من تجي داخل على ساحة الإعتصام ياقبلوك لجنة التفتيش .. تفتيش جمييييل يتأكدوا انك ما جاي كمخرب عشان يحافظو على سلمية الاعتصام .. وانت ماشي يجيك ( مروحه مان ) و ( همبريب مان ) يملوك طراوة كده عشان الجو سخن وتخش نفسياتك مفتوحة .. تمشي شوية تلقى تلفون واقع يوجهوك تمشي كشك المفقودات تسلمو هناك .. تعاين يمينك تلقى شباب ماسكين شوال .. ايوة شوال وبهتفو ( عندك خت .. ما عندك شيل ) وشمالك ( شير المواصلات ) .. وانت بتهتف مع الناس وحسك يتقرش تعطش تنوي تفتش موية يجوك شباب بوزعو في كريستالات موية لحدي عندك .. قبل ما تحس بالجوع يمدو ليك ساندويتش تقول تدي الجنبك تلقى في يدو في ساندويتشين وموزة .. تملى بطنك تشبع .. تخرم .. الجنبك يقول ليك داااك ( سجاير مان ) ودااااك ( صعود مان ) ايوه رفاهية والله حتى كيفك بتلقاه .. الساوند شغال .. قروب هنا بهتف ( الشعب يريد ) وبهناااك قروب بهتف ( تسقط تسقط تسقط بس ) .. ياخ نص ساعه كده يجيك تاتشر جيش مليان شرفاء يقولو ليك نحن جايين نحميك وتسقط بس .. عااااين ديل شغالين حملة نظافة لساحه الاعتصام .. وديييك بربطو في خيم تظلل الناس من الشمس .. ياخ قالو في قروب طلع فوق الحته العالية ديك عشان يكشف ليكم المنظر ويصور للناس الما حاضرين الحشد الكبيييير ده .. اسمع نرح نلعب كشتينه شوية .. دقيقه اتم قيم الليدو ده بس وامشي معاك .. اسمع اديني رصيد اضرب للشباب ديل .. رصيدي قاطع والله انا زاتي .. ارح هسي شفت ( رصيد مان ) ماشي بي جاي نشيل رصيد ونجي .. ما لقيتو ارح العربية ديك مكتوب فيها ( اتفضل اضرب الكنداشة واشحن تلفونك ) .. ياخ انا مصدع .. ديييك شباب عندهم جبنه وشاي .. لالا ياخ داير بندول .. خلاص امشي (الصيدلية) هناك في الكهربا .. طبعا الوقت ده كلو في لجنة ( متاريس وتأمين ) تأمين للساحه وتجهيز لوردية الليل .. اسمعني يا فردة كتبت اسمك في الورقه ؟؟ ورقة شنو ؟؟ بوزعو ورق صغير هناك قالوا اي زول يكتب اسمو ورقم تلفون زول ثقه قريب منو وفصيلة دمو عشان لولا قدر الله حصلت اصابة يقدرو يسعفوك ويصلو لاهلك ..
الثواااااار عملوا ( دويلة صغيرة ) في ساحه الاعتصام منظمه نفسها بنفسها وكل زول عارف دورو شنو وقايم بيه على أكمل وجه .. ياخ نحن ما محتاجين زول يحكمنا زاتو ..
ده كلو غييير العربات البتمشي تشحن اكل من البيوت والمطاعم وتجي .. غير امهاتنا واخواتنا الما قادرين يطلعوا قايمين بدورهم من بيوتهم وبجهزو في الاكل والعصير للمعتصمين .. وأما جمال الشخصيات الحاضرة بمختلف اعمارهم .. الحماسيين .. الدمهم خفيف .. العازفين .. البجدعو أشعار ثورية .. البغنووو .. ده كوم تاااني .. وتفاصيل كتييييرة عايزة كتب عشان تتسرد ..
ملحمه تاريخيه بتتسطر في السودان .. ياخي دي ثورة عظيمة اقسم بالله ..
كيف ما تسقط ؟؟؟؟؟؟؟؟؟؟؟؟؟؟؟؟؟؟؟؟؟
#ٱجمل_شعب_ثآر
#اعتصام_القيادة
04-10-2019, 12:42 PM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
ناصر سلامات بمناسبه النضافه قبيل شفت اولاد صغار عمر 10 من الشملسه طالعين من الاعتصام كل واحد مالى شوال فارغ مويه وبارد قدر مروتو . وواحدين كبار شويه مجهزين كارو يحملو فيهو الشوالاتهم ويدخلو على بحرى. الشغله بقت فيها للمساكين ديل
04-10-2019, 02:51 PM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
سلامات ناصر تعرف موضوع إدارة فعاليات الإعتصام مهم جدا موضوع وصول شاشات العرض دا مهم جدا لي شريحة متنوعة شباب وناس كبار بيخلي الإعتصام مكان للفرح ووفي نفس الوقت المطالبة برحيل النظام
04-10-2019, 04:05 PM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Nasser Amin
Asim Ali
عبدالعظيم عثمان
فيس بوك
تويتر
انستقرام
يوتيوب
بنتيريست