للناس الساعين برجليهم واسنانهم و يحسبوا الإيّام في انتظار هذه اللحظة! و يخدمون - بوعي أو بدون - أجندة آخرين! يترصّدون و يضخّمون الأخطاء قليلها و كبيرها و نقارتهم جاهزة للكيتة! هذا السؤال: ما هي السيناريوهات العايزنها حال اعلان فشل حكومة الحريّة و التغيير! ما تصوّركم للخطوة البعدها؟
سألت عشان بس أفهم طريقة تفكير هؤلاء! وهل حقيقة يدركون ما يجري اعداده ليكون الحل الجاهز و البديل حال - لا قدّر اللله - وفشلت الحكومة!
11-17-2019, 10:52 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12482
سلام عليكم مافى زول بتمنى الشين .لكن شواهد خلال ايام الثوره ومانمشى بعيد من فتح المجال للوصول لقياده فى 6 ابريل ودردقه الشعب -وحصول على تاييد حتى قبل تلاه البيانووضوح الرؤيا- يوم 11 ابريل تلاه بيان مخيب للامال الى الان مايبدو ان طريق الثوره وبالضروره مسار الحكومه ومدنيى السياده والازمات الماسكه بخناق المواطن البسيط هى مسارات مهيأأه دون غيرها ومازلنا فى منتصف طريق سيقود الى هبوط ناعم وانتخابات مبكره فى 2020 (كما اكد واراد البشير).دايرين شنو اكتر من تعامل وفود غربيه ومنظمات مع قائد المليشيا (-مش العسكر المعترف بهم مهنيا)ولو كانت المواقف الدوليه مبدئيه لكان تواصلها مع السودان عبر مدنيى السياده واحسن الناس تسمع النقد الحاد للحكومه عشان لما تقع الواقعه يعملو متفاجئن وتبدا البكائيات والمناحات.وقبل موضوع النقد مافى شى مدسوس ماكل شى على عينك ياتاجر والكيزان فى كل مكان فى تجهزه الدوله متحركين بثقه وصتهم فى الاعلام اصبح اكثر ارتفاع. الثوره اصبحت اشبه بالجزر المعزوله القاعده (لجان المقاومه) وانعدام اليات على المستوى الوسيط تستكمل العمل الثورى مع كيان ثورى اتحادى يود تنفيذ برنامج واحد على مستوى اتحادى.والكيزان وعسكرهم اشتغلو مايجيدونه فى الفتنه واللعب على نقاط الضعف
البديل إعلان حكومة الشريكين ... كيزان وشيوعيين ... مش في دعوة الأسبوع الفات بالتفاهم بين اليسار واليمين ... صادرة عن اليسار .. الاسبوع الجاي حا تكون دعوة للتحالف صادرة عن الكيزان ... وكلو بمعاونة وحماية عسكر السيادي الكيزان ... شغل أيديولوجيا لا مباديء تحكمها في سبيل الوصول للسلطة والثروة ...
11-17-2019, 11:28 AM
جلالدونا جلالدونا
تاريخ التسجيل: 04-26-2014
مجموع المشاركات: 9390
Quote: البوست ده اكبر من فهمك محدودى الافق يمتنعون خليك فى الدفرنش و الله يقدرك على شيل عجل الحديد
هههههههه طيب يا بتاع الحريقه ... اول شي ما تلخبت الاختساسات ... تاني الكلام الكبار كبار دا بتجيبو من وين ... تالت شي منو هنا المتخسس علوم سياسية وفهمو كبير وأفقو واسع عشان نخلي ليهو البوست ... أشر لي علي واحد وأنا حاضر .. رابع شي ما أديتني فكرة ولم أشتم رائحة أي من الشريكين فيك من قبل ... طاير فيني جوز مالك ... هههههه إتا قايل حمدوك بيعاني من شنو ... ما ياهو ثنائي الدبيبه ديل ... واحد بي شنب والتاني بدون ...
