الدقيق المدعوم نصفه يذهب الي جيوب اصحاب المخابز !!!!!! كلما يُرفع السعر يطمع اصحاب المخابز في زيادة جديدة، العالم كلها سعرت! اي زول عايز يغني بسرعة!!
قبل عدة اشهر كانت حاجات الفول في السوق يبعن كيس الدكوة بعشرة جنيهات تقريبا ده اول موجة كرونا الاولي كنت اشتري الدكوة يوميا، في يوم من الايام ست الدكوة قالت مافي بي عشرة قلت لها امس اشتريت بي عشرة؟ مشيت خليتا واحدة تانية برضو قالت بي عشرة ماف الثالثة والرابعة!!!!!! ها ها ها ها ها تراهن اتفقن علي سعر جديد!! اذا كان ديل ستات الدكوة وفي سوق طويل عريض نسقن امورن وزادن السعر وتمترسن علي ذلك طبعا واحد ممكن يقول سعر الفول زاد ........الخ القضية ليست كذلك
انا ضربت مثل بي ستات الفول لانو كوز اقتصادي معروف- الله يسامحو كان يضرب بهن المثل، كان بقول "ست الفول بتظبط ميزانيتها" الرجل كان لا يعرف غير سياسة التحرير معني كلامو انو كلما يحصل زيادات وتضخم اي زول يرفع سلعتو الخدرجي الجزار الدكتور سيد اللبن السباك بتاع الحافلة.. اي زول يرفع ف.. فما بالك باصحاب المخابز الجماعة ديل عندهم غرفة عديل وشغالة اعلام بس اول ما يضمنو الزيادة حصلت ادوها يومين تلاتة ويبدو يصرحوا في الاعلام: غرفة المخابز تحذر.. غرفة المخابز .... الغاز... غرفة المخابز .... الخميرة... غرفة المخابز ..... الزيت... غرفة المخابز ..... الكمية غرفة المخابز ..... اجور العمال غرفة المخابز ..... وكمان قال بعملو اضراب ياخي المفروض قبل ما تعملو اضراب ما تستلموا الدقيق
القلناهو ده غير ال... بتاعة ناس الافران ذاتم: الليلة ما شغالين الدقيق في لكن زيت ما عندنا الكهربا قاطعة الغاز بسيط العجان عيان ...الخ
ده غير انو اليومين دي الرغيف بطلعوه زي وشهم شي محرق ..وشي ني .. والحجم حدث ولا حرج وما برجّعو ولا رغيفة يقولو ليك هو في؟ كان ما دايرو خليو.. وحاجات تاني ما ليها اول ولا آخر
المهم اوجه حديثي لسيادتو البرهان: ملف الخبز ده مفخخ مسببات الازمة التي يسوقونها كلها غير حقيقية مشكلة الخبز ليس في الدقيق ولا التوزيع ولا حجم الدعم ولا ..ولا.. الناس ديل ما يدخّلوك في متاهة هل تصدق ان اصحاب المخابز يطالبون بزيادة سعر الدقيق!! يعني زيدو لينا سعره وزيدو لينا سعر الرغيفة!!! يعني زيما زدتو البنزين وزدتو المواصلات المشكلة هي الجــــــــــــــــــــــــــــــــشـــــــــــــــــــــــــــــع يعني والله .... ما في زول بِرتا لي زول سعر دقيق الذرة بزيد تلقائيا مع اي زيادة للقمح!! يعني لو ربع القمح بقي بي مليار سعر الذرة ببقي بي مليار!! عشان كدة بقت المرأة تقيف ثلاثة واربعة ساعات لخمسة وعشرين رغيفة لا تكفي لخمسة انفار كان ممكن الواحدة في نص ساعة تعمل ليها عصيدة او قراصة لكن المشكلة في التكلفة
الحل الوحيد هو ان يوزع الدقيق المدعوم مباشرة كدقيق للشعب يعني الدقيق الدايرين تدعمونا بيهو.. ما دايرنو رغيف.... نهائي ادونا ليهو دقيق بس نعملو فطير؟ نعملو قراصة؟ نعملو عصيدة؟ سيادتك بدون مؤاخذة ان شاء الله نسفّو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد سمنّور
فيس بوك
تويتر
انستقرام
يوتيوب
بنتيريست