*بتاع الدكان: يا حاجة ما بقدر اديك بالدين تاني الا تسددي القديم الحاجه: و الله ي ولدي ما اتيسرت معاي لسه بس دايرة رغيف لاولاد بتي و بعدين بجيب ليك القروش .. عندي سرير ببيعو و بجيب ليك قروشو بتاع الدكان : يا حاجه بالله ما تكتري الكلام قلنا ليك مافي دين تاني و لا تقربي مننا الحاجه : طيب يا ولدي الله كريم 💔💔💔 ------------------------------------------------------------------------ و مشت الحاجه مكسورة خاطر و كان في شاب واقف و سامع الحوار كله و بكل بساطه سأل بتاع الدكان امي دي حسابها كم ؟؟ قال ليه 1800 جنيه ... قال ليهو هاك دي 1900 جنيه و اشطب الحساب و لو جاتك في اي لحظه اديها ال هي عايزاهو و سجل لي في الدفتر دا و دا رقمي و حقك محفوظ ❤❤❤ ---------------------------------------------------------------------- الشاب شال السكر و العيش و الشاي و كلللل الاحتياجات و مشي بيتها و دق ليها الباب و فتح ليهو طفل كان بائس جدا و علامات الجوع واضحه في ملامحو و جسمه النحيل الشاب : هاك يا ولد الحاجات دي حقتكم جابها ابوك شيلها دخلها جوة الطفل : انا ابوي ميت من سنتين 💔💔💔 الشاب : امك وين الطفل : امي في المستشفي عندها غسيل حاجه بس ما عارف غسيل شنو الشاب : طيب في منو كبير في البيت الطفل : حبوبتي و جات حبوبه و لافحه توبها الكان ملتق من كل جهة الحاجه : اهلا يا ولدي اتفضل الشاب : معليش و الله يا خالتي مستعجل لاحق مشوار بس في حاجات هنا جاتكم من ولدك قال يدوكم ليها الحاجه : الله يكرمك يا ولدي بس انا ما عندي ولد الشاب : انا ولدك يا امي عندك مانع 😔😔😔 الحاجه : حبابك ي ولدي و الله يكرمك و فضل الشاب يزوها كل يوم و عرف انه زوجها مريض و بتها عندها فشل كلوي و بتغسل كل اسبوع و هي ارمله و عندها اطفال قرر الشاب يكفل الاسرة و بقي يزورهم كل اسبوع و يجيب ليهم كل احتياجاتهم و في الاعياد بجيب ليهم كسوة العيد و كل حاجه نفسهم فيها فجأة الشاب اتقطع و بقت الحاجه تفتش فيهو بس ما عارفه اسمه كامل لحدي ما عرفت من سيد الدكان انو اتوفي في حادث .... ---------------------------------------------------------------------- حصل يا جماعه حاولتو تسألوا من جيرانكم و الايتام ال في حيكم ؟؟؟؟ جايينا العيد و في بيوت مفتوحه علي شارع الهموم و رصيف الحوجه و الفقر و الحرمان ...
قيم واخلاق وكرم وإنسانية نتمنى من الشباب يحافظوا عليها ☝🏽
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة