|
|
|
 Re: إنها امرأة من العبابسة(قصة قصيرة) منحنى ال (Re: منصوري)
|
استطراد:-
ولعل القارئ المنصوري يعرف اتساع النيل في هذه الرقعة، خاصة أيام الفيضان، كانت هي لاتبالي بذلك وتقوم بواجبها على أكمل وجه
متن الموضوع:-
حينما دلفت على دارها كان عمري حوالي السابعة إلا بضع أشهر معدودة،حضرت من أهلي ومعي ثوب للغطاء وشنطة ملابس صغيرة، وبعض الملابس، فكانت توصي بناتها بأنني شقيقهم الأصغر فكانوا لايسمحون لى بأخذ ملابسي متسخة الى أسرتي وإنما يقومون بغسيلها، وتطبيقها وليس مكوتها، لأنه لاتوجد مكواه وقتها.كانت تطعمني أكثر مما تطعم بناتها وتطمئن بنفسها على فراشي ونومي، وتشجعني على الصلاة وأنا في هذه السن المبكرة، كنت أرى صلاحها ظاهراً، حيث أنها لاتحب أن تنم في أي أحد كان ومهما كان، وكانت كثيراً تنهي جارتها التي تزورها بعد صلاة العشاء( بلد النبي.. بلود) كانت كثيراً ما تنهيها عن النميمة حتى تعلمت منها جارتها هذه ، ترك الغيبة والنميمة، وهي عادة مستشرية في هذا الجزء من شمال السودان.. وطالما توقفت جارتها هذه عن النميمة، فقد وجدت الروضة بابكر حقاً عليها أن تقدم لها منفعة، وقد كان منزلها مجاوراً لها، كانت تذهب لها في الصبح وقبل شروق الشمس ليصليان في جماعة،وقد وجدت في فناء الفقه، أنه يمكن للمرأة أن تؤم المرأة..
كانت الروضة لا تأكل حراماً، فإن قبضت يدها مالاً مشبوهاً، كانت تقذف به في لجة النيل، وكانت تقول لا أعطيه لأحد لكى أؤذيه!
| |
 
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
من ميز الروضة بابكر:-
1 الهمة العالية:-
ولعمري أن الهمة العالية هي إحدي صفات المؤمن الحق، وهي النية، التي لايتم صلاح عمل إلا بها،( إنما الأعمال بالنيات، وإنما لكل امرئ ما نوى)و( نية المرء خير من عمله)و( إذا نوى أحدكم بسيئة ولم يعملها محيت، وإذا هم أحدكم بحسنة ولم يعملها، كتبت له حسنة) عجيب أمر المؤمن كله خير..
ولذلك هذه المرأة التي نحن بصدد الحديث عنها، كانت إمرة ذات همة تناطح الجبال،مرة وفي موسم شتوى كما ذكرت، في سيرة عمنا حسن أحمد الفكي،أدخل زراعة الفول السوداني في الموسم الشتوي، فجاء للناس بالبذر ، وأعطى كل مزارع جوالاَ من الفول السوداني لكي يقوم بتقشيره، وتجهيزه، لكي يصبح بذراً للموسم الجديد، أخذت أمنا الروضة نصيبها من البذر، ولكن أثناء إزالة القشرة عن الحبة، أثناء عملية التنظيف، كانت أحياناً( تنفشق) الحبة ولا تصبح بذرة صالحة، فكانت بلد النبي جارتها، وهم يلحون القشر عن حبة الفول السوداني، كانت بلد النبي تأكلها، تلك الحبة التى ( انفشقت) وأصبحت غير صالحة للأكل، بل بلد النبي لم تكتفي بأكل الحبة الغير سليمة! وإنما دعت الروضة نفسها لأكلها، فرفضت الروضة، وقالت: هذا حرام، لا أكل رزقاً غير رزقي..
أفتيت لها على الفور وأنا قربها، فتوى سماعية، سمعتها من حسن الفكي نفسه، قلت لها حسن الفكي نفسه قالSad أنا عارف في حبوب بي تنفشق، البي تنفشق أديها حنكك طوالي!) وقد علمت أن بلد النبي سمعت هذه المقولة مباشرة من حسن الفكي، ولكن بلد النبي كانت تمزح( وعايزة تجس نبض الروضة) لم تكتفي الروضة برأيي وراى بلد النبي، وإنما قامت بنفسها وسألت حسن الفكي الذي أكد لها على الموضوع!
عادت الروضة، أكثر إصراراً على أن لاتنفشق حبة، وقالتSad حسن الفكي أدا الناس الماعندهم ضمير إذن عشان عمداً يفشقوا الحباية عشان ياكلوها).. قلنا لها أنا وبلد النبي( أصلوالما عندو ضمير بلا تنفشق ممكن ياكلا، عاد حسن الفكي عايز يحرس ضمير الناس! كل زول وضميرو!)
كانت ورعة للغاية.. وصبورة وعندها همة عالية، لاتكل ولاتمل من خدمة الناس لها بنتان وولد.. الولد سمته محمد على التاجر الكبير في سوق النعوفاب( محمد ود الخليفة ود اب شوال) كان جسمه ضخماً ولذلك لقبه المناصير( شوّال) فصارت كلمة( شوّال ) هذه على ابن الروضة محمد وصار لاينطق الناس غير كلمة شوال هذه حتى هنالك أناس لا يعرفون اسمه الحقيقي من كثرة تداول اسم شوال.. لها بنتان توأم.. أم الحسن وأم الحسين
أم الحسن تزوجها الرجل الورع، بابكر حسن بابكر شقيق كركاب معلم الأجيال، وأم الحسين تزوجها، محمد أحمد عثمان عبادي، شقيق حاج الشيخ عثمان عبادي ووالد أستاذ الأجيال هاشم الشيخ، ويلغب بـ( اب تماني) واب تماني هذا أم الحسين لم تكن زوجته الأولى، وإنما كانت زوجته الأولى أيضاً بنت للروضة قد توفيت في الوضوع، تسمى فاطمة( بت عـَوَّجات)
بت عوجات سموها على حبوبتها فاطني بت عوجات، وعليها تسمي جزيرة صغيرة في قلب النيل ناحية مشرع المدارس، ( حجار بت عوجات) كنا نسرق منها بيض الوزين، هذه الجزيرة الصغيرة، وكانت استراحة لنا لما نقطع البحر بي صدرنا ونعوم ، نستريح فيها شوية، ثم نقطع البحر من الغرب الى شري، بالرغم من وجود التماسيح ولكن براءة الأطفال التي لاتعرف الخوف.
توفيت بت عوجات في عمر34 سنة، في الوضوع، كان عمري خمس سنوات، جايين من الشرق أنا وأمي من مباركة العيد الكبير على أهلها هناك، لما جينا قرب ترب ودي شري في التمر التحتو، كوركت لنا الحرم بت سليمان خالة أولاد بروي وهي متزوجة في قرية الضقولة، وقد كانت تسقي في شتلاً ليها، في ساقية السبيباب، ( دار حواتي) قالت تعالوا.. لما مشينا زفت لنا الخبر المؤلم، قالت بت عوجات ماتت.. والجنازي لسه ما جات.
انفطر قلبي وشعرت به انشق النص، لأنو قبل يومين زرناها أنا وأمي وأمي قالت لها: ربنا يحلك بالسلامي.. أمي دي ذرفت جنس دموع. لا حولالالا. وطوالي قالت لى أسدر على أهلك، وأنا بربط الحمارة في التمر، إنت الحمارة ترميك! ولكني لم أطلع البيوت، ظللت في التمر أراقب.. شري دي اتكبت عن بكرة ابيها في التمر والبيوت، والناس البي تمشي بالتمر كدبيب النمل.. جاء من النعوفاب علي ود اب ايد وأحمدون، كل واحد يحمل طورية وماشين يجهزوا القبر،لعمري هؤلاء الشخصين ما يموت زول إلا تشفوهم لفحوا طواريهم وقاموا، هذه عادة عندهم لايثنيهم عنها عمل،
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
أو ليل أو نوم.. وقد شاهدت قبل أربعة سنوات علي ود أب ايد يحفر في قبر في ترب ودي شري على جنازة طفلة.. وعمره حوالي 85 عاماً.. يحفرلامن نفسو قام، واحد من الشباب الغير موزونين في الكلام قال له: هو الواحد نفسو يقوم مالو ومال الحفر؟ رد عليهو وقال ليهو:هو نحن نحفر لامتين؟ يا ولدي نحن نحفر في القبور من قبل ما يلدوك إنت!
ألمتني عبارة هذا الشباب الذي يفتخر بفتوته وعضلاته، ولم يراعي سناً ولا مقدرة.. ولعمري هي العبارات الغير موزونة، التي يطلقها العامة عندنا، بفعل الجهل، وبفعل عدم التعليم، وما أكثرها عندنا، ولعمري كم هي جارحة، وعزاءنا في هذا الجيل الجديد، أن يصفو من رعونات الماضي.
جاءت جنازة بت عوجات، وشاهدتها عن بكرة أبيها، هذه الجموع الهادرة. وجاءت أمي مع الجنازة في مركب أخرى ومعها الحريم.. ولاتزال أمي دمعتها لم توقف. قالت( عجومات.. وهو والد الفقيدة. اسمه عبد الله ود العجمي، يدلعوه يقولوا له عجومات.. قالت أمي حي ما حنينا عليهو يرجف زي القصبة.. الروضة مراة فارسة وقوية ومتدينة ، أمي قالت اتحزمت بي توبا من النص ولا رمشت لها عين وظلت تعزي وتشيل الفاتحي مع جموع المعزيين.. ولدت بت عوجات جابت بتين تومات حيات، طلعتهم بي جاي وماتت بي جاي.. والطفلتان عاشوا لمدة شهر وماتوا والتحقوا بأمهم في ترب ودي شري..نفستها بت الكاب من عصمة والدة ناس حسونة التاجر المعروف هناك.. كانت داية أيضاً.. كانت إمراة فارعة الطول بيضاء اللون.. وكانت معروفة يقولوا عندها ظَهر اشاهدها تتحدث مع ابوي وتقول( عااااع) ( عاااااااع) عندها هذه العادة تقولها باستمرار ومرات تقول ( عااااع...حي) ( عااااع..حي) ومرات تقول( عاااع حي. إسيادي).. كانت دائماً تتحلى بسبحة من الخرز الأخضر في يدها.. مرة كانت تقول هذه العبارات في تمر ( معيتيقة) قطعة ارض للمشايخة تحتنا، وجنب بركاوية العمدة، ابوي كان ينجر في معداية مركب، كانت هي تقول كدة وأنا عمري خمس سنوات. قلت لابوي المرة دي تقول كدة مالا( عاااع... حي.. إسيادي) ابوي قال لي: عندها ظهر يا ولدي.. خفتا منها! وزحيت غادي..
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
أمي قالت بت الكاب. يقولون لها بت الكاب عشان كان عاشت بره المناصير زمان. أمي قالت الناس الكان حاضرين الولادي، قالوا جرررررت الجنا شديد. البنات التومات.. حتى واحدي جاء راسا مطفوق.. والحوض كان ضيق شديد..
آه إنه الجهل المطبق، كم توفيت منصورية في مثل هذه الظروف القاسية وكم ذهبت بنت في ريعان شبابها، ولكن ليست الداية ملومة، وليس الأهل بملومين، وقد ذهبوا كلهم لبارئهم. والفضل في التعليم والتنوير الذي بدأ يعم منطقتنا الآن، وكذلك الفضل في جيلنا الجديد، ثم من بعد ذلك الفضل لله وحده، الذي يخرجنا دائماً من ضيق الظلمات والجهل الى باحات العلم والنور..
شوف هذه الروضة بت بابكر صبرت على هذه المأساه، بكل جلد وصبر ورضاءاً بقضاء الله وقدره، وزوجت بنتها الأخري ( لأب تماني) خلفاً لشقيقتها.. فاطني بت عوجات خلفت من قبل ابنها عثمان ود اب تماني، هو الوحيد عندها في هذه الدنيا، وذهبت الى بارئها مأسوفاً على شبابها..
ذكرت قبل ذلك، أن شقيقي عمر، لم يظفر بأن يكون في الداخلية، فقعد معها.. غرق مرة في النيل والأولاد يعوموا.. جروا حدثوها قالوا ليها عمر شالوا العـِرق.. قالت: ووووب عليا أمشي وين! ود الناس غرق! اتحزمت بي هدوما ووقعت فوقو وجابتو من جوف النيل! وبطتحو على بطنو في حجيرة البحر لامن طرش الموية التى امتلأ بها جوفه.
جاءت أمي من الغرب باكية وتنشد شعراً في الروضة وتقول:
الروضة أم عمر وشـَوَّال
سيلا مدردق الجـَّبـَّال
هـَنـِيتْ الساعي عندو جـُمـَال
بى زَلـَفْ آبتقول بـَطَّال
الغريبة هذه العائلة كلها يحتويها الأدب والورع والدين والشهامة والضكرنة والفروسية
حسن بابكر في ود عيسى والد أستاذ الأجيال كركاب الذي كرمه أعضاء المنتدى هنا قبل فترة وزاروه في داره
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
محمد بابكر كركاب في مدنية وقر نواحي كسلا..
وهذه الروضة.. كلهم معجونين من طينة واحدة
أما هذه الروضة التى نحن بصدد الحديث عن اجترار سيرتها،كانت فلتة في جيلها في نساء شري، لا تنم في زول أبداً ،حتى وإن كان عدوها.. كانت لهم قطعة قش في الجرف بعيدة من دارهم في منطقة يقال لها( الوَدَّه) قريبة من قرية عضو المنتدى عثمان محمد حامد النفر،مرات تأخذني معها فوق الحمارة الى هناك، وتقول لا أتركك وراي تغرق في البحر..أثناء ركوبنا فوق الحمارة كانت لما تطرب، تغني وتقول:
سيد الجزيري الخدرا.. يا بـَلاَّل
يا الساقيتو في المَتـَرَه... يا بَـلاَّلْ
كانت تقول لى، أنا شايفاك ولد ما عادي، ما بتلعب مع الولاد الصغار كتير، ومؤدب، الله يحفظك، كنت تقول لى كدة.
مكثت معها مدة إقامتى ستة شهور ، ولكن خلال هذه الستة شهور، عشت معها حياة عامرة، عميقة، مليئة بالأحداث.. بعد الستة شهور التحقت بالداخلية، والدي وصى عليا الناظر، ناظر المدرسة.. ولكنه أحياناَ كان ينسى، وقد يكون جامل ابوى في جامع شري لما يقابله في صلاة الجمعة.. أمي ظلت تقول لي: على الاقل مرتين في الأسبوع، تعال مكتب الناظر ودق الباب بأدب، وقول ليهو: ( حضرة الناظر، أنا عايز الداخلية) الناظر كان حلفاوي اسمه صالح.. وجاب معاه ابن أخوه إسمو داؤود، يدرس قبلنا بسنتين.. كان مكتب الناظر مرتباً.. ومخيفاً لا أحد يقدر يعبر من أمامه وينظر لمن بداخله، ناهيك عن مكتب الناظر.. زير موية الناظر والمدرسين الموضوع في البرندة وعلى حافتها أمام مكتب الناظر، لا احد يستطيع أن يشرب منه على الإطلاق، سواءاً كان في ساعة اليوم الدراسي، أو بعد ساعات الدراسة، لأن ذلك يعتبر من المحرمات.. وفاعله، يستاهل 20 جلدة بالسوط، كإنذار أولى، وبعده إن كررها قد يفصل من الداخلية أو المدرسة، او خطاب استدعاء لولى الأمر..
كل الطلبة كانت عيون ساهرة لزير الناظر والمدرسين، أي واحد ممكن يبلغ عنك.. ناهيك عن ذلك حمام الناظر والمدرسين، كان الحمام رقم واحد من جهة المكاتب، لا أحد يستطيع أن يدخل فيه على الإطلاق..حتى الاباريق وزراة التربية والتعليم كانت توزعها على حمامات المدرسين.إبريق ابيض من ( الطلس) زي صحن الطلس. يملاه الفراش سليمان ود سموعي بالموية كل يوم للمعلمين والناظر. مكتوب على الإبريق(اس آر) لغاية يوم الليلة ما عارف أس آ ردي شنو؟ قلتا سودان ريل ويى..( سكة حديد. يعني كما هي حاجات السكة حديد! قالوا لى لا.. حتى البطاطين السوداء التخينة في الداخلية ، كان مكتوب عليها أس آر.. لغاية هسي دي ما عارفا كده ليه! المهم ( أس آر) ما علينا.
كنت أطبق وصية أمي.. وفي الفسحة أجي أطرق باب مكتب الناظر بكل أدب..( حضرة الناظر أنا عايز الداخلية!) كررتها أربعة مرات.. كل مرة يقول لى حاضر إبني... لمان زودتها آخر مرة نهرني.. وقالSad ولد... إنت حكايتك شنو؟ خلاص فهمنا قصدك) كنت أطبق وصية أمي حرفياً.. وأعتبرها شئ منزل.. بالرغم مع تعارضها مع سلوكيات المدرسة في الاحترام الزائد للناظر... بعد كدة انقطعت عن الحضور لمكتب الناظر وخفتا الحكاية تجيب نتيجة عكسية..بعد يومين نده عليا الناظر في الحصة.. صديق عبد الله.. صديق عبد الله... مكتب الناظر.. والاستدعاء لمكتب الناظر كان يخوف الزول شديد..
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
مشيت. طلعتا من الحصة.. قال لى: إنت ود حاج عبد الله! قلت ليهو نعم!
قال لى مبروك، شغرت خانة في الداخلية بكرة جيب سريرك وتعال قابل ضابط الداخلية..
زعلت الروضة بابكر من هذا الموضوع، وقالت إلا يكون نحنا قصرنا في شئ! أخوه قبلو لامن إتخرج من عندنا.. وقطعت الغرب تبكي.. ونضمت مع أمي.. أمي قالت ليها، حا شاك يا أم عمر وشوال، يجي من ناحيتك لوم! الناس كوم وإنت كوم.. بس الداخلية بعيدة من البحر وانا خايفي عليهو من البحر.. فهمت الروضة الموضوع، وقالت كان كدة خلاص.
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
مكثت مع الروضة في دارها ستة أشهر، والحق يقال كانت تسهر على راحتى أكثر من بناتها.. وعثمان ود أب تماني ولد بنتها ( بت عوّجات) التي ماتت في الولادة.. عثمان هذا كانت عندو مخاتة كدة طوالي نازلة على شفتو العليا ليل على نهار على شتاء على حر هي ثابتة.. ومرات يمص منها.. وقدر ما يتمخط ترجع تاني.. كنت أعاف هذا الشئ.. كنت طفلاً صغيرا نظيفاً جميلا، كل من يراني يحبني، جميلاً حتى في أخلاقى ومعاملاتي مع الكبار.. لذلك الروضة التى كنت أسكن معها كانت تعرف فيا هذا الشئ.. كانت يوم السوق تقول لى( ما تأكل مع عصمان.. أكل لوحدك).. يوم السوق زوجها عبد الله ود العجمي كان نظامه في لحم السوق..( نص وقة لحم+ ربع عفشي مرارة) لكنه لايحضر للفطور قبل ما يقطع ناس السوق كلهم. كانت هي المركب الوحيدة التي تربط شري بالغرب والسوق.. تضع السناسن والسليقة، وترش عليها السخينة.. وبأمانة كانت تضع ثلث هذا اللحم لى وحدي.. وتقول ليSad أكل.. عمك عبد الله يديك الجوع لامن يقطع ناس السوق النهار يحر.. وأنت طفل تجوع!) في الأكل آكل وحدي ولا بناتها معي ولا عثمان ود بتها.. كنت خايف هذا الشئ يؤثر على بناتها في علاقتنا نلعب مع بعض! لكن بالعكس، كنا نحب بعضنا جداً. وكان هذا الشئ لايؤثر، هذا الكرم الزائد من الروضة بابكر..
قصة ( الشلمبايي مع بنات الروضة) كنا مع بعض في دارها عندها بنتين تومات وولد بتها عثمان.. أمه توفيت كما ذكرت..
مرة أم الحسين وأم الحسن.. كانن( يفجكن في البحر) وقبضن شلمابيي.. وأنا كنت قاعد في أوضة في البيت.. لمان يفجكن، كان ممكن أمشي أفجك معاهن. وهن كل واحدة تمسك طرف الهدم. كان مفروض أخج لهن السمك حتى يدخل الهدم! وهن كل واحدة ممسكة بطرف الهدم كعادة ( الفجييك) وما لقن زول يخج ليهن.. كانن يخافن من الروضة أمهن إنو يسوقني معاهن للبحر.. وكانت محذراهن، أني أعوم أو افجك معاهن.. وعادة البنات والأولاد كان يعوموا مع بعض. حتى عثمان ولد بتها التى ماتت ما نعاهن الروضة يمشي معاهن البحر!
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
كانن يباصرن ويفجكن ، الواحدة ممسكة بطرف الهدم وتخج الموية برجلها التانية. لكن عادة عندما يكون لاتجد زول يخج ليك البحر. يكون السمك المقبوض بسيط.. عشان السمك ما بيجد زول يرهبه ويخج البحر بي كرعيهو عشان يدخل في الهدم، وهن بنتين كل واحدة ممسكة بطرف التوب..
على العموم قبضن شلمبايي واحدي. جابنها وجن طالعات البيت. ختن شوك.. وسلتنها على الشوك والملح والدقة.. وأنا وعثمان ود بت الروضة كنا نلعب في الغرفة.. أنا شميت ريحة العطاريب والسلات.. عرفتا إنو هن قبضن سمكة.. وشونها على الشوك.. عاينت بي فج الطاقة بتاعة الغرفة.. شفتا أم الحسن بت الروضة شايلا الشلمبايي مشوية ، شايلاها بي جريدتين كدة كبار.. والدخان طالع منها.. وجاية على المزيرة وكانت مزيرة بيت الروضة في نص الحوش.. زيرين متوسطات الحجم ممكنات في نص الحوش وعليهن مزيرة معروشة لزوم الضل.. معمولة بطريقة جميلة.. أم الحسن كانت منتظرة في هذه المزيرة متفرجخي. وأم الحسين جابت الشلمبايي وجات عليها.. ختنها في صينية شاي قديمة. وأنا أنظر من فتحة الطاقة المغطاه بغتايي قديمة..
شايفهن يغمسن في الدقة وياكلن..
بأمانة حاولت أتغاتت عليهن، لامن ياكلنها.. ويكون كل شي انتهى، وأجي أكلم ليهن أمهن الروضة التى كنت واثقاً من أنها سوف تقيف في صفي. لأنها إمرأة لاتثنيها العاطفة في أن تقول قولة الحق! حتى ولو على نفسها.. عثمان منهمك في اللعب لايدري شئ..
أبيت أظهر لهن خالص، لامن أمهن الروضة تجي من حش القش. وكانت بعيدة خارج نطاق المنطقة ذهبت لقطعتها البعيدة في قرية( الوَدَّة) القريبة من قرية النفر..
لما عادت الروضة. وأم الحسن وأم الحسين لايعلمن شئ عن الموضوع، وهن قاعدات جنب أمهن.. وعثمان ود بتها قاعد... طوالي قمتا فجرتا القنبلة في وشهن؟
حكيت لأمي الروضة وكنت أناديها بأمي الروضة دائماً، حتى بعد أن تركت القعاد معها، وكل الفترة كانت ستة شهور..
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
كانت ستة شهور..
حكيت قصة الشلمبايي لأمي الروضة.
ذهلن أم الحسن وأم الحسين.. ونطن جرن.. الروضة قبضت كل واحدي من أيدا.. وهن حلفن وقالن هن ما كانوا موجودين.. عشان كدة أكلناها برانا.. كنا قايلنهم ما موجودين.. مسكت الروضة كل واحدي من بناتا من حلقا وقالت ليهن تطرشوها هسي دي.. وحات أبوي إلا تطرشوها هسي دي قدامي؟
مكثت معها ستة أشهر وبعدها دخلت الداخلية، لم تتركنى كانت تجيني في الداخلية محملة بالتمر..
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
شكرا يا صديق ودي مناسبة اعرف منك الانساب
بتول حبوبة اولاد عمي من جهة الام اما حليمة بنت طة حبوبتي وحبوبتهم من جهة الاب وانا ماخد منها اللون والطول
معلومتك عن عمي طة صحيحة
ساقية ود جاير كنت اسمعها في كلام ابوي لكن ما عارفها هي شنو ياريت توضحها لي
انا اعرف لينا صلة قرابة بالحنانين لكن هي شنو بالضبط ما عارفها وناس احموده بالذات حسن احموده كان دائما يقول للوالد ياخال
اتذكر تماما عندما رزق علي سليمان بي مولده الاول ابوي فرح كانه جابوا ليهو هو وشال بندقيته وساق عربيتو واتوجه وقر عليه وعلى علي سليمان رحمة الله
شكرا يا صديق تاني
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: الأمين عثمان صديق محمد)
|
نعم يا اللمين تسلم ،، معلوماتك صحيحة
ابوك فرح لعلى سليمان ود اعمنا لانو قريبو ،،
حليمة بت طه
وسليمان ود طه ابوى ود خالن طوالى
،،،،،،
ساقية ود جاير ،، هى حلة حبوبتك حليمة بت طه قبل ما يرحلوا كسلا،، وتحتها ساقية ود جاير حقتهم اى اراضي الساقية ،،
ساقية ود جاير قريتكم فى المناصبر ،، مكونة من بيوت حليمة واولادها ،،، تقع بين قرية المترة والزيناب ساقية ود جاير
| |
|
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: منصوري)
|
سلامات يامنصورى
اهلى من جهة امى ووالدة ابى ال شبيكة. و ترجع اصولهم للرباطاب العبابسة, ومنطقتهم ساقية شبيكة فى الجزيرة مقرات و قد هاجر منها شبيكة الكبير فى هجرة فى منتصف القرن التاسع عشر الى رفاعة تاركا ساقيته بتورها و اصبحت هجرته مثل يضرب الى الأن " رقدت رقاد ساقية شبيكة".
هل هناك صلة مباشرة بين الرباطاب العبابسة و المناصير العبابسة؟ هل هم من اصل واحد توزع بين القبلتين؟ يعنى زى العبابدة الموجودين فى ابوحمد, مقرات, بربر, الدامر, امدرمان
مع ودى
| |
|
|
|
|
|
|
|
|
Re: إنها امرأة من العبابسة(قصة قصيرة) منحنى ال (Re: Elmoiz Abunura)
|
ههههه استاذ المعز
قصة ساقية شبيكة معروفة ،،
،،
نعم العبابسة فى المناصير والعبابسة فى الرباطاب بينهم نسب
كما الحجازاب فى المناصير والرباطاب لينهم نسب ،، وهم فقرا
كما الفريعاب فى المناصير وفى الرباطاب بينهم نسب
كما الدقيساب فى المناصير وفى الرباطاب لينهم نسب
كما السواعير فى المناصير وفى الشايقية بينهم نسب
كما النعوفاب فى المناصير وفى الشايقية بينهم نسب
كما الصلحاب فى المناصير وفى الشايقية بينهم نسب
كما البليلاب فى المناصير وفى الشايقية بينهم نسب
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
منصوري
adil amin
Elmoiz Abunura
فيس بوك
تويتر
انستقرام
يوتيوب
بنتيريست