ملكة حسين خوجلي على سقم الذوق عجائبية. فعلى أنى أعرف أنه صاحب مدرسة لا قاع لها في التسفل لكني شهد الله ما تصورته يشمت في قحت في نازلة الفيضان التي اطبقت ببراثنها على البلاد والعباد. قال في كلمة له: وخزة مليونية ادانة الفيضان (سري للغاية) علمت مصادرنا أن مركزية القحاتة دعت لمليونية ادانة الفيضان، واتهمت قيادات التجمع (الدولة العميقة) بانها تقف وراء استبداد النيل لاجهاض البنى التحتية لشعارات ديسمبر حسين خوجلي Not funny إغراء أن أصوب نصاً دينياً يحرم أو يستهجن شماتته كبير. وهذـا ما ظل ديدن معارضة الإنقاذ حيال خراقة نسائها ورجالها ونذالة طبعهم. فمتى أسفر الواحد منهم عن عاهة في الدين والخلق رموه بنص من الإسلام يخرجه من الملة. ولن يجدها حسين مني. فهو مسلم لا أملك لا أنا ولا غيري إخراجه من الملة. ولو فعلنا لزعمنا سلطاناً في الدين سوغ التكفير من الضفة الثانية. لن أيسر لها الهرب البسيط من قول الدين الثقيل. وكل إنسان الزمناه طائره في عنقه. سنتركه بدينه يلقى تحديات العصر ونلقاها مثله ونصون ديننا من دينه. حسين خوجلي مصاب بشيزوفرنيا من نوع ما. فلا أعرف من يحسن قعدات الفن ويتبتل في محرابها. تراه فيها كالمتنسك أو الموجد. ولكنه صفر الوجدان منهـا في إقليم السياسة. فالرجل الذي تكاد تراه يذوب في وهج الفن لا حدود لوقاحته في السياسة. فهو "لحن المساء" رقة وهو في "ألوان" التبلودية عواراً وسخفاً وتهتكاً. فلولا انفصام الشخصية قل لي بربك كيف عقد حسين واحدة من أميز اللقاءات التلفزيونية عن أدب الاستغاثة في تراثنا ثم تسنح له الفرصة ليستغيث لأمته من نازلة الفيضان فيسف. ففي البرنامج الـذي تجد رابطه أدناه عرض لمدحة معروفة لحاج الماحي استغاث بالصالحين لينجدوا الشايقية من تمساح جاسر أقلق مضجعهم. ثم توسع مع ضيفه في البرنامج حول استغاثة للشاعر عكير الدامر نهم الصالحين جملة ليبلي صديق له بشندي من داء وبيل ألم به. واعترف أنها من عيون الشعر. وحوت أدب الفروسية السودانية من جم. وليس مثل حسين من يفتتن بمثل هـذه القصيدة ويذيعها على الملأ. ولكنه متى أصاب أمته ضر كالذي يلهب سماءها ويُزبد بمائها خلا وفاضه من شعيرة الشفقة، وابتذل نفسه يصفي ثأرات ليس الوقت وقتها ولا المقام مقامها. متى استمعت للفيديو رغبت لك أيها القارئ أن تقف عند اللحظة الوحيدة التي ردد فيها حسين عبارة من القصيدة طرباً. كانت تلك حين قال الشاعر في وصف صديقه العليل: "عدو مالو". واستعجبت لمن هو خدن ماله الدولاري كحسين يطرب لنقيضة مؤكدة فيه. وهذه طبقة أخرى من طبقات انفصامه المركب. يا للطرب لمعان لا تتنزل في الوجدان لتشرق ثقافة. لم نضع من هين.
سلام وتحية يا دكتور عبد الله وشكرا على كشف تناقض حسين خوجلي. ـــــــــــــــــ ياسر ابو الكيلك علي 23. Juli 2013 ·
إستغاثة عكير الدامر في صديقه أحمد علي كمبال ود البيه..
