|
Re: نهاية تمساح تنقسي الجزيرة الجنن الخلق (Re: خضر الطيب)
|
ارحمـان ارحم بى جودك دلى الغوث ينزل فى بلودك سم يا فمى اذكر معبودك قول يا واحدا حى فى وجودك يا مسعد اسعد بسعودك ونحن نصلى على مريودك ***** يا رحمان ارحم بى برك يا حافظ فى بحرك وبرك فى وليانك اطلق سرك خل نيشاتن اليتحرك ***** آمين آمين يا كاشف الغمه جنب ها الدابى تصبحو رمه تسلط واحد ايدو مدمه يعجل قتلو قبيح القمه ***** يا الخلفا الحالكم مرضيه يا اهل البيعه العقدوا النيه التمساح سكن الشايقيه خلو اليروح نسيا منسيا ***** يا ابن ادريس عدل نيشانك فوق الكل عامر ديوانك هم يا شيخ الناس حيرانك فى التمساح بين برهانك ***** يا ابن ادريس شيخنا النورانى يا صاحب الفتح الربانى يا ابنو العركى ويا السمانى ارمو سهامكم يا فرسانى ***** شئ لله يا ذات التجلى صاحب السر والفتح الكلى يا الغوث البى الكون متولى التصريف هيلك عجلى ***** يا عبد الوهاب التازى يا اب درعا منسوب بى حجازى التمساح تمساحا خازى درنا العوم ادونا الاجازى ***** يا الداسوقى وشيخو رفاعى يا حسن التواع كون واعى الشبلى وشيبان الراعى ارمو سهامكم يا شجاعى ***** شئ لله يا اهل الدايره يا الفى الكون اسراركم سايره ارخو السر فى السحره الغايره خلو الدايره التصبح نايره ***** وينكم لى وينكم يا قومنا سهرانين نحسب فى نجومنا التمساح حجر لى عومنا ان ما جيتونا عليكم لومنا ***** وينكم وينكم يا ديله يا اهل ا لحضره الليله الليله اجتمعوا وخلوا البهديله التمساح احموهو الشيله ***** وينكم لى وينكم يا كمل يا لحاق فيكم بتأمل يا الفوت البى الكون اتحمل عرض الدار روح يتهمل ***** وينكم لى وينكم يا كسر يا لحاق فيكن بدثر التمساح بلحيل انجسر امرو عليكن ماب يتعسر ***** شئ لله يا حسن البصرى صهيب الروم ذا النون المصرى يا الدباغ ابو سرا يسرى يا ابن المحجوب الناس متحسرى ***** شئ لله يا اب جلابيه يا عثمان شيخ الختميه يا الصلاح جمله الاولياء التمساح شوفولو اذيه ***** شئ لله يا راجل البقعه يا اهل الحضره البعد الهجعه يا الفكى شيخ الهام اب تسعه شيل الدابى تحتكم بدعه ***** شئ لله يا عبد القادر محى الدين البحر السادر يا ود زينب قوم لى مبادر يا ود حاج قول جيتكم حاضر ***** شئ لله يا راجل البركل يا قايم الليل ماب تكسل يا عايم بالله اتوكل قول للدود من بلدى اتفضل ***** يا اهل الركب الفات بى ليلو ما فيكم واحدا شاد حيلو احمد واحمد واحمد شيلو ود عدلان فوق راسو اديلو ***** يا ياسين يا ود حميده يا اهل القبه الباقيه فريده انتو ما ابتا طيتو اكيده ما بتغلبكم هذى الصيده ***** يا رجاله نورى اتلموا خلو الغفله جميعكم هموا محمد صالح قام بى عمو لطم الدود بالسر فوق فمو ***** يابا حمدتو اب نايبا شوكه صاحب سر وايدك مبروكه يا اب نيران الحقنا بابوكا هم يا شيخ الناس زموكا ***** يا الفكى شيخ العبد الصالح يا لحاق فى بحر المالح ود بيلى و عووضه القارح وين حاج عيسى القدر الطامح ***** يا اب شارب واولاد السته امانى عليكم ليش ها السكته اسمع يا شيخ القول ليك انت جرت الحين فى بلادكم نكته ***** الزرق ابوات ود حاج موسى يا الكمل ما فيكن دوسه البلد الكانت محروسه اتحجر العوم والناس محبوسه ***** يا ود جابر ليك بنادى قوم با خوانك لا البولادى يا العجمى اب رزقا صيادى اخدوا الشكره العادى العادى ***** يا اولاد جابر بى عجميكن قوم الخمسه واكربوا سريكم نادوا اب رابعه وخلوا يجيكم قتل الدود مو قاسى عليكم ***** يا وراق يجن حوباتك فى التمساح بين آياتك خلو يصوب من بلداتك لا يتمسخر فى زوراتك ***** شئ لله يا رجالتنا شرف الدين فرسان المتنه صالح السلمى اسمعوا كلمتنا احبسوا الدود لا يطل صفحتنا يا النبى بى جاهك ثبتنا احفظنا واستر عربتنا اكوى اعدانا وكيد شامتنا فى الدارين اكتب راحتنا ***** البنيان يا جمله صحابى الغوث يا قطب الاقطابى الشبلى وبدوى النشابى ارخو السر فى هذا الدابى ***** على المحبوب صل يوت يا برا عدد مخلوق جميع لا الذره نظملوا الماحى قصيده وجرا تنجى الامه فى يوم الحرا ***** صلاه الله عدد ما لبا وقاف الحج وطواف الكعبه سلاما جابوا الماحى معبا يعم السيد والال والصحبا
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: muntasir)
|
اخونا خضر سلامات بس كتلتو . ياهو التمساح العشاري الجنن الجزيرة زاتو . وده عمك الملقب بي قناص ابو الدقيق في السماء السابع . ماشاءالله عليه نبلو في لهاتو . وجاب خبرو تب وتبو . وفي الصورة داير يرسنو من خشمو لزوم الجر من قيف النيل .
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: Osman Musa)
|
Quote: مرحب اخونا اب كريق استاذ عادل امين كيفك انت يا تمساح في لجج سودانيز . تحياتي ومشكور علي الهدية الكريمة والمرور البديع |
حياك والله فعلا تمساح كبير سودانيز اون لاين ضيقة ...مليانة بلطي وصير وكووور وضفادع بشرية بساكك في ورل غرابي اسمو بريمة ما شاف التمساح الا في الكبريتة وعايز يخوفنا بي الجنجويد والولد سيد بيه الشغال هي هيء والله الرجالة كده ولي بلاش شوف الزول ده راكب التمساح كيف خلي بريمة يجي يشوف الرجالة دي ناس الدعم السريع من جو الخرطوم وشربو الببسي واكلو الاسكريم انتهو والله
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: muntasir)
|
اخونا منتصر سلامات كان لابد من حكاية حكايتين من العمة قبال العشاء . وعشان ما نكورك و نجوط او ننوم جعانين . كان لابد من جرجرة الزمن بي الحكايات . تحكي لينا العمة انو في دميرة سنة 1884 ظهر تمساع كاسر في بحر الزيداب قصاد ساقية . ود عبدالماجد . اتعرف التمساح بعد كلام الناس عن فقدان حاشي نزل البحر وما رجع . في نفس الايام نزلت العروسة ودعة بت الشيخ تغسل ضريرة الجرتق زي عادات العروسات في داك الزمن ودعة كان عمرها 18 سنة كانت تلصف بي السماحة . وكانن معاها بنات اعمها وزيرات العروس واول ما دخلت يديها الا وتاااااااخ . ودعة راحت من بين يدين الوزيرات .
في اليوم التاني لي فقدان ودعة في جماعة عترو علي صدر ودعة وراسها في قيف البحر في جزيرة قصاد نفس مكان اتختفت ودعة . لقو صدرها مليان دهب وقليل من عضم الضهر . وسموها سنة ودعة . ... حكايات كتيرة عن تماسيح الشمال . لكن تظل الحكاية الارهب هي الحكاية المدحة المعلقة . مدحة ود حاج الماحي . ياخ الف شكر علي جلب بركات شيخنا حاج الماحي عليه الرحمة .
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: Osman Musa)
|
عارف يا عثمان .. عمك عبدالكريم (الشاب وقتها) واقف فوق المشرع ، جات مره كاشة نعاجا تسقيهن في البحر طلع ليها تمساح ختف منها نعجة ، عمتك ضربت الكوراك ، ياعبدالكريم بتعاين في التمساح يختف نعجتي؟ عمك ما كضب ، توووش وقع فوق التمساح صارعو وفك منو النعجة ما عارف حية ولا ميتة .. لكنه خرج من النهر بيد واحدة ...
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: Abdullah Idrees)
|
اخونا استاذ عبدالله ادريس سلامات دي النخوة الجد . عمك عبدالكريم مرق من النهر بي يد واحدة . لاكنو اكيد ظل يبشر بي التانية فوق ست النعجات . لابد من حماية العرض والحلال والمال . والله يا شيخ عبدالله سنة 1964 حصلت في العالياب قصة قريبة لي حقتك دي زول من اهلك العالياب كان قاعد في حجرة النيل ولفحو تمساح وهاك يا صراع مع التمساع . عمك قدر يحدد مكان عين التمساح . وقام ساط للتمساح عينو بي اصبعو . التمساح نفض زولك بعيد . وزولك بي جرحو العميق قدر يعوم للحجرة الرجل تم اسعافو لي مستشفي الزيداب . ختفة التمساح كانت مع صلاة المغرب لكن الرجل وصل مستشفي الزيداب حوالي الساعة 8 مساء وتوفي بي سبب النزيف الحاد . له الرحمة .
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: Osman Musa)
|
من عظمة التمساح في الشمال سموهو اسماء كثيرة اللدر الفوق ضهرو الخبوب والطين واب كريق في اللجج سكتر حبس الفجج وتستمر الاسطورة ================== يا سلام يا عادل .. زول جميل ورائع اغنية في الصميم .. كابلي والبلابل =====================
حبيبنا عثمان .. شكراً للبوست يا سلام يا جميل يأ أخي رجعتنا لعشرات السنين قبل السدود اليوم منطقتنا إلى المحس والسكوت منطقة تماسيح وخاصة الجزر معزولة والمؤقتة التي تختفي في الفيضان وأخطر تمساح في الدنيا تمساح الدميرة .. ===================== الحبيب اسمان .. بالنوبية اهديك هذا المقال عن التماسيح آسف المقال شوية طويل .. ولكن قراءة نوبية لشعر الحماسة والمهم التمساح الحبيب عثمان .. أهلنا الترابلة عندهم مقولة أن التمساح لا يعتدي على أحد ويعتبر من الحيوانات المحترمة لأن التمساح لا يأتي إلى منزل والطرقات ولكن الناس هم يذهبون إلى حيث سكن التمساح ودائرته وهو النيل
تحياتي الحبيب عثمان .. شكراً على البوست ========================
أغاني الحماسة ليست لها ذلك الصدى في الوجدان النوبي، لإختلاف المعطيات البيئية ونمط الحياة بين المجموعات القبلية والجميل أن القيم والمكارم هي القاسم المشترك ، فالبيئة الرعوية تجد فيها الغلظة والقسوة والحشد عند الملمات على عكس المجتمع الزراعي القائم منطق السلمية وإعمال العقل والعاطفة، فالغناء عنصر مهم في تكوين وجدان الفرد وتوجيهه الى حيث المبتغى منه ، وخلال الفترة الماضية درجت وسائل الاعلام في الاحتفالات والمناسبات الوطنية والخاصة الى ترديد أغاني الحماسة حتى اصبحت تشنف الآذان ليل نهار، ورغم عدم تعمق شريحة من أهلنا النوبيين في بعض مفردات هذه الإغاني إلا أن هناك رموز نوبية توشح هذه القصائد، ويرددها الاخرون دون التعمق في مدلولها، فمثلاً القصيدة التي قيلت في عمدة الجعليين ( النميراب ) .. دابي السار الرسا .. والمقصود هنا تمساح السار ومفردة (سار) نوبية خالصة وتعني منطقة محددة من شاطيء النهر تكون ذات ارضية جيرية صلبة لا تنبت فيها الزرع وتكون مثالية لرسو المراكب لأن قاع النهر يكون فيها عميقاً حتى آخر نقطة عند الشاطيء ويكفي ذلك الركاب عناء النزول في الماء وخاصة الاناث لتجنب رفع اثوابهن أثناء الخوض للوصول الى البر، كما أنها دائرة خطرة تحدث فيها حالات الغرق لمن لا يعرفون السباحة، ولكنها الساحة المفضلة للتمساح حيث يمكنه الصيد والمناورة لأن الارضية الصلبة تمكنه من القذف بفريسته داخل النهر والغطس بها الى الاعماق بسهولة ودون مقاومة، ونموذج آخر في أغنية خال فاطنة ( أبكريك في اللجج .. سدر حبس الفجج ) وكذلك (عشميق حبل الوجج) هنا تزواج الثقافة الزراعية مع الرعوية فكان الجمال، ( كريك) في النوبية هو الخور الذي يمتليء بالماء موسم الفيضان ويجف مع نهايته، وخور ارقو في الشمال يطلق عليه أهلنا (كرييه) وإخواننا العرب في نفس المنطقة يطلقون عليه (كريك) وأبكريك هو التمساح الذي يدخل (الكريك) دون قصد لأنه متفرع من النهر ومحدود المساحة ، وتنقص مياهها يومياً ، يشعر فيها التمساح بالخطر وعدم الامان ويصبح وحشاً كاسراً يضرب في كل الاتجاهات ، ثم كانت البلاغة الرعوية في كلمة (لجج) واللجة هي البحر او ماء الغزير وهذا دليل على ثراء قاموس العامية السودانية فقد إختارت الشاعرة أجمل المعاني من بيئتين مختلفتين فكانت هذه الدرر ، الى ان توجها ( بعشميق ) وهي الألياف التي تستخرج من سبائط النخل وحبلها متين وقاسي يزداد قوة كلما تقادم الزمن ، وحسب ما ورد لدى الباحثين فإن جدة الشاعرة هي البتول من الجوابرة الذين نزحوا من منطقة مشو والحفير الى شمال كردفان وخال فاطمة هو نقدالله عمر نقدالله ومن مسمى نقد الله تتضح صحة الرواية ، ..
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: خضر الطيب)
|
الحبيب عثمان .. تحياتي .. كما ذكرت اعلاه .. في ثقافة الترابلة التمساح حيوان عادل لا يأتي إلى البيوت .. وكان يعتبروا بأن النيل هو بيت التمساح .. وكان هناك مثل عن من يضربه التمساح .. كان يقال : التمساح لم يحضر إلى منزلكم ( انت الغلطان ) لماذا ذهبت إلى حاضنته .. ========================== نحن أمة واحدة المشتركات بيننا بلا حدود .. ويمكن معرفة ذلك إذا كنت تتحدث لغة أخرى غير العربية تجد معظم الاشياء مترجمة من اللغات المحلية فمثلا اشرس التماسيح : دميريه نلوم : تمساح الدميرة ( خطير) سار نلوم : تمساح السار ( دابي السار ) كرييه نلوم : تمساح الكريق ( اب كريك )
إلوم ( بالدنقلاوية ) وبالمحسية ( أولوم )
وأشهر صائد تماسيح كان الفارس ( بنعوف ) صاحب قصيدة كان يرددها الرواويس الضهر في كرمة صليت العصر في كريمة صليت أبوحمد قبل النوم مشيت أحمد الله أنا ماني ندمان احمد الله أنا ماني صرمان الدهب راقدلي كيمان
الحكي شوية متعب بالعامية العربية حبيبنا عثمان بنعوف صائد التماسيح .. من أهلنا الشايقية أو قل البدرية الدهامشة وله تراث رائع عند أجمل ناس في الفن والحكي أهلي الشايقية تحياتي الحبيب عثمان .. هيجت الذكريات .. مودتي يا جميل ,,
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: علي عبدالوهاب عثمان)
|
حكى لي د. الباقر العفيف مختار (ود قريش) بأنو في سندة سكة حديد في منطقتهم في جزاير الرباطاب سموها على رجل فارس من فرسانهم (راح علي اسمو للأسف)... قال لي باقر أن هذا الفارس كان يعوم من جزيرة الى أخرى فخطفه تمساح ... تمكن الفارس من انتزاع سكينه من ضراعه وبعد صراع عنيف مع التمساح تمكن من طعن التمساح في عينه فأنتزع التمساح يد الفارس وهرب... قال أن الفارس تمكن من العوم بيد واحدة الى أن وصل الجزيرة قال لي باقر أنا شخصيا، وأنا صغير في سني، لعبت مع هذا الفارس كشتينة في أرض الرباطاب وكان يشك ويقطع ويوزع بيد واحدة فقط....
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: عبدالله عثمان)
|
سلامات التلب د. عبدالله عثمان ياخ يا حليلو بروف الباقر الرباطابي الارباب . ربنا يديهو العافية مكان ما يقبل . طبعا منطقة الرباطاب مليانة بي التماسيح الكاسرة . قالوا زمان في تمساح جنن منطقة من مناطق اهلنا الرباطاب . وكان عندهم واحد من اولاد المنطقة كان محافظ الدامر . قاموا عملوا وفد جامد وركبوا القطار للدامر . قابلوا المحافظ وقالولو اصلنا بدون حل ما صادين . قاليهم متبرع ليكم بي خمسة نعجات اربطوهن للتمساح في الحجرة لامن اجيكن في البلد .
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: علاء سيداحمد)
|
الاخ علاء سلامات يحصل . مع بعض الاختلاف . انا سمعت برضو قالوا في منتصف الستينات في اسد طلع من جنينة النزهة حديقة الحيوانات وقرب يصل للقصر الجمهوري لكن راعي الاسود قدر يحصلو و يدودرو ويحنسو بدون اي مشاكل لاحدي ما رجعو للقفص بي سلام . والاسعد كان في قمة الفرحة . عشان كدي السودانيين عندهم مثل بقول : ( الحسنة معطت شارب الاسد ) يعني راعي الاسد في الحديقة كان يحسن التعامل مع الاسد ويعامل الاسد بي حنان .
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: Osman Musa)
|
سلامات عثمان وزواره الأفاضل .. للتماسيح حكاوى وروايات كتبت عنها هنا من قبل .. هاكم دي واحدة :ـ
Quote: من حكاوى الصبا (4) حكاية كُركُر!! يُقرأ بضم الكافين ويُطلق على فحل النعاج في العامية السودانية المحلية.
أطلقه الساخرون على أحد رجالات قريتنا. فكانوا كمن يسخرون من أنفسهم قبل سخريتهم عليه .. قصيرالقامة ، سريع الحركة ، كثير التفاخر .. باختصار زول نفّاخ .. قيل بعد وفاة ابنعوف صائد التماسيح الشهير .. زادت التماسيحُ جورها وتعديها على الخلق .. لجأ الناس (للفقرا) وكل من توسموا فيه صلاحاً .. علهم يعينونهم بمعارفهم اللدنية فيحجرعنهم هذا البلاء .. فشل العديدون ونجح واحد فقط كما أرّخت حكاوى القرية .. فقيرٌ كلمسيد هكذا جاء لقبه .. كان له مسيدٌ يجتمع إليه الصبية من كل القرى المجاورة لقراءة القرآن وحفظه .. روي عنه أنه أرسل أحد تلامذته (الحيران) ليملأ له ابريق الوضوء من النهر .. طال غياب الصبي فبعث الشيخُ بأخرين يستقصون أمره .. عادوا بلا نتيجة وقالوا إنهم لم يعثروا حتى على الابريق الذي كان يحمله ! سألوا عنه حتى في البيوت المجاورة .. نهض الشيخٌ، كالممسوس، من جلسته وهو يتمتم : البحر البحر .. وأسرع مهرولاً نحو الشاطيء ومن خلفه تلاميذُه .. 11. عندما لامست قدماه رمال الشاطئ الدافئة بفضل انحسار شمس الظهيرة .. صلى لله ركعتين .. ثم جثا على ركبتيه مستقبلاً مياه النهر .. وطلب من التلاميذ أن يجمعوا له الحصا .. يقرأ شيئاً على كل حصاة ثم يتفل عليها ويرمي بها في النهر .. المتجمعون من التلاميذ والأهالي خلف الشيخ .. يتابعون بصمت مهيب .. تلك الدوائر المتتابعة على صفحة الماء عندما تسقط عليها الحجارة .. يمضي الوقتُ بطيئاً وفاتراً نحو المغيب والشيخُ يمارس طقوسه على ذلك النحو .. ولولا ذلك اليقين الذي يملأ وجدانه وتفيض به عيونه .. لتسرب اليأسُ إلى نفوس الحضور وصرفتهم رتابة المشهد .. ومع خطوط شفق المغيب التي صبغت صفحة الماء بحمرة طوبية .. بدأت تطفو رؤوسٌ سوداء تشق عباب النهر سابحة في اتجاههم .. وعند بلوغها الشط كانت تتمدد على الرمل الى جوار الشيخ بهدوء وسكينة .. لم يعرها الشيخُ أهتمامه وظل مواصلاً في عمله .. التماسيح التي خرجت ووضعت رأسها وبسطت أذرعها على الرمل .. بدت في عيون الحاضرين كمن يلتمس العفو عن جرم اقترفته .. نهض الشيخُ واستقبل القبلة وكبّر لأداء صلاة المغرب .. وحين أكمل صلاته وسلّم .. خرج تمساح ضخم جاء يزحف ببطء وعنت واستوى عند ركبتي الشيخ وهو في جلوسه .. فنهض من جلسته واعتلى ظهر التمساح وصلّى ركعتين .. وما أن ترجل حتى بدأ التمساح يفرغ ما بجوفه .. أخرج أول ما أخرج عدداً من الأسماك .. 12. ثم قذف بالابريق .. فكان التالي، الذي استغرق بعض الوقت وكثير عناء، جثة الصبي .. حمل الشيخ جثة الصبي بين راحتيه وغادر المكان دون أن ينبث بكلمة .. فإذا بالتماسيح التي ظلت بلا حراك طوال الوقت تتحرك مسرعة إلى النهر .. إلا ذاك الأخير .. تيبّس في مكانه كالحجر .. قيل لنا إن الموقع أضحى شاهداً ومزارًا لمن يود التأكد من كرامة الرجل . وقبل أن ترتخي أعصابنا المشدودة ينتقل بنا الراوي .. لتلك السيرة التي طالما تندرت بها القرية .. كُركُر .. ذلك القصير الحركي .. الذي لا يملك من الصبر ما يفرغ به كوب ماء في جوفه .. يقول الراوي: في ليلة عيد الأضحى خطف التمساح أضحية جاره .. فجاءه حانقاً على ذلك التمساح اللعين الذي مسّخ عليهم العيد .. تعاطف الرجل وتحمس واعداً جاره بالإنتقام له من ذلك التمساح .. فرح الجارُ لوعد الرجل فهو يعلم أن له بندقية.. يساهم بها في أفراح القرية .. و يصطاد بها من حينٍ لآخر الكلاب العقورة وبعض القماري .. انصرف الرجل وظل يراقب ظهور التمساح .. وما إن رآه خارجا إلى البر حتى انطلق مسرعاً يبلغ الرجل .. - البندق البندق - قالها له وهو يلهث ويبتلع ريقه و يشير بيديه، يتعجّله. علّق الرجل بندقه على كتفه بعد أن أجرى عليها بعض الاختبارات المظهرية. وحشا فوهتها بالبارود وبعض الخرق البالية .. وصاحبه يرقب بتلهف وبعض خوف. جاءا معاً إلى الشاطئ فكانت المفاجأة التي تنتظرهما !! تمساحان يرقدان متجاورين؟؟! كُركُرٌ يسأل رفيقه بعفوية: - ياتو فيهم الختف الخروف؟ فيرميه صاحبه بنظرة تشي بالعجب ويرد ساخراً: -!! أيوه !! ما أنا الكنت مباريهو في بطن الموية. لم يعر كُركُر أو لم يسمع تعقيب صاحبه جثا على الرمل يحبو في اتجاه التمساحين. وما أن أصبح الهدف أو الهدفان أو اللاهدف عند مرمى نار بندقيته كما اعتقد، أطلق رصاصة أحدثت دوياً هائلاً طارت له العصافير وتردد صداها مع حواف القيف. انتفض أحد التمساحين محاولاً الهرب إلى الماء فهمس له الآخر!! - نوم نومك دا بندق كُركُر.
|
| |
|
|
|
|
|
|
Re: نهاية تمساح تنقسي الجزيرة الجنن الخلق (Re: محمد على طه الملك)
|
لو بعرف انزل الصور كان نزلت ليكم التمساح اللوع اهل قريتنا والقرى المجاورة ولاية النيل الابيض بالضفة الغربية وفي رمضان نزل شباب يستحمو قام ختف واحد منهم امام اعين والده واصحابو والقيامة قامت والله جروا التمساح خارج النيل واخرجوا الولد جثة والمشهد مصور شئ لا يصدق
| |
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
|
|