كل الذين هم في عمري او حتى القريبين في السن من عمري .. عايشوا ازمة العيش عبر كل الحكومات بمختلف اشكالها والوانها ومع الاسف الازمة لا زالت لم تبارح مكانها ... تنقلت اليوم بالصدفة بين مدن الخرطوم الثلاث (ام درمان، الخرطوم،بحري) بسيارتي، وشاهدت ذات المنظر في المدن الثلاث، مواطنين ومواطنات واطفال يقفون في صفوف في هذا الجو الحار علهم يحظون ب 2 او 3 كيلو عيش يسدون بها رمقهم ويحشون به بطونهم الخاوية .. اقسم بالله المناظر هي ذاتا في المدن الثلاث. * ازمة غباء متوارث؟ مع الاسف نعم. * ازمة متوارثة؟ ايضا مع الاسف نعم
@ في حكومة نميري وقفت انا المدعو اللمين في صف عيش.
@ ايام سوار الدهب .. ايضا وقفت في صف عيش @ في الحكومة الديمقراطية المنتخبة برضو وقفت في عيش. @ زمن البشير وقفت ايضا في صف للعيش @ ايام حمدوك والبرهان ايضا وقفت في صف عيش.
اتخيل نميري والبشير شالوا من عمري 46 سنة 😆
الحكومات دي بكل وزرائها وعرابيها ومفكريها وبمختلف اشكالهم والوانهم الاثنية والعرقية والثقافية والفكرية غلبهم يلقوا حل لازمة العيش. اي والله ... غلبهم عديل كدا
مع انو العيش ياما سقط حكومات في البلد دي. معظم الحكومات .. نعم معظم وما عايز اقول كلها ما سعت السعي الكافي عشان تزرع قمح. الراجحي السعودي جانا وزرع وحصد وصدر كمان.
طيب البخليهو انجح هو .. والدكاترة والبروفات العندنا دي يفشلوا شنو؟
معظم الحكومات مسيطرة ومتحكمة في عملية شراء القمح .. والمزارع ما ببيع ليها.
لأنها ما دعمتو لا بسماد ولا موبة ولأنها بتحدد سقف يسمى السعر التأشيري الحكومة هي البتحددو المزارع بعد تعبه في الزراعة عايز احسن سعر. واثبتت التجارب انو السعر التأشير ما ياهو المناسب والمجزي ليهم.
يلا المزارع في النهاية عايز قروش وما بهمو باع لمنو او الاشترى منو.
لأنو بعد ما يبيع المزارع البسيط دا ما بلقى عيش يأكله لاولاده.
السؤال الحكومات دي كانت وما زالت بتشتري القمح ليه؟
عشان تحل بيهو مشكلة العيش طيب الحكومات دي محننة؟ ما تمشي تزرع هي بنفسها وتحصد وتطحن وتعمل عيش للمواطن.
قول ما عشان المواطن الغلبان دا.
عشان هي تحمي نفسها بدل الناس تطلع عليها مظاهرات.
البلد دي فيها (كمية) من خريجين الزراعة ما لاقيين شغل ذاتو.
ليه ما توظفهم وتدفع رواتبهم وتديهم نسب وحوافز من الانتاجية بغلبها مثلا؟ لا والله ما بغلبها لكن بلادة وسوء تفكير من المدنيين والعسكريين الحكموا البلد دي.
وليهم حق المصريين والشعوب العربية في الخليج يقولوا علينا كسلانين
لأنو الراجحي اثبت وبالدليل الذي لا يرقى اليه الشك
* انو حكامنا ديل على درجة كبيرة من الغباء. * واثبت اننا كسلانين حتى من التفكير والابداع والابتداع ناهيك عن العمل.
الحل شنو؟
انا دا العبد الفقير الى ربه لو بقيت مسؤول ليوم واحد بس لقمت بالاتي:
1. الاولوية في التعين لخريجي الزراعة ومكانهم الخلا والمزارع. 2. تحويل كل الافران من القطاع الخاص للقطاع العام وطوالي سوف اعين فيها عمال وموظفين يشتغلوا 3 ورديات كل وردية 8 ساعات.
ليه عام؟
ح اجاوب عليها
الحكومة تتحكم في سلعة القمح من سعره ولغاية شرائه وطحنه بل لغاية توزيعه على الافران.
كان في عساكر بجوا مع عربات الدقيق عشان يشرفوا على وصول حصص الدقيق للافران ...
طيب باقي ليها شنو من انها تكون قطاع عام ومرفق حكومي؟
ما فاضل الا انها تشرف على صناعة الرغيف في الافران ... والافران دي هي اساس الوباء لأنو لو صاحب الفرن باعه او عمل بيهو باسطة ومعجبنات وخبايز انت ما حيكون عندك خبر كحكومة ودا قاعد يحصل من بعض ضعاف النفوس.
3. اشجع المزارعين على زراعة القمح واشتريه منهم باسعار مجزية. 4. استورد افران آليه اسرع واجمل واكثر كفاءة من الشغل اليدوي دا.
لو حولته الافران لقطاع عام حتكون كل حكومة مالكة زمام امرها .. وما حيكون في تلاعب وبكدا ضمنته الافران شغالة 24 ساعة والعيش حيبقى متوفر.
اهدي هذه الافكار لمدني عباس مدني ولجميع الاهل والاصدقاء بالواق الواق واللعوتة سيتي (city).
كباسيل سريعة:
# لو لم تنجز الثورة الا الحرية وازاحة البشير عن الحكم لكفاها ذلك.
# لو لم تنجز الثورة غير رفع الدعم وتحرير سعر الصرف (غول الحكومات السابقة) لكفاها ذلك.
# نفسي زول يقول لي بعد 3 سنوات الانتقالية دي ما هو مصير حميدتي وقوات الدعم السريع.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الأمين البشاري
فيس بوك
تويتر
انستقرام
يوتيوب
بنتيريست