امتثال يا بتنا ... انتي و صاحباتك الاتنين الغنيانة و الفقرانة ... ههه كان يا ما كان في قديم الزمان ... في بلد يدعى السودان ... كان في ناس بتعشق بي صدق ... بتحب بي صدق ... بتتغزل بي صدق ... اها انتي و صاحباتك .. كان ما لقيتو زول يكتب ليكم و يتعامل معاكم بي زي ده ... ما ترضوا بي اقل من كلام زي ده ... يعني ما تقعوا الا لي ناس تعرف معزتكم زيييين ... و تحترمكم و تقدركم قبل ما تحبكم ...
كان في شاعر يدعى سيد قاسم ... ناس شويييية البتعرفو ...
عمك سيد قاسم ده كتب كلام عجيب ... و الأعجب اداهو لي فنان برضو مقل شديد و ناس كتيره ما بتعرفه اسمه صلاح محمد عيسى ...
انا جبت ليكم تسجيل بي صوت ولدنا عبد الكريم ابو طالب عشان المزيكا نضيفة و الات حديثة و اداها بطريقة جميلة في محاولة لربط الماضي بالحاضر ...
عمك سيد قاسم قال : إنت الصباح الضاحك وإنت الغروب الباكي إنت المياه العذبة إنت النسيم الصافي بهواك وأزيد في حبي مهما تزيد في نوحي وقلبي راح لقلبك يا سيدي مالك روحي كف عيونك عني لغة العيون كاتلاني حب الجمال جنني شوق الوصال أضناني أهوى العيون السودا وأحب سمار في خدودها
الاغنية دي انا متأكد انه ناس كتيره بتكون كتبت عنها هنا زمان ... لكن لا انتو لا نحنا كنا هنا زمان ...
شوف يا ود قباني ،، انا كلمت البنية الغنيانة والبنية الثانية الفقرانة بهذا البوست ، وعندهن تعليقات بكتبها بعد تعليقي،،، اولا وين نلقى في الجيل الحاضر ده الماسك الجوال والايباد ٢٤ ساعة يكتب فينا شعر مثل هذا البيت _ انت المياه العذبة انت النسيم الصافي كف عيونك عنيو لغة العيون كاتلاني ... .... كده نبدا ليك بالبنية الغنيانة البرجوازية ، وعلى فكرة هي من بلد البروليتاريا وكفاح الطبقة العاملة ..لكن طلعت برجوازية وهي في جمالها واخلاقها فايتة الحد ، وكل الكلام القاله سيد قاسم بينطبق فيها ...وبالمناسبة جوها خطاب بالكوم ولكنها رفضتهم كلهم وادتنا اسباب انا ما مقتنعة بيها لكن بكتبها هنا ،،، السبب الاول حكت لينا قصة الخليفة عبد الملك بن مروان، الخليفة الاموي ، مع بنت سعيد بن المسيب ، وسعيد بن المسيب احد فقهاء المدينة المنورة في عهده .. فماهي قصة بنت سعيد بن المسيب مع الخليفة.. ونواصل الى حين مسرة ...
شوف يا ود قباني ،، انا كلمت البنية الغنيانة والبنية الثانية الفقرانة بهذا البوست ، وعندهن تعليقات بكتبها بعد تعليقي،،، اولا وين نلقى في الجيل الحاضر ده الماسك الجوال والايباد ٢٤ ساعة يكتب فينا شعر مثل هذا البيت _ انت المياه العذبة انت النسيم الصافي كف عيونك عنيو لغة العيون كاتلاني ... .... كده نبدا ليك بالبنية الغنيانة البرجوازية ، وعلى فكرة هي من بلد البروليتاريا وكفاح الطبقة العاملة ..لكن طلعت برجوازية وهي في جمالها واخلاقها فايتة الحد ، وكل الكلام القاله سيد قاسم بينطبق فيها ...وبالمناسبة جوها خطاب بالكوم ولكنها رفضتهم كلهم وادتنا اسباب انا ما مقتنعة بيها لكن بكتبها هنا ،،، السبب الاول حكت لينا قصة الخليفة عبد الملك بن مروان، الخليفة الاموي ، مع بنت سعيد بن المسيب ، وسعيد بن المسيب احد فقهاء المدينة المنورة في عهده .. فماهي قصة بنت سعيد بن المسيب مع الخليفة.. ونواصل الى حين مسرة ...
قالت :~ سافر الخليفة عبد الملك بن مروان لاداء العمرة في مكة المكرمة، وذهب الى المدينة المنورة لزيارة المسجد النبوي، ووجد هناك حلقات الذكر وتدريس الاحاديث ، ومن بينهم حلقة سعيد بن المسيب ، وكان قد سمع ان له ابنة جميلة ، من اجمل بنات المدينة المنورة، فاراد ان يخطب ابنة سعيد بن المسيب لولده الوليد بن عبد الملك،، فقال لاعوانه اطلبوا لي سعيد المسيب ياتيني في مجلسي، فذهب اعوانه اليه واخبروه ان الخليفة يطلبك ليسمع منك درس في الحديث والفقه ، فقال لهم ان العلم لا يذهب لاحد في مجلسه ومن يريد العلم ياتيني هنا في المسجد ، ولا استطيع ترك تلاميذي واذهب معكم ،،فذهبوا للخليفة واخبروه بما قاله سعيد بن المسيب،،، وكان الخليفة من الذين يقدرون حفظة القران الكريم ، لاته هو نفسه كان حافظا للقران وكان لا يترك المسجد ابدا ، ولهذا لم يغضب وذهب الى المسجد النبوي لمقابلة سعيد بن المسيب وهناك اخبره الخليفة بانه يريد خطبة ابنته لولده الوليد، وكان الوليد وليا للعهد، اي انه سوف يصبح خليفة بعد والده،، ولكن سعيد ابن المسيب رفض رفضا باتا خطبة ابنته للوليد ،،،فاستغرب الخليفة واستغرب الحاضرون ..فقال لهم سعيد :~ ترى ماذا قال سعيد عن سبب رفضه .. ونواصل الى حين ميسرة
قال سعيد بن المسيب للخليفة ان ابنك الوليد ماجن ومستهتر وانا لا ازوج ابنتي لماجن ومستهتر حتى ولو كان من العظماء والملوك ..وهنا غضب الخليفة لان سعيد اهان ابنه ، وامر بجلده مائة جلدة حتى يوافق ، ولكنه رفض... وبعد ذلك زوج سعيد بن المسيب ابنته لطالب فقير كان يحضر باستمرار حلقات درسه في المسجد واسمه ابو وداعة،،وكانت زوجته قد توفيت ، واقترح عليه سعيد ان يتزوج ابنته ، وطلب منه ان يدفع درهمين وخاتم حديد كمهر لابنته ،،،،وقال انه اختار ان يزوج ابنته لابي وداعة لانه ذو خلق ويتخلق باخلاق القران قلنا للبنت البرجوازية وما علاقة قصة بنت المسيب برفضك للخطاب الذين يتقدمون اليك ويكتبون فيك الشعر كشعر قيس الى ليلى وجميل الى بثينة ،،،فقالت لم اجد بينهم مثل ابي وداعة رجل ذو خلق .... واما سببها الثاني فاظنه معروف لديكم ، فهي الت على نفسها ان لاتتزوج من خارج عطبرة،ولا يهم قبيلته ولكن ان يكون قد نشا وتربى في عطبرة ، فاهل عطبرة كلهم طيبون وذو خلق.... ..اما البنت الفقيرة ، وبالمناسية هي من اذكى الطالبات ، وفي ال honour class فان نظرتها تختلف كليا ،،،فسوف تندهشون عندما تسمعون ماذا قالت !!! فهي لا تريد ان تتزوج ممن تحب ،،،،فقلنا لها اذن من!!؟؟ فقالت شئ عجيب ،،، والى حين ميسرة ومسرة ، نواصل
01-27-2020, 02:37 AM
Kabar Kabar
تاريخ التسجيل: 11-26-2002
مجموع المشاركات: 18537
ول ابا يحى..حبابك يا صديقي والتحية لبت ابا امتثال وبنات ابا (اميرة وبسمات) والتحية لصديقنا ابوذر بابكر وحباب ضيوفك هنا..
اليوم ، 26 يناير 2020 ، حظيت بمشاهدة (الصباح الضاحك) ، وايضا سعدت بمشاهدة (الغروب الباكي) ، وكليهما صورة منفصلة ومستقلة تماما عن تصورات النقد القديمة التي توقفت في هذا الوصف باعتباره انه لا يمكن أن يكون نفس الشخص (صباح ضاحك) وفي نفس الوقت (غروب باكي) باعتبار ان هناك تناقض ، ولكن من يشاهد شفق الصباح وشفق الغروب سيدرك ان كل منهما لوحة تكاد تكون اقوى من الأخرى في عمقها..!
سمعت كثيرون يرددون هذه الأغنية ، والتي يستسهلها كثر ويظنها اغنية بسيطة (كلمة/لحن/اداء) ولكن لم اطيق سماعها الإ من سيدها صلاح محمد عيسى..فالمدخل الأصلي: انت الصباح الضاحك ، انت الغروب الباكي لا اعتقد ان احد يستطيع ان يؤديه ويعطيه حقه كما صلاح محمد عيسى.. النقطة الثانية ، صلاح يؤدي الأغنية بصورة متحركة ، ويجعلها اغنية فرح ، ويستخدم لازمة (الليل) وفي البداية تعطيك انطباع بانها دوبيت..ولكن اداء صلاح يجعلها اغنية متحركة وحية واغنية مواجهة..
في المقابل ، مع احترامي لعبد الكريم ابوطالب ، الإ انه جعلها اغنية ميتة واغنية مناجاة ، اغنية حزن ، يعني زول قاعد يبكي جوه روحو (بكاء) ذاتي ، وبالتالي جعلها باهتة للغاية..!
جمال فرفور حاول يرجع لفيرشن صلاح محمد عيسى ، ولكنه طلع بتاع ورجغة ساكت..او ربما لأنو اداها في حفلات حية..وانت يا صديقي تعرف مشكلة الحفلات الحية..!
اما ثقافة الحب السمح الجميل فلقد ماتت يا صديقي منذ ان تم استبدال المنديل (الإجتهاد/الصدق/طريقة صناعة المنديل) بمناديل الورق..فلقد رحل الحب بعيدا..! تابعت اغاني الحب في العشرين سنة الأخيرة ، ورايتها باهتة ، حتى محاولات الحلنقي للعودة للمشهد برضك تحس فيها الصناعة..!..مافي اغنية بتقعد في خيالك ساعتين..!!!!!!
حصل لاقوك ناس بتقلد:العاقب محمد حسن او صلاح محمد عيسى؟
تحية مليانة للعزيز يحى . تحية شاملة للكريمات بناتنا . تحية ماكنة للعزيز شاعرنا اب ذر . تحية كاربة للاستاذ كبر . وتحية وتقدير للفنان المجتهد عبدالكريم . .. ارجع ليك يا اخ كبر وكلامك عن الصباح الضاحك وعن الغروب الباكي . عمك كان مية مية في وصفو . قالوا الصيدة جات من داخلية المدرسة البعيدة في صباح ديك الجمعة الضاحكة . ورجعت في نفس غروب ديك الجمعة الباكية . عمك يا كبر اتبشتن بشتنة شديدة للزيارة النتشة . الا بي بشتنتو قدر يرسم للامة لوحة تقعد مع الخالدات من لوحات اعمامك الجميلين . غايتو يا كبر صاحبك يحى ده ما عندك طريقة الا تدو طلقة في انكلو عشان تاني ما يبحبت ليك في زي الممنوعات دي ويختها ليك في تلايت الليل . .. سلامات
كبر اما قولك ان ثقافة الحب السمح الصادق قد ماتت،فقد اصبتنا باحباط... زلكنك بصراحة قلت الحقيقة المجردة،،،،ولكن مع ذلك نامل ان تكون هناك بقية من تلك الثقافة،،،،فقط نامل،،،،
01-27-2020, 04:52 PM
محمد محمد قاضي محمد محمد قاضي
تاريخ التسجيل: 12-23-2014
مجموع المشاركات: 1605
أسمه بالأندادي سلاه إيسنتود بتان فعلا يا أبا ذر هو غريد بديع وترجع أصوله لمنطقة تسمي كويه شمال مدينة دنقلا أولاد شقيقته المرحومة عشمانة ناس أزهري أصحابنا من زمان وأبوطالب فعلا كتل الأغنية وطلع عينها من عيونها السودا وسمح القول من خشم سيدو ... ولا شنو يا يحي يا قباني؟
(لكن لم اطيق سماعها الإ من سيدها صلاح محمد عيسى) لا تعقيب. - وعودة لموضوع المناديل المطرزة يا كبر، والذي ، alas، تحول إلى كلينكس.. بذات القدر الذي أصبحت فيه (الجوابات) بالمظروف المزخرف بخطوط قصيرة مائلة بالأحمر والأزرق على حوافه مع أشهر كلمتين Par Avion مع أشنا وأجمل خط بقلم حبر جاف ورطب ومعطر وندي في آن ، فالحبيبات كللللللهن خطهن شين زي الحبيب .. قيل إن خط البنات يتناسب عكسيا مع جمالهن.. أها، المنديل دا الغنوا ليهو ناس سيد خليفه وأحمد المصطفى وعموم مناطق العسيلات فتبعتهم العاصمة بمليونية عجيبه.. المنديل دا يا كبر أهدته واحدة في ثانوية أمدرمان للبنات لشاب ما زال يعتاش على (أماني يماطله بها زمانه)، كانت لابسه فستان (لبني) معاهو حذاء رياضي و (شُراب) أبيض بطول الساق البرازيلي والمساق الأدبي نسجا على نول (الله يا خلاسية).. الجورب في أعلى الساق خطين أفقيين أحمر وأزرق و (بلبلتين) كإجابة للسؤال التاريخي : هل عذابي أم عذابك كان أكبر؟.. أهدت صاحبك المنديل معطرا.. وضعه في جيبه، وأقسم ألا يستعمله سوى لاستنشاقه.. يا زول كيف، المنديل دا لتجفيف العرق ولمآرب أخرى!! قال: سيدنا عثمان بن عفان أقسم ألا تمس يمناه عورته بعد أن صافح بها الحبيب المصطفى.. عَرَق ومآرب يا هواة؟؟
- يحيى ، بقيت كل يوم أنوم بتوبة.. يلغيها الصباح..
01-27-2020, 11:04 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: سمعت كثيرون يرددون هذه الأغنية ، والتي يستسهلها كثر ويظنها اغنية بسيطة (كلمة/لحن/اداء) ولكن لم اطيق سماعها الإ من سيدها صلاح محمد عيسى..فالمدخل الأصلي: انت الصباح الضاحك ، انت الغروب الباكي لا اعتقد ان احد يستطيع ان يؤديه ويعطيه حقه كما صلاح محمد عيسى.. النقطة الثانية ، صلاح يؤدي الأغنية بصورة متحركة ، ويجعلها اغنية فرح ، ويستخدم لازمة (الليل) وفي البداية تعطيك انطباع بانها دوبيت..ولكن اداء صلاح يجعلها اغنية متحركة وحية واغنية مواجهة..
كبّر يا صديقي
اصلو ما في اتنين بختلفو في سماعها من صلاح محمد عيسى
لكن انا خاطبت امتثال و قلت في بداية البوست اني جبتها ( لامتثال ) بمزيكا جديده و حبيت انها تركز في الكلمات و ليس الاداء و فكرة الموسيقى الحديثة اقرب لي جيلها من جيل العجايز ههه يعني مستحيل أقول يا كبر و لا يا ود المرتضى تعالوا اسمعوها كده
أما اداء أبوطالب الهادي لم يفسد الأغنية بل زادها حنية في نظري
01-28-2020, 01:41 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: وقال انه اختار ان يزوج ابنته لابي وداعة لانه ذو خلق
شفتي يا بتنا ...
امسكي في دي قوي الاختيار الاول لازم رجل ذو خلق
عارفه ليه ؟
لانه صاحب الاخلاق لو حباك حيعيش معاك بما يرضي الله ... و لو كرهك ... برضه حيعيش معاك بما يرضي الله ... ما حيمرمطك ... خاصة في مجتمعنا الذكوري ... لذلك امسكي قوي في الاخلاق و المروءة ..
اما نصيحتي للرجال ... اختار واحده لما تصحى الصباح تلقاها جنبك تفرح ... ههههه
محمد المرتضى هسع زي الشاب ده الاقسم لا يستعمل المنديل المعطر الذي اهدته اليه حبيبته سوى لاستنشاقه ، هل هو موجود في عصرنا وفي جيلنا الحاضر ، ام ان كلام كبر بان ثقافة الحب السليم الصادق قد ماتت هي الحقيقة المجردة والذي نتهرب من تصديقه ... اما انك تنوم على توبة ، فانك رجل سعيد،،
01-28-2020, 09:45 AM
ياسر السر ياسر السر
تاريخ التسجيل: 08-06-2010
مجموع المشاركات: 3204
يا اختنا امتثال الاغنية مهداة لكم جميعا .... فشنو فتشو علي كلماتها برااكم ... بالله شوفي غنانا السوداني ده سمح كيف .. زمانك والهوى أعوانك كلمات الشاعر " علي احمداني الشهير بالمساح كتبت سنة 1924م " وضع الحانها: شبلي
تحياتي : ياسر العيلفون ...
01-28-2020, 10:40 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
اها ياكبر دخلك ود حامد بي كلامو المكهرب . زولك يا كبر من اخطر اساتذة لغة العيون . اها جاك . دخللك وجابلك معاو السيرة . جابليك سيرة الفستان اللبني والجوارب . دخليك البقوليك كلامات عيال امدرمان المابتنقدر . زولك عرفتو ممسوخ من ما كتب بوست النهود الجميلة . وبوست النهاية . بوست النهاية القدمتو ست الشاشة . في الليلة ديك كلهم كانوا اسياد شاشة . والله النيل الازرق حظو وحظ التماسيح زاتو . ود حامد ده بتخيل لي لو جدع بردلوبة القانون ومسك في مخرج افلام . كان هسع يكون في مكتبو في كلفورنا ما تقدر تقابلو الا بعد اربعين سكرتيرة من نوع السكرتيرة (جين لوكس ) معليش علي النطنطة في الكلام . ومعليش علي البردبة في الغروبات الباكية .
سلام يا قبانى وسلام للمحتفى بها امتثال وسلام لضيوف البوست
انت الصباح الضاحك انت الغروب الباكـــى من النادر جداُ ان نجد تشبيهين متناقضين فى بيت شعر واحد ولكن قريحة شاعرنا الراحل سيد قاسم وملكته انتجت مالم تستطعه الاوائل ولا من كانوا يزاملونه . انت الصباح الضاحك : تشبيه وجه المحبوب بالصباح الباسم الضحوك وما فيه من انوار . انت الغروب الباكى : تشبيه صدود المحبوب بالغروب الباكى والشمس تنغمس في حمرة الشفق والليل يرخى سدوله ( مثل دموع جفّت فى العيون ) ( ويقابل هذا المقطع :بهواك وأزيد في حبي مهما تزيد في نوحي
تشبيه صدود المحبوب بغروب الشمس تشبيه غاية فى الابداع . والكلام عن لوحة من المناظر الطبيعية الزاخرة بأنوار الفجر وشفق الغروب ومياه عذبه ( كمياه النيل ) والنسيم العليل .
شكراُ ليك كتير يا قبانى اخوى : You made my day
(عدل بواسطة علاء سيداحمد on 01-28-2020, 01:05 PM) (عدل بواسطة علاء سيداحمد on 01-28-2020, 01:26 PM)
01-28-2020, 01:08 PM
علاء سيداحمد علاء سيداحمد
تاريخ التسجيل: 03-28-2013
مجموع المشاركات: 17162
اها كدي اسمعوا رأي البنية التانية ، وبعدين رأيي انا ، ومن ثم نجي لتعليقاتكم ... البنية الثانية وذات الذكاء الخارق بتقول هي حتمشي بالمثل البقول : لا تتزوجي من الشخص الذي تحبينه ، ولكن ابحثي عن الشخص الذي يحبك ....قلنا ليها دي غلوطية ولا شنو !؟يعني ما في حب متبادل من الطرفين ويكون ذلك أفضل، فقالت انتو ما قريتو تعليق كبر القال أن ثقافة الحب السمح الصادق قد ماتت منذ أمد بعيد ...يعني الحب الصادق السمح بقى نادر ...فإذا جاءك شخص يحبك فلا تتتردي في القبول به ، وحبك له سيأتي بالعشرة والكلمة الطيبة ...فهذا منهجي في طريق الزواج ... لم نستانس بفكرتها ولكن ربما كانت محقة ، والرأي للقراء ..
01-28-2020, 11:27 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(محمد المرتضى هسع زي الشاب ده الاقسم لا يستعمل المنديل المعطر الذي اهدته اليه حبيبته سوى لاستنشاقه ، هل هو موجود في عصرنا وفي جيلنا الحاضر ، ام ان كلام كبر بان ثقافة الحب السليم الصادق قد ماتت هي الحقيقة المجردة والذي نتهرب من تصديقه ...)
قااااعد
(اما انك تنوم على توبة ، فانك رجل سعيد،،)
يا امتثال ، قال مظفر النواب: كلنا قد تاب يوما، ثم ألفى نفسه قد تاب عما تاب.
01-29-2020, 02:55 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
يا باشمهندس الله يفتح عليك هيجت فى النفس الذكريات وذكرتنا ببديع المغنى وجبت لينا الناس السمحيين ناس مولانا ود المرتضى وتريمومتر الجمال عثمان موسى ومجس المشاعر أستاذ كبر وياسر السر الخابر أسرار الكلام ومحمد محمد قاضي البيأصل كل شئ بخلفايته وعلاء سيد أحمد المرجع فى تجسيد جمال الطبيعة وشاباتنا البسميهن "النبيلات الثلاث" امتثال واميرة وبسمات واللواتى اشهد لهن بالأصالة وأتمنى لهن كل السعادة البتستاهلها أرواحن الإنسانية الصادقة.
أها زمان حبوبة رضينا عليها رحمة الله مرجعنا فى الدنيا وهى التى عاشت حياة طوفت فيها بأرجاء السودان وحقبه وصارت واحدة من أفراد أسرتنا قالت كلام زى الكلام الجابو أخونا الباشمهندس المموسق قبانى البيلخص الموضوع كله فى سر عمق العلائق الإنسانية "لغة العيون كاتلانى". قالت لى كان داير تعرف "صاحبك الجد جد من البيعمل نفسه صاحبك. والبنية البتريدك جد عاين ليهم فى عيونهم والله تعرف من العيون كلام كتير مهما وصفو ليك ما بيحصِّل ربعو. العيون بتوريك الريدة الجد" أها دى رسخت فى عقلى لامن قريت كلام إتلخص كله فى بيت شعر قالتو بتنا السمراء الفاتنة ليلى العامرية فى الكاتلاهو قيس بن الملوح: تحدثنا العيون بما أردنا**وفي القلبين ثم هوى دفين فركزن فى العيون خلسة بتعرفن الصادق والمتيم والأصيل. بس أحذرن القهييى لأنو أطالة النظر بتتفهم غلط! أها أمسكوا فى كلام مولانا محمد المرتضى والله لكل زمان ناسو وهم وى ما قال ليكن موجودين وبرضهم حيرانين زيهم زيكم. ومصيركن تلقن الأصيلين مع ممارسة الإسترخاء العقلى المنفتح. أها يا مولانا مش بلغنا مرحلة حكمة العجائز؟
01-30-2020, 00:33 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
الضيوف الكرام ومتابعي البوست اسفة لتاخري في المتابعة والرد على التعليقات، ولكني طريحة الفراش حتى تفكيري انشل من شدة المرض ولكن الطبيب طمانني باني ساستعيد عافيتي خلال اسبوع ، ودعواتكم ،، وشكرا لكم جميعا للمتابعة ، وان شاء الله ربنا ما يوريكم شر ابدا ..والشر هو المرض وربنا يديكم الصحة والعافية ، لان الصحة تاج فوق راس الاصحاء لا يشعر به سوى المرضى
01-30-2020, 02:13 PM
علاء سيداحمد علاء سيداحمد
تاريخ التسجيل: 03-28-2013
مجموع المشاركات: 17162
Quote: (محمد المرتضىهسع زي الشاب ده الاقسم لا يستعمل المنديل المعطر الذي اهدته اليه حبيبته سوى لاستنشاقه ،هل هو موجود في عصرنا وفي جيلنا الحاضر ، ام ان كلام كبر بان ثقافة الحب السليم الصادق قد ماتت هي الحقيقة المجردةوالذي نتهرب من تصديقه ...)
لااااااااااااااااااااااااااااااااااايك يا مولانا .والتحية لروح شاعر الحب والجمال الجاغريو فى عليائه . وقصة منديله المسروق فى احدى الحفلات .
وقبل الرد على المرور الكرام ووجهات نظرهم الخص وجهة نظري في الزواج في الآتى؛ لا أريد أن يشاركني حياتي رجل كسول يحب الكسل وفي نفس الوقت يريد أن يكون:سي السيد زي ما بيقولوا المصريين ، ولا احب ان يشاركني الحياة رجل لا يغير ، لا يغير على اذا أصبحت زوجته ، ولا انسى طبعا وصية ود قباني عن الرجل ذو الخلق، فلا احب ان يشاركني الحياة رجل ماجن مستهتر فالرجل ذو الخلق دائما بكون فيه المروءة والشهامة السودانية، فلذا احب ان يشاركني الحياة رجل ذو مروءة وكرم ونخوة سودانية أصيلة، يفعل كما فعل عبد الله ود البوش من قبل ، يحب مساعدة الناس والمحتاج ،،، وأخيرا لا يمكن أبدا أن أتزوج رجل غير سوداني حتى ولو كان يملك البلايين فالسعادة ليست فقط بالمال ،،، وهناك نقطتين نتركهما لمجال آخر... ونواصل لحين ميسرة ومسرة، حين أبلغ الصحة الكاملة ، وربنا يديم عليكم نعمة الصحة والعافية
02-01-2020, 00:48 AM
Kabar Kabar
تاريخ التسجيل: 11-26-2002
مجموع المشاركات: 18537
ول ابا عـُتمان موسى..حبابك يا صديقي وحباب الصديقات والأصدقاء هنا..
والتحية لصديقنا ول ابا يحى قباني الذي نجح في خلق منطقة سلام وجمال ..! وبعد.. بعد شوية يا عتمان ح يجيك واحد يقول ليك دايرين قاموس تفسيري لمفردات عتمان موسى من شاكلة (صيدة) و(نتشه) ومش مهم..
المهم..
(نتشه) ..! ايواتا ليك يا عتمان ، ما هو ده المجنن عبد القادر..! هي ، كانها ، يوم مقداره خمسين الف سنة..! الجن يا عتمان ان تكون النتشه بهذا البعد والطول والإرتفاع..! السحر يا صديقي ، في ان يكون المهزوم هو الآمر والمتأمر..! قال بلغة الأمر: كف عيونك عني..! ثم سكب الجرسة بصورة مواربة لتبرير الأمر : لغة العيون كاتلاني..ياااااااااااااخ..! شفت الجمال كيف؟..والأجمل انها ،شوفة ، مجرد نتشه..! عارف يا عتمان لو كان اللورد محمد المرتضى حامد ، وشخصي ، لو كنا قضاة في دار امسودان ، كان ح نطبق قانون النظام العام بصورة مختلفة..! فالذي قال: قبلي جاي ، عليك الريده قبلي جاي..شوفي عيونا شايلة شنو..! فهذا فعل تحرش وفعل فاضح للغاية..يعني نظام مشاغلة بالباب العديل..! اما من قال: كف عيونك عني..فهذا قمة التهذيب والجمال..! ايام الجامعة يا عتمان ، كنت السكرتير الثقافي لرابطة كلية القانون بجامعة الخرتوم..اها قلت اعمل لي حركة واحتفل بمواهب الكلية (شعر/خطابة/غناء)..ومن ضمن الفقرات فقرة غناء مفروض يقدمها اخونا الجميل الأستاذ طيفور سليمان ، وهو من ناس سنار السمحة..وطيفور كان عوادا ماهرا ويحب تقليد استاذنا وابونا في الجمال عبد الكريم الكابلي (متعه الله بالصحة والعافية) ..اها طيفور بدأ يدندن بالعود ويغني (حبيبة عمري ، قد تفشى الخبر) ..وبعد مقطع..توقف طيفور ، ومد سبابته مشيرا الى زولة في وسط الحضور وقال بلغة عربية فخمة للغاية: هذى البنت ، عيونها تمنعني أن اغني..!!.. وصاحبنا طبق عودو واتخارج..!..حصلتو تحت (الفعالية كانت في قاعة بابكر عبد الحفيظ) وقلت ليهو: يا طيفور الموضوع التزام ، وانت التزمت تشارك في الفعالية..وكده ح تخلق لينا فراغ..!! قال لي: انت شفت عيونها يا كبر؟ قلت ليهو: ياخي انا طيلة وجودي في الكلية ما قاعد اعاين ليها في عيونها عشان ما اشوطن في السهلة..انا وراي عيال يا طيفور..! ضحكنا..وملينا الفرقة بنشاط اخر..! This true story
صاحبي ول ابا يحى قباني ، ياعتمان ، مرات زي البولش اسكواد..يعني براهو بيدي نفسو طلقة في الأنكل بالممنوعات اياها ،ولغاية هنا عادي..لكن الغير عادي..تعويق الجماهير التانية..(تقرأ ناس حزب الجمال والبهاء)..!! يعني الجاية من السما ، مجبورة الـــوطاة تتحملها..او كما قال..! كبر
02-01-2020, 00:50 AM
Kabar Kabar
تاريخ التسجيل: 11-26-2002
مجموع المشاركات: 18537
بت ابا امتثال..حبابك يا صديقة.. (ثقافة الحب) متغير يا امتثال..يعني كل جيل وليهو امكانياتو الخاصة في خلق ثقافة حب خاصة بيهو..أما الحب فهو ثابت..! الحب ، موجود ، زي مبدأ الكمياء في تعريف المادة (المنهج الذي درسناه في سنة اولى ثانوي ، والذي يقول: المادة لا تفنى ولا تستحدث من عدم..!!)..فالحب لا يفنى ولا يستحدث من عدم..!! صاحبتك كلامها صاح يا امتثال (حكاية الحب حاجة نادرة) وهي تفهم الواقع السوداني جيدا..في السودان يا امتثال: هناك فرق كبير بين (الحب) و(الزواج)..يعني 97% من حالات الزواج السودانية (الناجحة) ما عندها علاقة بالحب..و3% فقط ، ممن تزوجوا عن (حب)..والأهم استمروا..!.. عادي ، يا امتثال ، تلقي الناس تحب وتحب وتحب (كما يتهيأ لها) ثم تعرس خارج نطاق الحب المزعوم..! والأسباب كتيرة للغاية ، منها الظروف الإقتصادية ، والإجتماعية والدينية والأخلاقية والجمالية برضك..! كبر
02-01-2020, 00:52 AM
Kabar Kabar
تاريخ التسجيل: 11-26-2002
مجموع المشاركات: 18537
ول ابا محمد المرتضى..حبابك يا صديقي وكأنما صديقي اياه ، يتماهى استغراقا في رائعة القرشي (يلاك يا عصفور).. وهي ايقونة صديقتي البقارية البرهانية ، استاذة السيكولوجي ، اياها..!! احد اصحابي ، يا المرتضى ، قال ملاحظة حول (زينة المدارس) ، قال يمكن تكون الأستاذة..!!..وتلك سكة تانية ..! فشنو ، احسن نركز مع (اللبني)..يا قريبي..! اتا مالك ومال الخط الشين يا محمد المرتضى..؟..حدي يشوف الجنة ، ويقول:انا من ناس الأعراف..!! بالضبط يا صديقي ، والقلم بيك أب..جاف..بالوان عديدة : الأزرق ، الأخضر ، الأحمر..! ورغم ان (الأحمر) لون الحب ، الإ ان سلطة القمع جعلت منه (بيت اشباح)..خصوصا حينما يكتبوا ليك في اخر الصفحة (قابلني)..عشان كده نادر تلقى ليك زولة تكتب الجواب اياه بقلم بيك اب احمر..لكن ممكن تتطرز ليك منديل بحرير احمر وفيهو سهم كيوبيد في الزاوية..! وضعه في جيبه، وأقسم ألا يستعمله سوى لاستنشاقه.. True story..!! عارف يا محمد..كنت مرة بتونس مع عمك النور ملاح ابو ام شنشينلات (بدوي السافنا الأخير) ، وهو رجل انصاري فيهو شوية ليبرالية وعقل منفتح(زي ناس امدرمان)..سألتو عن عما لينا اسمو احمد ولد الفضل ولد حميدان ، ولقبه (جارود)..! ضحك بدوي السافنا الأخير ، وقال لي: عمك احمد كان يتجول مع بعض رفاقه (سجالاته/ مفردها سجيل: أي الرفيق او النديم..مع انو المسيرية في الخلاء لا يعرفون المدام العنبي..!!) في الدروب ، وطبت عليهم حكامة نضيفة..كانت لها خصلة تتدلى على وجهها ، بجانب المساير المعهودة ، وكان لها كلـــب سالط..وحينما رأى جوقة الشباب تلك ، اخذ ينبح دفاعا عن صاحبته.. فصرخت تناديه وتهدئ من روعه ، ونادته: جارود..جارود..! والشباب كانوا خمسة ..من باب خدعة..قاموا اخدوا ليهم جكة .. نظام هاربين من الكـــلب جارود (كلــب الحكامة)..والمغزى الحقيقي ، ان يدوا الحكامة برهة (نتشه،النتشه تلك، التي اخرجها الملعون عتمان موسى من اضابيرها..!!)..حتى تتدارك حالها..!! اها عمنا احمد (عليه السلام) ، كان اخرهم ركضا..لأن طبعة العناد والفضول هزمته..فاخذ يتملى في وجهها جيدا..وذاك عيب في ثقافة البقارة عامة ، والمسيرية خاصة..! بعد ان اخذت الحكامة ، برهتها ، ولملمت حاجاتها (زي حكاية اخوانا الأبالة ، ومحنتهم مع: لو انت راجل تعال اهبشو..!..او كما قال الناصر قريب الله ذات مرة في حكاية لقيط الصمغ والكاهلية..وغناها الكابلي..!!..طلعتوا عينا يااااااخ ، ما قادر اشرح اكتر: ده كلام كبر مش كلام الناصر الفصيح..!!)..نادته باسمه..! احمد ولد ابوي الفضل ولد ابوي حميدان: تعال..!! (يعني اقيف دقيقة يا شاب)..! في تلك (النتشه) ، يا عتمان، ابوي احمد ولد الفضل ولد حميدان ، عشان يصلها..وقع خمس مرات (والله صحي يا عتمان موسى)..!! وحينما وصلها ، معطت نفس الخصلة المتدلية على وججها ، ومدتها لعمي احمد ولد الفضل ولد حميدان..! وعمك ما صدق يا محمد المرتضى ، شال الخصلة ، وضعها في جزلانو..وقام صوف..عرد ، عدييل كده ، يا محمد المرتضى..!! عرد..عرد..وفي القلب حسرة من شاكلة (كف عيونك عني..!!).. ولكنه اقسم على صحابو الأربعة: ان ينشروا في كل اصقاع الدنيا بان لقبه هو: جارود كـــلب العزبا..!! صحابو خانوا الأمانة ، يا محمد المرتضى ، فحذفوا صيغة الجمال (كــلب العزبا) ، وابقوا علي اسم الكــــلب مجرد (جارود)..فصار عمي اسمه (احمد جارود)..!!!!!!!!! بعد سنوات ، من حكاية بدوي السافنا الأخير ، عمك النور ملاح يا محمد المرتضى ، لاقيبت عمي احمد جارود..وكان راس مية في نواحي ابوزبد..وبطفاسة المثقافتية اياها..توشك خشيت فيهو شمال: احكي لي عن حكاية تسميتك باحمد جارود..!! ضحك وقال لي: جارود كـــــلب العزبا..!! ثم اخرج جزلانه الفارغ/الغني..واخرج تلك الخصلة..! ومن باب السفاهة يا عتمان موسى ويحي قباني والمرتضى ، قلت ليهو: اسمها منو يا ابوي احمد..!! وعينكم ما تشوف الإ النور..! كرعيني مرقني يا المرتضى..جريت جري دقاق ..عرد عدييل كده..! كبر
02-01-2020, 03:41 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: نت الصباح الضاحك انت الغروب الباكـــى من النادر جداُ ان نجد تشبيهين متناقضين فى بيت شعر واحد ولكن قريحة شاعرنا الراحل سيد قاسم وملكته انتجت مالم تستطعه الاوائل ولا من كانوا يزاملونه . انت الصباح الضاحك : تشبيه وجه المحبوب بالصباح الباسم الضحوك وما فيه من انوار . انت الغروب الباكى : تشبيه صدود المحبوب بالغروب الباكى والشمس تنغمس في حمرة الشفق والليل يرخى سدوله
ده يا علاء يا صديقي ينطبق عليو كلام الشاعر: ضِدانِ لمّا استَجمَعا حَسُنا -- والضِدّ يُظْهِرُ حُسْنَهُ الضِدُّ
وصف بديع ... :)
02-01-2020, 03:59 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: وعودة لموضوع المناديل المطرزة يا كبر، والذي ، alas، تحول إلى كلينكس.. بذات القدر الذي أصبحت فيه (الجوابات) بالمظروف المزخرف بخطوط قصيرة مائلة بالأحمر والأزرق على حوافه مع أشهر كلمتين Par Avion مع أشنا وأجمل خط بقلم حبر جاف ورطب ومعطر وندي في آن ، فالحبيبات كللللللهن خطهن شين زي الحبيب .. قيل إن خط البنات يتناسب عكسيا مع جمالهن.. أها، المنديل دا الغنوا ليهو ناس سيد خليفه وأحمد المصطفى وعموم مناطق العسيلات فتبعتهم العاصمة بمليونية عجيبه.. المنديل دا يا كبر أهدته واحدة في ثانوية أمدرمان للبنات لشاب ما زال يعتاش على (أماني يماطله بها زمانه)، كانت لابسه فستان (لبني) معاهو حذاء رياضي و (شُراب) أبيض بطول الساق البرازيلي والمساق الأدبي نسجا على نول (الله يا خلاسية).. الجورب في أعلى الساق خطين أفقيين أحمر وأزرق و (بلبلتين) كإجابة للسؤال التاريخي : هل عذابي أم عذابك كان أكبر؟.. أهدت صاحبك المنديل معطرا.. وضعه في جيبه، وأقسم ألا يستعمله سوى لاستنشاقه.. يا زول كيف، المنديل دا لتجفيف العرق ولمآرب أخرى!! قال: سيدنا عثمان بن عفان أقسم ألا تمس يمناه عورته بعد أن صافح بها الحبيب المصطفى.. عَرَق ومآرب يا هواة؟؟
يحيى ، بقيت كل يوم أنوم بتوبة.. يلغيها الصباح..
نحن لا نتوب حتى تتوب عنا الدنيا يا صديقي ...
تصدق يا مرتضى ... واحده زمااااان ... كان في موده ... لا تتعدى الاعجاب ...و كانت طالبة مدرسة اخر العام اول العالي ... و انا ممتحن للجامعه ...
حصل في مناسبة في بيتهم اتدفق شي قمت استخدمت منديلي لونه ابيض و فوقو خطين خضر بي جنبتين بس ... .. قامت قالت لي انا بغسل المنديل خليو عشان اتبل و ما ممكن تختو في جيبك ... اها المنديل انا نسيته ... و هي ما اتذكرت رجعته ( حسب فهمي ) و صاحبتنا عرست بعد داك ... و عدت سنوات و اتلاقينا في بيتهم ... في موقف مشحون كده ... و كانت زعلانه مني شخصيا ... فقعدت معاها عشان نحاول نحل الموضوع ... و الدنيا حر شديد ... قمت طلبت منها (كلينكس) عرقان من الحر و من نظرة عيونها ... قومي يا البنية دخلي ايدك في جيبك و امرقي لي منديلي الابيض اب خطين خدر دااااااك ... رغم انه القطر كان فوقه مفتش لكن ما هماها ... ضحكت انا و قلبي الاتنين ... و شلته قال انشف عرقي ... و قبل ما ادخله في جيبي ( على اساس حقي يعني ) ههه ختفته و ختته في جيبها ... تخيل يا مرتضى ورتني ليو تاااااني بعد 20 سنة من يوم الخطفه ديك !!!...
02-01-2020, 05:24 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: ا باشمهندس الله يفتح عليك هيجت فى النفس الذكريات وذكرتنا ببديع المغنى وجبت لينا الناس السمحيين ناس مولانا ود المرتضى وتريمومتر الجمال عثمان موسى ومجس المشاعر أستاذ كبر وياسر السر الخابر أسرار الكلام ومحمد محمد قاضي البيأصل كل شئ بخلفايته وعلاء سيد أحمد المرجع فى تجسيد جمال الطبيعة وشاباتنا البسميهن "النبيلات الثلاث" امتثال واميرة وبسمات واللواتى اشهد لهن بالأصالة وأتمنى لهن كل السعادة البتستاهلها أرواحن الإنسانية الصادقة.
أها زمان حبوبة رضينا عليها رحمة الله مرجعنا فى الدنيا وهى التى عاشت حياة طوفت فيها بأرجاء السودان وحقبه وصارت واحدة من أفراد أسرتنا قالت كلام زى الكلام الجابو أخونا الباشمهندس المموسق قبانى البيلخص الموضوع كله فى سر عمق العلائق الإنسانية "لغة العيون كاتلانى". قالت لى كان داير تعرف "صاحبك الجد جد من البيعمل نفسه صاحبك. والبنية البتريدك جد عاين ليهم فى عيونهم والله تعرف من العيون كلام كتير مهما وصفو ليك ما بيحصِّل ربعو. العيون بتوريك الريدة الجد"
استاذي البديع البروف عبد الرحمن
لغة العيون لا تضاهيها لغة ...
اتذكر في المجال العام ... كنت اعمل مع احد الامراء السعوديين و نشأت بيننا كيمياء في العمل غير مسبوقة تلك الكيمياء كانت محل غيره و حسد حتى من ابناءه ... فتسلط احد الابناء و اصر على تعيين مهندس سعودي حتى تتسرب اليه اسرار والده التي كنت اكتمها حتى من زوجته و الابناء ... عمل المهندس السعودي فترة ثم قرر الانسحاب و قال لذلك الأمير الابن: " يا طويل العمر انا مستحيل اقدر احل محل المهندس يحيى .. يحيى بفهم على ابوك قبل ما ابوك يتكلم ... عندهم اسرار بفهموها من نظره ... لو جلست عشرين سنه ما حافهمها "
اما بالنسبة لعالم الريده ... فحقيقة كلامك في الصميم ...
العيون ما بتدس الكلام ... الزول ممكن يكون كتوم لكن فاضحاهوا عويناتو ...
سعدت بمداخلتك كما اسعد دائما يا بروف ... ما تطول علينا ...
02-01-2020, 03:28 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: الضيوف الكرام ومتابعي البوست اسفة لتاخري في المتابعة والرد على التعليقات، ولكني طريحة الفراش حتى تفكيري انشل من شدة المرض ولكن الطبيب طمانني باني ساستعيد عافيتي خلال اسبوع ، ودعواتكم ،، وشكرا لكم جميعا للمتابعة ، وان شاء الله ربنا ما يوريكم شر ابدا ..والشر هو المرض وربنا يديكم الصحة والعافية ، لان الصحة تاج فوق راس الاصحاء لا يشعر به سوى المرضى
كفارة يا بتنا ...
ما تشوفي شر ان شاء الله ... :)
02-02-2020, 12:43 PM
ياسر السر ياسر السر
تاريخ التسجيل: 08-06-2010
مجموع المشاركات: 3204
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يحي قباني
أبوذر بابكر
Kabar
ياسر السر
Osman Musa
محمد محمد قاضي
محمد المرتضى حامد
علاء سيداحمد
عبدالرحمن إبراهيم محمد
فيس بوك
تويتر
انستقرام
يوتيوب
بنتيريست