الاضراب هو التوقف عن العمل بصورة مقصودة بي بساطة جدا ، و بيتم من قبل مجموعة من الأُجراء و بيتوجه ضد رب العمل لي أسباب مختلفة و يشترط فيه اعلان السبب. في نظريات بتقول انه الاضراب عشان يتسجل/يحتسب مفروض يكون عدد أدنى مشاركين فيه 10 أشخاص و يستمر مدة تزيد عن يوم. اي اضراب كان بيتم في السودان طوالي الدعاية المضادة بتبدا تتوجه لي انه ديل 'شيوعيين مخربين' حاجة كدا زي 'طلبة صعاليك غالباهم قرايتهم' الكان منتشرة زمان. الوثائق التاريخية بتوري انه حصلت اضرابات في السودان قبل ظهور الشيوعية نفسها في السودان. في 1903 و 1905 و 1913 كان في اضرابات لعمال مصلحة الغابات لزيادة الأجور، ولا كان في نقابة ولا كان في شيوعيين. لأنه السبب بسيط لمن العامل يحس انه مرتبه ما بيصله او الأجر البياخده ما متناسب مع المجهود البيبذله بيضرب. 1907 اضراب عمال الوابورات بحري، في نفس السنة كان اضراب عمال مشروع الفاضلاب. 1910 اضراب عمال مزرعة التجارب في طيبة (بداية مشروع الجزيرة) من أجل الأجور و السكن و الغذاء، الحكومة استدعت قوة عسكرية من الخرطوم عشان تخمد الاضراب. كذلك اضرابات في 1921 و 1931 و 1934 و 1936 و 1940 اضراب عمال وحدة النجارين عطبرة من أجل تحسين شروط الخدمة و في 1943 اضراب خريجي مدرسة الصنائع لحدي سنة 1946 و انتظمت الحركة النقابية. يبقى الاضراب توصلوا ليه عمال السودان بدون أي افكار مستوردة، و طالما في مشاكل في تأخر المرتبات و العلاوات الاضرابات حتحصل و دا أقل حد. لأنه مفروض تضرب لي تحسين شروط الخدمة مش عشان تاخد حقك المنصوص و متفق عليه سلفا. و الاضراب عرفته الانسانية قديما فأول اضراب حصل في 1490 ق.م قام به صناع الطوب العبرانيين في مصر القديمة. الاضراب في حد ذاته وسيلة و سلاح قوي، لكن كترة اللجوء ليه ما دليل قوة، و دي بتنقلنا لي أهمية التنظيم، وجود نقابة و اللي هي شكل تنظيمي بيجمع العاملين و بيمثلهم كجسم تفاوضي. النقابة جسم تفاوضي مع الجهة المشغلة/الإدارة سواء كانت الدولة أو ادارة الشركة. فالنقابة في تفاوضها و حمايتها لي منسوبيها و قدرتها على انتزاع مطالب العمال بتقدر تقيس قوتها بي قدرتها على تنفيذ الحاجات دي من دون الحوجة للجوء لسلاح الإضراب. الحالة السابقة دي وضع متقدم و مفروض نسعى فيه لي قدام خلال الفترة الانتقالية و تكوين جذور و فهم لي أهميتها خلال الفترة الحالية. و التعلم من التجربة الحالية و الاستفادة منها، و مثال لي العمل النقابي هو تجمع المهنيين نفسه (ممكن الرجوع لمقال محمود المعتصم ربيع النقابة هو ربيع الشعب) ( https://m.facebook.com/story.php؟story_fbid=10216723066602701andid=1042836920https://m.facebook.com/story.php؟story_fbid=10216723066602701andid=1042836920 ). الإضراب حاليا و في ظل غياب للنقابات تماما أو التغول عليها من قبل النظام بخلينا في وضع مواجهة غير متكافئة و في مجازفة لأنه مافي جهة تحميك اذا حصل ليك ضرر من الاضراب، الحاجة البتخلينا نوازن كفة القوة هو الشارع، وجود حراك و مظاهرات و ضغط شعبي في الشارع بيحسن الموقف. من هنا بتجي أهمية الحشد و أهمية التنظيم المبدئي، يعني دائرتك القريبة في الشغل تتفقوا انه تتحركوا مع بعض و تضربوا سوا و تتفقوا انه تواجهوا العواقب بعدين كمجموعة و دي لازم نستصحبها معانا في العمل الدعائي للإضراب الجاي يوم 5 مارس و الإضرابات الجاية و نقيم الوضع. الضغط الاجتماعي و القانوني مثلا برضو بيساعد في زيادة الحماية للمضربين، و دا دور قايمين بيه منبرشات من جهة (تهديد المدراء الحيتخذوا اجراءات ضد الموظفين) و المحامين من جهة مفروض يكون ليهم توضيح مثلا بمقاضاة الجهة المشغلة و خلافه، و دور شعبي بالتشهير و المقاطعة مثلا.
انتهى. #اضراب5مارس #اضراب5مارس #اضراب5مارس
03-03-2019, 08:16 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48727
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة