تفة قشرة تسالي في قفاك اجمل من غربة العالم الاول .. يا عم علي :)

Quote: نعم الحبيب ( الغربة صعبة لو في الجنة )

Quote: المرق من دارو ... قلّ مقدارو

Quote: صدقني .. الحبيب قباني .. أنا من أمس مزاجي ( زيرو) من الغضب تصريح ( الخطيب ) الحلفاوي قريبنا بتاع الحزب الشيوعي .. عن الامارات والسعودية وهناك سبعة بواخر في بورتسودان .. مشتقات بترول .. وأنا السنة دي بدأت في زراعة القمح مساحة معتبرة ( تمهيداً للعودة ) خفنا من الجازولين .. اصابني الوهم لأن مع الاعراب ( ما في ضمان ) ممكن يرجعوا البواخر والسنة تضيع ( الشتوي) والقمح سعره مجزي جداً 2500 للشوال .. وأنا في غمرة تفكيري حصلت البوست .. وطبعاً أي بوست بأسمك لا بد لي المبادرة ..

Quote: يالله عليك ياحبيب

Quote: المرق من دارو ..قل مقدارو ...حكمة أوسكار....لكن خالتي التي تعيش في مونتريال في كندا لها رأي آخر..كنت بتونس معاها قبال شوية وتحدثنا عن هذه الحكمة وقلت لها انها حكمة اوسكار وان أي شخص يترك وطنه كي يقيم في دولة أخرى فانه يعيش في تلك الدولة الجديدة مواطن درجة ثانية

Quote: والسؤال المهم يا قبة ما قلته ليك: هل من عودة هل ؟؟ يعني يجي يوم كدا .. تلبس العراقي المهبهب وتقعد في ضل النيمة أو الليمونة في الحوش تفطروا (ناس البيت الكبير) .. تجي الجبنة .. ودا داخل ودا مارق ودا ماشي السوق مرات بشوف أولادي يستغربوا في الحكاوي دي وأظنها أصبحت حكاوي .. وأماني حبيسة النفس والوجدان إيييييه دنيا تحياتي للجميع

Quote: اححح . مالك علينا ياخ

Quote: يعني يجي يوم كدا .. تلبس العراقي المهبهب وتقعد في ضل النيمة أو الليمونة في الحوش تفطروا (ناس البيت الكبير) .. تجي الجبنة .. ودا داخل ودا مارق ودا ماشي السوق

Quote: يا أستاذ ود قبانى سلامات وتحايا مالك علينا يا صديق فتقت المواجع فعملنا خلف دور عقلى رحعنا لأيام--؛ بس نقول يا حليلا. وجانا الراجل الأصيل على عبدالوهاب فتح لينا باب الوحوحة الجد لامن جاب سيرة الخرطوم بحرى،مصدر العشق ومنبع الحميمية ومنبت الطفولة ومرتع الصبا ومسرح الشباب. خلجات كثيرة دارت فى رأسى ولكنى سأقتصر على ملاحظتين: أولاهما التسالى لكن لازم كان يكون من عمك أحمد إب كراع الذى كان يجلس من الساعة الرابعة إلى الساعة السابعة فى التلتوار المقابل للمجلس البلدى ومكوم الجرم مطنطر فى طبق سعف غريق زى الطشت وتكون مباريات الليق مولعة ولما المبارة تخلص يكون كل واحد فينا كمل قرطاس بى خمسة قروش. فلازم نشترى زوادة السينما قبل ما يكمل الجرم. والله لامن السينما تنتهى تشوف أكوام القشر فى الواطة والكراسى الجمبك والقدامك وحتى فى داخل الفانلة و فى جيوبك كمان. ياخى والله أنا مستعد أدفع أى مبلغ عشان ألقى لى تسالى جرم زى حق عمك أحمد أب كراع الذى فقد رجله من الركبة فى حادث حركة كما قيل. لكن دا أحسن زول فى الدنيا بيعمل تسالى. والله أنا جربت التسالى فى أكثر من 19 بلد فى العالم وكمية من مدن السودان. لكن زى جرم عم أحمد دا ما لقيت أبدا فى طعمة وتساوى أستواء كل حبة لأنو لامن تقزقز حبة كأنك بتكرر فى أكل الفاتت. الله يسامحك يا قبانى. النقطة الثانية متعلقة بى قولك Quote: كما قال سيدنا حميد رحمه الله : دي الجنة ام نعيم دي الجنة ام قصر يا عبد الرحيم الا ورا القبر دى ذكرتنى بى رباطابية خالة واحد صاحبنا شديد. أخوه مرة قال لى خالتو لامن قالت ليه "يا ولدى أنتا تعبان إرتاح شوية وبعدين وصل بنيتى ووليداتها بيتم". قال ليها " والله يا خاله مافى راحة إلا يوم المناحة" فبدون تفكير ردت عليهو فورا: "والضمان شنو؟" فيا عزيزى كتبت علينا مغالبة الغربة ومصارعة الأشواق بس الصبر غيره ما فى! شكرا ليك ولى كل المتداخلين البيورونا جانب جميل من دواخلهم وظرفهم.