كيف أصبحت قوات الدعم السريع جيش السودان الأوحد؟

Quote: اي زول اليومين دي بتساءل وين الجيش بتاعنا ... وين القوات المسلحة ،؟؟ ليه الجنجويد مسيطرين على البلد ؟؟ و عشان تعرف المتسبب في ضياع القوات المسلحة والأسباب ، خلينا نوريك الخبر العاجل دا اولا : "الفريق (محمد عثمان الحسين) قال انه (هاشم عبد المطلب) بريء من المحاولة الانقلابية و بان المحاولة الانقلابية الاخيرة هذه لها اتصال بالمحاولات الثلاث السابقة وأنها جميعا من تخطيط وتدبير العميد( م) (محمد ابراهيم عبد الجليل) عميد معهد الاستخبارات السابق وقائد كتائب المجاهدين في العمليات، الذي قاد محاولة انقلابية ضد البشير في العام ٢٠١٢...." - الغرابة إنو الأفاعي ما بتحب بعض ، لكن عشان هي من ذوات الدم البارد ممكن تتجمع بالمئات مع بعض داخل وكر واحد ، عشان دا فيهو مصلحتها ... و أي مخلوق غريب يحاول الدخول للوكر مصيرو حيكون اسنان مسمومة .... و قاتلة. - الجنرال (وانغ جينغ زي) "¹” احد اعظم القادة في التاريخ وضع استراتيجيات للفوز بأي حرب ، و على أي عدو سماها ( الاستراتيجيات الست وثلاثين) "²" في كتاب ( كي). الأستراتيجيات دي بيتم تطبيقها حرفيا علينا و من وقت طويل جدا . ح اسيب ليك رابط تحت تقرأ فيهو الاستراتيجيات و تفيق من السكرة بتاعتك . ١- اللمبي : كتير من السودانيين بعتبروا (عبد الرحيم محمد حسين) مجرد شخصية بلهاء و مثيرة للضحك ، بسبب تصريحاته العبيطة و تصرفاته الخرقاء. و (يمكن) هو بصورة ما بسوق للفهم دا ، لكن المقربين من دوائر الحكم بعرفوا إنه الرجل كان السبب الرئيسي في دمار القوات المسلحة ، على حساب المليشيات . " أنا عارف انه الكلام دا ما حتقدر تبلعه عشان كدا الليلة مقالتنا دي حتغوص في عمق وكر الأفاعي ، و حنمسكها واحدة واحدة). - بعد كارثة عمارات الرباط تم تحويل (اللمبي) بسبب فساده اللي سمع بيهو القاصي قبل الداني ، من وزارة الداخلية لوزارة الدفاع ، مخلفا وراهو شرطة بائسة تكاد لا ترقى لحماية نفسها ، ناهيك عن المواطنين. و في الدفاع كان في قادة مختلفين عن قادة الشرطة. قادة بخوضوا معارك حقيقية ، و بواجهوا الموت بصورة اعتيادية, يعني ما بخافوا من أي بن تسعة . لكن الفاسد دائما نتن الرائحة ، و اكيد بجذب كل الرمم اللي ما بتعيش الا في مستنقعات الفساد . و من هنا بدأت حكاية نهاية القوات المسلحة . لكن كيف بدأت الحكاية ....؟ - ح نحاول بسرعة نرجع لعملية إغتيال (مبارك) بأديس ابابا ... عارفين المخطط ليها كان منو ؟؟ كان المقدم حينها (صلاح عبد الله قوش) . طيب الجديد في كدا شنو ؟؟ الجديد إنه هو من سرّب تفاصيل الخطة دي للمخابرات المصرية ، لضرب حكومة الإنقاذ ، انت بس خليك متذكر المعلومة دي . ٢- بيلاروسيا : لما كان (عبد الرحيم محمد حسين) وزيرا للداخلية قام بشراء طائرات هليوكوبتر متهالكة و شبه خردة لطيران الشرطة ، أدت لنشوب خلاف كبير بينه و بين رئيس طيران الشرطة أدت لإقالة الرجل الى الصالح العام وهو برتبة لواء . فالصفقة كانت مربحة لأصحابها ، رغم نتائجها الكارثية على صعيد الأرواح . و لما بقى (اللمبي) وزير دفاع ، تكونت عنده عصابة خطيرة من (البشير) و (نافع) و (علي عثمان) و اللواء (علي سالم) مدير الأمن الإيجابي ، و مدير مكتب وزير الدفاع اللواء (النعيم خضر) ، و اللواء (الطيب المصباح) قائد لواء الفاشر ، و اللواء )أحمد عابدون) قائد لواء نيالا . و أقنعوا (البشير) بضرورة شراء معدات و آليات جديدة للجيش . (البشير) وافق عليها بدون اي نقاش او محاولة معرفة التفاصيل . اتصل اللواء (النعيم الخضر) بمدير التصنيع الحربي لإتمام الصفقة مع أوكرانيا في توريد الآتي : ١٨٠ دبابة من طراز T80 الروسية . ٣٠ مدرعة من بيلاروسيا . ٥٥ مدرعة من طراز PMP2 الأوكرانية. و ناقلات جنود تخطت ال٣٠٠. طبعا هنا بدأت المشاكل مع قادة الجيش ، فعملية شراء أي معدات مفروض تتم عبر رئيس وحدة مشتريات القوات المسلحة . الوحدة دي كان بترأسها اللواء (صديق فضل) ، اللي رفض التوقيع على اي حاجة ما بتم عبر وحدته المسؤلة ماليا و تقنيا عن جودة المعدات ، وهي البتقدّر حوجة الجيش لمعدات جديدة . و كان في مقدم ركن (طارق الأمين) في سلاح المدرعات برضو رفض يوقع على الصفقة لعلمه بنوايا وزير الدفاع ، و الأغرب إنه اللواء (الطيب المصباح) كمان رفض التوقيع عليها . و رغما عن كدا مضت العصابة في إستيراد المعدات و أضافوا عليها أسلحة كمان . (قوش) كان عارف بكل التفاصيل. دي ، و مستني اللحظة المناسبة للإنقضاض على (نافع) و (علي سالم) اللي كان بتجسس على الجيش لصالح (نافع) . و بدأ الجيش يخسر معركة تلو الأخرى لرداءة المعدات و الأسلحة ، و يفقد مناطق قصاد الحركات المسلحة . لحد ما جات حرب النيل الأزرق ، اللي خسر فيها الجيش كمية لا تصور من الشهداء ، جنود وضباط . و في صورة درامية غريبة طلع (الصوارمي خالد سعد) و صرّح بإنه الجيش خسر لأنه ذخيرته نفدت تماما. تخيل جيش دولة كاملة في حرب أمام الحركة الشعبية في منطقة معينة تنفد ذخيرته بعد كم يوم ، و هو الجيش اللي وراهو التصنيع الحربي و وزارة الدفاع . هنا وقعت العصابة دي في شر أعمالها لأنه قادة المتحركات في العمليات مع قادة المدرعات أعلنوا الحرب على (اللمبي) و عصابته ، و القادة ديل كان في واحد منهم بارز و مشهود ليه. بالكفاءة وقربه من الجنود . قائد برتبة عميد .. اللي كان ساخط وغضبان جدا من الوضع الكارثي اللي ادخلهم فيهو اللمبي و ادى لخسارة الأرواح الهائلة دي و كان إسمه العميد ؛ ٣- ( ود إبراهيم) : "³" (ود إبراهيم) ح أسيب ليك رابط عن السيرة الذاتية بتاعته تحت . كان من الضباط الإسلاميين الدبابين كما يسمى ، و مقبول نوعا ما في اوساط الجنود . المهم و(د ابراهيم) و قادة المدرعات على رأسهم العقيد الركن مدرع (محمد زاكي الدين) واجهو (عبد الرحيم محمد حسين) بمكتب القائد بالمدرعات الشجرة بتفاصيل جريمته دي ، و وصل الأمر للتراشق بالألفاظ النابية . بعدها (قوش) تواصل مع قادة الجيش و افادهم بالغائب عنهم من معلومات و اتفق معاهم على انهم يطلعوا المعلومات دي للشعب عشان يحرجوا (البشير) و (اللمبي) . مادام الدولة بالهشاشة دي . (قوش) في باله (نافع) و(علي سالم) و (البشير) ، و (ود ابراهيم) و المعاهو همهم الجيش و القوات المسلحة ككل . تسربت التفاصيل دي و هوووبا يا أخينا (نافع) يحرش الهمبول (البشير) و يعلنوا اعتقال (قوش) و مجموعة العسكر البقت بتكشف في الفساد بتاع (اللمبي) ، و اتهموهم بمحاولة تخريبية مش انقلاب .... كووول الكلام دا عشان تختفي فضيحة صفقة بيلاروسيا . و عند عودته من واجب عائلي جاء ضابط لإعتقال (ود ابراهيم) من منزله ... عارف الضابط دا منو ؟؟ دا العميد حينها و اللواء الأن بحر أحمد بحر قائد المنطقة المركزية و مسؤول أمن الخرطوم . و الله صحي ... ما تضحك ايوة وجاب قوة كبيرة كدا و كان مبسوط جدا بإعتقال (ود ابراهيم) . أول جلسة محاكمة للقادة ديل اللواء مدرع (محمد زاكي) الدين درعها للقاضي و نشر بالوثائق فضيحة و مسؤلية (اللمبي) و طالبوا بي جلبه للمحكمة ، القاضي حاول يسكت الزول دا ، و رفع الجلسة . في نفس الوقت اللواء (علي سالم) جرى للرئيس و كلمه بإنه قادة الانقلاب ناوين ينشروا كل شيء بالوثائق و بملكوا معلومات حتودي العصابة في ستين داهية . (البشير) اتصل على (الزبير محمد الحسن) رئيس الحركة الاسلامية عشان يتدارك الموضوع مع العساكر ديل ، و معاهو (غازي صلاح الدين)... و فعلا تحت ضغط (الزبير) و (غازي) و بعض قادة الإسلاميين في المؤتمر الوطني ، وافق (ود ابراهيم) و جماعته على السكوت قصاد اطلاق سراحهم ، و شطب التهم الموجهة ليهم ، و فصلهم من عملهم . و جلب معدات جديدة للجيش و أسلحة . و يقولوا ليك هم اسلاميين 🙄 الدور اللي لعبو (الزبير) هنا كان التستر على جريمة كاملة ... و سكوت (ود ابراهيم) و كل المعاهو بختهم في نفس مكانة البقية المشاركين في كارثة تدمير الجيش بعدها ... و بخليهم مسؤوليين عن ضياع كل الشهداء من ابناء الوطن دا. ، اللي دخلوا حروب ما كانوا عارفين انهم شايلين أسلحة بالية لا تهش الذباب عن وجوههم ، و ما عارفين انه وزير دفاعهم قدمهم وجبة سائغة لخصومهم ، في مقابل هو وعصابته جيوبهم تكون مليانة . و الحقائق دي موجودة و موثقة في كل الصحف ، و حتى المشاركين فيها أحياء . و أي خبر عن محاولتهم للإنقلاب دا حيكون مجرد تصفية حسابات بيناتهم. ومن اليوم داك ما قامت لي جيشنا قائمة ، لأنه اتضح خلف كل قائد في قائد خائن ، و أخر بتجسس ، او مشارك في عملية غير قانونية أو متورط في فساد ، الا من رحم الله . و من هنا برزت فكرة قوات الدعم السريع اللي اتكونت في ٢٠١٣ بداية بعد الافراج عن (قوش) و (ود ابراهيم) و تعيين (محمد عطا) كمدير لجهاز الأمن . و نحن شايفيين اليوم الدعم السريع بتمدد و بنتشر على حساب قواتنا المسلحة ... و بنجني في نتائج جرائم (اللمبي). الموضوع دا طويييل جدا و فيهو أسرار أكتر و أكبر و بحتاج لمقالات و مقالات ... و كل البتشوفو قدامك ماهو الا وجه لقشرة تحتها قشور و وجوه .... و كل ما غصت زيادة يدك حتمسك بأفعى سامة و كامنة في اعماق ... وكر الأفاعي . ----------------------------------------------------------- المصادر: ١- وانغ جينغ زي Wáng Jìngzé. احد جنرالات الصين في عهد الامبراطور غاو. كتاب (الاستراتيجيات الست و الثلاثون ) للصين القديمة - الكاتب ستيفن إتش فيرستابين. كتاب الاستراتيجيات - للكاتب هارو ڤون سينغر . ٢- رابط : http://aaafan.blogspot.com/2011/05/36.html؟m=1http://aaafan.blogspot.com/2011/05/36.html؟m=1 . ٣- رابط : https://www.google.com/amp/s/www.alnilin.com/515371.htm/amp ٤- تقرير القاهر للكاتب (سليمان سري) بتاريخ ١٩ مارس ٢٠١٣م ٥- تقرير خضر الطيب ٢٠١٣م ٦- تقارير و ارشيف صحيفة حريات ٢١ مارس ٢٠١٣م ٧- صحيفة الشرق العدد (٤٢٧) ، الصفحة ٢١ بتاريخ ٢٠ مارس ٢٠١٣م

Quote: ٥- تقرير خضر الطيب ٢٠١٣م

Quote: فرق تسد.