يامن بي قميص يوسف نجد يعقوب يامن نج يونس منو مسح القوب أحمد اخو الضعاف البنحر ام عرقوب بدل سهرو بي نوم الهنا المرغوب تسلم من رقاد العلة يا المهيوب نسيم العافية ليك ياالحي كرامة يأوب تعيش يا البي خيانة الجارة ماك مريوب تعيش يا السنجك المثلت صبر ايوب ضو الهجعة للتايه غريب بتلفت اكسير الضرا الليهو الشوارع لفت باهل رزقو رحمان القلوب الخفت ايدو بشاير الطرفة أم بروقاً رفت عريس امات لبوس الهربست واتصفت الخير الدفر لبن البيوت الحفت عسل عيش الجوار زمن السنين الجفت مابحسبلها ان جات والله باكر قفت كوع الدندر الما بتنقطع زوارو بيتو تملي للبياع تلوح انوارو خريف كاجة الفتك نالو وضحك نوارو نعم الصاحبو ونعم السكن في جوارو عدو مالو اب سوالف كلو مخلوق دارو ماهل رزقو ساهل للبيدخل دارو طالع نجمو كوكب نور ادور في مدارو من برج الاسد جات عزتو ومقدارو بيوت ناساً مساكين في الفريق محشورة صاحبي صبح كفيلة وامسى صاحب الشورة سيرتو عطر مجالس بالبلاد منشورة عندنا يوم تطوف زي ليلة العاشورة صاحبي ولد ملوك بدري ختو الطولا نيران الترك متل الجبال ثبتولا الموت ام شرف متل الصقور عرضولا اتقسمولا ناس لاقوها ناس ربطولا دابي الكركر الضارب حُجار صفصافو مأمون بدخل الوكر البعيد لصافو قبلي الفنجري المرحوم نظم اوصافو خيبت شنبي لو قصرت في إنصافو سيف قطع الخلاف الانعدم حباسو وابل نعمة الجار البيرو يباسو ربنا اجعل العافية العظيمة لباسو بحر المنزلة البرحمة قوقا دباسو كريماً بالتحية يميل عليك اتعصر جنباً لو حرن قدر انطلق ريح صرصر زي علما الفلك في كل شي اتبصر في كل شي اتبصر ان جات هينة وان جات التقيلة منصر
بالقافات وبالصافات ونون والكوثر احمد يترفع واصحابو ما تتعثر ويا من عندك اصعب قاسية ما بتتعسر العفو فوقو ادلي ورضاك اتيسر رسول الله الامين البيك نباهي ونفخر الدايرونو بي جاهك اهون اسخر فيك الظن جميل النظرة ما بتتأخر المرض الاصاب احمد زبد اتبخر جود بي فضلك اللي كل شر بيزيل محمد يانبي الرحمة العطاهو جزيل يا المدحك إله القدرة في التنزيل كم لطفك جبر مكسور وداوة عزيل يا الشيخ القمر بي ابوك قمر الدين ياحسين ود حمد وأب شلة يا الزاهدين سبعة درو يا الفوق الصلاح راقدين لي صاحبي اب سوالف مرتع الواردين يا النقر الكبير وابواتك الصوفية يا رجال العزازة البينو المخفية ود ابو ضوة يا ابو نصيرة وب الالفية وجع احمد تكتلو شرارةً مطفية شمر يا اب شضيفة والعزيب اطبقو للحلفاية بي جنحان صقور استبقو المرض القلب لون اب سوالف صبغو دايركم دكاترة وليهو حراس تبقو ودحامد سريع التبه قوم بي سرعة عالج صاحبي لا حبوب لا مسوح لا جرعة ............................
ود فلاتي ليك إديا فاتحات شرعة هم بي همي يا البحر الطمح فوق ترعة شمر يا اب نجيعة الصيدو برعى مصرر إتلافا أب عروض آلامو ما تتكرر من قيد السرير احمد إقوم يتحرر تبقي زيارتي ليك حُكماً صدر واتقرر يا باقري ابو راعي الخريفين شمر قوم بي جارك اب شرفاً دهب متجمر رقاد احمد سهرني وخلي طرفي مِحّمِر بي جاهكم طعم لبن الضيوف ما يخمر ياود العسيلي المجلي نور وصلاح كاشف النية نية الشيخ بريقاً لاح اكرم لي صاحبي الكلو جود وفلاح زيل البيهو يا الموية وضوك سلاح توركي النور بدورنا نْرجع المخلوفة هم بي صاحبي احمد بهجة الوالوفة يا الجيلاني قمزة وفوق حصان مكلوفة يا ري الدوراويش العديدة أُلوفة مصباح القلوب فتحت قمرية مفتاح العقول الارشدت ذرية لي صاحبي العزيز يا ابو البشر ابو بشرية جودلنا بي دواك وبركتك المحرية ويا حمد الكبير واولادك الستاشر اتولو العلاج بيكم نهز نتباشر صاحبي ابو الكرام العمرو يوم ماكاشر اكسير الرفيق فارس أم القنا البتعاشر يا ابو النابشه كشاف البعيدة وغايبة يا بدر الدجى الحسنابي قمر الجابية غفرا الدامر الحارسنو متل الطابية احمد اجبدو من غابة الهموم الكابية ود أب خُف كبير السادة سافــل بربر الهادي المحيط السرو ما بتعبر قوم بي اولادك الأشارف صغير أو أكبر احمد خلو خاترو المنكسر اتجبر شيخ ادريس ولدو محمدين في العون زمم العِرفة يا حراس قلع سيدون صاحبي الطال محجز وانقلب في اللون اطيب بي سركم وفرحنا إملي الكون يا البوشاب معاكم كندمر اتحزمو نوم احمد سقد للغمدة فوقو اعزمو صاحباً في الشدايد ديمة وافر عزمو كم شاعراً خلافي انا فيهو حكم نظمو يا الغبش العلي الحركة بتتوا عجالة جامعين التلاتة صلاح وسر ورجالة كتوف احمد علي النار أم لهيب سارجالة يا اهل الكشف ما تطولهو مجالا يا سبق اوهيب للفزع شمرو واسرو لمو على السناهير بالكتوف انعصرو اكشفو على اب زنود الوافي حاتم عصرو زيلو البيهو بالنصر المبين انتصرو
شرف الدين ابو النجدة المقابل القيف وياحامد ولي الجبل اب عصاتاً سيف احمد ود علي الهايج ليالي الصيف تتم عافيتو نتهني ونتم الكيف ابو العوضية سلمان سلم المو واصل تور الكردة ياعلم الديانة الباسل صاحبي اسد معارك شكرو تحصيل حاصل اعملو بينو والمرض المطول فاصل وابونا الشيخ نعيم الأمن القيزان بطل موية المحاية الشدت العجزان بي سرك تفج من احمد الأحزان مرضو يفر يطير شيطان سمع آذان كوكب شندي نور الوادي يا الحفيان وشيخ التوم وبسبار سـافـل الرويان احمد ود علي الراقد عجز مليان بدور برهان صلاحكم فوقو ابقي عيان حسن ياود حسونة وبنده الحاج عطوة وياود القلوباوي الشهير بالخطوة انجدو صاحبي ورونا الصلاح والسطوة للمابصدقو السرياني اطلعو فتوة ويا الكباشي للحلفاية بسراع اقرب ألحق جارك احمد شوف نهارو المغرب الجار ليهو حق الشُفعة مابنستغرب يا الإسمك حجاب من الدبيب والعقرب الولي يا المقابل الجيلي شيخ الطيب الحوبة انتكت يا بالصلاح متطيب كم عالجت فاقد وكم رفعت مغيب احمد في مهمة وبيتو ليك قريب بّر يا ابو البتول ويا الشيخ جليس الظاهر حمد النيل أبو الجاز السريع الطاهر احمد ود علي الطول عليل ومساهر النوم ليهو يحلى يبقي ورداَ زاهر سيف السنة يا المهدي الشفا الآلام رفع علم الشهادة وعزز الإسلام صاحبي ومركزي المتجلي بالاحلام باكر لينا اصبح نور كشفلو ظلام الخرساني واب جنزير رجال الغارة جات اللازمة يارجال حوبتها وصقاره بي جاهكم اطيب الدّكري اب نقاره برهانكم ازيد الاعدي ذل وحقاره اب فركه الغيور النافي اسم الريه والبدر المنير قول العبيد ود ريه اهل الترجمة العالية اللغة السرية قومو الهجعة لي احمد تعالو سريه قنديل طيبة والشيخ المكاشفي النافع يا ود الترابي معاك عبدالدافع ياسلاح الحقيقة الما بتقابلو مدافع تقل احمد بدوركم ليهو كفاً رافع صلاح اب حراز اهل القبب سلسله جاتكم صيحة يا العُظمى التكشفو العله في عين القلب ليكم اعز محله احمد ينسند قمر البلد والحله ولاد العركي يا الواقفين بنيه بنيه مدني السني قايد حملة السنيه علة ود علي المتعصية وزمنية بدور كرامتكم تكون علنية قمر مية وبورس سيد الحفير المدّة ومكي الشابك القلب القضارف جدة وراجل الصوفي مكي والسرو في الناس شدة شيلو مرض رفيقي الما بعرف الهدة ود تكتوك فرح كوكب شرق سنار لاقي الصيحة يا البيكا المظلم نار يازاهد حلوها وخيرا والدينار عالج صاحبي بالسر واطفي حر النار الشيخ طلحة نور العابدين الكامل والشيخ طه ود البكري حوض الآمال ياشموس الهداية البِين كنزي الآمال لي احمد نظركم ابقي راعي وشامل يارجال ام شديدة سابل الأبيار ناس الحاج ولاد حسب الله يا الطيار يا النجماب نجوم السادة يا الاخيار احمد تنجو من حقنة وحوب وغيار وسيد كسلا ام تقاق سيد الجبل والتاكا ياحسن العظيم صوت النديها اتاكا طواعين احمد الشاوية الكلى الفتاكا داوي اذاها وثقها اصلو مافايتاكا شيخ برقوت وابو الفتح النشبته الطالح اعلام الهدى الضاربين سواحل المالح بي جاهكم اطيب سند القبيلة الصالح لقمان البخاصم والبرضى اصالح وجميع الفيهو سر في كافة البلدان محلف بالرسول انزل على الميدان ميدان احمد البتقلب النقدان يطب افرح ونفرح واهلو والولدان ونظمتها بي عقدية وسر بعرفو برايا ولا موني البيضحكو في القبب والرايا شيخم قال دا مشرك لا عقل لا درايا قلت الأعمى معذور مابشوف بي مرايا بي جاه النبي المعصوم وبي خلفاهُ والعشرة الكرام النالو بيعة فاهُ وسر الصالحين الجملو وصفاهُ احمد يا كريم من المرض تعفاهُ
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالله علي إبراهيم
Yasir Elsharif
فيس بوك
تويتر
انستقرام
يوتيوب
بنتيريست