[bold[\] اذا اردت ثورة ناجحة: دوما انظر للجانب المليان من كباية الموية..ولا تنظر للجانب الفاضي..
فياترى كيف سيكون اختيار كل جانب؟..
المهم..
التحية لأرواح الشهداء (حسب فهمي الخاص، عشان ما ينطوا فينا ناس سدنة الأديان الإبراهيمية كافة التي صكت معنى الشهادة وخطت معيار زي الدهب او الدولار او اليورو..!!) من شباب الثورة السودانية ، وامنيات بعاجل الشفاء للجرحي ، وامنيات ورجاءات بضرورة اطلاق سراح كافة المعتقلات والمعتقلين ممن قالوا لأ في وجه من قالوا نعم..!.. فالكلمة الحق لن تقتلها رصاصة او حبس (ذات دهليز او زنزانة) من قال بها ..!
زمان ، حسب ما اذكر ايام بدايات حكم الجبهة الإسلامية في امسودان ، قام واحد حريف ، وذكي اجتماعيا/ سيولوجيا، قال: الناس ديل شبكونا ليك الله قال والرسول قال..دخلونا الجوامع (المساجد) وهم بي عدلهم دخلوا السوق..!!
اليوم ، وحراك الشباب السوداني دخل شهره الرابع ، ناس كتيرة قالت انها اتعلمت كيت وكيت من الحراك..البيقول ليك ردوا لينا معنى الكرامة..البيقول ليك خلقوا الوحدة المفقودة..البيقول ليك رجعوا لينا فكرة النسيج الإجتماعي الواحد ، البيقول ليك ادونا الأمل انو الناس ممكن تقيف بصلابة في مواجهة نظام الجبهة الإسلامية..البيقول ليك فتحوا لينا فرصة عشان ننتقم منهم..الخ..! البيقول ليك ، وهو طالع سلم طيارة: تسقط بس..!!..والخندق المضاد بيقول ليك تسقط بس شعار معلق في الهوا..!!..بالله..؟؟!!!..والبيقول ليك من باريس (عاصمة النور و الجمال) محتاجين نطور ميثاق اعلان الحرية والتغييروالبيقول ليك هناك محادثات سرية تجري بشان السودان تحت اشراف منظمة بريطانيا..والبيقول ليك (من طرف الحيكومة: امر الطوارئ رقم ستة ولا شنو كده ما عارف: يمنع تخزين النقود في البيوت..!!)..
المعارضة والحيكومة: كلهم لقوا روحهم في شعارات ثورة الشباب السوداني..!!..والله صحي..!!
وانا برضك ، كمواطن من امسودان ، ضارب الجليد والربيع والزهور والنجم والمساء ذاتو..!!، اتعلمت من الحراك الثوري.. اتعلمت ان اتذكرت قراية بعض مواضيع القانون بروح عصرية ومواكبة..اتعلمت شنو يعني مالية عامة وشنو يعني ميزانية امسودان ، ومين بيعد تلك الميزانية..وبنك السودان وسياسات بنك السودان ، وخدمات التمويل ذاتو..وحكاية ضرورة انتشار ثقافة البنوك..وزرة الحيكومة التي تحاول(عبر التدليس) معالجة امر السيولة باستبدال العملة وقوانين الطوارئ والعين الحمرة التي لا تقتل ضبانة..ومراجعة سيرة الإقتصاد السوداني منذ الإستقلال..وهو اقتصاد عمرو ما شاف عافية..ميرود طوالي..في زمن الحيكومة الحالية او السابقة او الجاية..اوانبهار اهالي امسودان بانو بلد غني بالموارد والمصادر ولكنو لسع فقير عشان كده نثور وتاني نثور..والثورة دي بدت منذ اخر ايام الحكم البريطاني ولغاية هسع ماشة ، زي التكون فقدت البوصلة وضهبت عن طريق الوصول..!!..
اها الجماعة دخلونا الجوامع وهم دخلوا السوق ، فلماذا لا نجرب ان ندخل السوق (نفس سلاحهم ، حتى ولو نظريا..؟؟!!)..
منظر الشعب السوداني اليوم: ناس تفتح صدورها لرصاص صلاح قوش ، وناس بتقع وهي خاشة في مدخل بنك؟..ليه الناس المستعدة تموت عشان تدخل البنك بعيدة عن الثورة؟...ليه سوداني او سودانية ، عندو، اهم ليهو يقع في صف تدافع امام بنك عشان يلحق ليهو صرفة شوية جنيهات ، من الوقوف في صف ثورة الشارع؟..
نحن بنغش في منو يا نخبة يا سودانية؟..
كبر
03-30-2019, 04:39 AM
Kabar Kabar
تاريخ التسجيل: 11-26-2002
مجموع المشاركات: 18547
طيب الموضوع ليس حده في حكاية: نحن بنغش في منو..(اصحاب النظرة التشاؤومية سيتوقفون هناك ، يسنون خناجرهم لتقطيع جتة صاحب البوست..ومش مهم)..
دخلة ناس الجبهة الإسلامية للسوق ، جابت معاها بلاوي كتيرة خلاص (جملتها ورمتها صُرة في خيط ممكن نقول عليها : شوال الفساد)..وماح نتطرق ليها الآن..لأنو اتقال فيها ما لم يقله مالك في الخمر..والناس عارفة البير وغطاها..المهم دخلة السوق كانت كيف؟.. دخلة السوق جات عبر فهم محدد: Whenever you have access to power, you have access to wealth من يملك اداة السلطة ، قطع شك يملك اداة الثروة..بفهم ادق اذا كان عندك مدخل للسلطة اذا سيكون لك ، قطع شك ، مدخل للثروة..!
البنوك في السودان ، في عهد الإنقاذ صارت بنوك اسلامية ، تعمل بالمفاهيم الإسلامية ..ودي فيها نقة كتيرة ونقد لكن نؤجلو شوية..اها عشان الشغلان تمشي على الشعوب الطيبة في دار امسودان ، جات فكرة التوسع في البنوك..والبنوك ما بتتوسع ببراءاة كده لله..الإ بعد تتأكد من مصلحة كبيرة في التوسع ده..(هنا مافي حاجة اسمها اخلاق..يا اهلنا ومافي حاجة اسمها طيبة وعمل لمصلحة عامة..اللهم الإ في نظامنا القادم ، وهو ليس نظام المعارضة العجيبة دي..!)..
اها من ضمن المفاهيم الإسلامية ، اتباع ادوات تمويل (يقال انها تتوافق مع الشرع الإسلامي وكده) الغرض منها اقناع الناس بان تخت قروشها في البنوك (مودعين) وبتقول ليهم عندكم نسبة في الأرباح (طبعا الكلام ده نظري..لأن المشارك/المساهم في تأسيس البنك كشركة ح يعود ليه نصيب في الأرباح ، اما ناس قريعتي راحت ديل يودعوا قريشاتهم ، ويسحبوا..ويدفعوا رسوم لتعب البنك ..وتلك قصة تانية برضك..!)..
البنك بيلم القريشات من المودعين..اها يسوي بيها شنو؟..يقوم يخلق منها ارباح وفوائد..ككيف؟..يستخدم ادوات التمويل المشروعة (اسلاميا وكده)..اها ادوات التمويل دي شنو بالضبط؟..الأدوات الشائعة هي: المرابحة ، المشاركة ، المضاربة ، الإستصناع ، الإجارة..طبعا مافي ربأ (او ربما الربا ده حاجة تانية خالص..!!).. اها الحاجات دي نربطها كيف بموضوعنا هنا؟..
في العنوان سألنا: ماذا تريد النخبة من الشعب السوداني: مرابحة ام مشاركة ام مضاربة؟..
ونقوم نوضح الكلمات المتقاطعة دي ونحلها شوية شوية..
بالمناسبة ده برضك شغل ثورة..!! كبر
03-30-2019, 05:06 AM
Kabar Kabar
تاريخ التسجيل: 11-26-2002
مجموع المشاركات: 18547
نفترض ان هناك سلعة (قطعة ارض كبيرة بتاعة مشروع مثلا ، سيارات وجيهة وانيقة تفتح كرين/معرض سيارات ، بقجة ادوية اجنبية/تفتح صيدليات منتشرة في العاصمة والأقاليم ، شوالات قمح غير مسرطن/توفر خبز لسكان كم مدينة في امسودان ، لعب اطفال/تبهج شفع المدن الكبيرة وكده ، قماش هدوم/ تلبسوا شعوب امسودان نسوان ورجال ، اسمدة غير فاسدةـ تترش في شوية مشاريع وكده ، زولات سمحات مستوردات للمتعة فقط..!! ..الثورة..الخ)..!
اها نشتريها كيف مثل هاتيك سلع مؤثرة في حياة الناس؟..او افترض ان هناك عميل مهم للغاية قرر يشتري الثورة (كسلعة مهمة للغاية في حياة الناس ومستقبل البلد) لكن ما عندو رصيد مالي كافي عشان يشتريها..يعمل شنو؟..طبيعي يمشي للبنك..
فكرة المرابحة يا اهلنا: انك تمشي للبنك وتقول ليهو اشتري لي السلعة الفلانية (لأنو ما عندك قروش كافية ، وفي نفس الوكت البنك عندو القروش الكافية..)..والبنك يقول ليك اوكي ، ح اشتري ليك السلعة دي لكن ح اخط طاقيتي فيها (الربح)..اذا حدث الإتفاق..هنا بيكون عقد المرابحة..!!
طيب: الثورة ، نفترض انها سلعة مهمة للغاية ومنقذة للحياة العامة..ياترى مين البنك ومين العميل؟..
العملاء (المعارضة والحيكومة)..
نشوف العميل (الزبون الأول)..
ونقول:
بسيطة: الزبون (اخف من العميل شوية) هو المعارضة.. البنك: هو شباب الثورة..! المال: رصيد كافي من التضحيات والمصادمة والمواجهة للطيش..! فكرة غريبة مش؟.. اها المعارضة راغبة تشتري سلعة (الثورة) ، والبنك (شباب الحراك) عندو الرصيد الكافي لشراء تلك السلعة..!
اها {bold]العقد يكون كيف؟..
البنك (شباب الحراك الثوري) دخل السوق يفتش في اجمل صورة من صور الثورة (كسلعة)..جاب من محاسنها (سلمية سلمية ضد الحرامية ، شعب واحد جيش واحد ، حرية سلام وعدالة والثورة خيار الشعب..)..!
اها البنك (شباب الحراك الثوري) توشك دخل السوق واخد يقدم ويقدم ويقدم من عروض لشراء الثورة (كسلعة)..!
اها المعارضة (الزبون/العميل) دخلتها رجفة شوية.. لأنو هامش الربح بتاع البنك الذي سماهو (حرية، سلام وعدالة) ده ربح عالي شديد للغاية ، والمعارضة ما ح تكسب معاهو شروي نقير..!..نقير ده منو؟..مندري..!
اها النخبة المعارضة: تعمل شنو يا ربي؟
دخول الحكومة كمرابي اعظمي /كمرابح ..في الشغلانة، سوف نشرحه لاحقا..!
كبر
04-01-2019, 04:08 AM
Kabar Kabar
تاريخ التسجيل: 11-26-2002
مجموع المشاركات: 18547
المعارضة زاغت من عقد المرابحة مع البنك (شباب الحراك الثوري) ، وذلك لخوفها ان الربح الذي يسعى البنك (حراك الشباب الثوري) مكلف للغاية..معقول زبون ، قصدي تاجر ، يقبل بعملية مرابحة الربح فيها (حرية وسلام وعدالة والثورة خيار الشعب؟؟)..ياخي افرض بكرة البنك (شباب الحراك الثوري) قال داير يخلص الربح من حكومة المعارضة القادمة(حرية وسلام وعدالة)..ح تقدر توفرو ككيف يعني؟؟!!
المعارضة ضربت اخماس في اسداس ، ورجعت للبنك (شباب الحراك الثوري) وقالت ليهو: نلغي عملية المرابحة دي لأنو فيها مشاكل كتيرة ، ونشوف صيغة تانية..!
اها البنك (شباب الحراك الثوري) قال للمعارضة: مافي مشكلة ، شنو الصيغة الدايرنها؟
المعارضة (كمرابي عظيم) قالت: سلعة الثورة دي مهمة وح تحقق لينا فايدة نحن الإتنين.. فشنو..نعمل عقد مشاركة..ليه ما نكون نحن الإتنين اصحاب راسمال ونتشارك الربح والخسارة بالتساوي..!!
البنك (شباب الحراك الثوري): قال خير ، ومافي مشكلة ، راس مالكم شنو بالضبط؟
المعارضة قالت: ندخل تجمع المهنيين ، نداء السودان ، قوى الإجماع الوطني ، التحالف الإتحادي المعارض..ونقدم ناسنا (كرأسمال) ونشارك في المظاهرات..!
البنك (شباب الحراك الثوري) قال: خير..نعتبرها مشاركة..والمعيار نتقاسم الربح والخسارة سوا..!!
واستمر البنك (شباب الحراك الثوري) بالهتاف النبيل (رأس ماله): حرية سلام وعدالة والثورة خيار الشعب (طبعا اتنازل عن شعارات مثل سلمية سلمية ضد الحرامية ، وشعار شعب واحد جيش واحد: ببساطة المعارضة خايفة تدخل ذات دقسة في طائفة الحرامية ، اما حكاية جيش واحد فهذه ح تدخل المعارضة المسلحة في مليون اٍن واخواتها كمان..فصارت المشاركة: كل يغني على ليلاه..!!)..
اها ، وبكل صراحة..المعارضة خايفة شديد من حكاية (حرية سلام وعدالة)..ده ربح مضمون شديد لكن ح يكلفها الكتير..وهي ما عندها راسمال قدر ده ، عشان تتحمل ربح قدر ده..اها تسوي شنو يعني؟..
خصوصا القصة جابت ليها: ، اموال منهوبة بالسنين ، ضحايا رصاص حي ، ناس بتموت من التعذيب المخجل الذي سال له جبين العالم عرقا متدفقا..، وبمبان لا تعرف المعارضة عدد ضحاياه التي ماتت اختناقا وموتا بالغبن ، ومعتقلات ومعتقلين (الحكومة في ذات نفسها ما قادرة توفر ليهم وجبات فطور وغدا وعشا ، ناهيك عن غرف تحبسهم فيها..فقالت الرووب وفكت بعضهم..!!)..اها ربح زي ده ، باقي ليك المعارضة بتقدر عليهو؟؟؟!!
كبر
04-01-2019, 04:13 AM
Kabar Kabar
تاريخ التسجيل: 11-26-2002
مجموع المشاركات: 18547
اها المعارضة لا رضيانة بعملية مرابحة (الربح فيها عالي من جانب البنك/شباب الحراك الثوري) ولا رضيانة بعملية مشاركة ( ما عارفة ح ينالها شنو من الربح ، طبعا الخسارة ح تزوغ منها بحجة اعلان الإفلاس وكده..!!).. المعارضة ضربت اخماس واسداس ، وقالت للبنك (شباب الحراك الثوري): قصة المشاركة دي الربح فيها غير مضمون ، احسن نجرب صيغة تانية..! البنك (شباب الحراك الثوري) ، بكل طيبة ، قال: مافي مشكلة ، طالما الثورة هي السلعة التي يرغب الجميع في اقتنائها..دايرين شنو يا ناس المعارضة؟ تبسمت المعارضة شهوة ، وهي مقامرة ومغامرة من النوع ابو كديس ، قالت: نعمل عقد مضاربة يا بنك (وهي تقصد شباب الحراك الثوري الذي دفع الكثير من الأرواح وتحمل استنشاق البمبان القاتل ، والموت تعذيبا في سجون الحكومة ، والمعتقلات والمعتقلين وشنو كده ما عارف...الخ)..!! البنك (شباب الحراك الثوري) بكل طيب خاطر قال للمعارضة: مافي مشكلة تب..اها عرضكم شنو؟.. المعارضة (كمرابي عظيم) تلمظت شهوة من اجل تحقيق الربح الذي يخصها في صفقة (الثورة) وقالت: نغير العقد ، نعمل عقد مضاربة..!!..انتو يا شباب الحراك الثوري : تقدموا لينا راس المال في اسقاط النظام..ونحن بنقدم ليكم الخبرة (معليش يا ناس الحال انعكس شوية..ولكن عدوها ..المافاهم يسأل الهادي هباني ..عشان يوريكم الفساد جاي من وين بالضبط..!!).. البنك (شباب الحراك الثوري) قال: شنو العقد الدايرنو يا ناس المعارضة؟ ناس المعارضة ، بسرعة ، قالوا: نعمل عملية مضاربة..!!..نحن نقدم الخبرة..انتو عليكم برأس المال يا شباب الثورة..! البنك (شباب الحراك الثوري) ، قال: خبرتكم شنو يا ناس المعارضة؟.. ناس المعارضة قالت: نطور ميثاق الحرية والتغيير ، نخوض مفاوضات سرية عبر منظمة بريطانية تشرف على الأمور، وتحت تحت عملية هبوط ناعم وكده ، ننجز الثورة ، تشتريها كسلعة..وربحكم محفوظ في الشغلانة..!! الغريبة يا هاشم الحسن ، البنك انخدع لتلك الحيلة.. فصار يروج لفكرة (تسقط بس..!!..رص العساكر رص ، الليلة تسقط بس..أي كوز ندوسو دوس..الخ)..بعيدا عن الربح الكبير (حرية وسلام وعدالة والثورة خيار الشعب..!!).. ولو مكضبني يا هاشم ، اسال المفاوضات السرية بتاعة كات هام/ شات هام(على قول دكتور يا سر المليح/ياسر الشريف)..ناس دايرين نعمل جبهة عريضة تكون بديل للنظام..!!..معقولة يا هاشم الحسن ناس ، شفع بتموت في الشوارع الحنينة..والمعارضة لسه بتفكر تطور ميثاق الحرية والتغيير وبنفس فاتحة بتقول ليك عندنا مفاوضات سرية..!!..مفاوضات في اديس ابابا ونيروبي ولندن..؟؟؟ بقدر ما كان الشعب حاضر وجاهز للتغيير ، المعارضة غايبة وساكنة في احلام الخيال ذاتو..!!..وبرضك بتفتش عن عملية هبوط ناعم..!! شكرا يا ناس المؤتمر السوداني..! شكرا يا البعثيين الملاعيين الملفوظين..ناس الإشتراكية الناعمة وشنو كده ما عارف..! شكرا يا الشيوعيين..السودان ما حق ابو زول عشان يبتز الناس..!!
كبر
04-01-2019, 04:27 AM
Kabar Kabar
تاريخ التسجيل: 11-26-2002
مجموع المشاركات: 18547
شنو يعني لو حكم اليسار السوداني دار امسودان؟ وهل اليسار السوداني هو الحزب الشيوعي السوداني فقط ام تيار سوداني عريض من حقه ان يساهم في بناء امسودان؟ الداير الجامع ، فهناك جوامع وخلاوي صوفية تسد عين الشمس..! هناك بنوك ، بطريقة تانية ، توفر حق.. Access to power , access to wealth عشان امسودان ما يكون فيها زول/زولة ، معتمد علي ضهر (سلطة وسلطة مال وسلطة دين)..ناس متساوية زي الترتيب..والماعجبو ..هداك البحر يشرب زي الترتيب..ويروى كمان..!!..المافي شنو يا عبد الرحيم حمدي..! عشان مافي زول يتكتل سمبلا ولا يتسجن سمبلا ولا يشرب بمبان سمبلا..وكلو بالقانون ودولة المؤسسات..!!..من غير مرابحة او مشاركة او مضاربة او استصناع او اجارة..!!..بنوك تنال ثقة الزول/ة البسيط والبسيطة عشان يودع قريشاتو لبنك يا عمر البشير..وهو ضامن استثمارها ما ح يكون مجرد محاباة لأخ او اخت..!..ويبقى الكل سعيد..!! فهل المعارضة على استعداد لتحمل مسئولياتها وواجباتها الوطنية؟ ام تنتظر البنك يجيب ليها الربح الحلال في صمة خشمها عشان بعد داك تورينا كيف يكون افساد السلطة والدولة..؟؟!!
كبر
04-01-2019, 04:28 AM
Kabar Kabar
تاريخ التسجيل: 11-26-2002
مجموع المشاركات: 18547
في الجزء التاني ، ح نشرح كيف الحكومة (كنخبة/ عميل تاني) دخلت في حكاية تفاوض وتعامل مع البنك (شباب الثورة)..خاضت مفاوضات من اجل حيازة الثورة كسلعة حيوية مهمة والبنك وحده قادر على تحقيقها..مرابحة ، مشاركة ، مضاربة..!!
الفرق بين الحكومة (كعميل/زبون) تميزت بسوء نية خشن ، خلافا لسوء النية الناعم الذي اتبعته النخبة المعارضة ، وسوء النية الخشن تجلي في تلاتة مستويات: اولآ: الحكومة حاولت تدمر البنك ، وفات عليها ان البنك ليس حاجة مادية وانما حاجة معنوية وطاقة وروح.. ثانيا: حاولت تفرض على البنك ان يبعد العميل/ الزبون الأخر ..وذلك عبر اجراءات اقصائية معينة.. ثالثا: حينما عرفت ان البنك قوي وصامد ..حاولت سكة تانية..وذلك بان تتفاهم مع العميل/الزبون المنافس..عشان يمرق ليها من السوق..وبالتالي تشتري الثورة كسلعة وترميها البحر (يعني عملية اتلاف سلعة حيوية بصورة ظاهرة)..
كبر
04-01-2019, 11:03 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 32995
Quote: شنو يعني لو حكم اليسار السوداني دار امسودان؟ وهل اليسار السوداني هو الحزب الشيوعي السوداني فقط ام تيار سوداني عريض من حقه ان يساهم في بناء امسودان؟
ول أبا كبر، سلام .. أنا أفتكر .. جربنا الأخوان واليسار .. وتجاربهم الأثنين حصادها معروف .. دعونا نعود للشعب .. ونجعله الفيصل ليختار من يحكمه .. بعد هذه التجارب المريرة لن يختار الشعب من يتسلط عليه .. زي ما يقول أهلنا "السايقه واصله" .. الناس تدرج الأمر مستلهمين إرثنا الأجتماعي في العمل السياسي .. حتى يجعل الله لنا مخرجا. الشعب السوداني يختلف سياسياً لكنه متواصل إجتماعياً .. جاء الوقت لتفعيل هذا الإرث الإجتماعي ليساعد في الحل السياسي .. ولا شنو؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
Biraima M Adam
فيس بوك
تويتر
انستقرام
يوتيوب
بنتيريست