منقووول ------- الليله طلعت من الشغل بدري شويه الحقيقه اني مشيت الشغل بس عشان اصرف المرتب وطلعت طوالي لاني مفروض امشي لصاحبي في اللفه... صاحبي دا مورد بتاع ملابس ولعب أطفال عندو محل في مجمع الرشيد اكيد ناس الكلاكله بعرفوهو.. المهم اني كنت ماشي اعزيهو في خالتو اتوفت وانا م قدرت امشي العزاء لانو العزاء كان في البلد واستنيتو لمن جا...بعد م قابلتو وشلت معاهو الفاتحه قال لي ارح اعزمك جبنه عند حاجه أمنه عندها جبنه ظابطه ونحنا طالعين من المحل لقينا عمك كبير شايل مجموعه من السبح وطواقي داخل المحل المقاصد لمحلات صحبي..لاحظنا الراجل في المحل قام بزعل وبقي يدفر في عمك بطريقه همجيه لمن عمك وقع قدامنا والسبح والطواقي وقعت من ايدو .. جطنا مع الراجل ووقفنا عمك وقلنا ليهو تمشي معانا تشرب جبنه ولمن قعدنا وطلبنا الجبنه سألنا عمك : يا حاج انت عمرك كم سنه قال لينا ٥٧ سنه قلنا ليهو يا حاج انت ليه بتبيع الحاجات الشايله دي وتاعب نفسك م عندك اولاد.. قال لينا انا الله م رزقني بالجنا ومرتي عيانه عندها ضغط وسكري لازم اشتغل عشان علاجاتها.. سألناهو انت ساكن وين قال لينا ساكن الجبل دار السلام صاحبي قال ليهو بعد نشرب الجبنه ح نوصلك البيت يا حاج وفعلا مشينا البيت.. الراجل بيتو عباره عن بيت طين (جالوص) واوضه(غرفه) فيها سريرين بدون مراتب والحوش فيهو زير في ضل الاوضه وقدام الاوضه كانون وحله وبراد شاي.. الراجل أصر نشرب شاي زوجتو عملت الشاي شربنا الشاي وكان شاي ماشاء الله ظابط.. صاحبي استاذن من عمك قال ليهو نحن عندنا مشوار ح نمشي ولمن نكون راجعين ح نغشاك تاني ولمن طلعنا صاحبي قال لي معاك قروش قلت ليهو على حظك انا صارف الليله قال لي تمام سلفني مبلغ كذا عندك قلت ليهو موجود قال لي اركب مشينا سوق الجبل صاحبي دخل محل اثاثات اشتري سريرين ومرتبتين ومشى محل الملايات اشتري ٨ ملايات ومشى اشتري بتجاز وانبوبه وتلفزيون ومروحه استاند وبطانيتين وبعد داك مشي اشتري لحمه وخضار وفواكه ومواد تموينيه زيت ودقيق ورز ومكرونه وأجر بتاع ركشه رفع ليهو السراير والمراتب وقال ليهو امشي ورانا وشال باقي الحاجات معانا في العربيه ورجع بينا لبيت عمك.. نزل الحاجات وعمك م مصدق وبتاع الركشه جا نزل السراير والمراتب عمك لمن بقى يبكي ويدعى ربنا يخليكم ومن العبره م قادر يتكلم بعد نزلنا الحاجات صاحبي قال لي عمك يلا ودعناك الله وبنجيك ان شاء الله في اللحظه ديك زوجتو جات قالت لينا يا أولادي نحن م بنقدر على جزاكم بس يوم نلاقي ربنا يوم القيامه ح اقيف قدامو واقول ليهو انكم سترتونا في الدنيا يارب استرهم في الاخره ودعت لينا بدعاء انا م سمعتو قبل كدا.. صاحبي طلب روشتات الدواء وقال ليها تاني الدواء بصلك للبيت ومشينا.. انا قلت لصاحبي ياخ انت انسان بمعنى الكلمه ربنا يجزيك خير.. قال لي الناس بالناس وسكت.. صاحبي دا الليله كان عندو مقابله مع الدكتور عندو بتو عندها حصوه ومحتاجه عمليه والليله ح يعمل ليها فحوصات شامله عشان العمليه... سبحان الله اتصل على الان وقبل م اكتب الكلام دا قال مشي عمل فحوصات لقو انو الحصوه نزلت براها والبت م محتاجه عمليه بس شويه ادويه وخلاص... قال لي والله م صدقت لدرجه اني مشيت كررت التحليل في معمل تاني وطلع برضو مافي حصوه.. والله بتكلم معاي وببكي قال لي دي دعوه عمك ومرتو والله انا بكره بودي ليهم تلاجه وغساله... انا بكتب البوست وجواي احساس م بتوصف.. يا سبحان الله نفسي كلكم تحكو القصه دي لأي زول بتعرفوهو وتشيروها وتشاركوها في صفحاتكم.. خلو بالكم من الناس الغلابه.. التعليق : مثل هؤلاء الاخيار مفروض هم الذين يحكمون الوطن بدلا عن العطالي والحركات وسماسرة السياسة ومن لف لفهم . يا سلااااااام . الباشا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
صلاح الباشا
فيس بوك
تويتر
انستقرام
يوتيوب
بنتيريست