الزول دا كانت عنده فرصة عظيمة لإقناع الإدارة الأمريكية لكنه طرشقها.. لا حولا.. شفتو اللف و الدوران كان كيف؟ المذيع أضطر يكرر ليه السؤال و هو يلف و يدور لحد ما حصره فى زاوية حتى قال كلام أظن هو ذاته ما مقتنع بيه. قاله على إستحياء.. أظنه خائف من عبدالحى يوسف مما يؤكد للإدارة الأمريكية انه لم يحدث تغيير فى موضوع الإرهاب.. و انا الان شبه متاكد ان الوفد سيعود خالى الوفاض بسبب هذا الرجل.. مسكين هو كأنه يرد على صحافيين سودانيين لا يتابعون السؤال.. و ما عارف ان هذه هى قناة الحكومة الأمريكية و هم متابعين و مسجلين حديثه. المذيع يسأل عبدالحى يكفر السودانيين و انه كفر حتى وزيرة زميلته، ويقول له كيف ستتعامل الحكومة معه، فيرد ان الشعب السودانى شعب مسالم و الوسطية و ما عارف شنو.. السؤال محدد حتعملوا شنو مع الناس الما وسطيين ..
12-03-2019, 07:15 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48791
غايتو وزير الشئون الدينية أثبت أنه دون المستوى المطلوب.
أرجو ألا تكون فرص الوفد الحكومي قد ضاعت.
المقدم ذكر للوزير السروريين وهذه آخر خطب أحد السروريين، الشيخ محمد عبد الكريم الجمعة الماضية. في الموضع 9 دقائق تقريبا، يعلق على إلغاء قانون النظام العام، ويتساءل "طيب ما هو البديل؟". ثم ذهب يصف الحكام بأنهم شيوعيون.!!!
12-03-2019, 07:34 AM
Abureesh
Abureesh
تاريخ التسجيل: 09-22-2003
مجموع المشاركات: 30182
قرار حذف اسم السودان من قائمة الدول الراعية للارهاب وقرار رفع العقوبات الاقتصادية من السودان ليس قرار امريكي قاصر عليها بل هو قرار تشارك فيه الدول المجاورة التي من مصلحتها ان يبقى السودان على ضعفه وحاجته الدائمة لعونهم ومساندتهم وهم الحلفاء الانفع لامريكا مقارنة بالسودان، على الاقل في هذا الزمان الحاضر لهذا لن تتخذ الادارة الامريكية اي قرار في صالح السودان قد يضير بمصلحة هذه الدول ولو بدرجة قليلة لهذا على حكومة حمدوك ان تجلس على الارض وتعمل بالقدرات المحلية من موارد بشيرية ومادية ولنصبر على حالنا ونطور عطائنا فهي الطريق الوحيد لنيل الحرية الكبرى التي تملكنا حرية قرارنا ولا طريق آخر غير هذا
12-03-2019, 08:24 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48791
هذه حكاية من حكاوي النظام العام الذي يتباكى الشيخ محمد عبد الكريم على إلغائه..
ـــــــــــــــــــــــــ
“ع، ز”: بائعة طعام
فى الحراسة إغتصب العساكر النساء جماعياً . زميلتى إغتصبها أربعة فى ليلة واحدة
أنا لو عندى ولد قال داير يشتغل فى النظام العام بنفضو وبقول ليهو ماعافية ليك لانه ده ما نظام عام ده انتهاك وإستغلال للسلطة .أنا مطلقة وأم لأربعة أطفال كنت قبل سنة ونصف شغالة طعمية فى سوق الفتيحاب بفرش فى المساء ببيع طعميتى وبيض مسلوق وبجيب عيش لى العاوز سندوتشات وفى الصباح كنت بقرأ بمشى الجامعة بقرأ فى جامعة النيلين. جنبى كان فى ست شاى”ح” من جبال النوبة اتعارفنا واتعاشرنا وبقينا أخوات بنخلص زى الساعة عشرة نرجع سوا هى تركب وانا أقطع الزلط أركب برضو لى بيتى . عساكر النظام العام ديل كانوا طوالى بيجوا يشيلوا مننا من غير قروش انا كنت بصبر عليهم لكن ظهر عسكرى كده كل يوم يتعشى ويشرب الشاى وبعد داك بيتكلم كلام فاضى كتير قررت انا وست الشاى اننا تانى مانديهو لا طعمية لاشاى فجاءنى قال لى أدينى طعمية قلت ليهو جيب قروشك أول فكيف الله يقدرنى وأقول ليهو كده قعد ينبذ ويهدد فينى انه والله مابنخليك تبيعى وكواريك شديدة فانا سكت ما اشتغلت بيهو بقى يجى كل يوم يعاين لى من فوق لى تحت ويعمل لى حركات وسمعت انه بيقول للناس إنى مشيت معاهو أها انا وكت سمعت الكلام ده زعلت شديد وواجهتو قدام الناس قلت ليهو أصلو المافيك ماببقى فيك وانا وكت أمشى أمشى معاك انت البوت لابسو الكلب حارسو حق الصابون ماعندو يغسل شرابو المهم فى لحظتا ديك مشى وجانى تانى يوم مع العربية بتاعت الكشة فى واحد عسكرى كلمنا قال لينا الزول ده مشى يجيب العربية قمنا دسينا حاجاتنا جوه الدكان وقعدنا ساى جاتنا العربية فيها صول قال لينا إنتو مالكم لئيمات مع العساكر مابتيعوا ليهم قلت ليهو انحنا ماعندنا شىء بنبيعو عاين لى وقال للعساكر أرفعوهن انا قلت أصلنا مابنركب عربية الكشة قلنا ليهم انحنا بنمشى وراكم بى ركشة .بعد كلام كتير العسكرى الكلمنا قبيل قال هو بجيبنا بى ركشة والصول وافق فركبنا بالركشة وصلنا القسم لقينا قدامنا 5 او 4 نسوان اول ما الضابط شافنا قال قاعدات فى الشارع وكمان معاها قلة أدب قلت ليهو والله انحنا ماقليلات أدب وأهلنا ربونا..قال لى لو عندكم أهل ما كان مرقتوا الشارع . قلت ليه انت مابتعرف أسرنا ولا بتعرف الظروف المرقتنا قال لى ماعندنا ليكم شىء غير العقاب ياستات الشاى فى النهاية قالوا نكتب تعهد ونمرق انا قلت ليهم انا مابكتب تعهد لانى رزقى فى الشارع وكان قلت ليكم بدى اولادى الجوع أكون كضابة . سألتهم انتو بتتحملوا مسئولية أولادى ؟ المهم فى النهاية طلعونا بالضمان وما دفعونا الغرامة لانه الصول نادانى قال لى انا حأخليكم تمشوا لانه عندى معاك” فهم”عملت عويرة وقلت ليهو خلاص كويس.
بعد شهر جانا فى محل بنقعد أنا ما أديتو وش مشى شرب شاى عند “ح” و قال ليها: انتى من النوبة وصاحبتك دى من الجزيرة شنو الجمعكم على بعض. قالت ليهو لمتنا النيران دى ومعيشة وليداتنا. قال ليها ماتكلميها لى أنا دايرها . قالت ليهو الزولة دى صعبة وسكينها فى ضراعا كلمها براك انا مابكلمها.
بعد أيام وانحنا راجعات لقيتو واقف لى جنب الزلط قال لى أركبى أوصلك قال لى انا دايرك بيتكم فيهو منو ، خلاص أنا عندى بيت فى مربع “7″ بسوقك ليهو قلت ليهو أمشى بيتك بالحلال ولا الحرام يعنى؟ قال لى انا دايرك راجل ومرا. قلت ليهو نزلنى هنا انا مازولة كلام زى ده .
بعد أيام جانا العسكرى الرذيل الزمان مع عربية الكشة خمونا وخموا عدتنا وساقونا لقسم النظام العام فى محطة “6″ دخلونا الحراسة لقينا 3 نسوان قعدنا معاهم وطبعا مافى نوم صاحين لحدى الساعة واحدة صباحاً دخلوا علينا العساكر أربعة وكل واحد مشى على واحدة فى النسوان أنا اتكرفست على الحيطة والعساكر ما اشتغلوا بى النسوان بقوا يتصارعن معاهم .بعد عشرة دقائق كده جاء عسكرى ساقنى تراهم منتظرين بى حضرة الصول دخلونى عليهو قال لى “أبيتى تجى بيتى جبتك فى بيت الحكومة، انتى النوعية المابنفع معاها الا كده. خفت وقررت انى أغشو قلت ليهو انا ماعندى مشكلة بس هنا الحته ما مناسبة جرانى على كنبة قال لى تعالى هنا قلت ليهو انا ذاتى ما مستعدة والناس هنا داخلة ومارقة فى النهاية اقتنع لكن بعد ساعتين وزيادة وقال لى خلاص سوقى صاحبتك وأمشوا رجعت الحراسة عشان أسوق”ح” لقيتها راقدة ماقادرة تتحرك قالت لى : من انتى مشيتى العساكر ديل بيشتغلوا فينا عدلة وقلبة الواحد يفوت يجى أخوهو 4 عساكر رقدوا معاها وقدام بعض اى عسكرى مع واحدة والتانى عينو فيهم جماعى كده.بعد تعب قدرت تقوم . مرقنا بى كرعينا لحدى الشارع الرئيسى لقينا عساكر فى نقطة ارتكاز حكينا ليهم اننا مارقات من الحراسة شافوا حالتنا وبكاء “ح” وصلونا لى شارعنا . ثلاثة يوم “ح” ماكانت بتقدر تقيف على كرعينا، أول مابقت كويسة رجعت الدلنج طوالى كرهت الشغل والشارع . انا قفلت موبايلى وخليت الشغل فى الشارع .جمدت الجامعة ومرقت بتى الكبيرة من المدرسة وقعدت فى البيت أشتغل طواقى واتاجر فى ملايات من شدة الزعل جاتنى غدة بتعالج منها هسى . ماعندى اى مصدر دخل عندى ود أختى بيصرف علينا يوم يجيب حاجة نأكل يوم مابجيب نقعد على الله وربنا كريم.
12-03-2019, 08:52 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48791
قناة أمدرمان الفضائية استضافت الشيخ مزمل فقيري ليقول هذا الكلام، وهو ما قصده مقدم حلقة قناة الحرة عندما تحدث عن الشيوخ الذي يطلقون عبارات التكفير إلخ..
الأسئلة عن التكقير وخطاب الكراهية ماذا فعلت أو ستفعل الحكومة أعتقد هذا شان وزارة الداحلية والأمن لإتخاذ ما يجب للملاحقة القانونية
مستغرب لوف حمدوك لمريكا يضم وزير الشؤون الدينية ووزيرة رياضة ديل حيساهموا فى شنو لرع الحظر والإتنين ما عندهم نظائر غى الحكومة الأمريكية .ز يعنى وزير الدين يقول ليهم خطانا الدينى إعتدلن ووزيرة الرياضة تقول ليهم نشطنا كرة القدم النسائية !!!
غايتو فسحة وتغيير هواء فى توقيت غير مناسب فى امريكا نهاية سنة وموسم أعياد وترم مزنوق فى إميشمنت الكونجرس وفاكرناها طق حنك
12-03-2019, 09:34 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48791
أفتكر وزير الشئون الدينية مهم لكي يوضح ماذا فعلت وزارته لترشيد الخطابة في المساجد وفي مخاطبات السلفيين التي انتشرت في السنوات الأخيرة وهي لا تزال موجودة حتى الآن. طبعا هناك دور لوزارة الداخلية في حفظ الأمن ومنع التكفير ومحاسبة من يرتكبه. هذا نموذج لأبوبكر آداب يتحدث فيه عن مدير المناهج الدكتور القراي قبل أيام قليلة:
12-03-2019, 09:43 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48791
مع كل هذا الهوس وما ينطوي عليه من خطورة إلا أن الحكمة تقتضي من الولايات المتحدة أن تقوم برفع إسم السودان من قائمة الدول الراعية للإرهاب، وذلك منعا لانهيار السودان.
ــــــــــــــــــــــــــ
حمدوك: استمرار العقوبات الأمريكية سيعجل بانهيار البلاد Last updated ديسمبر 2, 2019 7 مشاركة
قال رئيس الوزراء د.عبدالله حمدوك إن العقوبات الأمريكية المتبقية ستعجل بانهيار البلاد (الهشة)، محذراً من أنه إذا أصبح السودان دولة فاشلة، فإن حجم الدمار سيزداد وقد تجد جماعات داعش فرصتها للانتشار بالمنطقة، وأضاف: حمدوك بعد الثورة لا يرى مبرراً لاستمرار العقوبات الأمريكية لاسيما وأن الحكومة الانتقالية الحالية تتعاون مع كل العالم لمحاربة الارهاب.
وحث حمدوك في حديث خاص لـ “الإندبندنت” المسؤولين بالولايات المتحدة على شطب إسم السودان من لائحة الدول الراعية للإرهاب، وقال إنه إذا سمح المجتمع الدولي بأن يصبح السودان دولة فاشلة، فإن الفوضى ستنتشر في كل الأقليم.
وأضاف حمدوك: الحكومة المدنية التي تشكلت بعد الثورة تسعى جاهدة لفك العزلة عن السودان خارجياً، وتأمل في أن يستجيب المجتمع الدولي لمطالبها، وشدد على أن موقع السودان الجغرافي والسياسي، المتاخم لسبع دول يجعل انهياره مدمراً لكل محيطه الإقليمي.
وشدد حمدوك على أنه إذا فشلت حكومة الثورة السودانية، فإن الانفلات سيكون كبيراً وقد يصبح وجود داعش في المنطقة أكثر من ماهو في سوريا وحذر من أن العقوبات تضعف الحكومة المدنية، وتمنعها من تلبية مطالب الثورة.
الجريدة 7
12-03-2019, 10:59 AM
خضر الطيب
خضر الطيب
تاريخ التسجيل: 06-24-2004
مجموع المشاركات: 10279
شكراَ سعادة الوزير نصر الدين مفرح و للزميل منتج اللقاء و الأخ المذيع دا ما لقاء تلفزيوني .. دا تحقيق جنائي كيف سمح سعادة الوزير بهذا اللقاء المهزلة ؟ و كيف ارتضيتم لقناتكم بمثل هذا اللقاء و لماذا اخترتم وزير الشئون الدينية ؟ هناك اسئلة يجب ان يسأل منها رئيس الوزراء و هناك اسئلة يجب ان تسأل منها وزيرة الخارجية او من ينوب عنها اتمنى في اللقاءآت القادمة ان تصححو هذه الأخطاء لانها خصماَ على قناتكم و على من تستضيفوهم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة