كتب الأستاذ : الطيب عبدالماجد سامعني يا ( برعي ) ...!! لاقيتو وأنا داخل علي حرم الإعتصام من ناحية كبري الحديد ...شفتا العلم الفي خدو دا ...!! وشايل ليهو واحد تاني في يدو ...!! اتبسطتا منو شديد ..!! سلمت عليهو ...قلتا ليهو كيفك إنتا كويس ....!!؟ قال لي تمام التمام ( إجابة تطمن ) ...!! قلنا ليهو بتعرف لي خيمة ناس ( مجددون ) دي وين ...!! ؟؟؟ قال لي ( خيمة نجددا ليك ...) ..!!! 😳 داير أقع من الضحك ....فلم أتوقع الرد ...!! وزاد إعجابي بالفتي ...!! قلتا ليهو أصلي إنتا ياخ ...!! يلا وصفا لي .... قال لي تعال معاي بوديك عديييل ...!! وفعلا مشينا مع بعض ....وفي الطريق قعدت أتونس معاهو ...!! قلتا ليهو إنتا بتجي هنا كل يوم ...!!؟؟ أخد ليهو ضحكة كدا ...!! قال لي ...كل يوم شنو ياخ ...!! أنا ( صابيها ) هنا طوالي ...فضحكت أنا هذه المره ....!! قلنا ليهو والله تمام لكن ...!! أها وقاعد تمشي البيت مرات ...!!!!! رمقني الفتي بنظرة لا أنساها ...وهو يصطحبني ....!!
نظرة فيها مزيج من الأسي والدهشة والاستغراب ...
قال لي أنا بيتي هنا ...!!!
ولم أكمل أنا السؤال...!! فقد رد الفتي ...!! ووصلني الرد...!! بسرعة حولتا الموضوع ...قلتا ليهو أيواااا ...والله كويس إنتا قلتا لي اسمك منو ...!!؟ قال لي ..برعي ...!! إسمي ( برعي ...) قلتا ليهو ....اها والرسم ليك العلم الجميل دا منو ....!!؟ قال لي دي ( كنداكة ) اصلية ياخ رسمتو لي ...إسما ( تغريد ) ...( تبرع باسمها دون سؤال وقد اختزنه في ذاكرته الصدوقة ...!! ) أعجبت بالتوصيف وبالبت اللطيفة الرسمت ليهو العلم دي ...رغم اني ما عارفا دي منو ...!! بس إتخيلتا جمال الروح ......!! لقد ( غردت ) علي خده النضيض ....!! .....( غايتو جنس حب في المكان دا ) ....♥️ فجأة كدا وبدون مقدمات برعي دا قال لي إنت فنان ...!!؟؟ استغربت السؤال ... !! قلتا ليهو ...لييي بعني ...!!؟؟ قال لي ناس كتار بسلمو عليك ....!! ضحكت أنا وقلتا ليهو أيوا أنا فنان ...!!! وهو يضحك ساااي ...!! قال لي غني لي ....😳😂😂
(وتمنيت وقتها أن كنت فنانا لألبي هذا الطلب البريء العذب ....لبرعي الجميل .....!! ((أي صدق هذا ونقاء ..!!)
أها ونحنا ماشين كدا ....!! فجاة قال لي وصلنا ...ياها دي الخيمة بتاعة الناس ديل ...وصلنا ...!! داير تاكل ...!!؟؟ !سألني ببراءة حسدته عليها وضحكت ... قلتا ليهو ياسلااام يابرعي ياخ ...شكرررا ياظريف ما قصرتا ابدا معاي وما حسينا معاك بالمشوار .. وكان الفتي قد استلمني من النفق الاول حيث سكانه الأصليين يواصلون الطرق والتحليق كما الأطيار ...
قلنا ليهو كتر خيرك وهاك أمشي إشتري ليك حاجه حلوه هديه مني ...!! و أنا بطلع في القروش كدا من المحفظة ...صدني الفتي ورفض في إباء وشموخ وعزة هزتني من الداخل .....قال لي لا والله انا هنا تمام التمام باكل وبشرب وبنوم والخيمة دي بناكل منها ...!! لم اجد ما أقوله أمام هذا ( المعلم ) .... عندي طاقيه كدا لبستها ليهو ...قلتا ليهو دي هديه مني عشان ( الحر ) ...!! فقبلها ( الكبير .....) ليتك يا ( برعي ) تعلم أن هناك من أكلو السودان شخصيا ...وهو الذي أطعمهم وعلمهم وآواهم ومنحهم كل شيء ....فلم يترددوا لحظة في أكله ....!! وأكل البشر ...!!
استوقفني المشهد .....
ماهذا المكان الباذخ ....!! واي سحر فيه ...!!؟ من اين جاءت هذه الجموع المنتشرة بهذه الكثافة ...وما هذا السحر والجمال الذي يغلفه المشهد و أي بهاء هذا وسطوع هنا في هذه البقعة المضيئة
اكتشفت حاجه غريبه في أرض هذا ( الإعتصام ) إنو الزول بشوف الناس كلهم جميلين وحلوين ولطيفين ...!! كيف انقشعت الغشاوة التي كنا نري بها بعضنا البعض في بعض الأحيان ....ونتوجس خيفة في أحايين اخري ..حتي كدنا أن نفقد الثقة في أنفسنا والآخرين ....!! هل ياتري يتم حجز ( الشياطين ) ماوراء نقاط التفتيش .....!! ويمنعوا من الدخول....لهذا المكان الباذخ .....!! والتفتيش بالذوق ....!! ياربي ...🤔 يبدو أن هناك بالفعل من حاول أن يلعب بال ( داتا ) بتاعة الشعب السوداني لغرض في نفس ( مرعوب ) ولكن الراجح أنها كانت عصية علي الإختراق ....!! لذلك أظنهم فضوا هذا الإعتصام الذي كشف عن فشل العملية وإعادة ضبط ( المصنع ) ... وفاتهم ان البيانات كلها والصور مخزنه في ضمير الأمة وأنها قادرة علي استرجاعها في اي وقت .....!!! لقد فضوا ( المكان ) لكن هيهات أن يفضوا ( الروح ) فالاعتصام ( فينا) ولسنا ( فيه ) .....!!
أها وأنا لافي كدا في هذا المكان المهرجان ...!! جات شاحنة كبيره شايله ليها ( جنريتر ) أكبر منها في ضهرا ...!! لونو أصفر ...قالو دا جايبنو لي رمضان .. والناس بتفتح في الطريق للشاحنة ...وبرضو بي ( حب ) ♥️ بس أعاين ليك في راس ( الجنريتر ) دا من فوق ألقي ليك زولي المابغباني بأشر لي من فوووق ...!! وانا اتفقعت من الضحك ....طلع دا ( برعي ) ....!! مقنطر فوووق في راس ( الجنريتر) ....وداير يتشقا من الفرحة ولابس الطاقية .... انا غايتو فرحتا فرح ..كأنو دا أنا الطالع فوق دا ( وأظن أن عقلي الباطن يسترجع ملامح طفولة ولت ...!!! ) عاجباني فرحتو دي عجب ....
ايوااا نسيت أقول ليكم...!! لما وصلني ( برعي ) دا لي خيمة ( مجددون ) شفتو سلم علي الصديق العزيز ( فارس النور ) ( سيد الحاجات السمحة) سلم عليهو بحراره ...!! قمتا أنا قلتا لي ( فارس ) إنت بتعرف الزول دا ...!!؟؟ قال لي كيف ياخ دا ( برعي ) الود الشفت حافظ الاعتصام دا ركن ركن ..!! وزاوية زاوية ...!! وهو المرشد السياحي الذي من الممكن ان يأخذك في جولة سياحية كاملة الدسم ...!! قال لي حافظو اكتر من ناس ( التجمع ) ....ومايفوتك صوتو سمح بغني ...!!
( ايوااا عشان كدا قبيل سألني قال لي إنتا فنان !!؟؟ )
قال لي بتصدق لحدي الطيارة القدام الجوية دي عارفا وموديلا كم ومهامها القتالية ..وكل حاجه عنها ... قلتا ليهو ياخ أنا لازم أعمل لقاء مع ( برعي ) دا في التلفزيون ....أنا مبسوط منو شديد وهسا اتبسطا اكتر ...!! فارس عاين لي ( برعي ) كدااا وقال ليهو بختك يامعلم حيجيبوك في التلفزيون ....!! ( ضحكة ( برعي ) في تلك اللحظة ونظرتو بخجل لينا وللأرض وفرحتو بهذا الاهتمام ...حلقت بي الي ما فوق السحاب ..) 💕 ( فارس ) قال لي دا لو وافق ...!! مشغول شديد اليومين ديل والاستعداد في ( الاعتصام ) لي رمضان وضحكنا انا وفارس ضحك شديد ...و( برعي ) معانا ميت من الضحك واخدتا قعدتي معاهم وغادرت المكان .... ولم يغادر برعي ......!!! بعد فض الإعتصام المؤسف وبهذه الطريقة الوحشية والتي يندي لها جبين الإنسانية .....!! طوالي اتذكرتا برعي ....!! هيا اخوانا ( برعي ) ....!!؟؟؟؟؟؟؟ 😳😳 إحساس ثقيل تملكني ....!! ودعيت من قلبي إنو يكون بخير ....!! بقيت كل ما أشوف صور في ( المستشفيات ) ولا ناس ماسكنهم ...ولا اي صورة من هناك ...!! طوالي بفتش بعيوني في ( برعي ) ...و أدعو له في سري بالحفظ ...و إن شاءالله يكون كويس ومالاقيهو .....!! ....!! إن شاءالله ما تكون نزلت من الشاحنة ديك ومرقت بيك .....!! إنتا لسا صغير يابرعي ياخ ....!! اسأل الله الكريم ورب العرش العظيم ان تكون بخير ...ياصغيري .... لا أدري لماذا لم تفلح الطائرة التي تحرس الجويه في حمايتك رغم معرفتك بقدراتها ..!! لنا الله ولَك أيها الجميل الوديع ...!! ( برعي ) ياهو المعاي في الصورة دا .....قال لي داير أتصور معاك قلتا ليهو أنا العايز أتصور معاك فقام بتصويرنا الصديق الجميل ( مصطفي ) وأرسلها لي فأرسل لي معها زخات من الشجن و والترقب أشرككم فيها ...!! وبرعي سيد الصورة ذاتو قال لي رسل لي الصورة ...!! انا كمان بكل تفاؤل قلنا ليهو اديني رقمك ...!! فضحك ( البرعي ) (وللاسم دلالاته عندي والمعاني ....) قال لي لما أكبر ...هسا أنا ما عندي تلفون ....!! ليه خليتك يا ( برعي ) من غير تلفون ياخ ....علي الأقل كنا نتصل نعرفك وين ...لكني أتركك للعزيز القدير ان يحفظك وهو خير الحافظين ...دعوت صادقا إن شاءالله كل خير يا( برعي ) الله يحفظك ويغتي عليك ياربي انت وين هسا يابرعي ياخ ....!!!انا غايتو مطمئن كدا ...( فارس ) قال إنك حافظ المكان شديد ...! بتكون اتصرفت مش ...!! عارفك بتكون مرقت بهناك بي عند السلك ... ما مشكلة حتي لو الطاقية وقعت منك خليها بجيب ليك واحده تانيه اطلع بسرعة بس أجري ....اخوانك الراكزين ديل ما جرو والجري ما حقهم ...!! انت بس عشان صغير ...!! ماتزعل ....طيب ..!! هو انت قايل الاعتصام دا كلو والتعب والمظاهرات دي لي شنو ..يابرعي...!! دي ماليك انت وإخوانك عشان تكونو دايما بخير ...!! ( فنلتو ) اللابسا مكتوب فيها( يوم جيد ) بالإنجليزية إنشاءالله يابرعي تكون أيامك زي ما مكتوبة ليك وكل من شافو يغريه السلام ونطمن عليك ... عندي إحساس انك قااااعد مدسي صاح ...امرق ياخ جنك حركات .... بررررررررررررعي سامعني ....!! ياااااارب..
07-15-2019, 04:02 PM
عمر سعيد علي عمر سعيد علي
تاريخ التسجيل: 08-20-2015
مجموع المشاركات: 885
في ٢٠١٣ ، أول ما عرفتك قلته لي ” والله ياخ انا بريدك شديد لو مت ودخلت الجنه و قالو لي اختار ١٠ انفار نجيبهم ليك حاختارك، قلته ليك ولو قالو ليك ٥ ضحكت وقلته لي برضو حاختارك” فبالله ما تنسى .. اختارني بقو ٧٠ بدل ١٠ مطر، رفيق الدرب ، حبيب الروح ، صديقي الصدوق أول شي أهلاً وسهلاً . في يوم ٢٩ رمضان بعد ما اتكلمته معاك بساعات ومن ما صحيت حاسه بي احساس غريب و بالصدفه لبست أسود في أسود مشيت الشغل و أنا في الطريق كلو بفكر فيك وصلته المكتب قريت خبر انك مفقود ضربت ليك تلفونك مقفول لأول مره في حياتي حسيت بيك فجأه كأنك واقف جمبي قلبي اتقبض قلته ياخ بطلي عواره بسم الله إن شاءالله بكون متدسي في مكان و تلفونو وقع منو؛ بس جوا قلبي عرفته انك بالجد واقف جمبي وانا ما بتخيل خفت شديييد، أبيت اصدق لحدي ما شفت الصوره و لقيت الناس كلها بتضرب لي و ترسل لي و انا مامستوعبه الحصل دا شنو بقيت ببكي ما لأني مصدقه بس لأني خايفه أصدق خايفه أصدق يمكن لأني ما كنت عارفه اعمل شنو ولا احس بشنو. استمرت الحاله دي لمدة اسبوع بعدها جاتني حالة صمت داخلي و خارجي ما حسيت بشي ولا متذكره شي بس كل ما انوم الصمت بتكسر ببكاء هستيري في الحلم ودا كله خوف من إني اصدق ما صدقت ولا حصدق في يوم إنك مت، لحدي يوم زرتني وأكدت لي انك ما مت، في الحلم ضربت لي وانا كالعاده ببكي قلت لي مالك بتبكي؟ قلت ليك مطر إنت وين إنت حي؟ قلت لي انا حي و ما مت وقاعد في البيت بس ماف زول عارف غير ناس بيتنا ، طيب انت وين من زمان قاعد وين، قاعد مع امي، طيب اجيك ؟ اي تعالي لكن ما تكلمي زول و سجلي الرقم دا لو احتجيني في اي وقت اضربي ليمن اليوم داك صحيت مبسوطه ، اي شك او خوف بإنك مافي مكان كويس راح، الحمدلله مطر ما مات مطر حي وفي منزلة الشهداء، بقيت عايشه عادي بمشي الشغل و اجي واليوم بمر لحدي ما الدنيا تروق والناس تنوم…… تاني بنهار! أعفي لي يا مطر البكاء الكلو يوم الماف ليو داعي دا، بس والله عشان مشتاقين ونفسي اتكلم معاك و تحكي لي حصل ليك شنو والضربك منو و ليه انت وليه في راسك ليه ما في مكان تاني ليه ما ادوك فرصه تقاوم، إنّا لله وإنّا اليه راجعون ، لا اله الا الله والحمدلله على قضاء الله. شكراً يا مطرونه على كل شي، إنك بنيت شخصيتي و كنت خير رفيق و صديق من ٢٠١٣ و للأبد ، شكراً زاتها ما كفايه وانت قاعد معاي و انا عارفه و حاسه بيك و بلاقيك كل يوم في الحلم. مطر علمني ما اتكلم في زول الّا بالخير٦ سنين عمره ما جاب سيرة زول بباطل ولو عايز يحكي لي قصة للعبره بحكيها بدون ذكر أسماء ، عمره ما فضح سر زول عمره ما قصّر مع زول و كان عايش للناس ولأهله مطر مره ضرب لي بليل قال لي في مرأه كبيره راقده في الشارع وانا ما شايل معاي قروش جهزي لي بطانيه و سندوتشات اجيبهم ليها مطر بمشي يشتري العاب ويغلفهم و يوديهم لأطفال المايقوما بحب الفرح بحب يفرّح الناس، ماف زول عرّس ما زفاهو، لدرجة والله مره مشى زفّا عرسان لقاهم في الشارع عربيتهم خسرت بيهم. مطر كل مره كان بتأخر في رجعة البيت لأنو كان بوصل الناس الما لاقيه مواصلات لحدي بيتهم مطر الصاحب و الخادم لأهله و أخواته و عماته و خالاته و اكتر زول مصاحبهم كلهم. مطر طفل بريء يوم المناقشه بتاعتو ضرب لي الصباح و هو ببكي قال لي يا هيفاء أمي فخوره بي شديد و انا فرحان شديد إني رفعته راسها بعدين قعد يضحك. مطر مره قال لي انا بكاااااي بالمناسبه زي ماما سيده ما تشوفيني كده، انا لسه بطوط (تمتم) على قول عماتي. مطر اخر مره اتكلمته معاه في التلفون قال لي فال اختي بقى عمرها ١٣ سنه وايمان اسي عرست اناما عارف انا سافرته شهرين ولا سنتين لكن الحمدلله الكبروا . مطر صاحب السودان كلو، في اي حته عندو صاحب لأنو عمرو ما حكم على زول ولا أذى زول ولا قصّر مع زول بتقبل الناس بكل انواعها و بتعلم منهم و بعلمهم لك الرحمه والمغفره يارب، عمري ما حتكلم عنك بصيغة كان، دائماً ححكي عنك وح أورّي الناس محمد مطر دا منو، إنت معانا دايماً وانا اصلاً شخصيتي دي كونتها منك انت و للأبد حتكون جزء لا يتجزأ مني. أستودعك الله الذي لا تضيع ودائعه و الحمدلله الحمدلله والله فخوره بيك شديد و فرحانه ليك شديد، انا عارفه انّك مبسوط و بتكتشف في حاجات جديده في الاسترو عارفاك بتحب الخارجيات دي لكن أعفي لي قلة حيلتي و جرحي الما عايز يبرا دا أعفي لي دموعي دي وما تنسى تسوقني مع ال٥ قافله عليك انا، مع السلامه لحدي ما نتلاقى ، في أمانة الله.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر سعيد علي
فيس بوك
تويتر
انستقرام
يوتيوب
بنتيريست