|
|
|
 Re: أين الكبار ؟ (Re: عمر التاج)
|
ود التاج سلام
ما تشفق على الثورة ،بعدين نوع بوستيك
مصنف انو جدادي في الفيس،عارفك منفعل
بس الشغلة مراحل،مش زي سواقة النظام
سايقا صلاح ، سايقا صلاح...
السواقة هنا مختلفة ، متفاهمين و متحابين
زي العنبة و التين.
تجمعنا ، احزابنا وثوارنا
فما تشفق يا صديق.
نحن ح نكون في مظاهراتنا (الصغيرونة) دي و هم يدعموا السلع و قواتهم في استعداد دائم و يشحدوا و يتسولوا ونحن بالطبع لن ننتج قمحا ووعدا و تمني كم يتمنون..
بل مظاهرات ووقفات و اضرابات...
شفت ورطة النظام كيف.
مطالب يوفر و يدعم و يتسول مع شعب كاره لهم
دا الموت البطئ
و بالنقاط...شكلك عايزا بالقاضية
الشعب شكلو عايز يقزقز بالانقاذ
شعب حاقد...مش؟
| |
 
|
|
|
|
|
|
|
|
Re: أين الكبار ؟ (Re: Nasser Amin)
|
مرحبا بالناصر الأمين،
يحزنني والله ويشق على أن أرى الموت و القهر والتعذيب الشنيع يحيط ابناء وطني من كل جانب
من قبل أجهزة امنية وشرطية لا تعرف الرحمة ولا الإنسانية، مقابل سلمية ذل وانبطاح لم تقدم الا القتلى والجرحى، يا اخ اذا في ناس بتلذذوا بهذه الاستسلام حقو يراعو للشباب الصغار البتعذبوا كل يوم من غير ذنب جنوه، السلمية اذا ما بتحمي ناسها حقو تشوفوا بديلها يا اخي، نعم نحن مستعجلين لأننا اتحملنا ظلم السلمية دي ٣٠ سنة في بيوتنا وغربتنا، واتفاءلنا خير لما طلع الهتاف للشارع، اردناه هتافا لا يعلوه الا العز والانتصار مش الموت والاعتقال.
وبعدين يعني فيها شنو لما نسأل من الكبار، يعني مثلا الزعماء الوقعوا على البتاعة الفاضية دي منتظرين الحكومة تسقط عشان ينزلوا الشارع؟ ما اساسا الثوار محتاجين ليهم معاهم في الوقت العصيب ده عشان يثبتوهم وينصروهم، الثورة محتاجة الصادق المهدي والخطيب وغازي ومبارك الفاضل يلبسوا كمامتهم ويقودوا الصفوف ويهتفوا انا الزعيم لاكذب انا ابن هذا الشعب، مش ينتظروا تسقط ويتلقوا وهم في مكاتبهم امنين، الثورة عايزة قيادي يضرب ويعتقل أو يستشهد في الساحات زي ما استشهدوا الشباب الزغب، محتاجين نعش قيادي كبير نقدر نباهي بيه بين القنوات الفضائية مش قادة من وراء حجاب.
الشئ الثاني، سألنا مستنكرين موقف الرفيق سلفاكير، سلفاك ده مش بيمثل الحركة الشعبية العندها قاعدة عظيمة في المنبر ده، والكلام ليك يا دينق وبشاشا ومن لف لفهم، الحركة الشعبية الناس كانت معقولة عليها كتير في الإصلاح وبناء سودان جديد، هي بالفعل كونت دولتها المستقلة ولكن موقفها من الاحتجاجات كان سلبيا للغاية، يعني اذا ادانت القتل والعنف في مواجه المتظاهرين في حد عايز يقول ليها ده تدخل في سيادة دولة أخرى، وامال العملو الرئيس القطري والمصري ده اسمه شنو؟ يا اخ علي الاقل كان سلفا يعبر عن قلقه، يوقف ضخ البترول، يسكت ساكت بدل الموقف الني ده عشية المظاهرات:
Quote: تلقى الرئيس عمر حسن أحمد البشير مساء السبت، اتصالا هاتفيا، من الفريق سلفا كير ميا رديت رئيس جمهورية جنوب السودان، أكد فيه أن استقرار السودان هو استقرار لجنوب السودان وضمان للسلام في الإقليم كله".
وقال سلفا كير، إنه "يتابع بقلق الأزمة الطارئة التي تجري في السودان، معربا عن ثقته بأن السودان بحكمة قيادته ونضج شعبه سياسيا سيعبر هذه الأزمة وهو أكثر قوة وتماسكا". |
الناس البقولوا بوست جداد وحمير، بوستات الهتاف متوفرة في المنبر اشبعوا منها، أو ابقوا رجال وردوا بالمنطق في النقطتين الذكرناهن في البوست، وما في زول بقدر يزايد على وطنيتنا بالكتابة الا ينزل الميدان ويخاطبنا من هناك.
| |
|
|
|
|
|
|
|
|
|
Re: أين الكبار ؟ (Re: Yassir Ahmed)
|
كلهن بوستين ياياسر في المنبر
موضوع واحد بس فيه نقد
بنحاول نباصرو مع زحمة الشغل.
يعني نسكت، ما قلتو سكات الزول
وبعدين يا اخ نحن منتظرين عصر الحريات
تجي من اسه تسكتنا، كفانا طبلة بكرى يا اخي
حقو يا ياسر تحاول تجاوب اسئلتنا المشروعة دي
بدل تدعو للتكميم ، كفانا تكميم الإنقاذ يا اخي.
| |
|
|
|
|
|
|
|
|
|
Re: أين الكبار ؟ (Re: عمر التاج)
|
Quote: فأين الصادق المهدي من الشوارع الان بعد أن أعلن وقوفه مع الثورة
وأين قيادات ال23 حزبا التي انسحبت من الحكومة وناصرت الثوار
أين غازي صلاح الدين ومبارك الفاضل ومبارك الكودة والجزولي وغيرهم
أين قيادات الأحزاب اليسارية بالداخل بأجنحتها الكثيرة وفئاتها المنوعة من هذه الثورة |
عمر التاج وضيوفك... سلام.
الناس ديل أرباب معاشات ما بقدروا علي الكر والفر..
لكن لو سقطت تلقاهم في الصفوف الأولي المهرولة نحو الكراسي..
| |
|
|
|
|
|
|
|
|
|
Re: أين الكبار ؟ (Re: Arif Nashed)
|
حباب العارف بالثورة
رسولنا الكريم ص في بدايات الدعوة كان يقود الجيوش ويتقدم الصفوف، وعندما ينحسر أصحابه كان يشق صفوف الكبر وهو ينادي انا النبي لاكذب.
قيادات الأحزاب التي انضمت للحراك نعرف لها وزنها قبل الثورة، وماكنا نريدهم في الثورة إلا ليكونوا جندا في الصفوف الامامية لا وراء الشاشات، عامل السن مقدر ولكنه لايمنع التقدم ولو بدقائق ثم اخذ بعض الصور أمام صفوف الشرطة وتاتشرات الأمن عسى أن تلهب الحماس وتخدم تقدم الصفوف.
وجود سبعة أو ثمانية من قادة المجتمع في الصفوف الامامية قد يحمي المتظاهرين ويمنع الشرطة من التقدم لضربهم، فمن غير المعقول أن يتجرأ احد العساكر ويضرب مبارك الفاضل مثلا او غازي صلاح الدين أو منصور خالد في الشوارع وهم يعرفون قدرهم، وجود هؤلاء في الصفوف الامامية للثورة وانسحابهم للصفوف الخلفية بعدها هو مؤشر حبهم وولائهم للوطن والا فإن انضمامهم لايزيد الثورة إلا خبالا،
نعود لموضوع سلفا، ونسأل أنفسنا هل سيكون منطق سلفا هو من البشير هو منطق كل قيادات الحركات الشعبية والدارفورية اذا استقلت بوطنها ام الجنوب حالة خاصة؟
وهل موقف الشعب الجنوبي وبقية قيادة الحركة الشعبية التي كانت تحكمنا لخمسة سنوات شراكة مع المؤتمر الوطني هو نفس موقف سلفا ام فيهم من بقول كما قال الثائر الجنوبي هنا..
Quote: #تسقط_بس
سقوطه بيعني السلام الحقيقي لجنوب السودان وذلك بخروج الميليشيات المدعومة منه والذي يستعملهم كمخالب قط للتدخل في شئوننا.
سقوطه بيعني استعاده بترولنا المنهوب عن طريق الرسوم المتعسفة والعتاواءات والسحب العيني لبترولنا لمصافيهم ولمحطات الكهرباء بدون إذن مسبق من حكومتنا ..
سقوطه بيعني فتح الحدود بين البلدين والتبادل التجاري الشفاف لانو حيكون هناك حكومة محترمة وشفافة في الخرطوم ..
سقوطه بيعني إرتياح كل الاقليم حول السودان من المؤامرات والتدخلات والدعم لاي جماعة تخريبية يستخدمهم البشير الان للضغط علي الجيران ( امسك من مصر 'ليبيا'تشاد'افريقيا الوسطي 'جنوب السودان 'اثيوبيا' اريتريا'حتي يوغندا البعيدة جوزيف كوني قاعد في الخرطوم )
سقوطه بيعني وقف الحرب في المنطقتين(جنوب كردفان والنيل الازرق ) والعودة الي جماهير المنطقتين لتحديد طريقه حكمهم وعلاقتهم بالمركز بالتالي سيتخلص كل جنوب سوداني من عقد الذمة بانه خزل الرفاق الذين قاتلوا معهم وعندما انتصروا واستقلوا تركوا رفاق الامس في حرب مع البشير لوحدهم دون غطاء ودون دعم حتي..
سقوطه بيعني قفل اكبر معسكرات اللجوء في العالم (ايدا ومعسكرات المابان ) بالتالي ستنتفي التوتر بين المجتمعات في مناطق المعسكرات
سقوطه بيعني عودة السلام الي دارفور وعودة عرب النيجر الي حيث أتوا وعوده الحواكير الي اصحابهم ..وعودة المشردين الي قراءهم ..
سقوطه بيعني انو استقرار الاوضاع الاقتصادية بالسودان بالتالي ما يهربوا أموالهم لكي يشتروا الدولار بجوبا (باي سعر وتحويله) لدبي علشان يشتروا بضاعة الي الخرطوم ذي ما بحصل اليوم ..
سقوطه بيعني تطبيق برتكول أبيي واجراء إستفتاء برعاية دولية لتقرير مصيرهم المقرر أصلا..
سقوطه بيعني هبوط تكلفة استخراج البترول بجنوب السودان لاحتكار أخوان البشير وفرضهم اسعار باهظة لمواد تحتاجها الشركات العاملة لاستخراج البترول والابتزاز اليومي ...فقط لاننا نستخدم ميناء بورتسودان للحقول ...
سقوطه بيعني "عودة كرامة نصفنا الاخر"
إن مشروع الحركة الاسلامية "القطبية الترابية" مشروع ضد الإنسانية والحرية والعدالة وضد دين الإسلام ذات نفسه...
فلماذا لا تسقط هذا المشروع حتي ننعم بالسلام والطمأنينة...
دكتاتوريته وعنفه وبطشه إهانته لشعبه وشبابه ..كلنا بنعرفه واخدنا الفيها النصيب لمده قريب العشرين سنة ....ده بدي اي "سوداني جنوبي" الحق ان يطالب بأثر رجعي بسقوطه
ولكن علشان اجندتنا الراهنة والمحلية
#تسقط_بس
علشان التضامن والانسانية
#تسقط_بس
علشان الخوة وصلات الرحم والتداخل والجيرة ساي
#تسقط_بس
وعلشان حساباتنا القديمة معاهم
#تسقط_بس
وعلشان قتلوا الزعيم جون قرنق بالتأمر مع حلفائهم الدوليين والاقليمين
#تسقط_بس
وعلشان حاجات تانية ما اتقالت فوق
#تسقط_بس
الإهداء الي :- مؤتمرجتنا بجوبا
صورة الي : للقالوا ما خاسانا الحاصل في الخرطوم
صورة الي : الغافلين من الرفاق
صورة الي :الما عارفين "صليحهم" من "عدوهم"
اخير ..اكرر ..بس عشان اجندتنا المحلية
#تسقط_بس |
| |
|
|
|
|
|
|
|
|
 Re: أين الكبار ؟ (Re: عمر التاج)
|
الاخ عمر - مساء الخير
كدى خليك من قيادات السياسه ونسال وين القوى الناعمه ورموزها بعد ما مسك بعضهم العصايه من النص زى كوليكشن الاعلاميين الفيهو اهلان انحياز للحراك صيغه واحده رددها الجميع وواحده سجلت مقطعها فى جو شبه مظلم بصوت منخفض ولم تذكر اسمها فى النهايه (نظامتنكر لو اتزنقت ولا شنو ؟؟).
انا بقول كدا طالما تحالف التغيير اهم قطاع فيهو تجمع المهنيين البمثل حزبيين وغير حزبيين ورموز ومشاهير المهنيين زى قطاع الاعلام والفن- الاكثر تاثيرا فى زياده زخم الحراك - وهم الاكر تاثيرا مختفين تماما مجرد اداء واجب مسك العصايه من النص فى الايام الاولى واحتفوا.
الشباب دفع دمو مهر للحريه وناس لابده حريصه على مصالحها وعدادات حفلاتها وشغل الناس بصورهم على انستقرام والفيس .زى عينه امحسوبه اعلاميه وبتجى تقول كلبى راح وكديستى عيانه. وين موقعها من الثوره ؟؟؟؟
يا عمر انا من القاعدين جوا وبشوف ومابفوت حاجات كتيره لكن بنسكت عن ذكر كثير لانو الناس دايره الواحد يجى يهتف هنا ويلعن ويسب ويمشى .
ربنا يحفظ الثوره من السارقيها والاخرين من المتلونينين كالحرباء مع كل عهد فقط لاقيم لهم الا مصلحتهم ومطامعهم الشخصيه دون اعتبار لمصلحه الوطن.
| |
|
|
|
|
|
|
|
|
|
Re: أين الكبار ؟ (Re: Asim Ali)
|
سلاام
اكييد توجد تساؤلات مشروعة لإكمال مشروع
الثورة السودانية
علي الناشطين والمهموميين بقضايا البلاد
التفكير بصوت عالي وجمعي لمعالجة القصور
حتي يكلل مشروع الثورة بالنجاح
اما بخصوص الحركة الام فهي مأزومه
كما البشير والعصابة في الخرطوم لذا المطلوب. من
سلفاكير معالجة اشكاليات الدولة
الوليدة قبل التفكير في مساعدة الشعب
السوداني لان معالجة اشكاليات دولته
يَصْب في مشروع التغير الشامل
في السودان الام
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
عمر التاج
Nasser Amin
Yassir Ahmed
Arif Nashed
Asim Ali
فيس بوك
تويتر
انستقرام
يوتيوب
بنتيريست