مدخل : ( يا حمدوك مسافر وين لينا بنيتك عملت شين ) ومني أنا : ( يا حمدوك مشيت وين خليتنا ولينا بنيتك مطلعة زيتنا ) . اها نخش في النص او ( متن الموضوع ) زي ما بقولو الجماعة . العنوان الفوق ده كواريك واحد حكمو عليه بالاعدام شنقا حتى الموت وهو شكلو نص القرار ده رايح ليه ما فرزو شنو بالضبط كده ، يوم التنفيذ جابوه يتلفت ويتكشم زي ام العروس ولا هماه طلعوه المشنقة ولفو الحبل في رقبتو وغطو وشو وزردو الحبل تب ورفعو وفجأة بدأ يكورك ( دقيقة دقيقة يااخي دقيقة يا مولانا انت ) ، الجماعة نزلوه وفتحو وشو قالو بتكون عندو وصية اخيرة قالو ليه شنو ؟؟ وصيتك شنو ؟؟ قال ليهم :( أنتو بتبالغو والله بالطريقة دي ما ح تكتلونا يااخي ) اها المدخل هو هتاف ( مولانا ) الجميعايي رئيس منظمة أنا السودان بعد ما لبس مريلتو وشاف معاه كم موظف وموظفة من ناسو وقال عاوز يعمل مظاهرة احتجاجية علي قرار الوزيرة القاضي بحل منظمات طيور الظلام ولصوص الظلام وشيوخ الضلال من لدن ستنا الاولي وداد ، مرورا بمنظات فار الفحم وزوجته ومن تبعهم بلهطان شديد زي صاحب المظاهرة العشرينية الجميعايي . هذا الجميعايي الذي كان يعيش في كنف الانقاذ مرة معتمدا ومرة مسئولا في التنظيم وأخيرا لقى ليه عضم كبييير لبد يكوضم فيه ، والله ما فتح عليه بي أي كلمة حق ولا شفناه يوم واحد في مظاهرة أو موكب إلا بعد ما سقطت بتضحيات الشهداء الكرام والجرحي والمصابين والثوار من الجنسين ولغاية ما ( بتنا لينا ) عفصتو في ضنبو وهو بلهط ، قام مفزوع ولما ليه كم وعشرين موظف ومريلة واحدة من الخلعة ما معروف لابسها قلبة ولا عدلة وقال يا الشارع جاك زول وهتاف ( يا حمدوك مسافر وين لينا بنيتك عملت شين ) . اول شئ يا مولانا لينا دي ما طالبة مدرسة لا بت صغيرة بتلعب مع بناتك في الشارع ودقت واحدة منهم . لينا دي وزيرة ثورة وحمدوك ما ولي امرها لا هو قاعد ليه في راكوبة قدام بيت عشان تجي تكورك ليه زي كواريكك دي ، حمدوك ده رئيس حكومة ثورتنا وثورتنا دي واحدة من أهم اهدافها تفكيك بقايا النظام ومنظماته وكوادره تحت شعار واحد معروف ( الحل في البل ) والبل ده يا مولانا انت قايلو بل موية ولا بل ملابس بي خرطوش ما هو البل المطلوب ال زي ده زااااتو ( إيقاف كل المنظمات المشبوهة ) القايمة بروس دي وبتمصو فيها ٣٠ سنة لا حسيب لا رقيب . البل يا مولاي هو زي عفص ضنبكم ده والفطام من الشطر ال بترضع فيه أنت واخوانك من منظمات وهمية عملتوها انتو وخليتو أي شغل ومشغلة وبقيتو تصرفو منها علي جماعتكم صرف من لا يخشى الفقر واي واحد منكم سجل ليه كم منظمة وبقى ملياردير من ( سيدة السودان الاولي ) لي النائب الاول وهكذا ( دلاليك ). اها العملتو لينا ده وخلتك لأول مرة تطلع شارع في مظاهرة ده اسمو ( البل الثوري ) ف ما تزعجونا ساي بكواريكم دي لسة الغريق قدام وبتنا لينا دي وولدنا حمدوك لو ما بلوكم نحن زاتنا ح نبلهم لانهم حكومة ثورة الحل ابو بل لأي فساد او لص او كوز او بقايا نظام . وقع ليك الموضوع يا مولانا عشان ما تزعج حمدوك ساي وترجعو من سفروا يقول في كارثة حاصلة ؟؟ خلي الرئس يسافر سفرو وخلي بناتنا واولادنا يواصلو بلهم ، بس اقترح عليهم يشرحو ليكم قبل كل بلة مجيهة انو الموضوع ده بل عشان لا تكوركو زي زولنا الشنقوه فوق داك لا تطلعو مظاهرات عشرينية ام مريلة واحدة قبل ما تعرفو الموضوع شنو . وصدقني اخير ليك لينا دي انت وشيخنا عبد الحي داك ال قال كيف يوقفو منظمتو وح يستانف احسن تفكو دربها . و غايتو موضوع شيخ عبد الحي ده زي موضوع قصة ست العرقي الشرب عندها واحد وابى ما يديها حقها قالت ليه خليتك لي الله بخلص حقي منك يوم القيامة قال ليها لو مرة جيبي سيرة الكلام ده هناك ف أنت يا شيخ عبد الحي برضو لو راجل امش استأنف وقول ليهم المنظمة تبع وين وقروشها من وين ووديتها وين ؟؟ اما حمدوك لو عرف ح يقول ليكم لينا كانت حنينة عليكم أنتو عاوزين بل اخشن كمان . ف انه البل يا مولانا الجميعايي اسمو بل ما ( عملت شينة ) لينا دي ٫ لينا بلتكم بس. بطلو هرجلة وخلونا ننوم .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر جبرونا
فيس بوك
تويتر
انستقرام
يوتيوب
بنتيريست