من مذكرات معتقلة (1) بقلم: مناهل صلاح - حزب المؤتمر السوداني =================================
الخميس السابع عشر من يناير 2019 كان يوما عاديا في بداياته ككل خميس(لاحقا سأدرك أنه يوم استثنائي في حياتي)مذدحم بالعمل،ملئ بالصخب واتصالات وطلبات الموظفين منذ الدقائق الأولي. انهمكت في العمل لثلاث ساعات متواصلة،شعرت بالجوع فتوقفت لدقائق أتناول سندوتشا من الفول علي عجل. أتاني صوت صغيرتي مآل عبر الهاتف حوالي الساعة 11 وربع: يا ماما أنا رجعت البيت أنا:ليه بدري كده ياماما؟ هي:قالوا لينا عشان المظاهرات انا:اهااااا.كويس طيب هي:يا ماما نفسي أمشي وأشوف المظاهرة أنا:الا بكرة لمن تكبري وإن شاء الله تحضري زمن سمح مافيهو مظاهرات ولا ظلم. ذهبت وتوضات استعدادا لصلاة الظهر،الساعة 11و35دقيقة تلقيت اتصالا من موظفة الإستقبال في الشركة: - آلو أستاذة مناهل معانا سيد اسمو عمار أبوبكر عثمان عايزك -عايزني أنا؟أنا ما بعرف زول بالاسم ده -ايوه أدانا رقمك واسمك.هاك متميزه -آلو معاي منو لو سمحت؟ -أنا عمار أبوبكر عثمان -معليش ما عرفت الإسم.انت منو؟وعايزني ليه؟ -معليش حاجات شخصية ما بقدر اقولا في التلفون -طيب.نازلة ليك ماهي الا دقائق قليلة وأنا في الإستقبال،أشارت موظفة الإستقبال لرجل يجلس منفردا في ركن،مددت يدي مصافحة: -أهلا وسهلا أنا مناهل -أنا الضابط عمار أبوبكر عثمان من جهاز الأمن والمخابرات الوطني وعايزنك معانا في شوية استفسارات -جدا،بس ممكن أشوف بطاقتك؟ -بغضب شديد:انتي قريتي شنو؟؟ -آداب -حسستيني إنك قارية قانون -من حقي أتأكد إنك فعلا من جهاز الأمن وما الا اكون قارية قانون عشان اعرف حقوقي. طقطق باصبعه بحركة عصبية لفردين يجلسان في الركن الآخر من الصالة،أتاه أحدهم مهرولا: -معاك بطاقة -آي -وريهو ليها -أخرج بطاقته،بالكاد رأيت فيها الجهة جهاز الأمن والمخابرات -بعد ده ممكن أمشي معاكم.ارح -تلفونك وين -في مكتبي فوق -نمشي نشيلو ذهبنا الي المكتب ،أخذت الموبايل واخبرت مديري بما حدث. تم اقتيادي بواسطة 3 أفراد بزي مدني بعربة أمجاد زرقاء،كانوا عنيفين ونحن في الطريق الي مبني الاستعلامات بشارع المطار،وحاولوا منعي عدة مرات من الرد علي اتصالات مديري إلا أنني لم ارضخ لهم.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة