*جماعة بل بس .. وجميع الذين يؤيدون إستمرار الحرب وإن أدى ذلك لحرق السودان يصفون كل من يخالفهم بـ(الخونة) !!.. *يحرضون وينفخون في نيران الحرب و(يبلبلون) ويلصقون تهمة الخيانة كما يريدون رغم أن غالبيتهم في مأمن من جحيمها وشرورها !!.. *يكوركوا ساي وقاعدين في الطراوة !!.. *التخوين عندهم لا يعنى سوى إقصاء كل من يختلف معهم في الحلول المطروحة لوقف المآسي الإنسانية التي تتسبب فيها هذه الحرب العبثية !!.. *ولأنهم يرون أنفسهم من الأصفياء والأخيار والأنقياء فلا مجال ولا (حلال) لتخوينهم مهما فعلوا ومهموا شطحوا ومهنا نطحوا !!.. *فإن تجرأت وسألتهم ليييييه رفضتوا إدانة غزو جيش دولة الجنوب لهجليج - وأيضاً عندما اعتدت قوات الجبهة الثورية على أبوكرشولا - ولييييه ما طلعتوا في (زحفة) كرامة أو ربطتوا للجهاد العمامة وقومتوا القيامة لقالوا لك بكل قوة عين : دي (سياسة) إنت ما بتعرفها وكنا منقسمين و(زعلانين) من البشير !!.. *والتخوين إنما يعني أيضاً وقوفك ضد مقولة (بل بث) !!.. *وهي فرمالة صادرة -.طبعاً - وحتماً من جهة معروفة لدى الجميع .. *فرمالة (مقدسة) غير قابلة للتغيير .. وغير قابلة للتراجع .. وغير قابلة للمناقشة !!.. *وبتعبير آخر هو رأي مطلق .. وحل مطلق وأي مخالفة له ليس إلا عصياناً مطلقاً وخيانة مطلقة وشراً مستطيراً مطلقاً .. *أو كما (قررت) جماعة (التيار التخويني العريض) !!.. *شن نسوي؟!.. *هي كدا !!.. *جماعة مستبدة وما شايفة غير نفسها وغير (مصلحتها) حتى وإن تفرتق السودان حتة حتة !!.. *والتخوين عندهم لا يختلف عن تهمة (التكفير) عندما يصرون على ممارسة (فنون) الإقصاء بأي وسيلة كانت !!.. *لازم تشيل شيلتك لو تجرأت وخالفتهم و(عاكستهم) ولم (تسايرهم) في تحقيق أغراضهم الدنيئة .. *فتهمة التخوين جاااااااهزة !!.. *ولغة التكفير بتلصيق الآيات والأحاديث جااااااااااهزة .. *وأيضاً لغة التهديد جااااااااهزة !!.. *التهديد بالويل و(الخابور) وعظائم الأمور .. وشوفوا حا نعمل ليكم شنو بعدما ننتهي من وسخ الجنجويد يا (كرور) !!.. *وحا نوريكم منو الطفى النور !!.. والخ..............!!!.. *بالله أكتر من العملتوه في 30 سنة حا تعملوا شنو تاني؟!.. *والوحيد (المعفي) أولاً وأخيراً من هذا التهديد هو (برهانهم) رغم قوله الصريح والوااااااضح بأنها حرب عبثية ولابد أن تتوقف !!.. *لا ولم ولن يتجرأوا على تخوينه أو يقولوا فيه بغم لأنه (درقتهم) وحامي حماهم .. ومزبط إنقلاب (قصرهم) .. ومقصقص أجنحة لجنة إزالة تمكينهم .. ومساعدهم الأول في العودة لأضواء البرطعة والقرضمة من جديد !!.. *وبعدين شنو البجاحة دي؟!.. *وسخ الجنجويد دا الجابو بالكوم منو؟!.. *وكمان عاوزين كل الشعب الفضل يطلع غصباً عنه ينضف الوسخ الصنعتوه بيدكم عشان تجوا تحكموا تاني وتأدبوه تاااااااني؟!.. *نحن أمام حالة من (الفلهمة) والعنجهية و(القرضمة) والأنا الكريهة التي لا تجدها إلا عند جماعة (الزارعنا غير الله اليجي يقلعنا) !!.. *ونحن أمام مسلك إستبدادي مقيت تأسس وتجذر و(تشيطن) وتعنتر بمفهوم (يا فيها يا أطفيها) !!.. *وأصحاب هذا المسلك الآحادي يريدونك مجرد (إضينة) يسوقوك معهم الحجل بالرجل .. *إضينة (معاهم) في أي شيء وأي شيء .. *أو تخالفهم الرأي وتصبح في نظرهم عميل وخائن وكافر وزول ساي وتستاهل الدهس بالزد واي !!.. *وهذا هو ذات (الشغل) الذي كان يطبقه الحجاج بن يوسف الثقفي ضد أي زول يقول أنا بفكر وبقرر براي !!.. *و *الله في ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست