|
|
|
 Re: السياحة في سودان اليوم: كمنشط إقتصادي وكم� (Re: محمد جمال الدين)
|
السياحة .. حلقة "2"
سلام ليلى عبيد العزيزة وشكراً للمجاملة الجميلة والكلام التشجيعي السمح.. هي المحرية فيك.
أما إذا كانت وزارة السياحة أو مفوضية السياحة أو سميها ما تشاء كانت وزارة هامشية للترضيات نحن في هذا العهد الجديد كلنا رضيانين ولا أحد يطلب الرضا عبر منصب أو موقع بل نراها مسئولية جسيمة تستحق الهروب من أماها.. بفتكر زمن الترضيات دا كان في العهد القديم. لأن لا موقع مفترض يكون للترضيات بل لخدمة الشعب .. نحن رضيانين وسعيدين لما جرى ويجري ونعرف أنه ليس كاملاً بعد ولكنه قابل للتطوير والتكميل بالتفاني والتجرد والروح الثورية العالية أنا واثق بأننا بنمشي لي قدام.
أنا بفتكر أن وزارة السياحة مهمة جداً في المرحلة القادمة مرحلة الانفتاح على العالم لأنها لا تشبه الماضي.. في الوقت داك النظام كان محاصر وهو كان نظام قميء على مستوى وعيه وفهمه وتصرفاته وقد شرد الإنسان السوداني نفسه ناهيك عن استقبال ضيف آخر.. لا يستطيعون.
لذلك فعلاً المرفق الزي دا أسأوا سمعته مع أن السودان من المفترض يكون من الدول الرائدة في السياحة بما له من آثار وجبال وصحراء وأنهار.. وما له من طبيعة الإنسان السوداني نفسه الذي يتميز بالكرم. واستقبال الضيوف والذي يحترم الغريب، حتى أن الطيب صالح دُهش وقال أنه لم يجد شعب في العالم بحترم الأغراب بالطريقة دي زي السودانيين!.
والسر بسيط في تقديري وهو أننا في الحقيقة وعبر التاريخ كان عندنا أراضي واسعة وخصبة ووفرة في المياه وبالتالي أهلنا وجدودنا كانوا فاتحين السودان زي اللوتري الأمريكي وكانوا محتاجين ناس عشان يضيفوا ليهم في الاقتصاد مثلاً ناس كانوا بعرفوا حدادة ببيعوا حلل أو بعرفوا حاجات تانية أو بعرفوا حاجات هم ما بعرفوها أو بعرفوا زراعة أفضل بعرفوا فقه بعرفوا مسيحية بعرفوا دين.
أهلنا استقبلوا الناس ديل كلهم كما تفعل كندا وأمريكا الآن في الوقت الحاضر لأسباب عملية.. بالتالي نحنا عندنا عجينة عتيقة ومخيال موجب .
ووفقاً لذلك الإنسان السوداني في ذات نفسه موضوع سياحي (أنا جاد) الناس ممكن يجوا يشوفوهوا ومعارفنا من الغربيين لما يمشوا السودان بندهشوا من حاجات كتيرة جداً منها الصحراء وبقولوا لينا بلدكم جافة وجميلة وهم طبعاً بكرهوا المطر لأن المطر بصب عندهم كل يوم وبقولوا النجوم والبلد كلها جميلة جدا.
وفعلاً بلدنا مفتوحة على الجهات الثمانية مش الأربعة بس شمال وشرق وجنوب وغرب وعلى الأبد والأزل .. ومفتوحة التحت والفوق: مفتوحة على السماء الفوق دي ودي أعظم الجهات لما ترقد في السرير وتعاين فوق ما بتقدر تنوم من السماء المرصعة بالنجوم هنا في ضباب والسماء قريبة جداً ما بتشوف أي نجوم السماء قميئة جداً ودائماً مرعدة وممطرة.. فنحنا عندنا حاجات كتيرة جداً لنبيعها للناس وبشكل محترم وعادل ليتعلموا ويستفيدوا من هذا الإنسان الكائن السوداني هذا الأسطورة العجيبة الغير موجودة على كوكب الأرض.
الكلام دا صحيح جداً نشهده بنظرة بسيطة للواقع المعاش.. نعرف جميعاً أن عجينة الإنسان السوداني في العموم عجيبة خالص يعني ممكن السياح يجوا بس يسلموا على الزول دا ويقعدوا يشربوا معاهو كباية شاي ويركبوا الطيارة راجعين وح يستمتعوا وأنا واثق (ما تنسي أخوك درس أنثروبوجيا ولا أزكي نفسي فقط أزعم أنني أتحدث عن دراية) .. وحصلت هنا في أوروبا لما وحدة هولندية (مجرد مثال للدلالة خذوه بلطف) قالت دايرة تمشي المغرب أو القاهرة أو السودان أصحابي قالوا لي لأ خليها تمشي مكان تاني لأنو السودان حالياً ظروفه سيئة وح تكرهنا كلنا وحصل العكس تماماً.
ممكن تتابعوها على الفيس بوك وممكن تستفتوها هي مشت السودان بظروفه الكانت سيئة أو قل أسوأ .. وأكتر حاجة عجبتها هي الإنسان السوداني وحتى قالت هي تاني ما راجعة وأهلها بحنسوا فيها تحنيس إنها تجي راجعة وحتى الحاجات السلبية عجبتها.. قالت النسوان بتحننوا ويتدخنوا وقاعدين أميرات وكلام كتير.. يعني فعلاً نحن نستطيع أن ننهض بالسياحة كواحدة من المرافق التي تمثل دخل للدولة وممكن يكون دخل يدهش الجميع يعني ممكن تكون من أفضل الوزارات الممكن تجيب دخل للخزينة العامة وتجيب سمعة جيدة للسودان وبالتالي بتعمل شنو إذاً؟
لما يكون عندنا سياحة جيدة ونكون منفتحين ونستقبل الناس بشكل جيد وعندنا مرافق ولو بسيطة ودي ممكن نعملها وعندها نستطيع إذاً أن نبيع منتجاتنا الأخرى.. المنتجات المادية زي الحاجات البتعملها المصانع أو المزارع كالمنجة المجففة أو غيرها بنقدر نبيعها للعالم وبنقدر كمان نبيع حاجاتنا المعنوية كالأدب والشعر والروايات وكلها بتتباع بقروش.
أنا بقول إننا نستطيع أن يكون لدينا خيال ونستطيع أن نبدع.. السودان دا أرض واسعة جداً وليست للزراعة فحسب والصحراء دي كلها ممكن نعملها مشاريع ممكن يكون عندنا مشاريع لغاية جبل عوينات في الصحراء دي.. وأكبر هدف أنا دائماً بحلم بيهو إننا نستغل المساحات الواسعة في السودان دي والتي تدهش الناس واللي فيها تصحر بس حالياً ممكن نعمل بها حاجات كويسة جداً وممكن نزرع حولها شجر.. يعني المرافق الحنعملها.
تحياتي، محمد جمال الدين.. (تلك كانت حلقة من الكلام حول تحويل السياحة إلى منشط إقتصادي)
تسجيل صوتي محول إلى كتابة بواسطة الأستاذة أمنية جابر
| |
 
|
|
|
|
|
|
|
 Re: السياحة في سودان اليوم: كمنشط إقتصادي وكم� (Re: محمد جمال الدين)
|
السلام عليكم
موضوع مهم .من الاولويات عمل اعلامى يبصر الناس بقيمه السودان كبلد سياحى -لغايه الان الناس لما تقول سياحه يجى فى بالها السياحه الاثاريه البجراويه والبركل مثلا .ليه مايكون فى شغل لاقتراح اماكن سياجيه اثاريه او طبيعيه على امتداد السودان. اضافه للاهتمام بشىء ذكرتو وهو المنتدعات الصديقه للبيئه يتخلى الانسان فيها عن التكنولوجيا الحديثه ليحيا على الهدوء والبساطه. ثم بعد ذلك تجى عمليه شكل الترويج عالميا هو اللى حيلفت الانتباه وبشكل اوسع ويضع السودان ضمن الدول الاعلى فى قائمه السياحه الافريقيه.
| |
|
|
|
|
|
|
|
|
|
Re: السياحة في سودان اليوم: كمنشط إقتصادي وكم� (Re: منتصر عبد الباسط)
|
أهلا عاصم.. معاك
| Quote: موضوع مهم .من الاولويات عمل اعلامى يبصر الناس بقيمه السودان كبلد سياحى -لغايه الان الناس لما تقول سياحه يجى فى بالها السياحه الاثاريه البجراويه والبركل مثلا .ليه مايكون فى شغل لاقتراح اماكن سياجيه اثاريه او طبيعيه على امتداد السودان. اضافه للاهتمام بشىء ذكرتو |
ايوة، هناك فهم قاصر للسياحة في السودان عمره عمر الديكتاتوريات في البلاد والقبضة الأمنية وتاريخ الحرب الباردة!
| |
|
|
|
|
|
|
|
|
|
Re: السياحة في سودان اليوم: كمنشط إقتصادي وكم� (Re: محمد جمال الدين)
|
سلام منتصر
Quote: الأخ محمد جمال الدين لك التحية
كلامك جميل ومثل هذه المواضيع هي التي
تستحق الإهتمام
وللأسف جل قراء المنبر لا يميلون للحوار
في مثل هذه الإمور الهامة ونرجو أن تتغير
هذه الميولات نحو المثير وإهمال
الأمر الخطير والأولى بالإهتمام والتفكير
كهذه المواضيع. |
شكراً للمجاملة الجميلة.. معاك أن اللحظة التاريخية تحتم علينا أخلاقياً أن نهتم بالهموم العامة مع العناية بالأولويات والأشياء
الجوهرية ولكن نعطى الحق لمن لا يريد ونعذر من لا يستطيع.. ونواصل وحدنا المسيرة التى نراها خيرا.. وان صح زعمنا في النهاية الناس بتجي!ّ
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
محمد جمال الدين
Asim Ali
منتصر عبد الباسط
فيس بوك
تويتر
انستقرام
يوتيوب
بنتيريست