لاننا ليس كباقي الدول، فنظامنا الصحي شبه منهار، واليومين دي نقص فظيع في الادوية، يجب علي الدولة ومواطنيها توخي اقصي درجات الحذر، كورونا اصبحت واقع، خاصة عندنا في الخرطوم.
شئ آخر، نحن ايضا ليس كباقي الشعوب، فنحن عندنا حميمية وتقارب بالفطرة، يعني انو تلاقي زول ما تمد ليهو ايدك مشكلة، ونحن بناكل في صحن واحد، في المكتب وفي السوق وفي الجامعة، وبنشرب كلنا من جك واحد، والناس من مشاهدتنا ما بلبسوا كمامات، متوكلين ساكت.
العودة لا اظن انها يجب ان تكون كاملة، هو اصلا ما حتكون كاملة، لانو الناس بتكون في الاول خايفة، حيقولوا نشوف الناس الي بيمشوا حا يحصليهم شنو.
عودة كل العمال والموظفين جملة واحدة مشكلة كبيرة، حقو تكون الحكاية جزئية، يعني زي ما كانوا بقصروا دوام العمل ممكن يقلصوا ايام الاسبوع، يعني ما هو الناس كانت واقفة تماما، فبدل يرجعوا يوميا ممكن يكون يوم بعد يوم، يعني مثلا يقسموا المؤسسات علي مجموعتين، مؤسسات تجي الليلة، ومؤسسات تجي بكرة.
اما بالنسبة للاسواق وخاصة الاسواق الكبري، زي العربي، امدرمان، ليبيا، بحري، والله دي مشكلة كبيرة جدا جدا، لكن فترة الحظر دي ضرّت ناس كتيرين، لكن المشكلة والله اسواقنا دي حالتا مختلفة، يعني الناس بكونوا في السوق كأنهم في بيت واحد، انا شايف انو الاسواق دي يرجعوها ايام العطل فقط، يعني يوم الجمعة والسبت، وانا متأكد انو حا يبيعوا احسن من السبعة يوم، لانو الناس البجو كلهم بكونوا جايين يشتروا، يعني الناس البجيبهم الطريق والمواصلات حيكونا مافي، وفي نفس الوقت الراغبين حيتشجعوا، لانو الحركة بتكون اخف.
الله يستر غايتو لكن الناس يجب ان تتوخي الحذر، انحن الفينا مكفينا، الحكومة بالذات يجب ان تتحسب لكل هذه الاشياء، الحكومة يجب ان تقود الناس الي ما يحميهم، والله خير حافظا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد سمنّور
فيس بوك
تويتر
انستقرام
يوتيوب
بنتيريست