تتصوروا بعد حلقة بيوت الاشباح مع دكتور سيد والتى كشف فيها عن محاولة امنجى اغتصاب رجل فوق ال٦٠ عاما لمدة يومين لم اتمكن من النوم براحه فقد اعادت لى هذه الحلقه المؤلمه ذكرى مؤلمه أخرى فقد كنا فى احد المدن الامريكيه و فى لجنة التجمع الوطنى الديمقراطى المعارض كان ذلك فى بداية التسعينات ومعانا زميل قال حيصل بعد كم يوم مناضل كان مقبوض فى بيوت الاشباح وزول بتاع اركان نقاش وحيولع اللجنه دى وحيكون فارس من فرسان التجمع وأظنكم توافقونى نضمه للجنه ووافقنا بالاجماع فالرجل مناضل وخريج بيوت الاشباح وهل هناك تاهيل يعلو على بيوت الاشباح وانتظرنا الرجل بفارغ الصبر والزمن داك وسائل التواصل ماكانت كده وكونه زول يجى من السودان ويجيب ليك الاخبار طازجه دا براه شيء كبير وكمان يكون سياسى دا اضافه اخرى ومناضل خريج بيوت الاشباح دا خلانا ننتظر على احر من الجمر وفى اجتماع قادم حضر الرجل المنتظر واستقبلناه بالشوق كله واللهفه سلم علينا وجلس وصمت صمت الاموات نظرت فى عيون الرجل كان منكسرا انكسار الدنيا دى كلها فى عيونه مطاطىء الراس لم ينطق بكلمه خلال الاجتماع الدهشه كادت تقتلنا كان يلفه حزن عميق عميق وبعد ان انتهينا من الاجتماع وخرج الرجل صحنا بصوت واحد دا شنو القلت متحدث وبتاع اركان النقاش وزولك الاجتماع كله ولا كلمه فرد زميلنا والله دا ما زولى البعرفه دا زول تانى خالص وانا ذاتى مندهش اكثر منكم ولكن زولنا وعد بانه سيتصل بالحزب ويعرف الحاصل شنو وهم فى حزب واحد بعد فتره عاد وقال اول حاجه الزول دا نطلعه من اللجنه وانا اتصلت بالحزب وقالوا الزول دا للاسف من الذين تم اغتصابهم فى بيوت الاشباح وتم تهديده بصور الاغتصاب واصبح عميلا لهم ويكتب تقارير وطلب منى الحزب الابتعاد منه تماما وبعدها اظن الرجل غادر سريعا المدينه لم نراه بعدها ولكن بقيت ذكرى هذا الرجل ذكرى مؤلمه ولم تبارح ذاكرتى ولم يزول المها عبر السنين والمؤلم اكثر ان واحد من هؤلاء الذين ارتكبوا الفظائع لم يعاقب ولم يسأله احد مجرد سؤال وكان لسان حال القحاته يقول للضحايا تستاهلوا !! وقد سال احدهم احد الضحايا ان كان من عذبوهم مازالوا يعملون فى الجهاز فرد عليه انهم ابتعثوا للخارج مكافاه لهم وعادوا وهم الآن قيادات فى الجهاز !! وياترى هذا هو السبب الذى جعل الجهاز يمنع برنامج بيوت الاشباح من التصوير داخل بيوت الاشباح ؟؟؟ والعجيب قرات ان محامى الطيب سيخه فتح بلاغ بأشانة السمعه فى مقدم برنامج بيوت الاشباح وماهذا الذى يحدث وهل سمحنا بذلك ؟؟!ونحن هل جنينا ام عقولنا نصاح ؟؟!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد الحسن محمد عثمان
فيس بوك
تويتر
انستقرام
يوتيوب
بنتيريست