يا نيلنا آااه جوانا نيل يا نيلنا في الزمن الجميل يا نيلنا متحزِّم حزن يا نية صافية وسلسبيل جوَّانا نيل ما بْتِنهَزِم جوانا جواك ما نضب جُوَّاك بِتترادَم غَضَب واتكفرنت حولك ضفافك من نفاق الساسة والزُّمرة النجوس كُتر السّجون عوس الدُقون أشكال كَجَر أشباح كروش عُمْيَان طرش حِيكومة الكوز التعيس والحالة مايلة مْعَصلِجَة هانت نفوساً.. ما بتهون آه يا زماناً منفي من كل الزمان تِنهان بُطون الفيهو من كتر الصفوف آفة الطوابين.. الطواحين والرغيف حالاً أسيف ناسا تقيف شان الفضل من ضل من الحكم الدمار شكَارةَ الرَّاكوبة في عِيَن الخريف لا ليها قُدرة ولا في حيل كم في الزنازين من زميل مكتول هوى الوطن الجميل ضد الدخيل والسدنة والكوز العميل يا نيل يا مِتْحَزِّم حُزُن مِتْوَقِّي بي قيفك حِمِل همَّاً تقيل يا نيلنا آااه جوانا نيل يا نيلنا في الزمن الجميل يا نيلنا متحزِّم حزن يا نية صافية وسلسبيل جوَّانا نيل جوَّاك أصيل ما بْتِنهَزِم جوانا جواك ما نضب جُوَّاك بِتترادَم غَضَب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة