الحمار قرر يترشّح، في الانتخابات الجاية، باسم فطين وليس هواية، ولا سعياً للجاه أو لغواية ولا داير سلطة وراها عمايا.
برنامجه واضح وصريح للغاية، ما فيه وعود ساكت وحكاية.
أولاً: صحة وعلاج
ما في تشخيص بالمزاج، ولا مريض محتاج يتسلّل من النفّاج، عشان يلاقي التمرجي الكوز … عبد الفراج!
ثانياً: عدالة وقانون
ما في حصانة لمسؤول، ولا لجنة تخاف من غول، وتقفل ملف القاتل، وتترحّم على المقتول!
ثالثاً: خبز وتعليم
لكل فقير ويتيم، مويه وكهرباء … ولو بالتأميم، وحق الناس في العيش الكريم، ما مجرد وعود في الهواء أو تعتيم، ولا شعارات من كل عتلٍ وزَنيم!
عبيد قال: «يا حمار، إنت ما عارف اللعبة؟ الانتخابات الجاية بالجد صعبة! فيها رشاوى، والناس عليها منكَبّة، وحِيَل وألاعيب ومرشح في العمرة، يتصوّر سيلفي … لما يزور الكعبة، وبعد يرجع يبيع الشعب فى القبة في أول قعدة… بالحَبّة!»
الحمار قال: «أنا ما عندي مقام، ولا حزب ولا إعلام، لكن عندي حق فطين، وعندي قضية الشعب العام، وعندي ضمير متعذّب، طول الليل ما بنام!»
بدأت الحملة الانتخابية، والناس اتلمّت صباح وعشية، زي الجوعانين في الحولية، حتى المجانين من المستشفى خلّوا العنابر وطلعوا في الدورية!
أما الشاب اليساري، أفرجوا عنه بعد سنين، وقال: «أنا لسه على إصراري، والحق ما بموت بالتمكين!»
يوم الانتخابات … معروف والناس وقفت في الصفوف، وبيناتهم دقون تغطّي الأنوف، وشايلين معاهم مولوتوف، وصناديق مليانة قنابل قرونوف، وكل زول يديك كلام بالملفوف، والدولار مربوط في حزم وظروف!
التمرجي فاز في دوائر "الحيران"، والحمار طلع خسران، والنتيجة محسومة من زمان، بقرار من الكيزان!
الحمار ما اعترض، ولا دخل في شجار، لا بالطول ولا بالعرض، وقال كلام مليان أفكار:
«أنا ما زعلان عشان ما فزت ودخلت البرلمان، ولا كنت داير أبقى من الأعوان، كل الحكاية … مرادي فطين، ترتاح في القبر … بأمان!
لو الديمقراطية بالصندوق، عند التمرجى … المطلوق والباشات الساكنة … فوق، يبقى الشعب لسه داير العوق، والحق ضايع … في السوق، ومحتاج لعملية كبيرة في المخ، لزراعة و تغيير طايوق!»
ثانياً: استقالة الحمار
الحمار استقال، ورجع للكارو … في الحال، زي ما كان في الأول… حمّال، يشيل هموم الشعب … عتال وفوق ضهره أنواع من الأثقال.
قال لعبيد: «يكفّيني شرف، شلت فطين من الطين، وحاولت أكسر حصن التمكين، لكن لقيت الحصن متين، والجماعة لابسين وشّ المرفعين!»
الشعب قال: «ارجع يا حمار، لسه قدّامنا مليون مشوار!» قال الحمار: «مشواري حلم وضاع وما عدت أتحمّل آلام الأسوار و الأوجاع!
لكن فهمت … رغم أني بهيمة والفهم ذاتو … عند التمرجى جريمة، وشفت العدل كيف يتدنّى في القيمة، وشفت الحقيقة كيف أكلوها … وليمة!
من يوم فطين وقعت في الطين، البلد وقعت معاها… بسبب التمكين زي الطفل لما يحاول يمشي في عمر الشهرين … أو قبل التسنين، وكل ما نقول تعبر وتقوم ..، نلقى التمرجي مستنيها بالسكين!
يا عبيد، فكّ الكارو، وخلّي الطريق للشعب يسير، يا شايل هموم التحرير، لا إنت مسؤول ولا وزير، ولا رئيس لجان التسيير، ولا منتظر منصب كبير، خليها لامن تترقى وتبقى مشير!
إنت ما قريت قانون، ولا درست طب وعلوم، لكن من أول يوم، كنت بتشمشم وتفرّق بين ريحة الظالم والمظلوم!
خلّوا فطين ترتاح في القبر، وارفعوا عنها كفن الغدر، وصحّوا الشعب من نومة العصر، وخلّوه يرفع صوتو عالي … الزأر:
لولا الظلم والفتنة، ولولا الحرب الملعونه كان فطين … عاشت، بيناتنا عزيزة ومصونة!
فطين ما كانت مجنونة، فطين كانت دولة، طيّبة وحنونة … و الدولة … السودان!»
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة