جلس مجموعة من أهالي حلة "دبة التكل" يتسامرون تحت ضوء القمر و قد كان محور النقاش حول حكومة قحت المستجدة "قحتيد21". 🤣السيناريو:- ▪️حامد ود العوض : اها يا الطريفي يا اخوي ات ود جاب السيد دة عينوه وزير ولائي والا وزير دولة و الا وزير عديييل كدة .. ▪الطريفي : عفو عفو يا ود العوض ود جاب السيد شنو الببعينوه وزير عديل علي الإيمان الجماعة المتحكرين فيها ديلك ما يدوهو فرقة .. لكن تعال جاي ارخي اضانك اللقولك شيتن بيناتنا الزويل دة مو كفاءة. ▪️حامد ود العوض : يعني من الكفاوات . ▪️الطريفي : ايا و الله . ▪يتدخل ود جار النبي : هلا هلا و الله يا الطريفي انت و معاك ود العوض اخر الزمن بقيتو مثقفين و كمان تعرفو الكفاوات . ▪الطريفي : عفو يا ود جار النبي الكفاوات ديل في زولا ما بعرفن . ▪ود جار النبي : اها كدي ورنا اياها . ▪الطريفي : الكفاوات دي يااالغبيان زي ما تقول كدي لمن الزول يكون متلقي حجج يقوموا يشغلوه بي شيتن كدي يكافو شره اها دي الكفاوات ، علي الطلاق مما يعينو اها السكتة الياها . ماك شايف الزويل داك مما مسك الوزارة ديل اها السكتة الياها. ▪ود جار النبي : يعني اسة الجماعة البشييييلو و يعينو فوقن كل مرة ديل يعني دايرين يكافو شرهم و الله يا الطريفي اخوي جبتلك خبر . ▪الطريفي : الجماعة الفاتو ديلك مو خربو البلد اسة جايبينلكم ناس موحوماد ود جاب السيد الكفاوات ديل عشان يعدلوها . ▪ود العوض : علي الطلاق ليهن أكثر من سنة يسوطوا و يلكو يعجنوا فيها و الله التكتحن ما قدروا عليها، كل شيء يهبشوه يقولوا اللخيان مكجرنهن و عاملن لهم فيه عمل . ▪ود جار النبي : الله يجازي محنك يا الطريفي والله ات حقو يسووك وزير في رئاسة الجمهورية .. ▪الطريفي : تضحك عليا يا ود جار النبي . ات قايلا كتيرة علي الله .. عليا الإيمان بكرة بعد بكرة كدي يجي تعديل وزاري أن ما شفتني متحكرلك في داك اللانكروزم و جايطلك البلد شرق وغرب و شمال و جنوب ما تقول لي الطريفي تاني.. انت قايل شغل الوزراء دة شنو .. مو لاندكروزم و صرف بنزين و ونسات و مكالمات بالتلفونات و تحويل الرسائل الليلات الواسطات و دة ما ظنيتو دايرلو قراية و الا شهادات .. ▪ود جار النبي : انت من زمن اللاندوكرزيوم الناس اطوروا . اها يا الطريفي كدي خلنا من الخبير اللليل ود جاب السيد دة ، دحين داك مو عباس ود بتول .... ▪الطريفي : ايا والله .. ((يصل عباس ود بتول)) ▪ود بتول : السلااام و عليكم . ▪ود جار النبي : عليكم السلام ▪ود بتول : الندخل في الموضوع طوالي ما في زمن ظنيتكم ماسمعتو بالخبير المالي البلد يا ود جار النبي . ▪ود جار النبي : شنو دة كمان اااالمسيخيت ظنيتك بقيت متل الطريفي تجيب الخبارات. ▪ود بتول : و الله أمس محيميد ود التاية وليدو الفي السعودية داك رسلو ديجيتال و قالك كدي و شغلو وأول ما بدا وجابلك الجزيرة الخبر اللولاني قرار تعيين ود جاب السيد وزير تختيت .. أيا والله سمع اضاني دي .. ▪ود جار النبي : هع هع هع .. دااابك سمعت بالخبر دة .. علي الحرام الطريفي جابو لينا اول امس بالواسطات .. ▪ود بتول : الطريفي مو زول محن .. أها شنو الواسطات دي كمان .. ▪ود جار النبي : ماك عارف الواسطات .. هع هع .. انت ماك متخلف ، دة شيتا كدي في التلفون البقولولو كدي (إشارة لمسح الاصبع للتلفون الذكي) .. و يجيبلك الخبر اللليل الوزراء و اللليل الحكومة و اللليل الحرب و اللليل الاجتماعات و اللليل أي شي .. والله الشي قبل ما يتم .. تسمع بو في الواسطات . والله قالوا الجماعة مجتمعين اجتماع سري الليل اللجنة اللت الخرابة ديك و اتشاكلوا .. برضو جابوهو في الواسطات .. ▪ود بتول : هوووووي يا ود جار النبي خلك في حدودك قبل ما يجو الجماعة يودرو اترك و يودرونا معاك .. الشي دة نفوه وقالو دي فبركة ساااكت. ▪ود جار النبي : والله الدنيا دي حتي ود بتول بقي يتكلم في السياسة حسي عليك الله فبركة دي شن معناه . ▪ود بتول : هع هع هع ماك عارف الفبركة .. الفبركة دي التبيخ .. يعني زي ماتقول كدة زي البامية المفروكة هع هع هع . ▪ود جار النبي : كدي خلنا من دة دحين داك مو ود الاعيسر . ▪ود بتول : اية و الله و جاي مسرع كدي زي الجايبلو خبر . ▪علي ود الفضل : تعال تعال ااازول .. شن الخبر . ▪محمد ود الاعيسر : ها ناس انتو متكسرين هني و ما جايبين خبر و فريق لا فوق جايط. ▪علي ود الفضل : شن الحاصل اااالمنحوس . ▪محمد ود الاعيسر : الناس عاملين مظاهرة و قالوا دايرين يتمردوا عدييل كدة و يشيلو السلاح . ▪علي ود الفضل : الله لا كسبك دة كلام شنو دة . ▪محمد ود الاعيسر : قالو كيييفن بالكيف يعينو من فريق لا تحت ود البصير وزير للموية و ما يعينو زول من فريق لا فوق .. ▪علي ود الفضل : عليك الله شوف الغبيانين ديل .. نآن الزويل دة مو من الكفاوات و خبرة اكثر من ٢٠ سنة شغال بي حمارتو دي و يشيل في الموية بالخُرج و يرحل لي ناس الحلة و يسقي فيهن علي الليمان أكان صدقتو سوهو وزير علا تاني مانشوفلنا زولا عطشان في الولاية دي وكمان يخدملك البلد كلها الزويل مو خبرة أكان للشهايد و الله شوف عيني دي خاتيها تحت السرج الليل حمارتو ،،، . ▪محمد ود الاعيسر : الناس قالوا مالن و مال البلد هم بس لازم واحد من اولادن يبقي وزير . ▪ود الشيخ : هوي يا جماعة و الله انا سمعت ابوي الشيخ قال اولتمبارح أجتمعوا مع المسعولين وقالوا خلاص المشكلة دي محلولة. ▪محمد ود الاعيسر : محلولة كيفن قول لنا عشان نمشي نبشرن . ▪ود الشيخ : والله ابوي الشيخ قال الجماعة المسعولين قالو في نظام أسموا نظام الترضيات يعني يرضو الجماعة ديل فحال ما يتمردوا و يشيلو السلاح يعني زي ماتقول كدي يعينوا ليهم ويحدا من فريق لا فوق وزير دولة أو معتمد برئاسة الولاية و يمشي يقولك كدي و يخت ايدو في المصحف و يحلف لهم القسم و يسلموهو ديك الفارهة و تاني مادايرين منو حاجة .. بعد كدي المشكلة تكون اتحلت . ▪ود العوض : اوعي يكون المصحف الليل الجماعة الفاتو . ▪ود الشيخ : لا لا ظنيتو ويحيدا قديييم كدي نكتو محيميد وليد محمد وليد العمدة من مخزن جدو قالو ان ختيت فوقوا يدك علي الإيمان تتكجرلك لا يوم القيامة عشان كدي تشتغل دغري . ▪الجماعة : الحمد لله .. عاش نظام الترضيات عاش نظام الترضيات وان شاء الله البلد تروح شمار في مرقة . ▪ود اللمين : اها خلونا من دة الخزين ود السرة داااك البحلهن منو شنو و كيفن يكافو شره .. ▪ود الشيخ : ايا و الله الخزين وليد السرة بت الله جابو من الكفاوات و كمان عندو ضهر و وراه قبيلة ، عشان كدة قالوا خلقولو وزارة جديدة تكون مسئولة من حل المشاكل من ضمن صلاحياتها تكون مسئولة من الدرداقات و اول شيء بدابو مشي فريق الضبيبينة باقي ابراهيم ود مساعد متكاجر مع النور ود العازة فوق الدرداقات و الحمد لله حل المشكلة . ▪ود اللمين : الحممممممد لله و كيفن حلوها ،، ▪ود الشيخ : و الله قالو يبنولن موقف اللِيل درداقات جنب السويق القديم و يكون مسعول منو ابراهيم ود مساعد و يبنولن ويحيدا تاني في طرف القويز اللافوق و يمسكوه النور ود العازة و كل واحد يلملم موارد السويق . بس قالولن اوعاكم من التجنيب ، و كدة يادار ما دخلك شر ،، ▪ود اللمين : عفيت منك ااالخزين ات من قمت ماك حلال المشاكل . حرم دة التختيت الاستراتيجي و الا بلاش ،، علا يا ود الشيخ المرة دي كمان جبتلنا شيتا جديد الموارد يعني شنو و التجنيب يعني شنو . ▪الطريفي : والله يا ود ريا انت اصلك ما بتفهم .. أسع الناس يجوطو كل يوم و يلوصو في التلفزيون و الرادي و التلفونات و الجرايد و يقولولكن الناس لهطوا الموارد و الكفاوات جاية ترجعلكم حقكم و توقف التجنيب حماية للمال العام و انت لسة ما فهمت حاجة .. ▪ود ريا : والله ساامع علا لكن والله ماني خابرن قاصدين شنو والله هن في وادي ونحن في وادي .. نحن دايرين الكسرة و الويكة دي تكون رخيصة وبس والله تاني ما دايرين منهم شي . ▪الطريفي : اها يا ود ريا اللشرحلك الموارد .. شايف الكويم الليل الزبالة القاعد هنوك الليل منو .. مش هيل الارباب .. اها دي زي ما تقول كدة دي الموارد .. و مش وليدو الفضل مرة مرة كدي بشيل منو و يدسدس قدام اللوضة التحتانية ديييك و ما بخبر ابوهو يعني زي ماتقول بالعربي كدي سرقة .. اهااا دة التجنيب البقصدوهو .. ▪️الطريفي : و الله يا ود ريا كلام كتر لامن زعلت حمد وليد ابنعوف شايفه يحدرلك ساااكت . ▪️ود ريا : اية و الله الزويل دة من قعدنا هنا ما نضم ، يلتفت إلي ود ابنعوف و يقول له يا خرابة انت مالك اتبكمت سمعت و الا جابو ليك . ▪️حمد ود ابنعوف : و الله يا ود ريا اخوي ماني زعلان منك علا محتار و ظنيت حيرتي دي ما بفكها علا الطريفي دة شايفو بقي بفهم في السياسة أكثر من العمدة ذاتو. ▪️ود ريا : اها مالك عاد . ▪️حمد ود ابنعوف : الموضوع المحيرني انا لي كم يوم كدة بمشي بيت ناس محيميد ود التاية باقي عندو الديجيتال و اسمعلك الناس يلغلغو الحيكومة الحيكومة و قالوا غيروها عشان فشلت و ما نجحت في اي شيء . ▪️ود ريا : اها المحيرك شنو من قمنا في البلد كل مرة تجي حكومة و تفشل و يغيروها لها الجديد شنو . حمد ود ابنعوف: الشي المعروف الزول الفاشل بمشوه علا الجديد هنا يا ود ريا النويسين القالو فشلو ديل تاااني عينوهم مستشارين . دة المحيرني و ما قادر افهمه!! الطريفي : هع هع هع . انتو طبعا الحاجات دي ماااابتفهموها. النويسين الكانو وزراء ديل مش ما قدروا يعملوا حاجة للمواطن .. يعني فشلوا . ود ريا : ايا و الله فشل شديد الطريفي: اهااااا . طبعا بي فشلن الكتير دة بقوا كفوات عشان كدي من وزراء عينوهم مستشارين للرئيس و لم الرئيس يدور يتخذ قرار بعرضو عليهم كمستشارين و هم بي خبرتهم كفاشلين يقوموا يقدمو للرئيس الاستشارة يعني يقولو ليه قرارك دة ما مناسب و ذلك بحكم خبرتنا في الفشل او العكس صحيح . ▪️حمد ود ابنعوف: الله يجازي محنك ياااا الطريفي باقي انت ماك زول محن .. زمان ما قتلك حقو يعينوك وزير .. اسة عليك الله هم اخير منك بي شنو علي الطلاق يعينوك وزير علا تبشتنا ليهم جنس بشتنة ..هي مش الشغلانة بشتنة والا شيتا آخر ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
صلاح الدين حمزة
فيس بوك
تويتر
انستقرام
يوتيوب
بنتيريست