من عجايب السودان : 👈 عادي جدا في السودان الحاجات تكمل (تخلص) أو تنعدم من البلد وترجع تاني وفي حاجات موسمية أصلا الناس لا تسأل عنها ولا تطلبها الا في موسمها كالرطب والبطيخ والمانجو..... اللحمه ذاتها بقى عندها مواسم.... الموصلات ذاتها تختفي وتبين.... الدواء يكمل ويجي..... الدكاترة في المستشفيات مرات تمشي المستشفى لا تلقى فيه دكتور ولا دواء.....السيولة النقدية (القروش) ذاااااتها برضو أصابتها العدوى بقت تكمل وتجي تكمل وتجي.... أي حاجة في السودان تكمل وتجي الا أعمار النافذين والدستوريين.... 📌 نتمنى تحصل أزمة دستوريين ونافذين نقوم من الصباح نلقى البلد دي لا فيها رئيس لا فيها وزير لا فيها نائب برلماني ولا أشباههم ان شاءالله نحكمها بي مرقة ماجي... . . 📰 خبر لم يرد في الصحف : 👈 بورتسودان: عبد القادر باكاش : أصدرت وزيرة التربية والتوجيه بولاية البحر الأحمر، فاطمة مصطفى الخليفة، قراراً قضى بإيقاف مدير إدارة الامتحانات والتقويم ومساعديه وكل الطاقم الفني والإداري العامل بإدارة الامتحانات والتقويم وتكليف حواء إبراهيم اسحاق بشغل منصب مدير الإدارة والتقويم ومساعديه وكل الطاقم الفني ، وجاء القرار على خلفية الكشف عن أخطاء في نتيجة امتحانات شهادة الأساس بالولاية تمثلت في خصم 20 درجة من نتيجة تلميذين من إحدى المدارس الخاصة ترتب عليها حرمانهما من الدخول في المنافسة بالعشرة الأوائل. وأقرت وزيرة التربية في قرار تحصلت عليه (السوداني) بحدوث الخطأ، وشُكِّلَتْ لجنة تحقيق للتأكد من سلامة رصد الدرجات لجميع التلاميذ برئاسة أحمد عثمان محمد أحمد 📌 لا يصح الا الصحيح ، شكرا للوزيرة .... .ه. .ه. 📰 الجريدة: 👈 الزرزور يتسبب في فجوة غذائية بمحلية عد الفرسان 📌 الزرزور يكون سلطه علينا كلام (حمدي خارم بارم) الفي قناة الحدث داك . 📰 الجريدة: 👈 صحافيون ينظمون موكبًا سلميًا يشرح دور الصحافة 📌 أحسن لهم من قعاد ساكت . 📰 الجريدة: 👈 جعفر خضر: تعرّضت للضرب والإساءات والاتهامات 📌 أحمد ربك ما اتعرضت للخاذوق . 📰 الجريدة: 👈 الاتحاد الأوروبي: الوصول للمياه يمثل عبئًا في أجزاء من السودان 📌 المياه بت الناس؟ ، في السودان قروشك الخاتيها في البنك الوصول اليها يمثل عبئاً . 📰 الانتباهة: 👈 “الانتباهة” تكشف تفاصيل صفقة بيع منزل”المحجوب” 📌 الحمد لله لأن بعض الناس طلعونا كذابين . 📰 الانتباهة: 👈 قرارات الحل تطول مجالس بالجهاز الاستثماري للضمان الاجتماعي 📌 ان شاء الله ما يفضل فيهن نفاخ النار . 📰 الانتباهة: 👈 احتراق”تانكر” وقود يصيب”5″ أشخاص و”6″ مركبات.. 📌 قدر ولطف والتحية للسائق الشجاع الذي ابعد السيارة عن الطلمبة . 📰 الانتباهة: 👈 صرف المرتبات نقدًا اعتبارًا من اليوم 📌 الله يستر ماتصرفوها ليهم من القروش أم حبر باهت . 📰 الانتباهة: 👈 أحمد عبد الرحمن: الإنقاذ”مسكينة” راحت ضحية للوكيل والوزير 📌 والله مساكين نحن والضحية بلدنا ومؤسساتها التي نهبت وبيعت خرده وهي في قمة صلاحيتها . 📰 الانتباهة: 👈 إعفاء شركات الطيران من الرسوم الجمركية لإسبيرات الطائرات 📌 هههه دا اعفاء استفذاذي ، هي وينها الطائرات . 📰 السوداني: 👈 البشير: تراجعنا عن توصية بحظر سفر الأطباء 📌 برضو دا ما يمنعش انها #تسقط_بس . 📰 السوداني: 👈 “إيلا” يعفي نفوض الجهاز الاستثماري للضمان الاجتماعي 📌 أدي لهم بالحته الفيها الحديدة . 📰 السوداني: 👈 مجهولان يشرعان في ذبح طبيبة صيدلانية وينهبان صيدلية بكرري 📌 الصيادلة ديل بعد كدا حقو يصرحوا لهم بحمل السلاح . 📰 السوداني: 👈 الرئاسة: سنصحح المسار الاقتصادي والسياسي 📌 وووب علي يا قول أميرة علي . 📰 المجهر السياسي: 👈 طعن دستوري يرجئ تنفيذ الإعدام في قتلة مدير مؤسسة الأقطان السابق 📌 ياخي المسلسل دا شغال من زمن التلفزيون ابيض واسود . 📰 المجهر السياسي: 👈 لجنة التشاور السياسي بين السودان وإيطاليا تنعقد اليوم 📌 التشاور دا مع الحكومة الايطالية والا المافيا ؟ . 📰 المجهر السياسي: 👈 شورى المؤتمر الوطني يجتمع”السبت” القادم لإجازة رؤية الحزب للمرحلة القادمة 📌 هذا أمر لا يهمنا في كثير أو قليل . 📰 الصيحة: 👈 شركة السكر: لا زيادة في الأسعار وسياسات الدولة أثرّت على القطاع 📌 هو شنو ال ما أثرت عليه سياسات الدولة ؟ . 📰 الصيحة: 👈 توقيف منتحل صفة لواء”أمن” يستلم عمولات مقابل تسهيل إجراءات بالمالية 📌 هو لو ما فوضى لواء الامن الرسمي دخله شنو في الاجراءات الماليه سيبك من المنتحل . 📰 الصيحة: 👈 الحكومة: قرارات أيلا جراحة تأخرت كثيرًا 📌 لي هسع ما وصلت مرحلة جراحة دي خربشة ساكت . 📰 الصيحة: 👈 “الصيحة” تكشف معلومات جديدة حول فشل مشروع المطار الجديد 📌 المهم فشل سيبكم منه شوفوا لنا جماعة أراضي المندرة خبرهم شنو ؟ . 📰 آخر لحظة: 👈 البشير: حميدة”بلدوزر” ولا يحتاج لوظيفة تمنحه اسم 📌 الهناي شبه البتاعة . 📰 آخر لحظة: 👈 سياسات حكومية جديدة لإدارة ملف”سودانير” 📌 تديروا الخلاء ؟ . 📰 آخر لحظة: 👈 قوش يتلقي الدرديري ويبحثان الملف الأمريكي. 📌 أيواااا لو عاوز تطرطش الجماعه ركز على الملف الأمريكي دا . . 📌ابووضاح 📌
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdulhaleem Osman
فيس بوك
تويتر
انستقرام
يوتيوب
بنتيريست