نكتة شيقة مع السر قدور حول حقيبة الفن (توجد جائزة تلات آلاف دولار على هامش النكتة)!
أيام بحث الحقيبة اتصلت من ضمن ما أتصلت بهم من العارفين بالمجال الأستاذ السر قدور.
أول ما رفع الخط وقبل السلام والكلام وبحسه الفكاهي المعروف، قال لي: بتعرف الكورية والصينية.. طبعا بعرف دا سؤال دا يا استاذ.. قال لي لا، الكلمات جاية من وين.. غلبني، فأجاب: الكورية من كوريا والصينية من الصين.. ثم قهقه السر قدرو قهقته الشيقة تلك وقهقت معاه بصدق ومن القلب (أول مرة أعرف المعلومة دي، أن الكورية جاتنا من كوريا والصينية جاتنا من الصين).. شكرا للأستاذ.
لكن أنا ما مشيت ليه فاضي.. قلت ليه الدور جاك.. بتعرف: حقيبة الفن؟.. فقهقه على طول حتى خلته اغمى عليه "يعني دا هسا سؤال يتسال للسر قدور".. ثم أجاب الإجابة التقليدية أن إسم الحقيبة جاي من شنطة المذيع المعروف داك ومقدم برنامج حقيبة الفن الأول والقصة المعروفة ديك.. وقهقه مرة أخيرة على عجل.. قلت ليه لا ما كدا يا أستاذ، أصبر علي أحكي ليك: الحقيبة من نمط الزجل.. نوعها الشعري زجل ومفترض إذن تسمى "زجل سوداني" نوع شعري معروف في المشرق والمغرب العربي منذ مئات السنين.. مافي نوع شعري يا أستاذ بسموه بإسم ماعون بشيلوه فيه.. وكشفت ليه الأسرار كلها.. لو كان كشفتو السر دا من زمان كان الزجل السوداني انتشر عند كل الشعوب المتحدثة العربية لان كلهم عندهم نوع من الزجل والزجل السوداني من أروع انواع الزجل في العالم من وجهة نظري.. بس مافي زول عارف.. لان نحن عندنا شي ما عارفناه شنو فسميناه باسم الماعون الشايلنه فيه.. عيب والله مننا! .. اذا انت ما عارف اسم بضاعتك المسوقها ونوعها شنو ح تبيعها كيف؟. طبعا ما ممكن.
هسا اللبن داخل التمنة لبن والتمنة تمنة صاح؟ ، قال لي صاح.. وطيب!. وفي الختام رصيت ليه الحقيقة عارية: أنتو يا أستاذ كنتو كل الوقت الفات دا بتونسونا كالأطفال الصغار بقصص سماعية معظمها أو كلها وهمية وخرافات لم تحدث.. فصمت ولم يقهقه مرة ثانية. ولم أعرف رأيه حتى الآن في الموضوع.. لكن شعرت أن في صمته تأمل!. ---
ملاحظة: السر قدور ذاكرة ناصعة وتاريخ مهم كلنا نشتغل معاه إذا عندنا معاه تواصل.. انا ما عندي هسا.. ممكن يتذكر حاجات مهمة ما كان قايلها مهمة وعلى ضوء الأسرار التي كشفها لنا البحث في الحقيبة.. هو تاريخ مهم جدا.
الجايزة: كمان هو قال مرة في كتاب للعبادي اسمه استاذ الاغاني اصدره سنة 1925.. الكتاب دا إذا اتلقى بكشف أسرار إضافية مهمة.. العبادي يملك السر كله.. انا قبل دا رصدت تلات آلاف دولار لمن يحصل لينا نسخة حقيقية من هذا الكتاب.. والعرض ما زال قايم
الحب: تحية للأستاذ السر قدور ومحبة وإحترام وأتمنى أن يكون في أتم الصحة والعافية.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة