احب مكان.. وطني السودان هذه الاهزوجة التي اصبحت شعار قوميا كتبها سيف الدسوقي وتغنى بها برضو ابراهيم عوض الجابري غنى للدسوقي رسائل (مافي حتى رسالة واحدة)
هاشم يا حبيب التحية ليك والراحل المقيم سيف الدين الدسوقي والعمالقة عثمان مصطفي والجابري حقيقة الاغنية في وقتها وهي بمثابة هدية وقلادة لشباب الثورة السودانية
07-05-2019, 10:06 PM
احمد حمودى احمد حمودى
تاريخ التسجيل: 01-11-2013
مجموع المشاركات: 4364
Quote: حقيقة الاغنية في وقتها وهي بمثابة هدية وقلادة لشباب الثورة السودانية
لست من أهل الغناء لكن بعد سماع المؤتمر الصحفي للاتفاق جاءت هذة الأغنية فى خاطري والتى تعبر عن هؤلاء الشباب الذى رايتهم فى الاعتصام والإضراب والمليونية وهم الان ( الماسكين الدركسون ) . ودا شوف عين ما رأى
07-06-2019, 12:25 PM
Kabar Kabar
تاريخ التسجيل: 11-26-2002
مجموع المشاركات: 18537
ول ابا هاشم احمد ادم..حبابك يا صديقي يعني ما لقيت غير دي يا هاشم؟ هل تصورت انك تخوض رهان خاسر؟..ناس تقول ليك غنا ابراهيم عوض ممكن يكون وجه الثورة؟..خصوصا لو اتربيت على وجدان انو الثورة لازم تكون اغاني وطنية؟..ثم تشغلك الحيرة وتنساك في دروبها العصية وانت بتفتش عن ضبط المعادلة: يا ربي كيف يكون غنا ابراهيم عوض قناع للثورة؟..المهم.. لازم تبقى من ناس الغنا يا هاشم..صدقني ده المدخل المهم عشان تعرف امسودان هي شنو..ماشي وين..وكيف ح تكون..! وكتابة تاريخ اللحظة يا هاشم ، مرات قاسي واقسى مما ترجعي ليها تاني عشان تقوم تكتبها..فشنو اخير نضرب الحديد وهو ساخن..عسى ولعل ننمرق بي حاجة متماسكة..!! شكرا يا صاحب ، وبعد اذنك ..نتونس مع حبيبنا ول ابا احمد ياسين..ونسة يا هاشم ممكن تنفع معاك لو تاورك حس المؤرخ..وفكرت تكتب..! الثورة فركة كعب بين تفاؤلك يا هاشم (المصير/دوب ابتدينا) وبين جنون صاحبك كبر/اليأس (الليلة شوفتك مستحيلة)..وبرضك بنفس الغنا يا هاشم..غنا الذري ابراهيم عوض..! الخاطرة الجاية لحبيبنا احمد ياسين ..قد يكون فيها افصاح وفضائح عدييل يا هاشم..ويمكن تبقى شاهد للدينا والزمان..وكل عزائي انو احمد ياسين لو كتر ح يشتغل خاطرة بتاعة موسيقى وكده..!! الثورة انتهت بفترة انتقالية منتظر انها تحسم حاجات كتيرة يا هاشم..لكنها تظل لوحة جميلة وانيقة فيها جوانب كتيرة..وألأهم انها خطاب مفتوح يتيح للناس ان تضيف ما يخطر في خيالها..ومن ذلك ونستي الجاية مع حبيبنا احمد ياسين..!!
كبر
07-06-2019, 01:03 PM
Kabar Kabar
تاريخ التسجيل: 11-26-2002
مجموع المشاركات: 18537
عارف يا احمد ياسين..هاشم وانا اتعاصرنا في الجامعة..عشنا تفاصيل حزينة..تفاصيل ثورة مجهضة..ثم مشينا في دروب الكون..وفي الحلق غصة ثورة مؤجلة..ولمن حدثت الثورة السودانية الحالية..هاشم كان محظوظ..مشى شافها بعينو..وشكلها كان مدها عالي..فلم يستطع ان يكتب عنها كثيرا (طبعا الزول بتاع تاريخ ، وحينما يعجز زول التاريخ عن قولة بغم، فيتخيل لي التانيين محتاجين زمن عشان يعرفوا شكل المداخل لظاهرة جميلة ومعقدة مثل الثورة السودانية)..
بيد ان صديقنا هاشم..رجع لوجدانه..فكانت فكرة التعبير عن طريق الغنا..فكان اختيار اغنية ابراهيم عوض (المصير)..وكانت هي وجهة هاشم المبدئية وتصوره للثورة من جانب رؤيته..فهل يمكن ان نرى نفس الثورة من زاوية اخرى وبنفس خطاب الغنا بتاع ابراهيم عوض..الذي يتحسس صاحبنا هاشم منو بقوله (انا ما زول غنا)؟...
المهم..يا احمد..
حصل اتخيلت شكل الثورة؟
زولة ابنوسية ، نحيلة ، تشكيلية ، معلمة تعلم الصبايا معنى الإنسان..!
لها تصورات عجيبة عن الكون والحياة من حولها..فهي ترفض ان يكون اليساري يرتدي بنطال الجينز القذر ويهمل الإهتمام بمظهره حتى يتبتز الدنيا بانه مضطهد..!!..كانت ترى ان انسان اليسار يجب ان يكون نظيف وانيق حتى يخلق الإثر المطلوب في نفوس من ينظرون اليه..!!..واول مرة اعرف يا احمد ان انسان اليسار يمكن ان يكون انيق وحبوب ومبادر وصاحب الناس كلهم..!
طيلة معرفتي بها ، كانت انيقة وجيهة ، وسيمة..تشتهي انك تجكسها..!
تلك البسمة يا احمد..البسمة الوضيئة..الضحكة الواثقة..تضمد الجرحى..تخفي المطاردين..تحفظ مقابر القتلى..وتضحك كأن شيئا لم يكن..! سكتها كانت صعبة يا احمد..بالجد كانت صعبة..! كان عندها راديو مسجل (ناشنوال بانسونيك)..وبعض الأشرطة (الكاسيت)..بينها شريط محببة ..تحرص ان تشاركنا السماع له..وهو تسجيل لإبراهيم عوض.. تسجيل شايع يا احمد ياسين..وحينما اضيف لك بعض منه هنا سوف تتذكره بسهولة..!
كانت مجكسة الثورة يا احمد وبتقول لي (الليلة شوفتك مستحيلة)..!!
كنت اتحدث اليها..ذات يوم..وكانت قد جاءت من الدلنج الى امبدة..وهي التي حصلت على درجة الماجستير في علم النفس وكانت تحدث صديقاتنا واصدقاءنا وتقول ليهم :كلو من كبر..!!..
كنت احادثها من مدينة ريجاينا في مقاطعة سسكتشوان ..وفي نهاية كل محادثة نتقاسم اغنية (الليلة شوفتك مستحيلة)..وتلك الشوفتها مستحيلة..هي بتها التى حلمت بحضورها..!!
ده كلو يا احمد..وهي تخفي عني انها كانت مشلولة تماما ولا تستطيع الحركة..وتفرض على شقيقتها التي تحادثنا الأ تذكر تلك السيرة..!!
قالت لي ، وهي تضحك: غني لي الليلة شوفتك مستحيلة..!
قلت ليها: صوتي شين وح يخلعك..!
ضحكت ، نفس الضحكة الأنيقة وقالت لي: بقدر اتحمل شناتك..!
وبكل حسن نية ، غنيت ليها: الليلة شوفتك مستحيلة..!
ضحكت وقالت لي: هل تصدق صوتك بيشبه صوت الهادي الجبل..! ثم سكتت برهة..وقالت لي افادة غريبة: أي حاجة كتبتها ليك عندي منها نسخة وأي حاجة كتبتها لي محتفظة بيها..الحاجات دي كلها مع اختي منال..!! ومن غبائي يا احمد..الفكرة ما وقعت لي..تب ما وقعت لي..!
بعد خمس سنين (2012) لاقيت منال..ورغم انها كادر سياسي يتميز بالحذر والحيطة..ضحكت نفس الضحكة السمحة ديك..وقالت لي: ممكن تندن لي بغنية الليلة شوفتك مستحيلة..!
دمعت عيني..وقلت لمنال: بقى اتنين شوفتهن مستحيلة يا منال..!
في هذه الثورة يا احمد..بنات واولاد صديقاتها واصدقائي..شاركوا في اعتصام القيادة.. شاركوا في الثورة..وحينما كنت اتواصل مع بعض صديقاتي (صديقاتها)..بعضهن بخباثة ..بيدندن : الليلة شوفتك مستحيلة..!!..مرات اصرف بركاوي..ومرات اقطعها في حناني يا احمد ياسين..!!
طبعا يا احمد..كن الله مد في الأيام..في الويك اند الجاي..تحديدا السبت..ح اتصل على منال واقول ليها: واحدة شفتها..والتانية (رغم انها معاي) ح اقول ليها الليلة شوفتك مستحيلة..!
كتر خير الثورة يااااااااااخ..
شكرا على احتمال هذا التراش يا احمد ياسين..
كبر
07-06-2019, 01:05 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
اييييييييه كبر وصل كبر وما ادراك ما كبر ، نحن ما بين فجر وسحر وزي ما المح .. الثورة فنحن بين دفتي الليل والفجر ليلى طال ما شفت فجرو عمرى ولى و جف زهرو كبر اظهر وبان ودي اغنية (إظهر وبان عليك الأمان ) لحنها برعي محمد دفع الله وهو في مصر واستدعى ابراهيم عوض ليغنيها في فيلم ( إسماعيل يس طرزان ) وهناك ابراهيم غنى اغنيات هي مجاراة لاغاني مصرية لفنانين كبار مثلا اغنية( ياصباح يازاكي العبير) هي مجارة لاغنية محمدعبدالوهاب (القمح الليلة) واغنية أبو عيون كحيلة هي مجاراة لأغنية عبدالحليو حافظ ( أبو عيون جرئية ) ا الأغنية أعجبت شاعرنا الكبير والاعلامي سيف الدين الدسوقي وبنفس اللحن عمل انشودة ( أعز مكان وطني السودان ) وبعد كدة كتب الدسوقي لأبراهيم عوض: أيوه جيتكم يا حبايب كفاح شعب يا وطن المرأى الجميل و المصير
07-06-2019, 01:47 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
عزرا على الاختلاف ، لكن الثورة انطلقت بهذا الاتفاق والله يا كبر التنظيم والتنسيق والانضباط الذى رايته بين هؤلاء الشباب والشابات ، والأهم ( القطع الأخضر ) للهتافات والشعارات ، والتفاعل مع اللحظة قد حطم كل نظريات التحليل السياسي والاجتماعي المتعارف عليها . اما عن اليأس افوقك بسنوات فيه ( 18 عام غربة ) وكنت أظن جيلنا كلة من الذين فقدو الأمل ولكن اثبت لى العكس الصديق مهدى رابح عندما شاهدته فى احدى القنوات الفضائية يتحدث .. وله التحية . اما عن التاريخ فهو عاجز لان التاريخ بطبعة يدور جول الشخوص و احداث عصرنا أصبحت تدور حول المجاميع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هاشم احمد ادم
خضر الطيب
احمد حمودى
Ahmed Yassin
Kabar
فيس بوك
تويتر
انستقرام
يوتيوب
بنتيريست