|
|
 تركيا من الداخل(سلسلة موضوعات عن تجربتي الشخصية 7 سنوات من الدراسة والعمل)
|
10:32 PM July, 21 2019 سودانيز اون لاين
mayada kamal-إستنبول(مؤقتا)
مكتبتى
رابط مختصر
وايضا على استعداد للاجابة على اي تساؤل او استفسار او مرشد او دليل او اي شئ عايزنه من تركيا
بسم الله نبدا
اولا الشعب التركي : الشعب التركي بمختلف انتماءاته السياسية شعب هادئ ولطيف وساكن جدا
وما عندهم اي عنصرية تجاه الاخر
والواحد فيهم ممكن يكون ما بيصلي وبيشرب الكحوليات زي الموية لكن جميعهم الملتزمين من الما ملتزمين انسانيا بيحبوا يساعدوا الاخر للطيش,
اذكر لما جيت تركيا نهاية سنة 2012 لدراسة الدكتوارة في العلوم السياسية
وصلت مطار اسطنبول ومشكورا وصلني اخ سوداني موظف بالقنصلية لعنوان السكن الجامعي اللي رسلوه لي ناس المنحة.
ولما لقى لسوء حظي سستم السكن للتسجيل واقع وكدة تركني وغادر لحال سبيله,
المهم من تعب السفر والمطار وكدة نمت وكان لازم الصباح امشي اسجل الجامعة ومعهد اللغة,
لا انا بعرف وقتها كلمة واحدة تركية
ولا الاتراك بيتكلموا انجليزي او عربي,
الملهم كاتب عنوان الجامعة ومعهد اللغة " TÖMER" في دفتر وطلعت بالوصف,
فاذا بالاتراك طلعوا زي السودانيين من شدة بحبوا المساعدة ممكن الواحد يوصف ليك غلط,,, او يترك شغلو وموقعوا ويجتهدوا بكرعينهم ويدينهم عشان يوصف ليك بلغة الاشارة والجسد,
نواااصل
|
|
  
|
|
|
|
|
|
|
 Re: تركيا من الداخل(سلسلة موضوعات عن تجربتي ا� (Re: mayada kamal)
|
واكتر شئ عاجبني في الاتراك انهم بيحبوا السودانيين جدا
وفي نفس الوقت بيكرهوا المصريين والسعودييين لانهم بيفتكروهم نصابين وحرامية وغير صادقين وغير امينيين
وواحدة من اسباب حبهم للسودانيين شخصيتين في تاريخنا
هم
* السلطان علي دينار : اخر سلاطين سلطنة الفور ووقفوه لي جانب العثمانيين ومحاربته معاهم ضد الانجليز
* موسى الزنجي: دا كان الزراع الايمن لأنور باشا وحاول الانجليز رشوته واستمالته عشان يكون جاسوس ليهم ضد العثمانيين
لكن رفض رشوة الخواجات وفضل يموت حمال في منطقة "كراكوي" للناس اللي جو اسطنبول بيعرفوا المنطقة دي
ولما توفاه الله من المرض لم يجد الاتراك معه الا شنطة صفيح فيه كفنه ومصحف وصورة انور باشا,
والاتراك بيتبركوا بيه وبي امانتو عديييل
ولو جيتو اسطنبول ستجدوا قبر موسي الزنجي السوداني في منطقة " اسكودار" ولليوم مزار للاتراك بيزوروه ويتبركوا بيه
ولو سالت سوداني عن اسم موسي الزنجي ما بيعرفه,
انا عندي مقال مترجم من اللغة التركية " كتبه زميل تركي باحث شاب " ترجمتو انا للغة العربية ونشرتو السنة الفاتت في صحف الخرطوم .
ستجدونه على هذا الرابط
https://www.snn-news.net/؟p=13163https://www.snn-news.net/؟p=13163
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: mayada kamal)
|
ايضا تركيا من الداخل ما زي ما بنشوفها او بتشوفوها في المسلسلات التركية
فبحكم الدراسة والعمل ذكرت مدن تركية كتيرة من اقصي الجنوب لاقصير الشرق والغرب والشمال
"زرت العاصمة انقرا ومدينة ازمير - كتاهية- يالوفا- ادرنه- أغري- اضانه- سامسونج - بولو- غازي عنتاب- سكاريا .
وبالطبع بعرف اسطنبول جيدا بحكم الدراسة والعمل فيها"
فشنو في العائلات التركية المنفتحة وفي الاسر والعائلات المحافظة جدا
تخيلو زي بعض الاقاليم عندا تجد بيوتهم مفصولة مكان النساء والرجال
وممنوع للرجال المكوث او الدخول لقسم تواجد النساء,
وايضا تركيا رغم انها دولة علمانية لكن يستحيل البص السفري الولائي من مدينة لي مدينة
انو يقطعوا ليك تذكرة يكون رجال ونساء مع بعض او مجاورين بعض
اللهم الا لو عائلة او محرم وكدة. حتى لو البص حيقوم نقص عدد
ودي واجهتي كم مرة واستغربت ومشيتها ليهم هههه
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: mayada kamal)
|
بالنسبة للعلاج نظامهم الصحي افضل نظام في الشرق الاوسط
والثالثة عالميا بعد الولايات المتحدة والمانيا
واريتو حاااالنا في السودان مستشفياتهم الحكومية افضل خدمة من المستشفيات الخاصة,
اما في مجال السياحة العلاجية فالي جانب الامانة، فمن ناحية التكلفة العلاجية فهم ارخص من مصر والاردن والهند وروسيا بالنسبة للسوداني اللي عايز يجي يتعالج,
وفي مستشفيات خاصة بناء على تعليمات مباشرة من الرئيس اردوغان تتعامل مع المرض الافارقة بنفس سعر المقابلة اللي بتحصل عليها من المواطن التركي.
وبالنسبة لنا نحن السودانيين، تركيا والسودان موقعين برتوكول صحي بموجبه تمنح تركيا فرصة علاج مجان لــ 100 حالة سنويا للعلاج بالمستشفيات التركية بالنسبة للحالات الحرجة,
لكن للاسف السودانييين بيستغلوا المسالة دي غلط، وبتروح علي السودان فرص سنويا بحكم مماطلة وكسل وجرجرة بعض موظفي القمصيون الطبي ووزارة الصحة,
وانا بقول الكلام دا عن تجربة شخصية لعلاج والدتي بالبروتوكول دا
رغم وجود صفوف طويلة للطلبات لكن في ناس يا بيموتوا او بيضروا للذهاب لدولة ثالثة
مع انو فرص العلاج المجاني هذه دولة مثل اثيوبيا علاقتها مع تركيا اقدم واقوي من العلاقات السوادنية التركية، لكنها لم توقع على اتفاق زي ما تركيا ولم تحظ على خطوة زي دي الا بعد دا بالصدفة انا اقترحت شهر فبراير الماضي على زميلة اثيوبية عزيزة علي انها تحاول مع وزارة الصحة التركية لعلاج والدها,
وقد كان مشكورين جدا الاتراك استجابو لي طلبهم وبالفعل قدرت تجيب والدها تركيا وعالجته ورجعوا بسلام
وانا طلعت بي عسل نحل اثيوبي بري هههههههه
وبالطبع رضا ودعاء عمنا الاثيوبي ابو صديقتي
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: محمد بدرالدين)
|
Quote: تمسكهم و اعتدادهم بلغتهم قالو دة الضيع الدولة الاسلامية ..
|
حبابك اخ محمد بدر الدين
لا نقول انو الدولة الاسلامية ضاعت في تركيا بقدر ما انهم مسلمين متبعين العلمانية في السياسة ونظام الدولة
ودا تلقائيا ابعد الدين عن الحياة العامة الى حد ما
والسبب في مصطفي كمال اتاتورك يقال انه احرق رجال الدين والغي دروس التربية الاسلامية من المدارس
وتجد الان للاسف بعض الاتراك الشباب اولاد على بنات ثقافتهم في قواعد الدين الاساسية ضحلة جدا
تلقي بعضهم مثلا بيشرب كحول او البنت بتلبس ليس سافر لكن لمن الاذان ياذن وقت الصلاة تدخل الجامعة وكانو لم يحصل شئ.
لكن مع مجئ حزب العدالة والتننمية خاصة في السنين الاخيرة بقى الوضع يتغير وبقي عندهم حتى مدارس دينية صرفه.
عموما دعاة العلمانية وانصار اتاتورك في تركيا ما زالوا اقوياء ومناهضين بشدة لاسلمة المجتمع
ورغم كل ذلك الاسلام بخير
تجد المساجد وقت الصلاة تمتلئ حتى الشوارع المؤدية للمساجد تمتلئ بالمصلين ويتم اغلاقها لاتاحة الصلاة ليهم.
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: mayada kamal)
|
تركيا عموما واسطنبول خصوصا
من افضل المناطق اللي ممكن تفضلوها للعيش والسكن فيها
اسعار البيوت والشقق هنا ارخص من سعر قطعة ارض فاضية في الخرطوم.
وقانون التملك العقاري هنا في تركيا بعد التعديلات الاخيرة بيسمح للمالك الاجنبي الحصول على الجنسية وحق الاقامة بمجرد شراءك لملك بيت او قطعة ارض في تركيا هنا,
لكن شنوووو
اعملو حسابكم من الشركات السورية واللبنانية والعراقية
فما كلهم كويسيين ولا كلهم نصابين
التعامل معاهم يحتاج لحرص
عشان ما ينصبوا عليهم
لدينا جالية نوعية مميزة هنا في اسطنبول وعندنا قنصلية نشطة جدا جدا
لكن لم اسمع " ربما في شركات او افرد" بيقوموا ببيع وشراء البيوت
ياريت لو يكون فيها
مع الاحداث الحاصلة في السودان اكيد تركيا ستصبح وجهة لتدريس العيال او السكن
فوجود شركة او جهة سودانية تعمل وتشتري في العقارات تكون امنة والتعامل معها اسهل
لانو نحن كسودانيين بنفسهم نفسية بعض.
حقيقي انا بتجيني تلفونات كتير ناس بتسال من بيوت وشقق
فبنخدم الناس ساي بحكم تواجدي هنا
وبنسمع قصص نصب واحتيال من ......... من غير ذكر اسماء دول او شخوص بعينهم.
ومن هنا دعوة للسودانيين للدحول في مجال الاستثمار في القطاع العقاري دا.
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: mayada kamal)
|
الدراسة والمنح في تركيا
هنالك المنحة التركية الحكومية " ودي تابعة لرئاسة الجمهورية التركية مباشرة"
يتم قبول اكثر من 8 ألف طالب من على مستوي العالم
وهي نفس المنحة اللي جيت بيها انا للحصول على الدكتوراة عام 2012.
معانا ناس من امريكا واسرائيل برضو
المنحة بيفتحوا ليه التقديم اونلاين مبااااااااااااشرة
وما فيها لا واسطة ولا يحزونون
ولانو منحة شاملة وكاملة حتى تذكرة السفر للدخول لتركيا واخر خروج منها بعد اكمالك لدراستك
زايد تكفلهم بمصاريف الدراسة الجامعية وتعلم اللغة وبعد دا بيفتحوا ليك حساب بنكي باسم ويضعوا معاش شهري مصاريف وكدة.
وممكن لو جودت اللغة وزول نشيط تشتغل وتدرس
انا شخصيا لما لقيت نفسي جودت اللغة التركية اشتغلت شغلات متعددة وانا بدرس
اشتغلت مترجم تركي عربي في القسم العربي بصحيفة yeni şafak التركية
وبرضو اشتغلت مترجم للبلدية في المؤتمترات والمعارض البيعملوها
ومترجم ودليل للسودانيين والعرب اللي بيجوا سياحة او تجارة او كوراست وغيرة.
وبقولها هنا بدون خجل اني اشتغلت مترجم ودليل سياحي لانها ربما حكر على الرجال وقد يستغرب البعض
لكن فهمي كان انو انا ما جيت ادرس بس من قاعات الدراسة ولكن كنت بشوف انو ممكن اتعلم من الوقت البقضية في المترو او الباص او الساحلل او الاسواق
خاااصة بحب واموووت في البازارات الشعبية حقتهم
ياخي بتشوف وتتعلم اللي ما بتلاه في الكتب والمقالات عن حياة وثقافة وتفكير الناس ديل كان اتراك او السياح.
واحدة من اللحظات اللي تشرف فيها في حياتي هنا في تركيا
اني في 2016 قدمت لدبلوم الصحافة والاعلام باللغة التركية وانا وقتها لسع بدرس في مواد الجامعة
الدبلوم كان باللغة التركي 9 شهور انا ومعاي زميلتي ازربيجانية وباقي الفصل اتراك
المهم درسنا العملي والنظري
يوم الامتحان انا جبت اعلى درجة 84% ( أقرب زميل تركي لي جايب 72%).
والحمد لله الفرص بتجي لحدي عندك بعد اسبوعين من النتيجة اتصلو علي ناس صحيفة يني شفق بتكليف للعمل معاهم
وقد كان اشتغلت وانا بدرس الجامعة.
وبعد 9 شهور تركتهم بمحض ارادتي لما مشرفي الخارجي في البحث دعانا للعمل في مركز بحوث ودراسات خاص بالشئون التركية الافريقية وقد كان.
ايضا في منح دراسية خاصة بتقدمها وزارة الشئون الدينية والجامعات الخاصة نفسها ممكن تقدم ليها السنة الاولى على نفقتك الخاصة
وبعد تكمل السنة الاولى بنجاح بيخفضوا رسوم الدراسة حتى 75 % من الرسوم الدراسية.
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: الزبير بشير)
|
شكراً دكتورة .. على السرد
نعم شعب لديه عزة قومية .. لأن هويتهم محددة ومعروفة منذ الأزل
كما الاثيوبيين ( الحبش ) والفرس ( ايران ) وغيرهم
مثل هذه الشعوب لديها عزة قومية وولاء غير محدود للوطن
لدرجة تصل الشعوبية .. ولا توجد نسخ منها في العالم
حالياً خمسة مليون سوري بدأوا يسببون قلق للحكومة
هكذا العرب حتى لو كانوا ضيوفاً لا يلتزمون بالقواعد
تحياتي الدكتورة واصلي ..
| |
|
|
|
|
|
|
|
|
|
انتي جيتي يا وش البومة!! (Re: ombadda)
|
انتي جيتي يا وش البومة؟
| Quote: يساعدوا الاخر للطيش, |
مافي طيش في الاخلاق ذيك
على الأقل عشان الواحد يقول عندك ذرة انسانية كنتي تترحمي على الشهداء
اكيد انتي ما شايفة انهم شهداء ..
شفتي انتي نحس كيف .. أول ما اتخرجتي سيدك البشير مشى في ستين داهية
غايتو ما نحس سيدك الا انتي وروضة الحاجة الدباب
تباً لكم كيزان مأفونين
جاية بكل بجاحة تحدثينا عن تركيا؟
تركيا لما مشيناها انتي في الخريطة ما كنتي عارفة موقعا وين
| |
|
|
|
|
|
|
|
|
|
Re: انتي جيتي يا وش البومة!! (Re: Amira Hussien)
|
mayada kamal
سلام الدكتورة الفاضلة ميادة .
حديث رصين و مرتب.
تركيا جميلة وشعبها هاديء رزين.
شاهدتهم في المترو .
في مدينة انقرا العاصمة.
الصغير يوقف ليجلس الكبير.
نفس طباع السودانيين.
في المواصلات العامة
والكل صامت ولا همس .
لكن تمسك الاتراك بلغتهم .
فكل اللوحات الارشادية و المناطق.
مكتوبة باللغة التركية .
فلا بد من المترجم
التحااااايا العطرة
***
،،،،
عزالدين عباس الفحل
ابوظبي
| |
|
|
|
|
|
|
|
|
|
تركيا من الداخل (Re: ابوحراز)
|
.
.
خدر الفاقد التربوي ...
رفقا بالقوارير ، القارورة اليكسروها ليك في نافوخك الفاضي دا ...
قال شهداء قال ...
انت ما كنت غرقان في مستنقع الانقاذ لي اضنيك ...
متين لحقتا تتشعلق في بص الثورة بالنص دا !!!
.
..
.
| |
|
|
|
|
|
|
|
|
|
Re: تركيا من الداخل (Re: قسم الفضيل مضوي محمد)
|
يا ألف مرحبيتين مرحبا الاخت الدكتورة ميادة كمال
شكرا للكتابة المعبرة والمفيدة .. واكتسابك مهارات جديدة واسلوب كتابي مميز
اوياريت كل بنات بلدي يرتقوا ويتطوروا في طريق العلم زيك يا دكترة ..
نحن محتاجين لكفاءات امثالك لتقود الفترة القادمة للوطن بعد ثورة الشباب والعلم والوعي الظافرة
خاصة وانه مجال اختصاصك علوم سياسية..
ارشح لتولي حقيبة دبلوماسية تفيدنا وتفيد الوطن .. ولا بأس في تركيا نفسها ..
ياريت صوتي يصل لتجمع المهنيين
تحياتي
ــــــــــــــــــــــ
| |
|
|
|
|
|
|
|
|
|
Re: تركيا من الداخل (Re: HAIDER ALZAIN)
|
عجبي يا حيدر الزين...
انظر لماضيها واين كانت تعمل قبل أن تبتعث لتركيا
بل اذهب لارشيفها وأقرأ دفاعها المستميت عن النظام البائد على مدى سنوات..
دماء الشهداء على مدى 30 عاما وكل الذين عذبوا وشردوا ذنبهم يقع على كل من شارك الإنقاذ ودافع عنها
اقرأ تغريدات ميادة في تويتر؟؟؟ ورأيها في الثورة
| |
|
|
|
|
|
|
|
|
|
Re: انتي جيتي يا وش البومة!! (Re: خضر الطيب)
|
Quote: انتي جيتي يا وش البومة؟
|
Quote: مافي طيش في الاخلاق ذيك
|
لو الاخلاق البتتكلم عنها زي اخلاقك دي ياها طرفنا منها
ونعم الاخلاق لكن لقيتك !!!
انت منو عشان تقيم اخلاقي
ولكل مقام مقال
علاقة البوست دا بالشهداء ش نو عشان اترحم عليهم.
غايتو الزول يغيب سنة ويلقاكم ياكم انتو ما اتطورتوا ولا تغيرتو
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: الزبير بشير)
|
Quote: زعلان علي ضياع ليرات شحن الجوال ، كل مره ملحوسه هههههههههههههه
|
فعلا الاتصلات وشركات الاتصالت خدماتها هنا غالية
لو عايز تشتري شريحة لاول مرة سعرها بي 75 ليرة يعني قريب لي 750ج سوداني
اقل باقة شهرية بي 30 ليرة يعني 300ج سوداني
الاجنبي ملزم بتسجيلل هاتفه النقال " بي 800 ليرة " اي ما يعادل قريب 8 مليون بالسوداني
اذا عايز يقيم في تركيا اكثر من 4 شهور
والا التلفون بيقلق من قبل هيئة الاتصالات التركية
ولو بقيت مفتح ممكن تسجلوا بطريقة غير قانونية بي 15 ليرة اي 150 ج سوداني
بيكون شغال معاك سنة او لغاية ما هم يعملوا مراجعة دورية سنوية ويتم اكتشاف انك فاتح خطة بطريقة غير قانونية. فيتم اغلاقها اتوماتك.. وبامكانك فتحه مرة اخري بذات الطريقة وهكذا,
دي شفتنه مني وعملتها كم سنة لغاية ما اشتريت تلفون جديد من تركيا هههه
ونحن في السودان نحمد الله انو الاتصالات رخيصة والشرائح مجاااااااااااان
في زمنا كان بي جنيه في السوق العربي
او نقول في نفس الوقت انها ثغرة امنية وبلدنا همله هههههههه
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: mayada kamal)
|
ميمي كمال
بالغتي لكن
متين المقرر اتغير ؟
ما كنا مع هي للله والاخوان والمؤتمر الوطني .
باالله قبل تركيا من الداخل
كليمنا عن تركتك الانقاذية ، من الداخل او الخارج زي مادايرة
معقولة يااخي تجرتبك الخاصة محصورة ومحددة في تركيا ؟
انت السودان بالنسبة ليك مامحسوب حتي تجربة ؟
صحيح الاختشوا ماتوا
| |
|
|
|
|
|
|
|
|
|
Re: تركيا من الداخل(سلسلة موضوعات عن تجربتي ا� (Re: معاوية المدير)
|
سلام حبيبنا عبد الغني
Quote: خد يا خضر
دي الخلايا الكانت نايمة برة و متجدعة ببعثات على حساب السودان
و بكل بجاحة كوزرة السجم دي تقول ليك جاتا اسكولرشب
هاكي الشب دا
جوك بتوع الأوتوبيس
من بوابة تركيا قاليك
غايتو عاجباني مثابرة الفحل جاب رسومات الثوار يعني أضعف الإيمان |
| |
|
|
|
|
|
|
|
|
|
يا كوزة السجم (Re: خضر الطيب)
|
يا كوزة السجم
| Quote: لو الاخلاق البتتكلم عنها زي اخلاقك دي ياها طرفنا منها |
معروف طرفك من الاخلاق و ما عندك ليها التكتح
حاجتين انتي ككوزة غير مؤهلة انك تتكلمي عنهم , هم الاخلاق و الدين
فاقد الشئ لا يعطيه
Quote: علاقة البوست دا بالشهداء ش نو عشان اترحم عليهم.
|
المتعارف عليه لما اي زميل من الشرفاء يغيب عن البورد و يرجع , اول حاجة بترحم على الزملاء
الذين توفاهم الله في الفترة السابقة اي فترة غيابه, و بتمنى عاجل الشفاء للمرضى ,دا طبعاً في الأحوال العادية
اما في حالة الثورة فبترحم على الشهداء و الجرحى و بطالب بالإفراج عن المعتقلين لانو النظام الوداك تركيا على حساب الميزانية
لانك من داعميه الأصليين حتى في لقاءاتك التلفزيونية الباهتة و الساذجة في القنوات التركية الناطقة بالعربية
كان اكبر همك هو التبرير لنظام سيدك الهالك البشير و الذي ذهب غير مأسوفٍ عليه الى مزبلة التاريخ , هذا إن قبلت المزبلة به
الشاهد على كل ما سبق , عندما قام النظام بقتل اهلك في كجبار , لم يفتح الله عليك بكلمة ترحم على هؤلاء الشهداء الابرياء
ناهيك عن إدانة للنظام , لانك كنتي حتفقدي العلف ( حق الباسطة و الحليب ) قطع شك عصابة النظام كانوا حيرجعوك من تركيا بي خبيزك
المعروف انو الكوز او الكوزة ببدوا حياتم بي يرقة شرنقة حشرة كاملة , و الحشرة دي ممكن تكون قرمبعة , لكن في الغالب بتكون ابو الدرداق
ممكن و لسذاجتك و طايوقك الفاضي الا من التطبيل ما تكوني عارفة ابو الدرداق .. دي اوسخ حشرة في الدنيا, و هي مثال وتشبه كل كوزة و كوز
تباً لكي كوزة ما تستحي و لكل من شايعك من الارزقية و التا . فهين
كت آوت :-
ما حانكر حقك في الدراسة الأكاديمية .. لكن الفهم قسم , و دي قسمتك المتواضعة .. و تظل الكوزة كوزة , و بعيدة كل البعد عن الآدمية ناهيك عن الإنسانية
وحتى الآدمية لن تتحقق في حالة الكيزان حتى الممات او حتى يلج الجمل سم الخياط , او حتى يشيب الغراب , و يبيض الفأر
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
mayada kamal
منصوري
محمد بدرالدين
الزبير بشير
علي عبدالوهاب عثمان
ombadda
خضر الطيب
Amira Hussien
عزالدين عباس الفحل
ابوحراز
قسم الفضيل مضوي محمد
HAIDER ALZAIN
MAHJOOP ALI
معاوية المدير
Sharif Nasirladeen
فيس بوك
تويتر
انستقرام
يوتيوب
بنتيريست