ناس كم و 90 الما قبلوهم في التقديم للجامعات ومعاكم امهاتكم البكي والعويل في شنو؟ مش انتوا السبب؟
# ما قبلوك لأنو في ناس جايبين اكتر منك واحسن من نسبتك دي وعشان كدا اتقبلوا وانت لا. # ما قبلوك لأنك ارتكبته اخطاء في التقديم وضيعته فرصتك بنفسك.
في الحقيقة قبيل كتبته كلام كتير في الموضوع دا وجاتني كم مكالمة كدا وطار قبل ما انشره، وبكتبوا تاني للتوعية.
اول حاجة بصراحة لا اشعر بأي عاطفة تجاه الناس الامس كانوا ببكوا هم وامهاتهم لأنهم هم نفسهم السبب في المأساة دي ان جازت التسمية (مأساة).
اول حاجة لازم الناس تفهمها انو ماف عملية في البلد دي وعلى مر العصور والحكومات انزه من القبول الجامعي وسوف احكي موقف للتاريخ حدث معي شخصيا سبق كتبت عنه في سودانيز اونلاين.
في بدايات حكم الانقاذ كانت عندي مشكلة في شهادة الميلاد تقريبا او حاجة زي كدا وكان باقي يومين على التقديم وينتهي الموظف قال لي خش للمدير.
خشيت مكتب المدير وكان اسمه محمد ابراهيم ولا منو كدا ما عارف
لقيت طالب بحكي في مشكلتو للمدير وكان معي كم طالب كنا عايزين نقدم للجامعات طبيعي ننتظر لغاية ما يخلص الناس القدامنا ... الاول دا خلص مشكلتو وكان في واحد قدامنا قام عايز يحكي مشكلتو للمدير الزول دا قبال ما يفتح خشمو طلع مذكرة من جيبو ومداها لمدير مكتب القبول.
المدير قرأ المذكرة ورجعها ليهو حتى ما احتفظ بيها وقال ليهو بالحرف (واقسم بالله الكلام دا انا مسؤول منو يوم القيامة وهي شهادة في حق الرجل).
المهم بعد رجع المذكرة قال ليهو: امشي قول للزول الكاتب ليك المذكرة دي هنا ما عندنا واسطات قدم ودرجاتك هي البدخلك.
ياخ هنا انا احترمته المدير جنس احترام ومن الحادثة دي وما قبلها من خلال متابعتنا مكتب القبول هو انزه مكان بالفعل في السودان.
طيب يا ناس 94 و 93 و 92
ما قبلوكم ليه؟
اسألوني تاني
اول حاجة التقديم دا فن واستراتبجات ما بيانات بتملاها بس لازم قبلها تضع اولوياتك عايز اقرأ طب مثلا
تمام. ما لقيت طب ح اقرأ طب اسنان
ما لقيت طب اسنان ح اقرأ صيدلة
وهكذا
في ترتيب تاني وهو ترتيب الجامعات والكليات بحسب الافضلية بالنسبة ليك
وفي ترتيب تالت وهو ترتيب المناطق ما قدرته اقرأ طب في العاصمة الخرطوم
ح اقدم
طب الجزيرة طب شندي طب وادي النيل بعني القريبة من الخرطوم
ما عايز تطلع من الخرطوم لأنك ما بتقدر تفارق ماما.
طيب يا الفالح قدم طب في الجامعات الخاصة وخليك جنب ماما في الخرطوم.
دي ناحية
الحاجة التانية الما عملتها لا انت ولا ابوك ولا امك الكانت بتعزي وتبكي معاك في الوقفة الاحتجاجية
مستصحب كلامي الفوق داك كلو
لما اجي اقدم وبعد ما تكون ظبطته الفوق ديل ... بقدم ال 30 او ال 45 رغبة التي اتاحهم لي السيستم او النظام
ليه وكيف؟
برضو بستصحب كل الكلام الفوق دا
وبقدم كالتالي
10 رغبات اعلى من نسبتك عشان لو النسبة حقتهم قلت تخش الكلية الانت عايزها بالمزيكا.
10 رغبات في حدود نسبتك وتركز على ديل شديد لانك احتمال كبير ما تجلي منهم
10 رغبات اقل من نسبتك ... وديل احتياطي عشان ما تجي انت وماما وتملونا فقر وبكا زي ما حصل.
القبول الان يتم اليا لانو بيانات التقديم موجودة في داتابيز والكمبيوتر او السيستم هو البقوم بالفرز بدون تدخل بشري ... عشان ما تقولوا الكمبيوتر قاصدنا وعاك وعييك زي ما حصل.
اتحدى اي زول ما اتقبل يكون عمل كدا.
ما قبلوك لأنك انت وامك وابوك شايفين ال 94 وال 93 دي كتيرة وبدخل طب وقمته اتجاهلته الشغل المنظم والمرتب والمحكم دا.
انا متأكد كتير منكم اكتفوا بال 10 رغبات الاولى لغاية ما السيستم عمل معاك اخضر في الخطوة الرابعة وقلته كدا خلاص انا قدمته.
اي ما الولد ولا البنت جايبه فوق ال 90
الحاجة الما بتغالطوا في عنزتان انك ارتكبت اخطاء في التقديم وما حسبته حساب الموقف الانت فيهو الان.
اي زول يستهون بعملية التقديم ممكن يدفع تمن الخطأ دا .. ويقعد يجوعر هو وامه.
حاجة اخيرة بتخدع الطلاب واولياء الامور
# نسب الدخول حقت السنة الفاتت مجرد مؤشر عشان تستعين بيهو وترب رغبات وما حاجة قاطعة عشان تعتمد عليها مليون في المية.
# نسبة النجاح متدنية ... ودي ما تعتمد عليها ايضا.
ممكن نسبة النجاح تكون 60 %
بس في 30% جايبين درجات عليا، وديل كلهم عايزين كليتك وجامعتك الانت عايزها
من 90 وفوق
فائدة خطة
10 فوق 10 وسط 10 تحت
انك ما تجلي من التقديم ابدا ... لانو لو جليت معناها اتازلت بطوعك واختيارك لطالب عشان ياخد محلك في الخطة B وهي ال 10 حقت الوسط او ال 10 التحت الاخيرات.
وعشان ابرهن ليكم
في ناس اتقبلت طب في الجامعات الولائية لأنكم ما قدمتوها ونسبتهم اقل من نسبتكم. دي. وفي ناس اتقبلت طب اسنان ونسبتهم اقل منكم لأنكم ما قدمتوها.
طيب الكليات السيستم اختار ليها الناس القدموا ليها واتملت خلاص وتاني ماف زول بقدر يطلعوا هو وبدخلك انت.
الشاهد انو انتوا السبب في عدم قبولكم بالجامعات بالرغم من نسبكم الكبيرة دي .. لذلك لوموا انفسكم فقط ولا احد سواها.
واخيرا
* ماف عملية fair اكتر من عملية القبول دي لأنها تتم اليا حتى دون النظر الى اسمك. * اي صحيح انت متميز واي حاجة بس في ناس اكتر تميز منك.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الأمين البشاري
فيس بوك
تويتر
انستقرام
يوتيوب
بنتيريست