والله ناس قوى الحرية والتغيير وتجمع المهنيين عفيت منهم..بشموا العفنة في الزول على بعد ميل وكمان قبل كل الناس..😎 الفراسة يا احباب.. في اختيار الناس نعمة كبيرة من الله ..وكتير من الناس نكون ظانين فيهم الخير والشهامة وفي اول منعطف يظهر معدنهم الردئ ونفوسهم المريضة..وامكن تكونوا لاحظتو في السنين الاخيرة..ان كثير من جرائم القتل الغامضة يطلع القاتل هو الصديق الصدوق للقتيل المغدور..وكمان تلقاهو يجعر في المقابر والناس تشبكوا ليك..يا زول استغفر..يااخ وحّد الله.. وبعد داك يكون عاصر البكا ويشيلوا معاهو الفاتحة اكتر من اهل المرحوم..اها بعدها يطلع هو القاتل وكمان بسبب تافه ..قروش ولا كده.. واتذكر في المشرحة زمان جابوا لينا واحد متوفي ومجدوع في الخلا وظاهريا ما في اثار جروح او اعتداء ..وانا داخل على صالة التشريح قام واحد زي الاسد مسك الباب قدامي ويبكي ويكورك ..يا دكتور حرام عليك..ما تشرحو..انا بعوقك يااخ..ده اخوي شقيقي وحبيبي ما ممكن تقطعو والناس كلها اتأثرت.. ( وبيني وبينكم رغم اني وقتها كنت جسمانيا ما هين..لكن لاوزت من المعلم داك ..يااخ كان اوضتين وبرندة..والعضلات كل واحدة تنافس الاخرى..وجريدة اليد شبعانة تقول جريدة الشرق الاوسط مع الملحق😥🤣..).. المهم الحمد لله الناس مسكوهو مني وضايروهو ..وناس الشرطة حسموهو طوالي بأنو الدكتور لازم يديهم قرار عشان تقييم البلاغ واذا كان في جريمة قتل ام لا ودي اوامر نيابية وكده.. وبعد التشريح اثبتنا انو المغدور اتوفى قتلا بتهتك النخاع الشوكي نتيجة كسر بالعمود الفقري بالعنق نتج من الضغط على العنق بواسطة الذراع... اها بعدها بكم يوم..جاني الملازم اول الماسك البلاغ وقال لي تتذكر صديق المرحوم الزول المسك الباب وقال ليك بعوقك لو شرحتو..طلع هو ذااتو القاتل..😳😳 وانا اصلو ما اتوقعت كده بعد التمثيلية العجيبة ديك والمخاخيط والنخجة..😥 رغم انو فعلا جسمانيا مناسب لان يكون القاتل من دون كل الناس.. وبالمناسبة والله يا أحباب ناس الشرطة عندنا متميزين جدا في البحث الجنائي والتحري وعندهم حس امني عالي..وده نتيجة خبرات متراكمة متناقلة عبر الاجيال..👍 اها طبعا في مجتمعنا السوداني ..دوما بكون في واحد بجمع الناس عليهو انو زول ثقيل ودميم وما محبوب..بس كده لله ..والقبول من الله… وتلقى واحد اول ما يجي داخل الصالون او القعدة الناس كلها تطنطن وتزهج منو..ويكون المسكين مهما يجتهد ويتظارف برضو معظم الناس يكجنوهو..😢.. واتذكر الحبيب ترباس مرات بقول لي (تعرف ..صحبك ده..كلما ادخلو في قلبي يجي مارق فت..😲😂😂..).. وكمان بالعكس في ناس دجالين لكن بعرفوا كيف يأسروا قلوب الناس لحدي ما الفاس تقع في الراس… وبمناسبة الفخيم ترباس فهو ايضا عندو حاسة رهيبة نحو الثقالة والدمامة واهم شي العفنة والعفانة… 😂.. واذكر انو كان متعود يجي يشرب معاي النسكافيه في مكتبي في حوادث العظام بمستشفى الخرطوم.. اها يوم بعد شرب اول رشفة من الكباية بتاعت القهوة..قال لي يا اخوي قهوتكم دي معفنة الليلة..طوالي انا قمت هجت فيهو وقلت ليهو اصلك ثقيل وبتاع حركات في قهوة بتعفن..😡لكن تاني يوم..انا ذااتي لاحظت الموية بتاعت الحنفية ريحتها بقت زي ريحة المشرحة..اها مشيت للمدير الطبي بتاع الحوادث وقلت ليهو يا اخوي امشوا افقدوا الصهريج بتاعتكم..وقد كان ان وجدوا فيه جثة احد مرضى النفسية وقد مات غرقا داخل الصهريج وكان ليهو 4 يوم جوه المويه..😰 وترباس شم العفنة قبلنا كلنا..حتى اتذكر انو هو والمرحوم الحبيب نادر خضر رحمه الله كانوا عايزين يفتحوا فيني بلاغ وقضية تعويض مدني بأنهم اتأثروا صحيا بشراب القهوة والشاي في مكتبي..رغم اني اكدت ليهم انو اصواتهم اتصلحت شديد واتعتقت بشراب تلك المويه..😅 اها يا احباب..بالله بعد الوقفة العجيبة والمفضوحة التي عملها بعض مناضلي اللايفات امام السفارة الاثيوبية احتجاجا كما قالوا على تدخل اثيوبيا في شئوون السودان الداخلية..😳 بالله عليكم في تعريض وتفاهة اكتر من كده… وكتار من ناس اللايفات من من كنا نظن فيهم خير للبلد.. اتساقطوا جميعا كالحشرات الضارة في طريق الثورة المباركة… لكن الحيرني انو ناس قوى الحرية والتغيير وتجمع المهنيين فاتوا ترباس بيغادي… وبشموا العفنة في النوعية دي من بدري جدا وقبل الناس كلهم وما ادوهم اي خرم او فرصة.. وبعدها فعلا اتضح انو الشرذمة دي ممكن تعمل اي شي وتكون مطية لأي زول ضد السودان والشباب والثورة..عفنة شديدة خالص عفانا الله واياكم..😡
06-26-2019, 12:27 PM
ترهاقا ترهاقا
تاريخ التسجيل: 07-04-2003
مجموع المشاركات: 8417
يا ترهاقا غربال الثورة شغاااال الحصحاص كلو يطلع بره ـــــــــــــــــــــــــــــــــــــــــــــــــــــــــــــــــــــــــــ شايف تجاني السيسي رئيس تحالف نهضة السودان و موسى محمد احمد حزب مؤتمر البجا صندوق الشرق اجتمعوا مع تجمع المهنيين الهجرة العكسية بدات.
... .. .
06-26-2019, 06:09 PM
احمد عمر محمد احمد عمر محمد
تاريخ التسجيل: 01-10-2013
مجموع المشاركات: 1273
حري بكل من يعمل في السياسة أن يتسلح بأنف تشتم نتانة المتسلقين من على البعد ولقد ازكمت عفونتهم انوفنا مبكرا وكنا واثقين من أنها ستسقط في أول الطريق وطوبى لاصحاب الروائح الزكية. وما زال الطريق طفلا لن يبلغ كهولته الا الانقياء
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Nasser Amin
ترهاقا
احمد عمر محمد
فيس بوك
تويتر
انستقرام
يوتيوب
بنتيريست