11-17-2019, 11:37 AM
Asim Ali Asim Ali
تاريخ التسجيل: 01-25-2017
مجموع المشاركات: 13492
ارهاب متمركز فى جبل الشعابنه وتفجيرات انتحاريه ثم انتخابات ورئيس لا اصل سياسى له والنهضه تحصل على 25% من المقاعد وتقود ائتلاف تشكيل الحكومه وتقود البرلمان بواسطه الترابى بتاعهم (العنوشى). والكتل السياسيه الحائزه على 75% من مقاعد تفشل فى اجتماع 50 % او 60% للاتفاق على برنامج حد ادنى لاداره البلاد. الغنّوشي يقدم مرشح "النهضة" لرئاسة الحكومةالغنّوشي يقدم مرشح "النهضة" لرئاسة الحكومة مع التراخى فى حل مؤسسات النظام البائد والتى افسدت سياسيا هل نتوقع ان يتصدر على الحاج او غندور نفس مشهد الغنوشى اليوم؟؟
11-17-2019, 11:39 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
من يعيد النظر في سيناريو اعلان اللجنة الأمنية (اقتلاع) النظام و التحفّظ على راسه في ابريل مرورا بملاواة المجلس العسكري للمدنيين في مسالة تسليم الحكم أو حتى الشراكة و محاولات زين العابدين سرقة الثورة و تمثيل الثوار من الحرية و التغيير و اشراكه طيف كبير من مؤيدي النظام السابق ومواليه في التنظير حول المرحلة القادمة و خطابات و تصريحات و حتى قرارات العسكر و أخيرا فض الاعتصام و ما تلاه من اعلان البرهان لوقف التفاوض و الغاء ما تم الاتفاق حوله يرى بوضوح نوايا العسكر و ربما نوايا من خلفهم و رغباتهم في تدجين الثورة و قطع الطريق على التغيير الحقيقي الذي نود. ما حدث بعد ذلك كان نتاج العزيمة و الاصرار التي ابداها شعب السودان وتمسكه برغبته في التغيير الذي بدا واضحا يوم الثلاثين من يونيو و عمّده بدماء شهدائه. هذا الاصرار هو ما افسد المخطط الكان مفروض ينفذ بعد فض الاعتصام على طريقة الصدمة و اجبر العسكر و من خلفهم على الانحناء للعاصفة و القبول بالشراكة حتى ياخدوا نفسهم وينتقلوا للخطة ب! الخطة ب التي اشبهها بما جرى في مصر, سيناريوهات افشال الحكومة المنتخبة و التضييق عليها و نقدها و السخرية منها و خلق حاجز بينها و الشارع و عملت على ذلك آلة اعلامية جبّارة في كل وسائط الاعلام حتى التواصل الاجتماعي, وساعدتهم الحكومة و حاضنتها الاخوان المسلمين بكثرة الاخطاء و التعالي و الهلع المجنون نحو التمكين! يزيد الضيق و تكثر الاخطاء الحكومية و يتناولها الاعلام بالحق و الباطل والسخرية و الهجوم اليومي بلا توقف و تزيد الهوة و الفجوة بينها و بين الشارع و تظهر حركة آسفين يا ريّس ثم تمرّد ثم حدث ما حدث! مع انفلات الدولار و الضيق الاقتصادي و المعيشي المتعمّد في السودان ومع الترصّد لكل حركات و سكنات الحكومة الانتقالية بحسن نية وبدون ومع النعرة الجهوية عند الكثيرين! كم بقى لنا لتظهر حركة تمرّد السودانية التي تدعو لمليونية اسقاط حكومة الحرية و التغيير و تتوجه للقيادة! ليخرج أحدهم أن استجبنا لكم وهذا (تفويض و امر) من الشعب لاستلم السلطة و اعلن حكومة تسيير اعمال و انتخابات مبكرة اخلع فيها البزة العسكرية و اخوضها بالجلابية و العمة و اكياس المكرونة و السكر!! و يا للعجب تاني يوم ستغرق العاصمة في بحر البنزين و الدقيق وتختفي الصفوف و يخرج الهنايين يغنّون و يرقصون ان: تسلم الأيادي!! هذا ليس سيناريو من خيال بل نقل مسطرة من تجربة حدثت و تحدث حولنا!
فا الناس الواقفة لحمدوك و حكومته ع الحبة, وهم ما كيزان ولا يريدون عودة الماضي وعملوا و يعملون للتغيير! معقول ما شايفين فشل الحكومة البتتمنوه دا بودي على وين! هذا لا يعني ان الحكومة عجل مقدس فوق النقد, بل العكس النقد للتقويم واصلاح المسير مطلوب لكن ليس الهدم و الافتراء و نشر الاكاذيب! خلق حاجز نفسي بين الشعب و الحكومة أو زلق كلمات تبدو بريئة لكنها الخبث كله عن فساد الحكومة و المقارنة بعهد البشير وغيرها ليست بهذه البساطة ولا تمر هكذا بل ترسخ في الاذهان و التراكم سيؤدي لأن تطفو على السطح و حينها سيسهل التوقيع على مذكرة "تمرّد" السودانية التي ستكتب نهاية الثورة وحلم التغيير.
11-17-2019, 11:52 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
تحياتي شباب و شكرا ع المرور العنوان ما مشكلة, من قرأ لي من قبل لن يستشكل عليه فهم المقصود, أمّا البقية فسيدفعهم للدخول و الرد عليه وقراءة البوست و سيتضح لهم المعنى
الفكرة الرئيسة ان السعي لفشل الحكومة أمر مبرّر ومفهوم للكيزان و لكل من فقد ميزات كانت له بزوال نظامهم و من يأملون في شكل جديد من اشكال السلطة ينعمون فيه بميزة جهوية لذا البوست لا يخاطبهم هم, لكن يخاطب من - مفروض - عملوا و يعملون للتغيير, وناضلوا ونالهم ما نالهم من رهق وعنت و ربما اكثر! مالهم اليوم! هل ان يتولى السلطة الانتقالية رفاقهم ودفعتهم ومن يرون انهم لا يتميزون عليهم في شيئ سوى ظروف خدمتهم وصدفة ما اقسى عليهم من السيناريو النخيف الماشين عليه حال - لا قدّر الله - حصل الفشل! مالكم كيف تحكمون! هل صرنا كلنا نتحدث لغة انا أو الطوفان, وعجبني للمارقوت! ما هذا الفهم القاصر, ما هذه النظرة التي لا تتعدى ارنبة الانف! لتحكمنا الحرية و التغيير بكل اخطائها وتقصيرها ليحكمنا الاصم بقميصه الكاروهات لتكون آلاء ايقونة ليركب التعايشي الانفنتي لتعين الوزية خالتها مديرة للجامعة لـ.. لـ..لـ... ايه المشكلة! اهذا افضل أم عودة الساعة للوراء, ام ان نصحو ودماء شهدائنا صارت ارخص من كيس الشعيرية و السكر الـ 2 كيلو!
اي واحد يشوف محل سرجو وين ويمشي يفتش على لجوء او جنسية جديدة ، لانو في نظري دي اخر فرصة لينا ولو ضيعناها ما نلوم زول .. قبيل قريت مقال تافه لزول بقامة محمد جلال هاشم بنتقد حمدوك والبدوي نقد مجاني كده بلا معنى ولا مضمون وكل تركيزو انو الجماعة ديل اولاد المؤسسات الدولية والمؤسسات دي هي الجابتهم عشان ينفذو خططا وشغل بتاع بارانويا كده قدر ما توديهو ما تعرف صاحبو ده عايز يصل لي شنو؟ وبتهم حمدوك اتهامات تافهة جدا بدون سند بانو قبل تكليف البشير لكن اتراجع لانو ناس المؤسسات الدولية ديل ذاتهم هم الاقنعوهو يرفض وانو البدوياقتصادي نيوليبرالي ، تقول نيولبرالي دي بقت سبة. الناس دي ، واقصد الناس الماكيزان الكيزان ديل قصتهم براها ، رايح ليهم الدرب وما فاهمين حجم التعقيدات الحاصلة ومتخيلين انو من اول يوم حمدوك ده حيجيب مسطرة وقلم رصاص ويعمل خطة مافيها اي تعرجات زي رسومات المهندسين تتنفذ بالحرف الواحد ومافي اي مشكلة او تحدي حيقابلا طالما الطوب والاسمنت والحديد متوفرين! يا خوانا الدول الديمقراطية الراكزة وراسخة بتواجه مشاكل في التخطيط وفي التنفيذ وبتواجه تحديات في تطبيق العدالة وبتفشل في اشياء اساسية للدرجة البتسقط الحكومة وانتخابات مبكرة ومظاهرات واعتصامات بالشهور (فرنسا) وبتفشل في اي حاجة تجو تطلبو من حمدوك يغير ليكم البلد ويعدم ليكم الكيزان خلال 3 شهور وهو لا عندو موارد ولا عندو خطوط ائتمان مع المؤسسات المالية ومفروض عليهو عقوبات دولية وصفوف عيش وبنوك منهارة ما قادرة تلبي طلبات المودعين واحتياطي عملات صفر وبنزين مافي ومواصلات مافي ومافيات تتحكم في مفاصل الدولة و137 حركة مسلحة وشعب على عتبة المجاعة .. شنو هو؟ لو الموضوع بالسهولة دي ما كان غلب اليونان وايطاليا وفرنسا اهدو شوية وروقو ، الدول الديمقراطية بتدي االاحزاب البتشكل حكومات فترة من4-5 سنوات عشان تطبق برامجا انتو عايزنها كده طوالي في شهرين ؟
11-17-2019, 01:52 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
إنتخابات مبكرة يا عمكـ .. التحالفات القاعدة تتم هسه تمهيدا للانتخابات شغاله على قدم وساق .. بس الناس شايلاها الهاشمية وماحاسه بالحاصل وما عارفه الطامة الجايه قوى اليسار اللقت الفرصة الذهبية دي ماقادرة تستثمرها زي الناس وتبطل .. تشغل نفسها بالتوافه وتتوجه للعمل الجاد للمواطن وعيشته البقت كفاف .. على الاقل تترك في ذهن المواطن العادي الماعنده شغلة بي ايدلوجياتها .. صورة مشرقة لربما في الانتخابات يكون ليهم نصيب وسبت يقدموه .. في انتظار أحد قادم لانه الواقع بيقول إنهم حيروحوا في الرجلين .. في حال جات انتخابات مبكرة لكنهم استمرأوا شغل الفارغة ومقدودة .. تاركين المهم وقابضين في القشور والسواقط واستعراض ايدلوجياتهم .. والانتصار لذواتهم زي العطشان الما صدق لقى ليهو موية .. حيظل يشرب لامن يموت ...
مرات الواحد بيزعل من نفسه على أي حرف مضاد يكتبه .. لكن كمان روحنا محرقانا من البيحصل قدامنا ده الناس دي بعد وصلت للسلطة بقت زي العنّين ليلة الدخله .. حقو الواحد يبتعد شوية من كتابة أي رؤية سالبة ضد قحت .. ربما نحن الجايبين ليكم الكُج .. يوم داك ضحكت براي جنناك أنا وصاحبي الكاشف باللياقه والعكلته .. فشايفك قنعت مننا بي الله واحد لكن فيك الخير وفينا بعض رقشه ..
شهادتنا فيك مجروحة طبعا يا عمك لكن فلنثبّت لك حقك .. دورك في دعم الثورة والثوار في المنبر ده لا ينكره (أحد) ..
11-17-2019, 01:58 PM
عمر سعيد علي عمر سعيد علي
تاريخ التسجيل: 08-20-2015
مجموع المشاركات: 885
نقد الحكومة المدنية الثورية مطلوب وضروري ,, نقد من أجل التجويد وتطوير الأداء وحسم الفلول والحسم الثوري وإنجاز إهداف ومهام الثورة وتقديم حلول وخطط و معالجات إسعافية للأزمات الخانقة ,,مع الشفافية ومبدأ المحاسبة -- النقد من أجل الأفضل والأكثر ثورية - لانقد وهجوم لخدمة عهود الردة والنكسة..... أما الكيزان - فإن هجومهم علي حكومة الثورة - يندرج تحت بند إنفاذ أجندة الثورة المضادة والسؤال للكيزان هب أن حمدوك قد ذهب بالإستقالة أو سحب الثقة أو أو .... فماذا شستجنون ؟ بالتأكييد لن يعود عهد البشير الأغبر أو عهد الفساد والإستبداد ! البديل لن يكون معبرا عن الثورة المضادة - فالقادم - ثوري والبديل ثوري - سيضعكم بالسجون ويعجل بمحاسبتكم ومصادرة المال المشبوه - وسحب تراخيص الإعلام المشبوه - البديل سيعجل بضربكم ..
11-17-2019, 03:16 PM
خضر صيام خضر صيام
تاريخ التسجيل: 01-10-2013
مجموع المشاركات: 134
عاجز الرأى مضياع للوقت قوموا لفوا لفاكم قطر يا اشباه الرجال حرية سلام وعدالة دا شعار اكبر من عقولكم الوسخة يا يرابيع هذه الثورة مؤيدة من الله بس الشباب الثوار هم اداة تغير فلا مكان لمن يعملون بالوكالة الشعب هو الحاكم اليوم وقوى الحرية والتغير هى التى تمثل الشعب اليوم وهذه الحكومة اتت من خلال وثيقتين تم توقيعهما من قبل ممثل قوى الحرية والتغير نيابة عن الشعب وهذه حكومة انتقالية عندها اهداف محددة وفترة محددة بثلاث سنوات فعلى الناس ان تعقل شوية وقصة انقلاب مافى تانى بإذن الله وعلى اى وطنى ان يقدم مصلحة الوطن وهذا بوست إنسان مراهق سياسيا وبعض المتداخلين لا يفقهون شيا المهم راكبين الموجة زى قشة البحر متحركة مع التيار المهم ربنا يهديكم وتستفيدوا من هذه التجربة وتعيدوا حساباتكم
11-17-2019, 04:53 PM
علاء سيداحمد علاء سيداحمد
تاريخ التسجيل: 03-28-2013
مجموع المشاركات: 17162
شكراُ يا ودو بوست فى السلك فعلاُ العسكر وبعض عضوية واحزاب ق ح ت فى السيادى والوزراء و الفلول ومن شايعهم من الارزقية شغالين شغل تقيل فى افساد المرحلة و اعطاء حميدتى والعسكر فرصة ذهبية ولا فى احلامهم للانقضاض على السلطة بواسطة بعض قيادات بعض الاحزاب التى اصلا لا تؤمن بالديمقراطية واكون صريح جدا و اقول وبالفم المليان بعض اكرر بعض قيادات حزبى الامة القومى والمؤتمر السودانى ولكن فات عليهم ان الشعب ولا المجتمع الدولى سيرضون بذلك لانه لو حدث ذلك الانتفاضة القادمة سترميهم الى مذبلة التاريخ متبوعين بلعنات الشعب . الصادق المهدى هو الذى قام بتلميع حميدتى منذ مايو الماضى وفى لقاءات فضائية كثيرة وأتــى بسيناريو : الانتخابات المبكرة ولكن فات عليه وهو السياسى الضليع انّ هذا السيناريو مرفوض تماماُ من الشارع السودانى .
الحـــــــل : الحل الوحيد يتمثل فى العمل الجاد من جميع الجهات والاحزاب لرفع اسم السودان من قائمة الدول الراعية للارهاب الامريكية والتى وضعنا فيها حكومة الكيزان . وعدم التفكير فى محاولة سرقة الثورة لان السرقة ستؤدى الى ما لايحمد عقباه . والشارع جاهز .
11-17-2019, 05:11 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 10219
جيلنا ومن سبقنا فات فينا الفوات ولكنا نحمل ارادة التغيير ولكن الشباب والشابات الذين ضحوا بدمائهم لا يمكن ان يسمحوا لانتكاس ثورتهم حتى لو اوريقت دماء اخرى ولا اظن ان هناك احد من الامة السودانية اكتوى بنيران النظام السابق يريد افشال الحكومة الحالية ولكن الحكومة خيبت الامال وطرقت ابواب امريكا واروبا والخليج ولم تحصد إلا الفتات على الحكومة الحالية ان تتخذ اجراءآت صارمة للسيطرة والتقليل من الوارد حتى من السلع الاستراتيجية مثل الجزولين والبنزين وتقلل الصرف الحكومي وابطال استيراد كافة السلع الكمالية بما فيها الملابس والاتجاه نحو دعم الزراعة بكل الموارد الممكنة وكذا الانعام وتشجيع الصناعات الصغيرة والمتوسطة فهي تسطيع أن تستخدم ملايين العاملين في جملتها وعلى الشعب السوداني ان ينتهج نهج التقشف في معيشته وأعني الطبقة المتوسطة إن كانت هناك طبقة متوسطة والطبقة المترفة واخيرا اشدد على كلمة السر وهي الاعتماد على مواردنا المادية والبشرية ومن يريد ان يعننا دون سؤال منا فمرحبا به كصديق وقت الضيغ والسودان موعود بنهضة عظيمة بعد نحاح ثورة الشباب
11-17-2019, 05:59 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 10219
هكذا يصنعون حالة ما قبل الإنقلاب يصنعون حالة ذهنية تتقبل اي شئ خلاف الحرية والتغيير منطقيا حكومة الحرية والتغيير خلال مدة قصيرة جدا أعادت السودان يتواصل مع العالم خلتنا نشوف للدنيا والزمن مسؤول يتقدم ب الإستقالة خلال مدة قصيرة أصبح عندنا حكومة وقضاء نائب عام يا دوب الحكومة ختت القطر علي القضبان
حكومة الحرية والتغيير ورثت تركة من الفشل قوامها 30 عام من الفساد ثلاثة سنوات غير كافية للتخلص من تركة الكيزان دا سقف توقعات الناس والحكم علي الحكومة بعد 39 شهر
اي محاولة لقطع طريق الفترة الإنتقالية وتشويق الإنتخابات المبكرة او الانقلاب يعني ردة على ثورة الشعب
11-17-2019, 06:04 PM
Omer Abdalla Omer Omer Abdalla Omer
تاريخ التسجيل: 03-02-2004
مجموع المشاركات: 4079
محمد إزيك، إنت عارف و أنا عارف و الله عارف و هو يحكم بيننا! ردي ما كان إلا بعد قريت مدخلك الماعندو علاقة مع عنوانك و بصراحة لا أثق فيم ما كتبت.. حقيقة لو كتبت بنفس روح العنوان ما كان دخلت رديت عليك أصلا لأنه دا حيكون رايك و هو مكفول و حق! لكن غايطنى محاولة التذاكي دي! زي ما قلت لك كانت محاولة تذاكي منك و تلاعب بالكلام و محاولة خلق بلبلة.. غايتو دي قرايتي و زي متيقن منها كدا
11-17-2019, 08:18 PM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
Quote: الاعتماد على مواردنا المادية والبشرية ومن يريد ان يعننا دون سؤال منا فمرحبا به كصديق وقت الضيغ والسودان موعود بنهضة عظيمة بعد نحاح ثورة الشباب
الكنزي مساء الخير لو ممكن تفصل لينا حتة اننا نعتمد على مواردنا المادية دي ، وتوضح لينا مواردنا المادية الممكن تمول لينا ميزانية 2020 شنو وقاعدة وين . بعدين ياخي استخدام مفردة "سؤال" بمعنى شحدة دي ما اظن ده سياقها ولا مدلولا ، منو يا حبيب الحا يجي ويجيب ليك كم مليار كده ساي كده بدون اي طلب او اتفاقية او تبادل مصالح محددة او حتى فرض اجندة ؟ الكلام ده عندنا هناك في الحلة ، زول محصولو اتحرق ، بقرتو ماتت حصلت ليهو اي مصيبة زمان لخطبت امورو ، لكن في العلاقات الدولية مافي كلام زي ده الا في حالات محددة زي الكوارث الطبيعية الكبيرة . يظل السؤال المهم هو: من وين حمدوك يمول ميزانية 2020 الباقي ليها شهر دي وانت عارف كويس الخزينة الورثها من البشير.
أتفــهّــم حرصك على نجاح الثورة السودانية الديسمبرية المجيدة، وهو حرصٌ يحرص بالأساس على الحكومة الانتقالية، بضرورة صونها والحِفاظ عليها والوقوف ضدّ كل من تسوّل له نفسه من فلول كيزانية و عملاء مُدرّبين ومُدَوَّلين إقليمياً و "سِقاطٍ متمكنِّين" محليــّا، أن يُسقطها فيقلبها ويرثها وشعبها حي؛ وهذا حرصٌ وطنيّ يُرجَى من أمثالك ولا يُستَغرَبُ. مع ذلك، فإن حكومة الثورة برئاسة الدكتور حمدوك وصحبه الكِرام من آل-تكنوقراط المُختَارين وفقاً لدالّة الثمثيل قومياً، هم الآن المسؤولون الأُولى، بل والأساسيين عن صيانة واستدامة هذه الحكومة الانتقالية؛ وبالأحرى هُم "رُمّانة ميزان" نجاح الحكومة أو - لا سمح الله تعالى - فشلها فانقلاب عليها يكون كله ظلم وإظلام وضلامية لها عُباب وأنساب..! وبعد:
حقيقة لقد دشّنت الحكومة عهدها بمقدّمات باهرة، ثم تكأكأت عليها المصائب، فأخذت -ككل مُتَكأكأٍ عليه- لجلجتها ف مالتْ بعض الشيء! لكنها، وربما بفضل الحاسّة الثورية السودانية العارِمة، قد ركزت فثبتت فوق صهوة جوادها وسعت في رفع وتيرة أدائها..! على الأقل في شوت الذين تقنطروا بالدَّسِّ والدغمسة حتى يتقاصر شَــرّهم وَ دَسّــِــهم وجلافاتهم، ثم في تقصير حناجر المتحنجرين بالفشوش الانقلابي الحظّويّ آل-مُصادفاتي. ثم إن الحكومتنا الانتقالية، ما زالت تأمل في "تحييد" نافذين بالمجتمع الدولي! من الذين لا يُــزهَد في بِرِّهم إن ســَــخوا، ولا يُؤمَن شــّــرّهم إن أرادوا ثم وثقوا في "عُملائهم" الذين هُم بالداخل! بل أحياناً "جــُــوّة ال جـــُــوّة ذاتو ..!
الديمقراطية لن تكون بلا حُرّيات تعبير، وكذلك ليس كل النقد الذي جرى، هو نقدٌ هَــدميٌّ يرمي لإسقاط الحكومة؛ ومعنى ذلك فالساحة السودانية باعتقادي، تموج بالنقدَيْن. نقدٌ إيجابي، يسعى لتصحيح القرار الحكومي، وآخر سِلبي يكاد يقتل نفسه لو تأكد أن قتلِه نفسَه سيقتل معه الحكومة وُ بس!
النقد الإيجابي برأيي، لن يحافظ على موضوعيته إن صدرَ "انتقائي" ..! وحتى يكون نقد الديمقراطيين لحكومتهم الانتقالية موضوعياً، فلا بد أن ينصحوا في نقدهم بتجريدية وَ شفافية ليس فيها عين سُخط تجاور في ذات الوجه "عين" رضا.. وَ الآن الآن، أعتقد أن الحكومة الانتقالية، تمرّست على قبول النقد، بل واستفادت منه في الكثير؛ في ذات الآن الذي فطِنت بلباقة، وبالتأكيد بما لها من معلومات وتقديرات كبيرة، إلى أن "قنابل" و "كباتن" الثورة المضادة لن يألوا جهداً في سوقها للمذبح متى ما تمكنوا، وأنّهم لعلى استعداد أن يسوقوا في معيّتها " شعب السودان" إلّا قليلاً "لهم" في هذا الشعب الصاحي..!
الحكومة الانتقالية بالأكيد لها خارطة وخطة وتعرف أنها تلعب في أرضها ووسط جمهورها (خصوصاً بعد ال 3 شهيرات ديل)، كذلك فقد أنجزت الحكومة الانتقالية إنجازات محسوسة في فترتها ال قصيييييرة دي؛ أما الثورة المضادة فإن لعبها للسياسة معروووف! لعب الكيشة، وعوارة الطِّيشة، وتاريخ النبيشة، ومهما رشت الحُكّام، وأقسمتْ بالحقِّ أو بالأوهام..! فمصيرها زوؤام في قَتام..
والله تعالى، غالب..
11-17-2019, 08:48 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10347
قطع شك هذه حملة منظمة يقوم بها بعض اعوان النظام و الاوغاد الرماديين بدأها الجنريتر محمد بشير عبادي و بعده الهادي بالانقليزي و أتى الآن هذا الشطرطون ليكمل الناقصة و الآن في كوز ليهو فقرة اسمو الطيب النقر و دي كلها بتصب في اتجاه واحد و لسه متوقع باقي الأوغاد من المدحورين
11-17-2019, 09:21 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
يا دكتور عمر إن كنت قرات فهل فهمت؟ عموما خليني ابسّط ليك الفكرة لكي يطمئن قلبك, افشال حكومة الحرية و التغيير مهمة يعمل ويسعى لها شركاؤها العسكر و غيرهم و بالطبع اهل العهد البائد دوافع كل فريق مختلفة عن الآخر لكن في النهاية هذا أمر مبرر و مفهوم ما اتحدّث عنه واريد التنبيه له هو انسياق قطاع كبير من اهل الثورة و طلّاب التغيير وراء الدعايات السوداء التي تأخذ شكل السخرية و النقد المتدثّر بحرية التعبير و الحرص على الشفافية بالضبط كما حدث طوال عهد الحكومة المنتخبة في مصر, نقد وضحك و عمل قبة من الحبة و الوقوف على ابسط الخطاء وتضخيمها حتى تهيّأ الشارع نفسيا لقبول فكرة تمرّد و أن الحكومة المنتخبة فاشلة ولا بد من ازالتها نفس السيناريو يجري الان و للأسف بأيدينا لا بيد الآخرين! الخطوة التالية وبنفس السيناريو المصري سنرى حميدتي خالعا البزة العسكرية و يستعد للانتخابات معززا بذهبه وسيفه و اكياس عدسه و رزه, وحتى يصل لهذه المرحلة يحتاج أن يتهيّا الشارع بالتركيز و التكرار حتى ترسيخ فكرة فشل و ضعف وفساد الحكومة الانتقالية! الحاجة القلت ليك عشان يطمئن قلبك أن هذا السيناريو لا يشمل بأيّة حال عودة النظام السابق باي شكل كان ولا اي من الاسلامويين! لاعتبارات خارجية وداخلية وفشل مشروع وإحن لا يمكن تجاوزها, كما كان من الاستحالة عودة مبارك وحزبه الوطني في مصر فهذه حقبة انتهت وللأبد. الخوف من القادم الذي أكاد اراه ونمهّد له الطريق بلا وعي!
ابا جودة هلا بك و بطلّتك اسمح لي ان اخالفك الرأي, كتبت اعلاه ان حكومة الحرية و التغيير ليست عجلا من ذهب ليعبد ولا ينتقد كدي خليها تصبح بجيك برواقة
خضر الواطي ابن الواطي اتلهي أسّي بجيك باكر إن شاء الله
11-17-2019, 10:03 PM
Mohamed Suleiman Mohamed Suleiman
تاريخ التسجيل: 11-28-2004
مجموع المشاركات: 20453
الأخ الفاضل محمد البشري الخضر لك التحية و الإحترام
Quote: ماذا بعد فشل حكومة الحرية و التغيير؟
هل هذه حكومة الحرية و التغيير أم حكومة ثورة شعب السودان؟
إن كانت هذه حكومة قوي الحرية و التغيير ... فلتذهب الي الدرك الأسفل من مزابل التاريخ.
هذه حكومة تحمل بذرة فشلها في أحشائها يوم أن إحتضنت قتلة النظام اللذي إدّعت أنها قادت ثورة لإزالتها. الآن السودان في نفس النفق المظلم من العزلة ... لأن حكومة الحرية و التغيير قررت في إنتهازية و إقصائية أن تتحالف مع اسوأ سودانيين : المجلس العسكري بقيادة البرهان و حميدتي ... ضاربة بعرض الحائط المبادئ الأساسية للإنسانية: الصدق و العدالة و المساواة. حكومة الحرية و التغيير ليس سوي إمتداد لنفس النظام البائد: محسوبية و عدم كفاءة و فساد و تاريخ مشوب بالتعامل مع نفس النظام القديم ... أسألوا صلاح قوش ...... بينما واضح تماماً تخليهم عن تطبيق العدالة و ملاحقة كبار الجناة لكبريات الجرائم بحق ملايين السودانيين ... و بالطبع لن يجرؤوا علي محاسبة البرهان و حميدتي.
هذه الحكومة لن تأتي بالحرية و لن يكون هناك تغييراً طالما البرهان و حميدتي في سدة الحكم .... و لن يغادر حميدتي السلطة بعد الفترة الإنتقالية ... طالما هو قد وصل الي السلطة بفوهة البندقية و إكتشف أن السلطة في السودان هي أقرب الطرق الي الثراء الفاحش الحرام. هذه هي بذرة فشل حكومة الحرية و التغيير ... منذ أن تهافتوا علي بيع أي شئ .. بيع السودان للبرهان و حميدتي ... أسوأ من أنجبتهم حواء السودانية.
و لصق بطاقات التخوين أو أن كل ناقد هو يحمل أجندة من يضمرون شرّاً لهذه الحكومة .... صدقني يا محمد البشري الخضر ... ليس هناك أكثر عداوة لأي شعب أكثر من متنفذين أتوا الي السلطة دون كفاءات و أهلية و الآن تحيط بالبعض أغبرة الفساد و المحسوبية ... و كل الحكومة تحيط بها الذلة و الإنكسار للمجرمين البرهان و حميدتي.
هل عقرت حواء السودانية؟
11-17-2019, 10:48 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
سلامات محمد سليمان نعم الحكومة الإنتقالية الحالية هي حكومة الحرية والتغيير وتاني شئ حواء السودانية ولود جابت لينا حكومة كفاءات بعد ما حكمونا لصوص الكيزان 30 سنة بددوا موارد البلد واشعلوا الحروب في كل مكان ولكن حواء السودان رمتنا بكفاءات وطنية شغالين يعالجوا في كوارث الكيزان وعلاج العطب وبناء البلد من جديد
11-18-2019, 00:07 AM
Mohamed Suleiman Mohamed Suleiman
تاريخ التسجيل: 11-28-2004
مجموع المشاركات: 20453
Quote: سلامات محمد سليمان نعم الحكومة الإنتقالية الحالية هي حكومة الحرية والتغيير وتاني شئ حواء السودانية ولود جابت لينا حكومة كفاءات بعد ما حكمونا لصوص الكيزان 30 سنة بددوا موارد البلد واشعلوا الحروب في كل مكان ولكن حواء السودان رمتنا بكفاءات وطنية شغالين يعالجوا في كوارث الكيزان وعلاج العطب وبناء البلد من جديد
مافي حكومة نهضت بشعبها ... بالأماني العذبة.
السودان بلد لحم رأس ... و من يريد أن ينهض بشعب في بلاد مثل هذه ... عليه (عليها) أن يقود بالمثال ... Lead by example
بمعني .... سيبك من الإنشاء و التمنيات ... و أن يتم تطبيق كل هذه المبادئ: عدالة و قانون و حكم رشيد ... علي النفس أولاً ..... و بلا إستثناء .... لا برهان و لا صلاح قوش و لا حميدتي هم في حكم الإستثناء. و يجب تطبيق القانون و المحاسبة و العدالة علي الأقوياء أولاً ... و لا حصانة لأحد يعني ... ما ممكن تترك المجرمين اللذين إرتكبوا مذبحة فض الإعتصام ... و تمشي تعتقل رامبو بجرائم تربك أولويات المحاسبة و بصورة إنتقائية ... و ما ممكن تترك البشير و حميدتي و البرهان أحرار طلقاء بلا ملاحقة لجرائم الإبادة الجماعية في دارفور و هي السبب في أن السودان حتي اليوم في قائمة الدول الداعمة للإرهاب ..... و لكن و بصورة إنتقائية ... تنشط في تكوين تحقيقات نيابية عن إعدام 28 ضابط حقاموا بمحاولة إنقلاب ضد النظام البائد .. مع أحقية و بل وجوب محاسبة ذلك النظام عن إعدامهم. كيف لا تفشل حكومة الحرية و التغيير و قد جعلت من العدالة مهزلة و مسرحاً للعبث.... أمام كل العالم اللذي يري عدم الجدية هذه.
يا عزيزي عبدالعظيم .... العالم يراك من خلال أعمالك و مدي مصداقيتك في شعاراتك.
و لا تهمه شعاراتك البراقة و هتافات باتت مسخرة عند التطبيق.
و سؤال يلح الآن بشدة علي قوي الحرية: هل هناك حرية في دولة البرهان و حميدتي؟ و هل هناك تغييراً في أرض الواقع... أو حتي بوادر تغيير لا تكلف جنيها بل فقط عزيمة علي إحداث تغيير؟
11-18-2019, 00:29 AM
Elhadi Elhadi
تاريخ التسجيل: 01-06-2003
مجموع المشاركات: 9604
الله يخليك يا محمد، طبعا لازم أذكر في هذا المقام تأدبك و طول بالك و ضبط مشاعرك و الرد في كل الأحوال بما يليق.. إلا ما كان بينك و بين خضر الله يهديكما! الان إنشبك مع الهادي الله يحلو بس! الهادي دا شرامي قضى قدر عمر خضر تسكع في عمدان الكهرباء و الرمتلة ههههه . كذللك والله لو هنالك تكريم للعضوية الفاعلة في سودانيزاونلاين تكون من أجدر الناس بها و معك ثلة قليلة فقد حفظتم هذا المكان بمثابرتكم. و بعد، كلامك طبعا فهمته و لكن عندي عنوانك لئيم و محبط و يصب في نفس إتجاه الناس الذين يتمنون فشل حكومة حمدوك و سيفرحهم ذلك.. لكن مداختلك تظهر كما المشفق و دا محل إختلافي معاك.. قد تقول العنوان مالو؟ لكأنك تقول حكومة حمدوك فشلت! ماذا بعد! أها والله هذا السودان سيدخل في دوامة إذا ما فشلت هذه الحكومة! مهما حصل تاني والله ما في كيزان بذل ذليل او عز عزيز! التحالفات تتشكل و سيرى الناس ما يدهشهم و يشيبهم في مقبل الأيام! لنا الف تحفظ على هذه الحكومة لكنها قطعا أحسن من صادق المهدي و عواليق الجيش.. اما حميدتي، فهو عارف السم القدرو!إذا تحرك تحركنا و سيرى الذين ظلموا اي منقلب سينقلبون! المفأجأة ستشمل حميدتي و الدهشة سوف لن تسعكم! هذا كل ما في الأمر
11-19-2019, 05:52 AM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20360
هذا السلوك يا محمد البشرى يحتاج لتمعن شديد. اسبابو ودوافعو ومآلاتو ..
لو ركزت شديد ح تلقى اغلب هؤلاء اصحاب رؤى آحادية او مناطقية جهوية او كيزان (كيزان بالمعنى الواسع)
اصحاب الرؤى الاحادية بالضرورية يتصورون الصواب في كل ما يأتون من قول ومن فعل ومن تحليل.
هناك مثلا من يقول بسرقة الثورة وانتهى الموضوع. ثم يستند على هذا التحليل ويدعو للموجة التانية للثورة كي تقتلع حمدوك وحكومته.
ديل مشكلتهم كبيرة جدا.
في يناير او فبراير جيت كتبت بوست عن ضرورة انحياز القوات المسلحة لاي ثورة سلمية لو قيض لها النجاح. هذه مسألة تتمتع بقدر عالى من الصواب التاريخي (يوجد استثناء الثورة الايرانية بقيادة الملالي) .. وكنت طالبت قحت بتقديم تصور لانحياز القوات المسلحة ورجحت السيناريو التونسي كمقترح (حد اعلى) ..
المهم ذات (الصوابيون) هؤلاء كانوا يحلمون بأن تقود الثورة السلمية نفسها للحكم دون المرور بوابات العسكر (لا اعلم كيف كانوا سيتجاوزون جنديا يحمل بندقية) .. هذه تصورات غير منطقية .. وكان أن جاء 6 ابريل .. ودار لغط كبير بينهم لماذا نذهب للقيادة العامة ... ولكن الجماهير بوعيها ذهبت للقيادة وصنعت جمهورية الاعتصام الفاضلة .. وسقط الصنم الاول .. وتوالى سقوط الاصنام .. وسيسقطوا جميعا في نهاية المطاف لو حولنا شعار الثورة المستمرة والعميقة لشعار حقيقي .. ثورة تكتسب وتحافظ على مكتسباتها وتمضي لانتزاع مكتسبات جديدة.
المهم
11-19-2019, 11:59 AM
Asim Ali Asim Ali
تاريخ التسجيل: 01-25-2017
مجموع المشاركات: 13492
سلامات محمد حيدر لو تذكر سؤالى الاستفهامى عن (الدوله العميقه). وومازالت الدوله العميقه والثوره المضاده عقبه كؤود امام مسار الثوره ومازلنا لانعلم شىء واضح عن مكونات الثوره المضاده سوى ما القى فى اسماعنا من مسميات مثل كتائب ظل وامن شعبى ودوله عمقيه داخل مفاصل الدوله...الخ. لكن لم نسعى لمعرفه كنه هذه المكونات وحجمها والياتها (واساليب تحولها الحربائى للتكيف مع الواقع القائم حتى يمكنها اداء مهامها لاجهاض الثوره) والان تصاعد مد الثوره الضماده بعضها بالوجوه القديمه اعلاميه وسياسيه . هل انكمشت الكتله الصلبه لها ونزلت تحت الارض فى بيات شتوى انتظار لنتيجه معارك الخط الاول للثوره المضاده لثوره ديسمبر. العسكر لم نتعامل معهم كمؤسسه وانما كلجنه امنيه تخلص الثوار من احد صقورها (عمر زين العابدين) ولم تتخلص من ثعالبها (فريق خلا وكباشى) . الموجه مابالضروره تكون لاسقاط حمدوك وانما ثبيت اركان هذه الحكومه وسد الثغرات فى سفينه الحكومه المدنيه خشيه الغرق قبل الوصول مرافىء الديمقراطيه تحياتى
تحية للزملاء الكرام, اعتذر عن الغياب عن البوست, حقيقة مداخلات الزملاء خاصة الباشمهندس محمد سليمان و مداخلة دكتور عمر الأخيرة دعتني لاعادة القراءة و التفكير مرات ومرات وساعود للتعقيب بتفصيل اكثر
حتى ذلك الحين مر علي فيديو من انتاج جماعة جرعة وعي احسست انه يطرح الفكرة بصورة اشمل و اجود فأحببت مشاركتكم أيّاه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البشرى الخضر
علي عبدالوهاب عثمان
Mohd Ibrahim
Asim Ali
خضر الطيب
جلالدونا
Nasser Amin
Salah Zubeir
Abdullah Idrees
جمال ود القوز
عمر سعيد علي
كمال عباس
صديق مهدى على
علاء سيداحمد
Ali Alkanzi
عبدالعظيم عثمان
Omer Abdalla Omer
محمد أبوجودة
Mohamed Suleiman
Elhadi
Mutasim Idris
محمد حيدر المشرف
فيس بوك
تويتر
انستقرام
يوتيوب
بنتيريست