من عجايب السودان : 👈 بعد تلاتين عام من الحكم يصدر الرئيس مرسوماً يحظر فيه على أي موظف عام استغلال سلطة الوظيفة العامة او نفوذها لتحقيق اغراض شخصية او طلب اي هدية أو قيامه عمداً لصالحة او لصالح شخص آخر باختلاس الاموال العامة أو ابرام اي تعاقدات او الدخول في اي تعاملات ترتب التزامات على الدولة وما شابه ذلك من المحظورات التي حواها (أمر طواري رقم (5) لسنة 2019م)..... 📌 يا ريس دا اسمه المعروف من الدين بالضرورة وكان يفترض انه يكون مطبق خلال التلاتين عام الماضية أما اصدارك له في شكل أمر طوارئ الآن يعتبر اعتراف منك بأنك كنت تارك الجماعه يسرحون ويمرحون دون ضابط أو رابط ، أها لعلمك المظاهرات والاحتجاجات دي طلعت عشان تسترد الحقوق من الناس الذين لم يكونوا يطبقون ما ورد في مرسومك هذا....... . 📰 خبر لم يرد في الصحف السودانية : 👈 مجلس النواب الأمريكى يدين فرض حالة الطوارئي فى السودان وفي بيان من رئيس لجنة الشئون الإفريقية كارين باس يعلن فيه أن التفاهم السودانى الأمريكى لن يستمر مع فرض حالة الطوارئي.... 📌 واللييييلة يا سمراء يا سمارة اللييييلة يا سمراااا .... .ه. .ه. 📰 أخبار اليوم: 👈 رئيس الجمهورية يصدر أوامر طواريء تشمل حظر التجمهر والتجمع والمواكب والاضراب وتنظيم التعامل بالنقد الاجنبي والذهب وضبط السلع المدعومة والممارسات الفاسدة . 📌 كدي خلينا في حظر التجمهر دا ، أها كيف بالنسبة للتجمهر أمام الفرن والصراف الآلي والتجمهر في الطلمبات والا الزول يتوكل على الله يتجمهر وبعدين يطعم عشرة مساكين والا يصوم تلاته أيام . 📰 أخبار اليوم: 👈 الحركة الإسلامية تؤيد قرارات القيادة السياسية . 📌 وتصلح ساعات ؟ . 📰 أخبار اليوم: 👈 الإعلان عن تخفيض سعر الدولار الجمركي 📌 احتار دليلي غلب يا سمير القلب . 📰 أخبار اليوم: 👈 الناطق باسم الشرطة: فتح بلاغات في مواجهة متهمين تحت مواد القانون الجنائي وقانون الطوارئ. 📌 موسم عاد ، قدارف والإيش لبن . 📰 الوطن: 👈 حظر التجمهر والاضراب وإنشاء محاكم الطوارئ 📌 مرحبا بكم العدالة الناجزة وكدا . 📰 الوطن: 👈 قيادي بالشعبي: الإسلاميين الآن "خشم بيوت" وتيارات 📌 والله قريتها واطارات كنت عاوز اقول لكم ادونا ليها . 📰 الوطن: 👈 ضبط مزرعة للحشيش بالجزيرة 📌 كفو ، دا كان عاوز يختصر المسافة . 📰 الوطن: 👈 ايلا يصدر قراراً بإعفاء جلال الدين شلية 📌 أهل مكة أدرى بشعابها . 📰 آخر لحظة: 👈 هارون مساعداً للبشير ونائباً لرئيس الوطني 📌 الله يستر ما يقوم يعمل لنا نفير الوطني . 📰 آخر لحظة: 👈 صدور أوامر طوارئ تحظر الممارسات الفاسدة والتجمهر 📌 هو يعني الممارسات الفاسدة كانت مسموحة ؟ والله ما عندنا خبر الا هسع . 📰 الإ‘نتباهة: 👈 مدير الموانئ بعد إقالته لـ(الإنتباهة): توقعت إنتقام إيلا 📌 فخار يكسر بعضه . 📰 اليوم التالي: 👈 تحديد “3000” دولار و”150″ جراماً من الذهب سقفاً للمسافرين 📌 طيب لو الواحد زوجته عندها دهب زي بتاع زوجة هناي داك المتصوره بيه يدكم ليهو والا يخليهو ليكم في البيت تجوا تشيلوهو من وراهو (ما خلاص بقيتوا خاليين شغل) والا يعمل شنو بالضبط ؟ . 📰 اليوم التالي: 👈 السجن عشر سنوات على المهربين والمشاركين في تظاهرات غير مرخصة 📌 هو لو ما وجود المهربين والشفاطين التظاهر كان جاء ؟ . 📰 مصادر: 👈 (فك وتركيب) الوزارات الاتحادية 📌 أوع يضيع منكم وكيل والا مدير عام . 📰 مصادر: 👈 محطات تقوية لإذاعة الفرقان وزيادة نشاط جمعية القرآن الكريم 📌 أيواااا ركزوا على القرآن كان ربنا يخرجنا مما نحن فيه . . . 👈 وبمناسبة مرسوم الطوارئ رقم (4) الذي يحظر التقليل من هيبة الدولة وأي رمز من رموز سيادتها أو أي من أجهزتها أو العاملين بها بأي وسيلة أو فعل. 📌 وعشان نثبت حنيتنا تجاه الدولة (اللي هي السودان ما يروح فكركم بعيد) نختم بأغنية : حني حني على انا يا ستي الحاصل بي سببو انتي يا ست روحي واحلى غادة يا نني عينيا وسوادا انا بجيك مسلوب الإرادة بهاجر ليك وين ما كنتي *********** حاولوا العزال يفرقوني عن هواكي وهم بعرفوني انا ما ب تنوم جفوني مهما يا الايام اختلفتي *********** الرقيقة الطيبة الحنونة العيون بالشقى انتي لونا كتبت الآمال يوم ونونا يوم تركتي ديارنا ورحلتي الحاصل بي سببو انتي حني على انا يا ستي الحاصل بي سببو انتي . خلي واحد يجي يقول دا منشور يبث الكراهية والا يحرض ضد الدولة . . 📌ابووضاح 📌
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdulhaleem Osman
فيس بوك
تويتر
انستقرام
يوتيوب
بنتيريست