هلال وظلال ـ في زمن مليان تحديات وظروف ما ساهلة منتخب السودان المحلي ماشي يشارك في بطولة الشان 2024 وقلوب الناس كلها معاهو.. أملهم كبير إنو المنتخب يرفع الراية ويقول للعالم السودان حاضر.. رغم الحرب.. رغم الوجع. ـ بطولة الشان دي بتختلف من باقي البطولات لأنها بتضم بس اللاعيبن البيلعبوا في الدوريات المحلية يعني مافي محترفين بره. عشان كده الناس بتشوفها فرصة حقيقية لقياس قوة الدوريات المحلية والمنتخبات المحلية. - النسخة دي من الشان بتتلعب في تلات دول أفريقية وهي كينيا وأوغندا وتنزانيا في الفترة من 2 لـ 30 أغسطس 2025. ـ المنتخبات المشاركة 19 منتخب مقسمين على مجموعات وأي مجموعة فيها نار ولهب. ـ منتخبنا الوطني راجع بعد غياب وأول ما دخل البطولة لقى نفسو في مجموعة نار حرفياً مع: نيجيريا (اسم كبير وتاريخ عريق) ومباراتنا مع منتخبها يوم الثلاثاء 8/12 السنغال (بطلة النسخة الفاتت) ومباراتنا مع منتخبها يوم الثلاثاء 8/19 الكونغو برازافيل (فريق تقيل ومتمرس) وهو أول منتخب نلاقيه اليوم الثلاثاء 5 أغسطس.. مباراة مهمة وممكن تحدد مصير مشوارنا في البطولة من أولها. - المدرب كواسي أبياه.. الخبير الغاني مدرب منتخبنا عندو خبرة كبيرة ودرب منتخب غانا في كأس العالم سنة 2014، يعني زول عارف الكورة كويس. ـ من استلم المهمة اعتمد على لاعبين الهلال بصورة كبيرة وضم حوالي 13 لاعب من الهلال وكم لاعب من المريخ وأندية تانية زي حي الوادي. ـ أبياه قال كلام كويس.. قال واثق في أولادنا رغم التحضيرات كانت قصيرة وبيقول أهم حاجة الانضباط والروح القتالية. - التحضيرات ما كانت مثالية وللأسف البداية ما كانت سالكة.. في تأخيرات في السفر والمعسكر بسبب ظروف إدارية من الاتحاد. المدرب ذاتو ما كان مبسوط وقال دي أيام مهمة ضاعت. ـ وبرضو البلد في وضع صعب واللاعبين جايين من واقع مؤلم لكن دا ممكن يكون حافز ليهم عشان يرفعوا اسم السودان عالي. - أبياه حيلعب بخطة متوازنة غالباً ويركز على الدفاع الصلب الوسط متحرك والهجوم سريع. ـ احتمال غياب الغربال والقائد رمضان عجب بعامل الإصابة ولو الغربال موجود حيكون ورقة رابحة في الهجوم ولو ما موجود يمكن الاستعانة ببعض اللاعبين الشباب الذين يمكن يسدوا جزاء من الفرقة ويصنعوا بعض الفرق. ـ المدرب ممكن يبدأ قدام الكونغو بخطة حذرة ويستغل المرتدات خصوصًا إنو المنافسين في المجموعة تقال. - مجموعة منتخبنا الوطني من أصعب المجموعات.. لكن الكورة ما فيها مستحيل. ـ لو منتخبنا قدر يكسب أو يتعادل مع الكونغو راح يزيد الأمل.. وبعدها نقطة من نيجيريا أو السنغال ممكن تكفي للتأهل. ـ ناس كتار فاكرين السودان حيكون ضيف شرف.. لكن الزول البعرف تاريخنا في الشان بيعرف إنو نحن ما بنجي نكمل عدد. ـ في 2011 جبنا المركز التالت وفي 2018 وصلنا ربع النهائي ولسه الطموح باقي. - منتخبنا الوطني داخل الشان باسم البلد كله وقداموا اسم (السودان).. داخل وهو شايل أوجاع الحرب والشتات لكن برضو شايل حلم الناس. ـ كواسي أبياه عندو خبرة وكتيبته المقاتلة من اللاعبين عندهم رغبة والناس عندها دعوات من القلب. ـ لو اتوفرت الروح القتالية والانضباط ممكن نعمل المفاجأة. ـ غايتو نحنا واثقين في صقور الجديان.. وربنا يوفقهم ويشرفونا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست