الشغل الماشي ده يا أهل السودان وأخص هنا الحكومة الانتقالية باحزابها وعساكرها والغير مهذبين؛ زمااان وحتي الآن عندنا مثل بقول: *إنقري من اكل تفاتيف، وجِيزة بِني مرة لفيف !
المليشيا الذي صنعة حكومات السودان المركزيه من زمن عبود وانتهاء هيكلتة بعمر بشير القاتل ٩٠%من قياداته من أبناء الشمال ..والشينة منكورة واستخدم فيها أبناء غرب السودان جنود....وعندما نقول شمال السودان ما يجينا واحد ناطي يقول لي انت عنصري ؛ أُقسم بالله انحنا من ربونا ما عرفنا العنصرية الا من أبناء النخب الشمالية ...هنا نقصد النخب اللهو أحزاب المركز والحكام المرو علي تاريخ السودان وليس أبناء الشمال بصفه عامة ،لاني عشت في الشمال أكثر من ١٢عام عندنا فيها اصدق الاصدقاء وفيها مواطنيين شرفاء ؛ ظل بما يسمي بالجيش السوداني يحارب الشعب السوداني فقط من جنوبة وغربة وشرقة وشمالة وكنت حاضر في قضية المناصير قوموهم بالقوة ولكن تم تعويضهم بقرية نموزجية شرق الدامر؛ وادوهم ٥٠٠جنية قُصاد كل شجرة تمرة حينها قروش كتيرة...لكن ما شفنا تعويض لمواطنيين تانيين في السودان ..بل تم سحقهم وقتلهم وحرقهم وحرقهم ظلماً وبهتاناً وتجبراً ،كما حرق الصادق المهدي قطار الضعين ، الي ان تم إنفصال جنوب السودان وحينها أكثر من ٩٨%من الشعب حزين ماعدا شلة الطيب مصطفي العنصري زبحو ثوراً بخروج العبيد من الشمال !!! وما كان في أصوات من أبناء النخب يدين ويستنكر هذا الوقح الا الشرفاء منهم ونعرفهم بالاسم حتي الان هم شرفاء! وبعدها ظل مليشيات الجيش تحارب أهل دارفور الكانو بسموهم أهل القرآن و اللوح والدواية؛ الشعار الامس داك نفس شعار اليوم بتاع كل البلد دارفور؛
إذاً لازم نشخص المرض عشان نبدأ في عمليه العلاج، ومرضنا في السودان معروف وباين لأي شخص سوداني عندو نخوه وطنية؛ وهو عدم تقبل الآخر....والسيطرة علي مفاصل الدولة في يد ناس معينيين منذو خروج المستعمر الي يومنا هذا ؛ في ذمتكم يا أحزاب الصفوة المركزية من سنة ٥٦الي يومنا هذا ماذا قدمتم لهامش السودان غير الخدعة بالدين والحروب المفتعله؟! إستخدمتو شعارات وهمية مثل فِيحِما كربنا *في سبيل ديننا ! طلعو لينا لا في حماية للرب ،ولا في سبيل للدين ،بل خدعة وتجارة للمأكلة بإستخدام المساكين والمتعاطفين دينياً. وعملتو بيهو خدمة إلزامية وقبضتو بيهو خِيرة شباب الوطن ...وبتذكر سنة ٩٦ أو ٩٧ جونا عساكر ديش في شمال دارفور محلية طويلة بالتحديد وكنت شاهد عيان ، طاردو الناس في السوق وقبضو منهم شباب لتدريبهم بالقوة وزجهم الي جنوب السودان عنوةً بدون مراعاة لظروف اسرهم وعندنا شباب حتي الآن ما رجعو لاسرهم؛ ديلك أحزاب اليمين الكيزاني النخبوي بقيادة الملعون العنصري الترابي الله لارحمه ،واليوم يتكرر شعارات وهمية من أحزاب اليسار الكيزاني النخبوي بافتعال الحروب في أطراف السودان وفي المناطق الذاقت مرارة وويلات الحرب ، ولماذا الحرب دائماً في إتجاهات معينه في السودان ؟؟! واذا صحيح عندنا مشاكل قبلية من قبل كما تدعون ،يبقي السؤال لماذا لم تقومو بوعينا وانتو في السلطة؟ واذ انحنا ما متعلمين ،يبقي انتو السبب في جهلنا وعدم تعلمنا في المدارس...إنتهزتونا بالعاطفة الدينية المن قمنا لقيناهو طريق جدودتنا وانتو علمّتو اولادكم في المدارس.
.وزماااان آل المهدي عندهم مقولة مشهورة بقولو لينا عيال مدارس ناركم حارس...وكانو جدودنا يتشائمون من قراية المدارس بسبب ذلك المقولة ! ومثال قريب ...عندي خالي الان موجود استاذ اللغة الانجليزية في واحد من الدول العربية من ٢٠٠٢ قال لي لأمن شالو جامعة الخرطوم تخصص لغة انجليزية ...جدي الله يرحمو كان عندو بهائم كتيرة ...وقال ليهو يا ابوي انا ماشي الجامعة ، داير مصاريف ، جدي قال ليهو انا زول بقراء قراية نصارة ماعندي ليهو قرش ...لكن لو تقراء قرآن بهائمي ده كلهم نبيعهم عشانك؟!!!! وفي الزمن داك الصادقة بوخة بقراء في إكسفورد في لندن بلد الخواجات زااااتو البقولو جدة حرر البلد منهم! ملحلوظة: في عمك كده ما بتذكر اسمو من نيالا. ..سنة ٢٠٠٣ قال لي : جدو قال ليهو زمااان كان هو من ضمن جنود المهدي ...ومشو وودوهو يحفر متر في أرض المهدي بمترين في الجنة داك ، كلكم عارفينو! آها عمك ده حفر ليهو متر واحد بس وتعب من الإرهاق، فقال للمهدي، سيدي المتر ده بكم في الجنه ؟ فقال له المهدي : المتر بمترين في الجنة، فعمك قال ليهو انا كفاني مترين ده بس في الجنه ! طوالي اليوم البعدو رجعو نيالا ...وفصلو من جيش المهدي ...لانه حيبقي ليهم خطر علي الجنود الباقين...... بنفس القدر امبارح جندتو حميدتي ضد اهلو في غرب السودان ...واستغليتو جهلو وعدم تعليمو الانتو السبب فيها ...وسميتو الضكران الخوف الكيزان ...وفي ناس قالو خالي حميدتي برضو ...ولامن سلمكم السلطة دايرين ترجعو لنفس المربع ...لكن هو بقي ليكم عضم حوت ...وبقيتو تضربو في ضهرو ليل ونهار عشان يزهج ويطلع من المشهد ! وما بتقدرو تواجهو لأنكم جبناء ودايرنو يحارب ليكم بالوكالة أو تفتنوه مع اهلو بسياساتكم النتنه!! وحميدتي ما اتضررتو منه اكتر من أبناء الهامش وكله انتو السبب !! وما شفنا هجوم علي البرهان اطلاقاً مع انه هو الرئيس الفعلي الآن...فالمفروض أي حاجة يحصل تهاجمو البرهان لانو التعليمات بيجي منه ! لذلك يجب علي جميع أحزاب المركز أن يفهمو انو السودان ده تاني ما بِتحكم ليكم زي زمان ...واذا لسي عندكم العشم كمان خليكم في طريقكم الماشين فيهو ده، ما تغيرو لأمن الفأس يقع في الرأس...والموت يكون بالجملة داخل الخرطوم وخارجة وتزِح زول ميت من الشارع عشان تمشي ! #حرب شين ما تفتشو# #سلام حِلو أبحثو عنة مهما يكلف#
ياسر زُرقة 14/5/2020
On Thu, 7 May 2020, 11:12 yasir adam, wrote: بكري صباح الخير ده مقال مواصلة لقضية شوتايم ...لو سمحت نزلو لي يا حبوب ....ما قدرت نصبر للثلاثاء لانو الامور استعصي. شكراً
مرفق صورة للكاتب ياسر زُرقة
تفاصيل إستهداف الناشط الإعلامي شوتايم من قِبل أحزاب المركز العنصرية! (قحت)
رقم (٢) الجميع شاهد ما حصل ويحصل الآن للناشط شوتايم من صور مؤلمة وإستخدامة للمخدرات بواسطة الحقن !
مواصلةً للحديث الذي دار بيني وبين الأخ شوتايم قدُومياً صورة وصوت ، تم استهدافه من قبل ٦ أشهر عندما حس القحاته بأن هذا الغرباوي الشين كما يقولون له سراً وجهراً؛ والذي لا يجيد التحدث بالعربية ، لا يمكن أن يكون إعلامياً للثورة التي مات فيها شهداء من كل أبناء الوطن الحبيب، والثورة التي اطلقو فيها الشعارات الوطنية المزيفة ومنها: يا عنصري ومغرور ****كل البلد دارفور
ما بنرجع ما بنتغشا *** ما لم يتحاسب بشة يتحاسب بشة ونائبو***وعلي عثمان وكتايبو وجهاز الامن ونافع ***السرقو دم الشافع
حينها صدق أبناء الهامش بطيبتهم وقلوبهم النظيفة...وجاؤ من كل ولايات السودان مُستخدمون البصات والقطارات لمؤازرة إخوانهم في الخرطوم ، الي ان تم إعلان إزالة البشير وحفظ رأسة في مكان آمن!!!!!
وما شفنا كل البلد دارفور ،ولا إتحاكم البشير ولا نائبه، ولا علي عثمان وكتائبه، ولا جهاز الأمن ولا نافع !!!
ولكن خاب ظنهم وبدأ التخوين ومحاكمةالثوار الشرفاء الغير محزبين وتلفيق تُهم كيدية غير مبررة لسجنهم كما حصل لدسيس مان، ومحاولة إغتيالات غير ناجحة كما حصل للثائر شوتايم وكثير من الثوار ...
وايضاً تم سرقة 45 ألف جنية سوداني من مكان إقامة الأخ شوتايم بواسطة صديقة السيء السمعة المدعو خالد (راسطه) الذي قام بتخديره بواسطة مخدرات الحقن وحبوب منومة في عصير، وعندما صِحي شوتايم من النوم العميق، لم يجد نقودة فسرعان ما ناول هاتفه واتصل بصديقه السيء ..وسأله عن المبلغ المفقود ،و الذي بدوره أنكر و وصف الاخ شوتايم بالمجنون و قال له ( انت مجنون ولا شنو يا زول!) بلغتنا السودانية المعروفة . عندها رد له شوتايم انا ما مجنون، ولكن لماذا تخرج وتخليني نايم وما تقفل الباب؟!!! وحينها أغلق صديقة السيء خالد راسطة هاتفه والي يومنا هذا لم يتصل به ولا يعرف اين مكانه ؟!! عندما تأكد تماماً لا انه لا يوجد شوتايم بعد هذا اليوم بسبب جعله مدمناً للمخدرات و لا قرشاً واحداً في جيبه !!! وكل هذا السيناريوهات تمت بواسطة أحزاب قحت العنصرية لأنهم يريدون اغتيال الأخ شوتايم بكل السبل بعد ان فشلوا في تصفيته جسديا عدة مرات ودهسة بالسيارة أكثر من مرة ..وأكثر من مرة تمت سرقة هواتفة و اجهزته من كمرات و أدوات تصوير؛ وربنا سترو من كل هذا المحاولات النتنه....اخيراً تم إستهدافة بواسطة صديقة وإعطائه المخدرات عبر السندويتشات والعصائر....! وايضاً قال لي ان واحد من قيادات قحت رفض ذكر إسمه، بعد ما إتأكد من انتهاء شوتايم وصحته ...رسل له باكِتاً عصير ماذا ومعه موية صافيه!!!!!!
أخيراً وليس اخراً شوتايم بقي مُستهدف من قِبل الكيزان وقحت !! شوتايم يحتاج لوقفة وطنيه شعبية بروح الثورة كما وقف هو في الثورة وكلنا كنا نحضر لايفاتو عبر قناة الجزيرة العربيه وقناة الحرة السودانية ...وكُنا نُشّيد بشجاعة هذا الفتي الأبنوسي الذي لم يبّخِل لنا بشجاعته وقضَي كل زمنه مع الثوار والثورة وقحت و تجمع المهنيين؛ وهو اخر ثوري خالف آراء قحت وتم إستهدافة لمعرفته بكثير من إجرام قحت وكيف تم بيع دم الشهداء وتبديله بمناصب واموال الشعب . ملحوظة: شايف في شباب كتااار شمتانين في مصيبة شوتايم ، والغريب كتار من أصدقائنا في أحزاب قحت وغيرهم غير حزبيين وخاصةً أبناء الهامش ...أي انت القاعد تقرا المقال ده ..انا قاصدك انت زاتك ما تفرح وتشمت في اخوك ...اقعد أشمت وكسر تلج لاحزاب البوخة والسنابل والبعثيين العراقين والناصريين المصريين لأمن يجي دورك في التهميش والتخوين، ولا ندري كيف يأتي السيناريو حقك ؟ وحينها يشمت فيك الناس ! ما تفرح يا كوز يا نتن ما ناسينك لكن انت اصلاً ميت وشبعان موت مافي زول شغال بيك ...تصرخ بس. ولا عذر لمن أُنذر شوف شغلك وبطل الفلقنة والكلكسة والتطبيل! أحزاب النخب لا تفيدك بشئ سوي الدونية والرزالة! إتخارج يا مان
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ياسر زرقة
فيس بوك
تويتر
انستقرام
يوتيوب
بنتيريست