كعادتنا ثلاثتنا عوضية مرسال و فتحية عبدالله و شخصي عندما نستلم مصروفنا الشهري نخرج من السكن الجامعي لنرفه عن انفسنا في بعض المطاعم التي تتحمل ميزانياتنا اسعارها. اليوم جلسنا حول طاولة بها 4 كراسي امام كافتيريا الملتقي بتقاطع ابوحمامة الشهير. . كادت الشمس ان ترتمي في احضان المغيب. وكنا نثرثر بفرح و مرح حين لفت نظراتنا امرأة في منتصف الثلاثين من عمرها تعبر الطريق من الشارع المقابل و تتجه نحو الكافتيريا تسير مترنحة ترنحا خفيفا وهي تحاول ان تضبط ايقاع خطواتها لتبدو ثابتة. حين اقتربت منا و هي تمر بجوار طاولتنا لوحت بيدها اليمنى تحيينا و تبتسم . عندما رفعت يدها لتحيتنا اختل توازنها. همست عوضية : الله يسترها من ناس النظام. داهمتني شفقة عليها فاشرت اليها ان تاتي لتجلس على الكرسي الرابع . فاتجهت نحونا. كانت فتحية اقربنا اليها فحضنت فتحية في سلام حار كانها تعرفها ثم تمايلت و بصعوبة مرت من الكرسي كي لا تسقط وحضنت عوضية ثم جاءتني و احتضتني احسست انها تريد ان تنام على كتفي. بهدوء ازحتها و قربت اليها الكرسئ الرابع فجلست عليه. بدا لي واضحا ان ملامحها دارفورية . قروية بها مسحة جمال لا تخطئه العين. كان رأسها يتمايل فيميل سائر جسدها معه. لاول مرة اكون علي مسافة قريبة كهذه من شخص سكير. بدا لي ان مركز الحركة لجسدها في توازن رأسها فاذا تحرك الراس مال جذعها كله معه. سألتنا :شغالات هنا. قالت عوضية لا نحن طالبات جامعيات. فقالت بفرح" نور الشام كلو في الجامعة" . قالت لها فتحية انت سكرانة ما بتخافي من ناس النظام العام. بدا على وجهها الخوف حقيقة. ارتعبت و تلفتت الى كل الاتجاهات بعيون زائقة كأنها تتوقع ان يكونوا حولنا قالت كانها تعتذر اليوم اول مرة نسكر. قلت لها ناس النظام يهمهم انهم قبضوك سكرانة. قلت ليها اسمك منو قالت اسمي كلتومة سالتها عوضية ليه اليوم سكرتي ردت قائلة : تيه فالت بياخديني واهلو قالو ولا تجيبي لينا مرا ولا بيشربا مريسة باكر ينبزينا و يشتمينا اهل تيه شرابين مريسة . ابيتا .. ابيتا لكن هو ولا خلاني. مشيت بيتهم وامه زقاني مريسة امو اعوذ بالله اعوذ بالله سبعة مرات ثم توجهت الينا متسائلة تعرفوا تبلدية؟ قلنا لها نعم. واصلت حديثها اني وكت شفتا ام تيه التبلدية مسكاني تلاتة هم. اول التبادي اذا ولدت عيال طلعوا لي حبوبتهم التبلدية دي ولا امنقدر نرفعا وليد من وطا. وهم تاني كن امو شاكلاني و رماني في وطا وقعدت فوقي تاني ولا امنقوم حيي. و تالت هم ولا امنقدر نشبعي مرا قدر تبلدية. نهار كلو نقضي نصوط في عصيدة. ضحكنا ثلاثتنا فضحكت ايضا. سالتنا عن اسمائنا قلت لها انا مريم من نيالا وهذه عوضية من بورتسودان و تلك فتحية من النهود. جاء الجرسون فطلبنا عصائر حاولت ان تدفع ولكننا رفضنا.
سالتها فتحية معقول تشربي الخمر عشان تيه. طيب لو اتطلقتم بعد فترة وانت بقيتي بتاعت مريسة بتكسبي شنو. ردت بطمأنينة : تيه ولا بطلقيني كن اخداني... تيه بيقول فوقي كلام تكون نطير .. نقول ليهو انت كداب اني نشوف رقبتي في منضرة نص كلامك ده ولا نشوفي . يحلف ويحلف و نصدقي. راجلي ابدلاي كانت مرات كدي بقول كلام نمن جسمي يخدر فوقي سالتها عوضية مندهشة انت عندك راجل؟؟ ردت كلتوم ايي ابدلاي و لاحقتها عوضية كيف عندك راجل و تقبلي غزل راجل تاني و تشربي مريسة عشان يتزوجك. انتو عندكم المرا بتتزوج راجلين؟ بدا لنا فعلا موقفا غريبا. استعدلت كلتوم في جلستها وقالت 3 سنة و اني ولا امنعرفي ابدالاي حي ولا ميت. خالي في فاشر برسلي لي جوابات . هم كلو ولا بعرفوا خبرو.
قلنا لها وانغاسنا تتكاد تتقطع قبال تسوي اي علاقة مع تيه اثبتي في المحكمة و يدوكي شهادة طلاق و بعدها تحبي تيه ولا غيرو. قالت" تيه قالت بجيب ناس يشهدوا في المحكمة راجلي ماتت في حرب دارفور و بطلعوا لي شهادة و ياخديني . سالتها فتحية الشهود ديل بيعرفوا راجلك؟ هزت كلتوم رأسها بالنفي وانهلنا عليها لوما و تقريعا. كيف تقبل شهادة وفاة زوجها من ناس لا يعرفونه ولا تعرفهم. طيب اذا تزوجت وجا راجلك حي تودي وشك وين؟؟ بدت مندهشة تستمع لكل واحدة باستغراب لا ادرى مصدر دهشتها اهو لتدخلنا في شأنها ام لانها لم تكن تتصور مخاطر و سوء فعلها.. قلت لها : "واضح انتي بتصلي لكن هل تيه بيصلي". التفت نحوي مندهشة وهي تقول( يوم ولا سألتا. ناس كتار ولا بصلو) واصلت كلتومة كلامها" قبيل نهار وكت مشيت لي بيت امو وقبال نشربا مريسه كان عندي وضوء قلت نصلي ضهر... ما عندهم مصلاية ادوني شوال سكر فاضي. بعد صليت جا بنية صغيرون عمرو تكون خمسة او ستة سنة . سألاني: صليتي قلت ليها. ايي صليتا قالت لي مافي زول في بيتنا ده بيصلي. قلت نسألا من صلاة تيه لكن خفت يكلمي حبوبتو التبلدية. قالت لها فتحية ممكن ما يكونوا مسلمين ردت بثقة: (اني سالتو فقالت هو مسلم وقالت لي انتي عارفة الاسلام طرق كتيرة تجانية وهابية انصار سمانية و تاني شنو يا ربي .. قالت لي زي حداشر طريقة وهو مسلم مسيحي). في لحظة واحدة و بصوت شبه واحد اندفعنا نحن الثلاثى :" غشاكي. بيلعب بيكي. مافي مسلم مسيحي".
مذعورة نظرت الينا ونحن نخبرها انه نصراني لا يجوز لها ان تتزوجه الا اذا اسلم. طلبت من كل واحدة منا ان تحلف ان المسيحي نصراني وليس مسلم. حلفنا لها . بكت ان تيه خدعها. واراد ان يخرجها من دينها. قالت لها عوضية انها لسه في السيف سايد. يقينا لم تفهم كلمة السيف سايد التي نطقتها عوضية بانجليزية طلقة. بدأ انها لم تصدقنا بصورة كاملة رواسب شك. لانها اصرت ان تيه يحبها جدا ولا يمكن ان يغشها. لاحظت ان عوضية تلفتت حولنا تبحث عن شيء ما. فكنت في حيرة حتى لمحتها تشير الى شاب يجلس لوحده يرتشف عصيرا فاشارت اليه ان ياتي فوضع يده على صدره متسائلا بالاشارة اتقصده هو فهزت عوضية رأسها بالايجاب. سألت نفسي ماذا تريد منه. اقترب الشاب وسلم علينا. بادرته عوضية هل تعرفنا؟ فقال لا. فوجهت عوضية كلامها الى كلتومة اسمعيهو بيقول شنو. كلنا رفعنا رؤؤستا نحو الشاب. سألت عوضية الشاب: هل المسيحي مسلم؟ فرد الشاب لا.ثم سألته مرة اخرى: هل النصراني مسيحي فقال الشاب: نعم شكرت عوضية الشاب فانصرف ثم خاطبت كلتومة" لو جبنا مية زول ح يقولوا ليكي نفس الكلام". ومن ببن دموعها وبكائها بدات تهمهم استفغر الله. كيف نلاقي ربي يوم القيامة واني طلعت من الاسلام عشان راجل. واي واي يا ربي سامحيني. والله يا الله ما ممنقدر نقول ليك خليت اسلام عشان راجل. واي واي واي. اني عويرة كنت نسالا نورالشام. ولا امنقدر نقول كلام زى ده لامي كبرى بيكتليني. تصدقوا مرة يوم جمعة تيه جاني في بيت شايل كيس لحم وخضار وكيس فواكه. قعدت في سرير و قبال يشربا موية .. أمي كبرى جا داخل سالا تيه انت ياتو: قال انا زبون كلتومة. امي كبرى قالت زبون في محل شاي ولا في بيت تيه قالت: في محل شاي. امي كبرى قالت: لو سمحت شيل اكياسك امرق بسلامتك. و شافاني تكون يقطعي لحمي. من يوم داك حلفت ضل راجل ما نخلي يجيني في بيت.. عادت تبكي و تستغفر سألتها عوضيه زوجك عبدالله مشى وين ؟ اكتسى وجه كلتوم حزنا عميقا وقالت في يوم كده . نهار قبال ضهر ابدلاي مرقت بي غنم لي وادي متل بسوي كل يوم. اني قاعد في بيت سمعت هرج جهة دكان ابا منصور وقفت نتاوق بي حوش. نشوف ابا منصور واقف قدام دكانه و بيكلم حار مع 3 من عيال دامرة الشيخ ابو سعدية. ما عرفت بيقولوا شنو الا نشوفي واحد من العيال الثلاثة اسمو موسى يعمري بندقيتو و طاخ في صدر ابا منصور ندوري نعيط الا خالتي حليمة مرت ابا منصور سبقاني و عاطت. طوالي واحد منهم فكا فوقو رصاص. عمي ابراهيم مرقت من بيتو وام عيالو زينب بمسك فوقو واحد من الصبيان فكا رصاص في عمي ابراهيم و مرتو كتلاهم الاتنيين. قلت نعيط نلمي رجال لكن خفت بكتلوني. فكي هرون بيقول ولا تلقوا بايديكم الى التهلكة . وانا ابنبكي بالراحة ما يسمعوني . عيوني كلو دموع.. شوية كده حسيت برأس بندقية في عنقرتي عصراني شديد . لفتا بالراحة ندوري نشوف في شنو. ماقدرت نشوف العصراني من ورا ببندقيته. عصراني ما نقدر نلفت لي ورا. ... من جهة ايدي اليمين شفت ماهل من عيال دامرة الشيخ ابوسعدية واقف طرف وفي ايدو بندقية. قلت ليهو اني سويت شنو يا ماهل؟ الوراي نزلا بندقيتو. وقت لفتا لقيتا النضيف ود مسبل هو كلو من دامرة الشيخ ابو سعدية. . وجها بندقيتو لصدري و قال لي ادخلي قطيتك..وانا ماشي وهو يتبعاني سمعت ماهل بيقول للنضيف" انا ماشي لبت العمدة لو خلصت انتظرني" دخلنا القطية قالت لي ( ارقدي فى الوطا وارفعي جلابيتك. ختا بندقيتو ورا خشم وراي .وجاني ماشي قلتا في قلبي والله ما تلقا بي هين. وكت قربت مني سكيتو برجليني بمنعي كلو نمن ترتعت. وجاني زعلان وقعت فوقي ضرب و شليت و اني نرفس ونضرب فوقو. وليد حرام مانع قدرت يقتسبيني. وكت قامت مني قلت( اكتليني بدل فديحة اكتليني. شيلي بندقيتك رسسيني. نديك بندقيتك اكتليني نموت يدفنوني ولا فديحة). قمت مشيت لي سدادة مسكتا بندقية من ماسورة و جيتا ماشي عليهو. هو لسه قاعد في وطا مبسوط. وكت قربت.. قلبي قالت لي اكتلي. وكت اني نمد ليهو بندقية مسكتا ماسورة بحد منعي و دقيتا بقعر بندقية في وشو نمن وقع بي ضهرو و بسرعة قبال يقوم بقعر بندقية ضربتو في عيونو قديتا عيونو الاثنين و بخوف و زعلي الفوقي كسرت راسو وخشمو . دم دفقت ... و بقا يفرفر مثل جدادة دبحوا و روحوا لسه ما مرقت). بدأت كلتومة تمثل بساعديها وابطييها حركة فرفرة الدجاج المذبوح. طلبنا منها ان تكف حتى لا تلفت الينا نظر الناس في الكافتيريا. سألتها فتحية.: مات؟؟ ردت كلتوم؛ من الخوف قعدت نضرب في راسو لحدي بردت و نفسو انقطعت عملتي شنو بعد داك؟ صمتت و وضعت راسها بين يديها . تملكنا الشوق لنعرف ما فعلت بالجثة. قالت( اني ولا نصيحة. مريسة ده لخبطا رأسي. امي كبرى كلماني و حذراني ما نكلم اي زول اني كتلت رقبا. اهل الميت ما بخلوني الا الحكومة تكتلني. اعوذ بالله من المريسة ) قالت لها عوضية" اذا بتشربي المريسة يومي حتقصي كلامك ده للناس لحدي يشنوقي." اعادت وضع رأسها بين بيدها وبدأت تبكي. سألتنا بحيرة: (انتو توروا ناس دامرة ابو سعدية يجوا يكتلوني)؟؟ اكدنا لها اننا لا نعرفهم ولا يعرفونا واصلت كلتومة سردها (قبال 3سنة قبال ما نجي من فاشر لي خرطوم. خالي اسماعين قالت لي "لو قعدتي معانا في فاشر يفتشوك نمن يلقوك . احسن تمشي ام درمان عندي اخيتي من كبكابية اسمها كبرى التاماوية. بدربيك و برتبي ليك حياتك. لو قالت ليك اقعدي في نار تقعدي. ودعت خالي و عيالو . وكت وصلت خرطوم ولا امنعرف شرق من غرب.سواق لوري وقفاني قدام بيت امي كبرى. وقالت لامي كبرى ده امانة من اسماعين ابو حفصة. امي كبرى سلمت لي سمح و نادا بنيتو نور الشام وقال لينا انتو اخوات. كلتومة الكبيرة لكن نور الشام بيعرف خرطوم اخير. لازم تساعدوا بعض). داهمتها فتحية :"بعد ما الراجل مات انتي عملتي شنو؟" (قالت كلتوم شلت توبي في ايدي وقلت نجري لوادي نشوفي ابدلاي. لكن تاني قلت ما عندو سلاح . عيال حرام ديل بيكتلونا الاتنين. طلعت رأسي من قطية بالراحة مثل فاراي. وكت ما شفت زول جريت مسكت درب عربات فاشر اني تعبان و جسمي كلو بوجعاني لكن قلت نعصري رقبتي نجري و نمرق حي ولا نقعد يكتلوني . جريت نمن مرقت في ناس تحت شجرة عندهم بوكسي قالوا ماشين فاشر وصلوني معاهم فاشر. مشيت المستشفى قلت( انا اقتسبوني ودوني لخواجية معاها بنات سودانيات نضيفات و سمحات عرفت انهن دكتورات. قالوا لي تمشي الشرطة تجيبي اورنيك 18 قمت نبكي الخواجية رطنت لي واحدة من البنات سألاني مالك قلت ليها: ما عندي حيل نقيف على كرعيني ولا امنقدر نمشي المركز و نجي). الخواجية سمعا الكلام من البنيه رطنت معاهم جا سواق وداني مركز الشرطة وانتظراني دخلت لقيت العسكري القاعد راجل كبير قلت (ندوري نفتح بلاغ أقتساب).. قالت لي" البﻻغ نفتحو ضد مجهول". قلت( اني نعرفي الراجل الاقتسباني). العسكري قالت لي" تعليمات الحكومة من الخرطوم كده.اي بلاغ اقتساب يسجلوا ضد مجهول". سواق رجعاني لقيتا دكتور كبير قالوا مدير المستسفى. هو كلو كشفت على رقدوني اربعة ايام في المستشفى و خرجوني و ادوني ورقة فيها رقم البلأع وتغرير الدكتورة و الدكتور). ثم فتحت شنطة يدها و اخرجت التقرير الطبي. تلقفناه . وجدناها حقيقة تعرضت لاغتصاب بشهادة طبيبة و طبيب مدير مستشفى الفاشر و التقرير مختوم. بختم المستشفى و ختم منظمة حماية المرأة و الطقل.
واصلت حديثها (قعدت كم يوم مع خالي اسماعين وركباني عربية جيتا خرطوم. امي كبرى قالت هو قاعد يسوي فطور و شاي جنب الجهاز و يدربيني نعمل شاي و جنزبيل وقهوة و كركدي و حلبة وكيف نقدمي و نغسلي عدتي ناس لو شافوا وساخة بخلوا مكاني امي كبرى درباني و اشترى لي عدة النحتاجا كلو قالت لي بي راحتك تكفيني).
لحظتها شعرت بانه حان الوقت لشرب شاي اللبن باللقيمات لنعود للسكن. فطلبت 4 طلبات و بدانا نشرب ونلتهم اللقيمات اللذيذة. قالت كلتومة( نكلمي امي كبرى من باكر نسوي في قهوتي لقيمات بشاي لبن. ) سألتها فتحية : كلمتي تيه باغتصابك؟قالت( اديتو ورقة مستشفى شافا و عيونو رقرقت و لا قالا كلمة رجعا ورقة لي. تيه غشاني تاني خشمي ولا نفتحا معاهو. .. بدوري يودني نار جهنم معاهو بالمزيكا. قالت لي خالك بعيد في فاشر وهو بيعرفي ناس يزوجوني ليهو. قالت بيقدر يجيبي زول يبقا ولي امري و يزوجينا) قلت لها( خليه وفتشي زوجك عبدالله.) فتحية فالت ليها( علافة تبدأ بالمريسة و الكفر اكيد نهايتها شينة). اطرقت برأسها لفترة. داهمتنا بالسؤال: انتو في الجهاز.؟ فوجئنا بسؤالها نظرنا الى بعضنا باستغراب. ردت كل واحدة منا بالنفي. طلبت مني ان احلف فحلفت ثم طلبت من فتحية نفس الامر و اخيرا عوضية التي اقسمت انها لا تعرف اين مباني الجهاز. اخرجت كلتومة من محفظتها رزما من النقود و مدت لكل واحدة منا 1000 جنيه رفضنا باصرار وقلنا لها المبلغ كبير علينا ولكنها اقسمت ان لا تعيد المبلغ الى محفظتها. شكرناها . فكرت ان اعرف لماذا سألتنا عن علاقتنا بجهاز الامن. قلت لها(. مالك و جهاز الامن؟ مش امك كبرى بتعمل ليهم الاكل). التفتت الى وقالت( امي كبرى قالت نص الناس الماشة دي في الجهاز). يا بنات نقصي ليكم البقا لي اول اسبوع جيتا الخرطوم مشيت مع امي كبرى لناس هو بيعرفيهم عندهم مناسبة. امي كبرى قالت لي (لا تسوي اكل او شاي انت ما بتعرفي اكل ناس خرطوم). لقيتا بنات قدر نور الشام بيونسوا قعدت معاهم. شوية واحدة قالت" شايفين ناس دارفور الحاقدين ديل قالوا عندهم حرب و حرايق و اقتساب و الخواجات الكفار وقفوا معاهم". واحدة تانية قالت ' لان السودان بقا يطبق الشريعة و السودان بقا عظيم فلازم الكفار يحاربوا الاسلام و يحاربوا السودان بلد الاسلام الحقيقي. وما لقوا غير ناس دارفور عشان يهدموا الدين'. واحدة قالت:" قال اقتساب قال. مستحيل سوداني يقتسب سودانية. دي ما اخلاقنا. ده كلام اسرائيل ". دمي فارت فوقي قلت ليهم بزعل في اقتساب و في كتل وفي حريق.. اني القدامكم دي اقتسبوني. قالوا كلام كتير عرفت منو بيقولوا اني كدابة و ده فتنة من اسرائيل. قمت طلعت من محفتي التغرير حقت مستشفى فاشر. كلهم شافو تغرير. واحدة قالت" شايفين مكتوب منظمة شنو". قامت واحدة قرتا منظمة حماية المرا و التفل. الاولانية سالت البنات" يحموا المرأ و التفل من منو؟ مفهوم الخواجات عايزين يحموا المرا من الاسلام تكشف شعرها و تلبس قصير و حرية في اي حاجة). (كلامهم زعلاني شديد بكيتا. جا امي كبرى و ساقاني. و كلماني بزعل شديد). قالت لي (حكومة بيقول دارفور امان انتي تجي تطلعي حكومة كدابة . نص الناس التشوفي ماشة ديل شغالبن مع جهاز الامن. لا تصدقي كدب معارضة. نسقطوا حكومة نسقطوا حكومة. العندو مرتب ولا تسأل.... الوليدو ضابط في الجهاز ولا تسأل . . كن حكومة قالت بيكاتل اليهود في دارفور قولي شوف عينك اليهود حايمين هناك. ناس خرطوم ديل ولا بيعرفوا دارفور. انا لما جيتا هنا كتا بنية اصغر منك. اقول ليهم انا من كبكابية يقولوا عندكم منقة حلوة في ابوجبيهة. اقول ليهم يا جماعة الخير كبكابية وين و ابو جبيهة وين.. الفاهمبن منهم بيسألوني انتو قريبين من تشاد. يا كلتومة بتي اقدري على لسانك. اي زول سالاك من دارفور قولي امان من خرطوم. ناس الجهاز لو شالوكي بيكتلوكي و يرموكي البحر يقولوا كلتومة ولا بيعرف يعوم غرقت في البحر. فتحي عينك.) استطردت كلتومة انها سمعت كلام امها كبرى كل السنوات الماضية و لكنها اليوم فقط بقت مثل الرادي. توسلت الينا نسترها و ندعو الله تيه لا يخرجها من دينها وانها تريد ان تموت مسلمة. نهضت لتودعنا وسالناها اين تسكن فقالت( ورا مقابر الرميلة).. لمعرفتتا المنطقة فالمسافة ليست بعيدة ولكننا اتفقنا على توصيلها بتاكسي خوفا عليها من النظام العام.
عندما وصلنا طرقنا الباب فخرجت فتاة في عمرنا ادركنا انها نور الشام. كادت البنت تبكي عندما شاهدت كلتومة سالتها فزعة" عملتي شنو يا مجنونة امي لو شافتك ح تقتلك".
شرحنا باختصار لنور الشام احتيال تيه زبون كلتومة عليها. صرخت نور الشام( يا غبية لا بتشاوري لا بتسألي. قبال اسبوعين ابراهيم خاطر كلمنا قال يكلموا خالك يرسل لينا ورقة طلاقك هو عايز يتزوجك ). صرخت كلتومة متدهشة في وجه نور الشام (كداااابة.) . لكن ردت نور الشام بثقة " و حياة امي صحي و قال حرام يكلمك و انتي في ذمة عبدالله".
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالرحمن صديق ابوحبو
فيس بوك
تويتر
انستقرام
يوتيوب
بنتيريست