طير الرهو الاغنية الخالدة لآخر ضحايا الكرونا من اعلام بلادي الفنان حمد الريح عليه وابل و عاطر الرحمات كلمات الاغنية: والله والله يا طير الرهو قسماً عديل ما فيهو لو دمع الحبايب زي دموع السارية في وادي البعيد وتسوي شو والله يا طير الرهو ما كت مصدق إني بلقاك يا رهو أشكو ليك من جور زماني كيف رماني شوف وراك شوف الزمن كيفن بسو حتى باقي الزاد كمل والليل طويل طولاً غريب ما فيهو ضو والريح تنوح فوق الدروب وا خوفي من صوت الرياح وكتين (وقتين )تنوح وتسوي اوو زيك غريب والغربة طالت يا مسيكين مثلي يا طير الرهو التراب ملّينا عيشتو وأريتني زيك كل يوم يحضني جو في بحور الريد نسافر والمراكب كاسحة ما دام ريحنا نو يا سلام لمن نسالم نبقى شوق طير طائر معربد يستحيل شلال عواطف في قليب عاشق مغرد زي تميراً في الشمال لمن يفيض النيل يفرهد تنتشي الدنيا وتزعرد والنسيمة الحلوة تسبقنا وتنقر بابنا كو يا سلام يا سلام يا سلام ،،،،،،، يا سلام ساكت؟ تنسب الاغنية للشاعر اسماعيل حسن وقد كتبت في سبعينيات القرن الماضي و قال بعضهم ان الشاعر الحقيقي للاغنية كان الشريف زين العابدين الهندي واردفوا بان الشريف بث بها اشواقه و تقديره عبر الاثير لشقيقه الشريف حسين الهندي الذي كان يقود المعارضة ضد دكتاتورية الجنرال جعفر النميري ولا اعرف الحقيقة حول الامر فالكل قد اجتمع شملهم في دار البقاء وان كان الراحل الشريف زين العابدين الهندي قد اخبرني بالقاهرة تسعينيات القرن الماضي بان له الكثير من اغاني الاخوانيات مع غيره من الشعراء فضلا عن غيرها من الاغاني التي كانت كلها له ونسبت لشعراء اخرين ولم يعترض هو علي سرقة بنات الهامه! وساله ذات مرة الكاتب الصحفي و الاعلامي احمد البلال الطيب في حوار تلفزيوني عن اغانيه التي تنسب الي غيره فاقر بذلك و رفض الاشارة المباشرة الي تلك الاغاني ،،،،،،، رحم الله حمد الريّح رحمة واسعة واليكم طير الرهو التي قيل انها كانت اثيرة جدا عند زعيم الحزب الاتحادي الديمقراطي الراحل الشريف حسين الهندي:-
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الشيخ الحسين
فيس بوك
تويتر
انستقرام
يوتيوب
بنتيريست