*تقول الطرفة : اليابان صنعت مراية ختوها في المطار تقيف قدامها بس توريك اسمك ومواعيد قيام طيارتك !!! السوداني (فلان) وقف قدام المراية يجربها.. قالت له انت فلان السوداني طيارتك بتقلع الساعة ٣ الظهر .. تعجب فلان ،، وفكر وقدر ثم قرر أن يتحدى المراية اليابانية!!.. مشى وغير ملابسه و لبس باروكة وبنطلون ونظارة ووقف قدام المراية مرة تانية.. قالت ليهو .. انت فلان السوداني طيارتك بتقلع الساعه ٣ الظهر !!.. المره دى فلان مشى لبس عباية وخت ليهو روج ولبس نظارة وقعد يفرك في لبانة لايوقة ووقف قدام المراية .. قالت ليهو : أنت يا فلان أقعد أتعاور كدا لمن الطيارة تفوتك!!.. *وكمان في (فلان حلمان) كلما يقيف قدام المراية يجي راجع تاني يتعاور ليها !!.. *يقيف ويحلف قسم ويقول حا نحمي الفترة الإنتقالية.. ويجي راجع ويشرب حليفتو ويغدر حمدوك بطريقة (موزية) !!.. *يقيف ويقول سأظل في القيادة ولن أخرج إلا على نعش لأن هذا واجبي.. ويجي بعد اسبوع واحد بس فاكي البيرك ب(سفنجة) وقاعد جنب ست الشاي وفاكي البسمة !!.. *يقيف ويقول دي حرب عبثية ويجب أن تتوقف .. ويجي لابس برنيطة وشايل كلاش ورابط في بنطلونو قنبلة (نووية) ويقول ناس الشجرة بيسلموا عليكم !!.. *يقيف ويقول مافي أي تفاوض إلا بعد خروج المليشيا من البيوت والمستشفيات وغاغ غاااااغ .. ويجي تاني يلف من دولة لدولة بلا أي شغلة !!.. *يقيف و(ينكر) اشتراك المنظومة العسكرية في جريمة فض اعتصام القيادة .. ويجي يقول الدعم السريع ارتكب الجريمة دي !!.. *يقيف ويشتم ناس حمدوك لأنهم قابلوا البعاتي في أديس أبابا ويجي يرسل نائبه لمقابلة نائب البعاتي في المنامة بلا خجلة !!.. *يقيف ويقول مافي أي عملية سياسية إلا بعد إنتهاء الحرب .. ويجي تاني يمشي جدة .. ويمشي جدة .. ويمشي جدة !!.. *يقيف ويرسل وزير الخارجية عشان يشتكي الإمارات في مجلس الأمن ويجي يصهين من وجود آلاف جنوده اللي بيقاتلوا مع الإمارات في اليمن !!.. *يقيف يكورك : المتمردين احتلوا الدايات ودمروا ونهبوا و(زعطوا) .. ويوافق لوالي الخرطوم على إعلان حالة الطوارئ في الولاية !!.. *يقيف ويبعد أولاده من جحيم الحرب العبثية .. ويجي يطلب من الشباب الإنضمام للمقاومة الشعبية .. *يقيف ويتجاهل القبض على القيادات الكيزانية الهاربة من كوبر وتتجول وتتآمر وتسوط بكل أريحية .. ويجي يعتقل الكوادر المدنية .. *المراية (فترت) و(زهجت) يا فلان .. واقعد لف ودور كدا لغاية ما قيامتك تقوم !!.. *و *الله في ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست