|
|
|
 Re: احباط عام من ما يدور داخل فندق ريدسون اديس (Re: Osman Musa)
|
المولى يخدّر ضُراعك يا عثمان أخوي.
يقنُصا اللسد ؤ ياكُولا الضبع !، من أين أتى هاؤلاء ؟، مجموعة
عصبجية شفاتة تحت مُسميات شتى !، قالو قوى حرية ؤ تغيير
لا والله بل هي وهن خنُوع وذُل ؤ جو ناس الحركات المُسلحة
أقصد ناس الحركات والبركات بعد ما إنفضّ سامر القيادة
بالهراوات والبساطين والخراتيش والرصاص في الراص وسقط
شباب في ميعة الصبا وعنفوان الشباب مضرجين بدماءهم، جو
ناس الحركات والبركات قالوا لناس الخُنُوع والذُل قسماً باللهِ
ما تاكلوها براكم حقنا هسسسع دِي، ديّل اليوم عوى الرصاص
كانوا نايمين يضرطو في الفنادق !، فعجبي يأخ !!!...
| |
 
|
|
|
|
|
|
|
 Re: احباط عام من ما يدور داخل فندق ريدسون اديس (Re: معاوية المدير)
|
يا سلام الحبيب عثمان .. كلام من العمق
نعم .. الخوف يرجع نفس النظام .. فنادق واجتماعات ومؤتمرات
وجلسات بدون أي نتيجة
الحبيب عثمان على نفقة من هذه الاقامة في الفنادق 5 نجوم
والتذاكر والنثريات ,,
الحركات الحقيقية هي عبدالواحد والحلو .. الباقين زمنهم راح
اهم حاجة المصاريف والنثريات .. من وين ؟؟
شكرا عثمان على الكلمات المؤثرة .. ليتهم يقرأون هذا البوست
يبدو لي أن المجلس الانقلابي العسكري يريد أن يرسم صورة أخرى لهؤلاء المفاوضين من شباب التغيير
وعليهم الوعي والادراك ..
| |
|
|
|
|
|
|
|
|
|
Re: احباط عام من ما يدور داخل فندق ريدسون اديس (Re: علي عبدالوهاب عثمان)
|
مشكور. اخي علي مشاطرتك الاحزان و دخولك للبوست .
والله شلة اديس ابابا عندي فيهم اصحاب .
واشهد انهم. كانوا في الصفوف القدامية
في مسيرات القيادة في لحظات القنص .
وما. اتمنيت ليهم رماد. الريدسون .
ولا الموت اب رمادا شح .
اتمنيت. الوقوف. في. دكتنا. والاتفاق فيها والحليفة
علي كركجيها ورمالها .
| |
|
|
|
|
|
|
|
|
Re: احباط عام من ما يدور داخل فندق ريدسون اديس (Re: نادر الفضلى)
|
اخونا استاذ نادر. الفضلى سلامات
معقولة دي يا. اخ. نادر ؟
معقولة ؟
وكمان متلمين في طربيزتين و مقسومين علي مجموعتين ؟
ليه ؟
في السودان لافي طرابيز. ولا كراسي ؟
والله يا اخ نادر. انا. احب. زيارة اديس ابابا. بس في ظرف خلاف الظرف ده و بي تذكرة علي
حسابي .
وما عندي. ما نع
اكل انجيرة. علي حسابي .
ما علي اي حساب خلاف جيبي .
اليومين دي يا اخ نادر في شح في
اي سلعة في السودان . الاسبوع الفات كلو دخل
العاصمة المثلثة كلها دفار. واحد طماطم .
شحنة الدفار. اتباعت . بي اتنين ونص مليار .
اربعة حبات طماطم صغيرة بي خمسين الف جنيه .
كيلو اللحمة العجالي بي 380
معقولة ناس تترشح رصاص في المتاريس وتتجندل وهي
رافعة علامة تسقط بس .
وناس تطالب بي المشاوي في فنادق الاحباش ؟
بعدين الشعب ده لمان مرق و طمح في عطبرة
واتهرد بي الرصاص احتاج لي وسيط ؟
| |
|
|
|
|
|
|
|
|
 Re: احباط عام من ما يدور داخل فندق ريدسون اديس (Re: Osman Musa)
|
سلامات يا عثمان،
كلامك حق والله .. وَ عين الحقيقة ..
وهذه (المطاولات) لن تأتِ من ورائها للبلد فائدة ..!
ذلك أن الآمـــل في فائدة من ورائها، حذوَك القُذّة بالقُذّة كالآمـــــِــل في إيجاد رصيد من "إسكراتش" مكروشة ومنزّلة aready من زماااااان
| |
|
|
|
|
|
|
|
|
|
Re: احباط عام من ما يدور داخل فندق ريدسون اديس (Re: محمد أبوجودة)
|
أخونا على عثمان
علي أي أساس حكمت بأن حركة عبد الواحد والحلو هي الحركات الحقيقية
بالذات عبد الواحد المقيم ي تل أبيب وباريس
وجماعتو ماكلين نبم في الخلا
لقد سرقتم الثورة من من ماتوا فداءً لها وهم صيام
يجبو أبان كروش ديل في ليلة وضحاها يقتسمو الكيكة مع الثوار
ونستاهل نحنا الخلينا الشافع الأصم وفوضناها عشان يجيب لينا حقنا
وإذا بالتمسايح في أديس تلتهموا ويلزموا الضُل
والله مهزلة ،،، وطالما رجعنا كل المتمردين للمشاركة في الحكم يبقى سودانا وثورتنا راحت في ستين داهية
ويا حليلك يا بشة ،،، طيرناك وطرنا معاك وأكلنا تبن
والبلد بقت في يد حميرتي لا غير وغصباً عن عين أتخن تخين
| |
|
|
|
|
|
|
|
|
|
Re: احباط عام من ما يدور داخل فندق ريدسون اديس (Re: محمد أبوجودة)
|
اخونا استاذ محمد ابوجودة سلامات
كلامك عن المكروشين واننا. جربناهم. هو. الحقيقة .
عمنا. الصادق. واخونا. مناوي الاتنين جربناهم ومافي. داعي
للعباطة تاني.
اصحاب الشهداء. زملاء. المتاريس. قاعدين وهم الاحق .
اما حكاية. البترك بقالتو في يوغندا و يجيك طاير. ويعمل
ليك فيها. هو. رب السياسة ده تاني ما بياكل حنك مع الواطين
جمر. المعايش في دي البلد العظيمة .
| |
|
|
|
|
|
|
|
|
|
Re: احباط عام من ما يدور داخل فندق ريدسون اديس (Re: Osman Musa)
|
علي أي أساس حكمت بأن حركة عبد الواحد والحلو هي الحركات الحقيقية
=======================
الأخ سيف الدين .. أنا قصدي أن مناوي وجبريل وعقار وعرمان
ليس لديهم أي تأثير على الأرض فقط معتمدين على تاريخهم القريب
ولكن الحلو لديه حوالي 50 من المسلحين
وكذلك عبدالواحد لديه سيطرة على بعض المعسكرات ولديه قوات
المشكلة يا الحبيب سيف الدين تم تخصيص 2 لجماعة أديس أببا في المجلس السيادي
وهناك مفاوضات ستجرى مع عبدالواحد والحلو .. ماذا لو طلبوا 3 أو 4 مناصب في السيادي
وغيرها في مجلس الوزراء .. أو يستمروا في القتال .. والجيش ليس لديه أي استعداد للقتال
وحميدتي لم يعد قائد الهامش تحكر في الخرطوم ..
تخيل كم تحصل الجبهة الثورية وليس لديها أي قوات في الارض ؟ طيب .. كم سيطلب من لديهم قوات ؟؟
المشكلة كبيرة الحبيب سيف الدين .. ولا ينفع الحل بالقطاعي .. مجموعة أديس .. مجموعة جوبا أو كمبالا
كان من الأفضل عدم التنازل لهؤلاء لأنهم غير مؤثرين حالياً ..
تحياتي لصاحب البوست الحبيب عثمان .. ما زال الوطن في خطر ..
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
Osman Musa
معاوية المدير
علي عبدالوهاب عثمان
نادر الفضلى
محمد أبوجودة
سيف الدين محجوب
فيس بوك
تويتر
انستقرام
يوتيوب
بنتيريست