▪ من أرشيف ديربي الكنداكات £

▪ دوري الصيف و إحراجات الضيف }
{من أرشيف ديربي كرة القدم لكنداكات بلادي }
-----------
▪ اللبو لي شفعو متسائلاً على عجل: يا أولاد أمكم ويني ما عاست و
جهزت الغدا و لا لسة؟ أنا اتصلت بيها و قلت ليها جايب معاي ضيف!!
- أمي دي يابوي مرقت من قبيلك عصرن بدرييي لبست شورطيها اللحمر
و شدت كداراتا أمات كدايسن زُرُق و شتتن هي و شلة من جاراتنا بالهيتة.
- خير اللهم اجعلو خير ، في زول مات ، و لا مابي العيش في اللسبتالية
و لا رايحالا غنماية؟! ...
- لا يا أبوي: جاها واطسب من صاحباتا خالاتو حنان كروفة و عوضية ردحي
قالن ماشات يحضرن كورة ناس (مدنياااااو) المولعة دي في ميدان عقرب و
بالمرة يضربن ليهن أقاشي و يشجعن تيم الثعالب في دوري الصيف للسيدات .
- و هي كمان مالا و مال الثعالب (القراقير) ديل لعبِن خَشِن شديد ياخي ،
ثم ، موش هي أصلن قاعدة تشجع فريق الدجاجات النواعم ديل؟!! .
- قالت الدجاجات ديل مكجناهن خلاس ؛ ماجن (كاكن) معها شالن الفاتحة
عزَّنها في أبوها مات يومتا عشان كدا طوالي غيَّرت منهن و قلبت( ثعالب).

---------{ تخريمة}-----------

▪ نطالب بعودة (حَكَمَة) من جيل البطولات الجميل
زمن الناس حونان يقال لها أظن: منيرة عبد الساوي .
ففي وم كانت حاكمة هلال مريخ. فقام كمال عبد الوهاب بي
عزف انفرادي جرجر ليك دفاع الهلال جدَّعم بالواحد أرضن
(انبطاح)؛ لامن جاء للسيرد باك عبد الله موسى رماه نجيض هناك
زي الترتيب. لكن زولك بالمغسة عمل ليه حركة بايخة (جر ليه
لباسو). فداك أصلو ما مقق ليه قشطو طالوش بنية جابوالواطة يشخُر
شحيطة فقامت الحكمة بدل تصفر تحسبا فاول مسلن؛قلبتا مناحة
و شغل (حكامات ) عديل ؛ و هاك يا ردحي و سكليب: و يلا
" مالك عليهو ضاربو يايابا يضربك الضريبي" و كدي.

▪ أحيانا نجد أنفسنا مُنتَشينَ في ظل ظروفٍ ليست بزمانٍ للانتشاء.
▪ و لو بنظرةٍ فاحصةٍ وقفنا لنتقصى و نراجع بعض هوامش الأحداث العابرة من أجل التثبُّتفرغم أن البلاد غارقةٌ في ملفاتٍ مصيريةٍ و تحديات تطوقُ حكومة حمدوك الوليدة لتوها، و تأخذ بتلابيب السيادي فمثلاً ، جرت أول مباراة في افتتاح دوري كرة قدم للسيدات باستاد الخرطوم فث 30/9/2019م.

▪ الحدث بحد ذاته شكّل سانحةً نادرة لكتائب ضل الجداد الإلكتروني التي تتربص الدوائر انتقالية الثورة المجيدة لتعمل على تقويض أركانها و نسفها من عروشها و جعل عاليها سافلها ما استطاعوا إلى ذلك سبيلاً. و ذلك انطلاقاً من حجة أن هذه بدايات عهـد الفساد و الانحلال الأخلاقي في مقابل اعتبار ما كان من ظاهرة (التحلل) المالي و…إلخ.
▪ بالمقابل ، ربما نسبت بعض الجهات الرسمية كوزارة الشباب والرياضة، و عدد من الكيانات الثورية التطور الأخير بأنه واحد من إنجازات العهد الجديد.

▪ والحقيقة التي قد نجهلها أ و نتجاهلها ، أن الدوري النسائي كان قد تم الإعداد له من الاتحاد السوداني لكرة القدم منذ العام الماضي وانعقدت ورشة رسمية لتدشين الدوري النسائي في الخرطوم بتاريخ 27/12/2018 أي في عهد المخلوع ( مرفق
صورة للخبر بس غلبتني أجيبا هنا )، وكل ما قامت به (قحط) حديثا ًهو إكمال الترتيبات وإطلاق الديربي وفق الخطة المبرمجة مسبقاً و في الموعد المحدد.

تخريمة سريعة على جنبة:
▪ و بدورنا كل ما نتطلع إليه من السادة القيِّمين على الأمر برمته و نخص بالذكر عمنا رئيس اللتحاد القومي لكرة القدم إنو : ياخ رفقاً بالقوارير ؛ و ما يعمل لينا فوقا فعلن (كمال شدَّاد) على بنياتنا أخوات نسيبة ديل، و ياخدو الشغلانة كولها لعبة تسلية في تسلية و فارغة في مقدودة ؛ يعني ما دايرين أي كروت حُمُر و لا حتى صُفُر . عشان نتفرغ بقى و نتلفت للراجينا كوتييير.
*و د ا ل ح ي ش ا ن ال ت ل ا ت ة
مؤذن تعبان ساي في جزرة مــالطة،

أثارتْ إقامة أول مباراة كرة قدم نسائية في السودان ،
أمس الاثنين، جدلا واسعا في البلاد، وانتفاض هيئة علماء

السودان بسببها، متهمة "قوى الحرية والتغيير" بالسعي إلى
علمنة الدولة السودانية.وأقيمت المباراة على استاد الخرطوم
بين فريقي "التحدي" و"الدفاع"، وانتهت درون صفري لكل فريق.

# تعليقاً على المباراة، التي حضرها جمهورٌ حاشدٌ، أكدت وزيرة الشباب
والرياضة السودانية، ولاء البوشي، في تصريحات صحفية، على التغلب
على تحديات كبيرة أمام إقامة دوري كرة قدم للسيدات في البلاد،مشيرة
إلى أن الرياضة النسوية ستكون واحدة من أعمدة البنية التحتية وركيزة
في سياسة الدولة، بحسب صحفة "الانتباهة" السودانية.


# يشار إلى أن الاتحاد الأفريقي لكرة القدم "الكاف"،
أٌعلِن في وقتٍ سابقٍ أن 21 فريقا سيشاركون في النسخة
الأولى من الدوري السوداني للسيدات، إذ تم تقسيم الفرق
إلى 4 مجموعات (الخرطوم والأبيض وواد مدني وكادوقلي).

# و علق أحد ظُرفاء قاع المدينة بقوله:ماتش قوي جدا في أول
مبارة نسائية في السودان هذا الفريق ذكرني بسقور إنتر ميلانو
ما موش قوارير ، ما شاء الله ديل وحوش كاسرات عديل علي ارضية
الملعب. موش زي أولادنا كحيانين ومكعكعين التقول ماكلين ويكة