سِيدْنا النبي صلى الله عليه وآله وسلم، مُعلِّم البشرية، أرسى لنا قاعدة إجتماعية وسياسية مهمة جداً عبر الزمان هادياً لنا وموجَّهاً بأن المُؤمن يعمل السبعة وذُمَّتها بس ما يَكَضِّب!!! زمان كدي في البلد كان عندنا واحد كضَّاااااااب، والناس قاعْ تريدُو بي كضبُو دا.. أحد الشباب استفسرُوا انت آ فلان مالك بالرغم من إنَّك كضاب برضك محبوب؟؟؟ قال ليهُو مُبرر عجيب جداً.. أنا كِضبي دا ما قاعْ يضُرَّلُو زول... كِضِب ونَسِي ساكت!!! كَعَب الكِضِب البي يضُر!! والكضب اليضُر ويغتِّس الحجر ياهُو كضب ساستنا ديل... حالة الإرتباك والكذب الرئاسي والتنفيذي والإعلامي بين (برهان – فيصل – حمدُوك – الشفيع خضر – محمد الفكي) ذكرتني نُكتة صاحبنا العامل فيها رياضي تفتيحة وحاضر الكُورة في الاستاد.. الحكم أدَّى أحد اللعيبة كرت أصفَر.. أحد المُشجعين صاح... بالله هسع دي حالة تديهُو فيها كرت؟؟؟ صاحبنا دا نطَّالُو في حلقُو... - والله ما أدَّاهُو.. يا راجل كيفن ما أداهُو ونحن شايفين الكرت قدامنا... - والله ما أدَّاهُو.. يا اخوي كيف عاوز تقنعني ما أداهُو؟؟ أنا شُفتُو بس ورَّاهُو ليهُو ورجَّعُوا!!! ياخي بالله فكَّنا.. انت شِنْ عرَّفك بالكُورة يا عاطل!!! الحوار دا بالضبط كدة هو حال وزير اعلامنا فيصل محمد صالح عندما خرج حينها ونفى علم رئيس وزرائه المُبجَّل بلقاء عنتبي (البُرهان – نتنياهُو)!!! (والله ما أدَّاهُو).. جاء الشفيع خضر في جلسة ونسة أكَّد معرفة صاحبُو حمدُوك باللقاء.. (أدَّاهُو).. هاج وماج دجاج حمدُوك.. وأرغى وأزبد قُراد قحت.. (والله ما أدَّاهُو)... ليأتي في آخر الدُور.. ود الفكي ويضرب الجميع بي باص بيني لصحيفة الصيحة الصادرة أول أمس الإثنين 2 مارس 2020م بأن حمدوك عاااااارف وفايت قدَّ اضانُو كمان!!! (خلاص أدَّاهُو)!!!! وبين عارف ومُو عارف وأدَّاهُو وما أدَّاهُو الدُولار وصل 115 جنيه، والضائع وسط المعمعة دي الوطن الجريح والمواطن المِسكين!!! *خارج النص:* - علَّق أحد الإخوة الساخرين على فضيحة شركة الفاخر وصفقتها المشبُوهة باحتكارها لسوق الذهب والصادر.. والمميزات التي نالتها من وزارة ماليتنا المُنهكة من غير منافسة أو عطاء عام قائلاً: زمن الكيزان كان الفساد (غُمِّيتي)، أما في عهد الحرية والعدالة وزمن (الغتغتة والدسديس إنتهى) أصبح الفساد بالواضح مُو بالدس!!! - لجنة إزالة التمكين في الإسبوع الماضي إتقَطَّعت تَب وأنجزت وغابت وجابت وأرجعت لينا عدد من المحالج الخربانة، علق نفس الساخر الفوق دا.. يا ربي نحلج فيها شنو دي؟؟ ونحن لا قُطن قصير تيلة ولا قُطن طويل تيلة ما عندنا!!! وتحسَّر على أيام الزمن زين... وأُغنية: في الجزيرة نزرع قُطُنَّا.. نَزرع نَتِيرِب نحقِّق أمَلنا... - نهمس في أُذن الفريق ياسر العطا ووجدي صالح ولجنتهم المُوقرة ونذكرهم فقط... بأن ما يملكه (كديس سمين) واحد = مجموع ما وضعت لجنة التمكين يدها عليه من محالج (حالجي) وإذاعة قرآن كريم (رجعت) وصحيفة الرأي العام والسوداني (رجعت) وقناة شروق مديونة!!!! . . . *ثم.. يظل سؤالنا الدائم... يااااربي البلد دي السايِقَها منو؟؟؟!!!!!!* IMG-20190301-WA0017.jpg
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جمال أحمد الحسن
فيس بوك
تويتر
انستقرام
يوتيوب
بنتيريست