* أتيح الفرصة اليوم لمريض بالفشل الكلوي يحكي عن معاناة المرضى والاهمال الكبير الذي يجدونه من المسؤولين لدرجة ان الذي صار يتحكم في تحديد نوع العلاج ليس طبيعة المرض، وإنما توفر الإمكانيات!
* كما أعطي الفرصة لطالب ماجستير علاقات دولية ليتحدث في إيجاز عن قضية شرق السودان والمؤامرة التي يتعرض لها تحت ظل الصمت الحكومي المطبق، واعتذر عن اختصار الرسالتين لضيق المساحة رغم أهمية الموضوعين. * يقول طالب الماجستير الصدّيق النعيم موسى: الصراع في شرق السودان لا ينحصر في الوالي المعين ولكن بسبب أطماعٍ كثيرة في الإقليم، أولها الموانئ بولاية البحر الأحمر وأهميتها الاستراتيجية وكل المؤشرات تشير إلى ضلوع الإمارات ودورها في ذلك، واتوقع ان يتطور الصراع خاصة بعض أن أعلن مجلس البجا أمس الأول عن رفضهم لمفاوضات جوبا، وتؤكد كل المؤشرات ذهاب الإقليم نحو المطالبة بالحكم الذاتي ثم حق تقرير المصير الذي يُمهِدُ للانفصال!
* هذا المخطط ليس بجديد حيث توجد دولُ كثيرة تدعم هذا الاتجاه الذي يقسّم البلاد لدويلات ضعيفة يسهل السيطرة عليها والاستفادة من موقع الشرق، فجيراننا يطمعون في خيراتنا وثرواتنا والأصدقاء البعيدون كذلك، والحكومة بعيدة كل البُعد عن إيجاد الحلول الجذرية بالمنطقة التي عانت من تهميش كبير، فكل أموال الشرق من اموال الزكان والضرائب ورسوم المحاصيل تذهب للمركز منذ وقت طويل بدون أن يستفيد منها الإقليم بشيء، وما تقدمه ولاية القضارف وحدها سنوياً للمركز كان كافيا لإنهاء الفقر بالولاية.
* إن الصراع في شرق السودان أكبر من القبائل المتنازعة، فمخابرات بعض دول الجوار ضالعة في المؤامرة ولن تتوقف الا بعد ان تحقق اهدافها الخبيثة في ظل غياب كامل من الحكومة والسلطة الانتقالية وكأن الجميع يشارك في المخطط! الصديق النعيم موسى. طالب ماجستير العلاقات الدولية جامعة الخرطوم
* ويقول مريض الفشل الكلوي (شفاه الله): * بالنسبة لمقال بعنوان (شوية قلة أدب) أنا عايز أقول ليك انو فعلاً الناس دي ماعايشة معانا. هل شفت أي واحد فيهم واقف في صف البنزين وألا صف صراف وألا صف عيش وألا غاز وألا بركب مواصلات، وألا بقيف بالساعات عشان يقطع الكبري. والله أنا ماكنت داير من الحكومة دي غير انها تعيش معانا وبس، يقيفوا في صفوفنا يتعلموا في مدارسنا ويركبوا مواصلاتنا دي وكهربتم تقطع زينا ونلقاهم في الصفوف بتاعتنا دي.
* الحاجه الفعلاً ممكن تستغرب ليها انو في مشاكل كتيره ممكن تتحلَ بمجرد تلفون او زيارة لي مصلحة لكن طبعاً هم مافاضين، بالمناسبة المسؤول ده قبل ما يكون مسؤول، لو لقى حفرة في الزلط بتكلم عنها، اي مشكلة بتاعت اي مواطن قريب أو بعيد، داخل البلد أو برة البلد هو بتكلم عنها، لكن بمجرد ما يبقى مسؤول تاني ما بتكلم إلا لو الناس إتلموا وعملوا مظاهرة!
* لو عايز تعرف وجه من أوجه المعاناة أنا بدعوك تزورنا في مركزنا بتاع غسيل الكلى، او تزور أقرب مركز ليك وتشوف معاناة الناس ديل سواء العلاجات الما في او الغالية، او عدم التوزيع العادل للغسلات وإختزال زمن جلسة الغسيل من 4 ساعات الى 3 ساعات ومرات ساعتين لاسباب انحنا ماعندنا بيها اي علاقة!
الاغرب من كده، انو حتى الجهات المسؤولة مننا ما بجو يسألوا العيانين عن مشاكلم شنو، لا الوزارة لا المجلس القومي للكلى لا تأمين صحي ولا غيرهم بجو مراكز الغسيل ان شاء الله مرة واحدة في الشهر عشان يستمعوا لي مشاكل المرضى ويحاولوا يحلوها. وما تنسى ناس الزكاة ديل لو دخلت صفحتم في الفيس تلقى الانجازات دي يومية، لكن هم طبعاً ما بيكلفوا نفسهم يعملوا زيارة للمراكز مرة كل شهر عشان يشوفوا مشاكلنا شنو، وطبعاً ما في زول عارف انو أغلب المرضى ديل ما شغالين وحياتهم كلها بقت بين المستشفى والبيت!
* أنا كل البتمناهو انو اي واحد في السلطة يجيو فشل كلوي (لا قدر الله) ويوزعوه على أقرب مركز حكومي ويجى يغسل معانا و يشوف العذاب الانحنا فيو، موش عشان يتعذب ويتبهدل، عشان احوالنا تتحسن ! مريض بالفشل الكلوي الجريدة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير السراج
فيس بوك
تويتر
انستقرام
يوتيوب
بنتيريست