*ما أن تضيق حلقات (الظروف) التي نعيشها وتزداد (زنقة) يوماً بعد يوم حتى نلجأ كعادتنا للتشبث بحبل (ياريت) .. و(لو) .. والأماني السندسية (الفرايحية( !!.. *وياريت لو السودان دا ما كان واقع بين جيران بتاعين مشاكل .. وجيران عاملين فيها (باشوات) ومستهبلين و(أنانيين) .. و جيران (إيقاد) بيجي منهم (الجراد) .. وجيران (جاعانين) .. وجيران يجوا (يشتغلوا) عندنا (شحادين) !!.. *وجيران منه العوض وإليه العوض !!.. *وياريت بلدنا ذاتها لو ما كان إسمها (السودان) !!.. *بالله من عدم الأسامي؟!.. *(مسودنها) علينا ليييييه؟!.. *(النيلين) مالها؟!.. *موش في مملكة اسمها (البحرين)؟!.. *أو يقولوا (الأنهار) .. *أو (الخيرات) .. *أو (الأمجاد) .. *وأين عبقريات و(تجليات) الأدباء و(المثقفاتية) وإبداعات أمثال الدكتور الأديب الأريب محمد صالح الذي أجده في أي فاعلية بتاعة كورونا أمامي .. وأيضاً الشاعر (التقني) الفذ (رامي)؟!.. *المهم شوفوا لنا أي إسم مناسب غير السودان .. وياريت لو عملتنا كانت أي (حاجة) غير الجنيه !!.. *إمكن حال إقتصادنا يكون أحسن من كدا !!.. *وإمكن الدولار يكون داقي الدلجة !!.. *وإمكن نكون برة خط الفقر .. وجوة خط هيثرو .. وبرة تحت خط الفقر .. وسعيدين طول العمر !!.. *يا ريت لو الخبراء و(العناقلة) والجهابذة والعباقرة اللي (متشعبطين) في كل المجالات المهمة تركوا عادة (النقة) الكثيرة وتفرغوا فقط للعمل !!.. *ويا ريت ما يجي كل يوم واحد عامل لينا فيها خبير استراتيجي وخبير سياسي وخبير اقتصادي (يمعطنا) في القنوات .. ويا ريت لو بيعرفوا يشتغلوا !!.. *يا ريت لو نمنا وصحينا ولقينا كل الأحزاب والحركات المسلحة والتنظيمات السياسية (الكتييييييرة) في خبر كان !!.. *ياريت لو لقينا وزير مالية يقدر يحدد لنا الخطط أو البرامج اللي شغال بيها !!. *ووزير صحة يقول لنا هو قاعد بيعمل في شنو بالضبط !!.. *ومدير وزارة صحة لا يتم تغييره (6) مرات في سنتين !!.. *ويا ريت لو عندنا وزير شؤون دينية وأوقاف ما ماسكاهو (أم فريحينة) !!.. *وياريت لو خلينا الندم والتحسر على إنشاء سد مروي اللي اتعمل بالقروض الربوية ودخل علينا بالساحق والماحق .. واتجهنا بدلاً عنه للإستفادة من الطاقة الشمسية .. *و ياريت لو تم إنشاء نيابة تابعة للمراجع العام لها كافة الصلاحيات في القبض على أي (حرامي) يمد يده للإختلاس أو (شفط) المال العام مع وضع أقسى العقوبات التي تساعد على الحد من هذه المهازل (المستمرة) !!.. *يا ريت لو كل الشعب السوداني البطل وقف وقفة رجل واحد لرفض وجود أي متسلق ما حا ينجز في الحكومة الجاية .. *ويا ريت لو توقفنا عن البكاء على اللبن المسكوب و(شدينا حيلنا) لبناء المستقبل .. يا ريت لو خلينا تكوين اللجان (الكتيرة) التي لم تفلح في معالجة مشاكلنا (الخطيرة)...!! *ياريت لو ما كتبت العمود دا لأن تقليب المواجع يهيج (البواسير) !!.. و الصداااااااع .. وربما (نتفنقل) بسبب التفكير الكتيييييير من (السرير) !!.. *و *الله في ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست