كنت نسبت إلى "طمسة" ولاد المدن الزعم بأن حشد الأنصار الذي جاء للعاصمة ليعزز مطلب الأحزاب بحل الحزب الشيوعي كان يسأل من يلقاهم من الناس عن "حلة الشيوعيين" لتأديبهم. وكتب لي أكثر من صديق على صفحة الفيس بوك يقول إنه التقى بجماعات منهم وسألوه عن حلة الشيوعيين. فالذائعة حق. وتذكرت أنني كنت نقلت على صفحتي حكايتين لم يسأل فيهما الأنصار عن حلة الشيوعيين فحسب بل اجتمعوا ببعض "سكانها" من غير يعرفوا إلا مؤخراً. وكانت بينهما خوة دامت.
علق الأستاذ ساتي بكري ساتي على بوست لي عن حل الحزب الشيوعي 1965 وتجربته مع الأنصار ما يلي:
الشيوعيون دافعو عن حزبهم ببسالة. أتذكر لحظات هيجان الاحزاب بقيادة الإخوان المسلمين جاء حزب الامه بالأنصار من الجزيرة أبا يهتفون: "عيال لينين ما عندكو دين". كانوا نازلين في الديوم الشرقية بديم التعايشه بمنزل شيخ الطريقة القادرية. كنا جيران بعض. كان الأنصار بعد أن ينتهوا من مظاهراتهم نأتي كلنا نتغدى معاً في بيت الشيخ. نسألهم هل وجدتم الشيوعين فيقولون مالقيناهم أولاد أيه وأيه. شتيمة طبعاً. وحين جاء وقت رجوعهم قال لهم الشيخ القادري: "لو لقيتو الشيوعيين بتعرفوهم؟". فقالوا لا. قال لهم "الأولاد البتتغدو معاهم كل يوم ديل، وبصلو معاكم، والبحضرو معانا الذكر كل خميس واثنين، ديل شيوعيين". استغرب الأنصار وسألونا: إنتو شيوعيين؟" فقلنا لهم نعم. وتواصل النقاش حول شيوعيتنا معهم حتى سفرهم. والغريب أن المودة اتصلت بيننا وبينهم بفضل المرحوم شمس الدين من أبناء الجزيرة أبا الذي صار حلقة الوصل بيننا.
حلة الشيوعيين 2 كتب خليل الياس، من قادة اتحاد الشباب في الستينات، في جريدة الميدان كنت أحمل في سيارتي قدراً من الخبز من باب كوستا وطحينية وجبنة والماء لدعم المتظاهرين ضد حل الحزب الشيوعي. انتهى الحشد في العصر وقفلت عائداً إلى منزلي بالخرطوم بحري عبر المحطة الوسطى بالخرطوم. أوقفني ثلاثة رجال واضح أنهم من الأقاليم. -إنت من الخرطوم كان العطش والجوع بادياً عليه. -وبتعرف حلة الشيوعيين -داير منهم شنو؟ -جينا هنا عشان نكاتل الشيوعيين الملاحدة. نظرت إليهم مرة أخرى وبان لي إرهاقهم الكبير -باين عليكم تعبانين -والله من أمس لا أكلنا لا شربنا -اتفضلو معاي على البيت وبعد الغداء أوريكم حلة الشيوعيين. وسرنا إلى حي المزاد الدرجة الثالثة بحري. توضأنا لصلاة العصر وقدموني إماماُ. ثم تغدينا. وتصادف أن كان غدائي جيداً لأنه مما جاء به جار سماية. نام الجميع حتى صلاة المغرب. ايقظتهم. وكان بينهم شاب فيه معرفة وكلامه ليس ريفياً خالصاً. -كتر خيرك يا خوي. والله يبارك ليك ويبعدك من الشيوعيين الكفار. خلاص بعد دا ايرين نمشي لحلة الشيوعيين. الله أكبر عليهم. -لو قلت ليك أنا شيوعي بتصدقني. وقف الشاب مندهشاً مضطرباً: -عليك الله إنت شيوعي. إنت صليت معانا. وأديتنا أكلاً سمح. الشيوعية ما بصلو ولا بعرفو الرسول. -الناس البقوليكم الكلام دا ناس كضابين. ولا بخافو الله. وبقولو ليكم الكلام دا عشان ما تصوتو للشيوعيين. اسع ليكم تلاته أيام لا أكل لا شراب ده هس كلام ناس مسلمين؟ نحن الحق بنصلي وبنصوم وبندي الزكاة ونساعد المساكين عموماً. وبيوتنا مفتوحة ليكم أهلاً ومرحب في كل وقت. وأخذتهم لأم درمان ليحقوا بمن تبقى من الأنصار العائدين إلى قراهم. بعد مدة جاء من جماعة بابنوسة من سأل مني في البنك. وقال له إنه جاءهم في بابنوسة شيوعي اسمه عثمان. وصار ابنه وبنته هو بنفسه بفضله شيوعيين. وسأل: هل لسع بتقروا في لياليكم السياسية سورة "ورأيت الناس يدخلون في دين الله افواجا" وكان الشيوعيون يكثرون منها في بدء مناسباتهم السياسية. وقيل إنه حدث في ليلة سياسية للإسلاميين افتتح أحدهم الليلة بالسورة. فقال أحدهم: -يا مولانا ما تقرا لينا سورة الشيوعيين دي -لكين الشيوعيين ما عندهم سورة.
خليل الياس رئيس اتحاد الشباب السوداني في الستينات
06-23-2020, 02:12 PM
ABDALLAH ABDALLAH ABDALLAH ABDALLAH
تاريخ التسجيل: 08-26-2007
مجموع المشاركات: 7628
السلام عليكم أخى العزيز بروفيسور عبدالله على إبراهيم ما كتبته عن الأخ العزيز خليل الياس فى هذا المقال أعاد إلى الذاكره كل ما هو طيِّب من ذكريات عطره لى مع أخو الأخوان الحبوب الأستاذ خليل الياس خلال فترة عملنا فى بنك السودان وفى فترة حضوره لنا فى واشنطن بداية التسعينات عقب إستيلاء عسعس بنى كوز الشيطانى على السلطه فى السودان . أسمح لى أن أقتطف جزء من مقالك لأكتب بوستاً عن الأستاذ خليل الياس فى صفحة المنبر العام بسودانيزأونلاين . تقبل تحياتى .
07-02-2020, 10:30 AM
عبدالله عثمان عبدالله عثمان
تاريخ التسجيل: 03-14-2004
مجموع المشاركات: 19192
لطيفتان وطلب أما الطلب فهو مقالكم الذي يذكره دايما ابوالقاسم حاج حمد في تعزيتكم والدتكم السيدة جمال في رحيل السيد علي وأما لللطيفتين فهما: بعثتي ج اوهايو لفصل دراسي بغانا فألتقيت د. عبدالمنعم ساتي متعه الله بالعافية حكى طايفة لطايف من وعن الفريق ابراهيم عبود وقد سكن جارا لهم في الخرطوم ٢ مما ذكرني به مقالكم الطريف هذا قصة الفريق مع الراحل عبدالخالق محجوب (برواية منعم عن راشد) قال عبدالخالق انو دخل على الفريق عبود تووووش في بيته ولا حرس ولا ديدبان مالك؟ داير أسافر... طيب ما تسافر... مالك؟! ما عندك قروش؟' ما عندك جواز؟' عندي! لكن منعوني أسافر .. يمنعوك ليه؟! ما سوداني؟ منعوني لأنو أنا عبدالخالق... و مالو عبدالخالق؟!!! هنا شعر عبدالخالق بأنو سعادة الفريق ما عرفه فقال له أنا عبدالخالق محجوب سكرتير الحزب الشيوعي قال؛ هنا أنتفض الفريق وقال لي: ما تراكا ود ناس ياخ!! والله أنا قايلك شيطان بي قرونو —-
الثانية عن الأستاذ خالد الحاج عبدالمحمود من ديم لطفي رفاعة يقول أنه يعتقد أن ما ساقه روحيا لسوح الأستاذ محمود محمد طه هي القصة التالية التي أحاول أن أحكيها على لسانه
كنا طلبة في جامعة الخرطوم ... كنا مجانين كورة ... جا الهونفيد المجري وبوشكاش .. كداري من الجامعة ماشين .. وقتها كان الأمام استدعى الأنصار فجوا الخرطوم مستعجلين نحصل الكورة ... لاحظت انو في أنصاري كبير في سنو واضح انو أول مرة يشوف عربات كتيرة ما قادر يقطع الزلط ... أتباطأت شوية من اصحابي وهم يستعجلوني يلا ياح!! يلا ياخ!! ساعدت العم الأنصاري يقطع الزلط واشتريت ليهو سندوتش وكباية عصير
تٰرى لو عرف عمنا هذا بعد حين أن هذا الشاب من عيال محمود فكيف سيكون رأيه؟!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالله علي إبراهيم
ABDALLAH ABDALLAH
عبدالله عثمان
فيس بوك
تويتر
انستقرام
يوتيوب
بنتيريست