مما طربت له من قول الأمريكان في العرفان بالفضل قولهم لمن أسعدتهم كلمة كتبها: "شكراً لكتابتها" (thank you for writing it (. ففي العبارة صهيل ووجد وأريحية. ووجدتني أسر بالعابرة لنفسي خلال قراءتي لكلمة منقولة طائفة بالنت لعائد من تركيا للخرطوم يقرظ الروتين الصحي الجيد الذي خضع له من باب الطائرة حتى صالة الوصول. فأكثرنا يمر بمثل هذا الإحسان في بلدنا حُوفا. ولكن "الله يقدر" يلقى نقصاً هنا أو هناك ليطلق عقيرته لا بالشكوى من النقص المعين بل من السودان قاطبة من لدن وُجد إلى أن يرث الله الأرض ومن عليها. إلى كاتب تجربته عن إحساننا في التربص بالكرونا في المطار: Thank you for writing it
ياناس السلام عليكم والله على مااقول شهيد انا جيت من تركيا يوم الاربعاء بتاريخ ٢٠٢٠/٣/٤ الساعه ٣ الظهر واحنا في الجو وزعو علينا فورمه وزارة الصحه وطلبو مننا نملاها وبالفعل مليناها وقبل ماننزل من الطياره ومجرد ماالباب فتح والسلم وصل طوالي طلعت لينا فوق دكتوره من وزارة الصحه وقفت في باب الطياره وشالت من الكابتن ورق كميه كده وبعدها سمحت لينا بالنزول وقبل مانطلع البص لقينا دكاترة وزارة الصحه واقفين ومستعدين استعداد تام لابسين نظيف جدا جدا جونتيات وكمامات وبتكلموا بيه كل ادب واحترام ومعاهم أجهزة فحص الفايروسات بفحصوك وبسمحوا ليك تركب البص بعدها وصلنا صالة الوصول وقبل ماندخل على الجوازات لقينا نفس الفورما الوزعوها علينا في الجو مرصوصه تاني تحت وجمبها برضوا كمية من الدكاتره بقولوا ليك لوسمحته شيل فورما واملاها لوماادوك فورما في الطياره اوضاعت منك. وبعدها بسمحو ليك تخش وجمب الورق ده في جهاز استشعار زي الكاميرا خاص باالفايروسات معلق فوق بكون موجه على الناس الداخله يعني لومامستحمي ساي الجهاز بصفر وبدخلك في فتيل. وبعدها على يدك اليمين طوالي غرفه مجهزه تجهيز كامل للحجر الصحي فيها برضوا كمية دكاتره ومعدات واسعافات كامله مكمله يعني قبل ماتوصل للجوازات وسير العفش بتكون اتفحصته من ساسك ليه راسك لوقحيت ساي بدخلوك الغرفه ياخي قبل ماتركب البص وتوصل المطار زاتو لوالجهاز اكتشف فيك حاجه بعزلو الطياااره كلها والله ووزارة الصحه في الموضوع ده قايمه بيه شغلها على اكمل وجه والله الااجراءات الااحترازيه العاملنها للكرونه في مطار الخرطوم ده في مطار اسطنبول ماشفتها زيها الحق يقال الداير اوصلوا الناس البطلعو و البنقلو الاإشاعات وبنسخوا وبلصقوا ساي زي الطير بطلوا طلس وكذب وماترعبوا الناس ساي الناس ال فيها مكفيها ولانو ربنا حيغطس حجركم والناس لازم تطمن انو كورونا ماعندنا في السودان ومن مطار الخرطوم ده مابتخش بعد الاانا شفتو ده الاربنا يقول ليها كوني والله على كل شيء قدير الله يحمي السودان واهلوا ويشافي ويعافي اي زول مريض
وللمعلوميه.انحنا السودان ده بنحبو بنحبو شديد فيهو كورونا فيهو كريسيدا فيهو بيكانتو زاتو برضو بنحبو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالله علي إبراهيم
فيس بوك
تويتر
انستقرام
يوتيوب
بنتيريست