عارفين الفرق شنو بين جواز رجل الاعمال، و الجواز العادي؟
الفرق جواز رجل الاعمال به عدد اوراق اكثر، يمكن لأيّ مواطن إستخراجه بدفع مبلغ عشرة دولارات زيادة عن الجواز العادي..
هذا الجواز لا يعطي حامله افضلية، او يميّزه علي الآخرين، يعني يقيف في ذات الصف، و يدخل ذات الصالة، و يخرج بذات المخرج الذي يسلكه الجميع..
بتسافر كتير يعني تحتاج لجواز بصفحات اكثر علماً بأن صلاحية الجواز لعشر سنوات.
اما الجواز الدبلوماسي هو جواز وظيفي تنتهي صلاحيته عند إنتهاء التكليف بالوظيفة..
الجواز، و بطاقة التعريف الشخصية، و رخصة القيادة تقدمها الدولة كخدمات بسعر تكلفتها، بل تُقدم بأسعار اقل للأطفال، و المعاقين، و الام العزباء.
يعني مافي دولة محترمة بتتكسب من الخدمات التي تقدمها لشعبها..
هاكم دي..
بعد غياب لما يُقارب الربع قرن من الزمان دخلت الجامع الكبير لأداء صلاة الظهر، فوجدت الدخول الي الحمامات بالقروش، آيّ والله تدفع عشان تقضي حاجتك لو عايز تصلي في دولة المشروع الحماري.
العبد لله دفع نظام خاشي بحقي اول حمام لقيتو فاتح إنقشطة فيهو، لما بقيت مارق الراجل بتاع الكاشير قال لي يا ود العم انت استحميت و دفعت حق العادي..
قلت ليهو لا انا ما استحميت، الزول مُصر اني استحميت، و بدأ ينظر لي بسخرية، و قرف قائلاً خلاص اتخارج.. و بدأ يطنطن الواحد لو ما عندو ما يقول ما عندو في داعي للكضب..
في الوضاية بديت افضفض مع شاب .. قعد يطحك قال لي الاخو اول مرة تجي هنا.. رديت عليهو بسؤال، ندفع قروش في حمامات الجامع.. يا عمك و الله الكيزان لو قاعدين لحدي هسة كان بدفعونا بالركعة..
لو شايف سعر الجواز غالي بمبلغ 150 الف، تذكر إنه من إفتتح مصنعه عقار، و وزير ماليته فكي جبرين، و رئيسهم البرهان الصور لينا الاكل، و البلكونة، و البحر في العلمين، و شعبه بين جائع، و نازح، و لاجئ.
حسبي الله، و نعم الوكيل..
كسرة..
يحدثكم العبد لله حامل جواز سفر رجل اعمال امريكي Business تجد حسابي عامراً يوم الجمعة، في الإثنين لا تسكنه الفئران.
الكسرة دي يفهمها من يعيشون في الغرب، و امريكا بوجه الخصوص..
"والله نحن مع الطيور المابتعرف ليها خرطه ولا فى ايدها جواز سفر"
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة