قبل اسبوع ركبوا جنبي شباب تلاته في مقعد شكرن فيهم واحد لافي إيدو بشاش ومعلقها في رقبتو ووشو كلو كدمات وعينو وارمه مبهدل بهدله شديده خلاص وحالتو تحنن عديل والله بس بعد دا كلو بحكى لاصحابو المعاهو وبضحك لمن بغمض عيونو الفضول ساقني وسألتو يا زول كفاره مالك وقعت من موتر ولا مسكوك الجماعة الطيبين؟
اصحابو قالوا لي دقاهو اخوهو وقعد يضحكو قال لى كذابين ما تصدقهم اخوي ما دقانى بس هو كان مع الجماعة الدقوني وضحك، في عمك قدامنا كان متابع الحوار فقام سألو كيف يعنى اخوك مع الجماعة الضربوك ديل وما سألهم؟ فقام حكى لينا القصه من بدايتها قال لينا اول امس الصباح صحيت من النوم لقيت الحاجه جايطه في اخوي الكبير ومصره عليهو انو يمشي ليها السوق يجيب الخضار وعندها ستائر عند الترزي يجيبهن معاهو المهم اول ماشافني قال ليها خلاص بمشي.. الحاجه مشت بجاي اداني 300جنيه كان ماسكها في ايدو وقال لي عليك الله عندي مشوار ضرورى ياخ شيل القروش دي جيب لناس البيت خضار من السوق وجيب للحاجه ستايرها الجننتنا بيهن ديل معاك المهم بعد ما طلع اكتشفت انو نقص القروش 100جنيه حسب كلام امي انو ادتو 400جنيه عملت نايم وتميتها من جيبي مشيت اغير ملابسي لقيتو اخر غيار نضيف ومكوي انحشر فيهو واتخارج.. المهم فطرت ولبست لي فنيلة كوره حقتو هو ومشيت السوق اول ما وصلت الشهداء لقيت البلد كاتمه والناس جاريه والبمبان مدور قلت ارجع البيت لاقوني اتنين عنقاله في زقاق كدا استلموني ليك دق واقعد تحت والخراطيش دورت في رأسي شالوني جدعوني في البكسي ك اول معتقل وفي اتنين حارسنو دورو فيني دق لمن جابو تاني نفرين رموهم بفوق على ودورو فينا دق بدون اي رحمه المهم بعد ربع ساعة بقينا زي سبعه نفر كدا وانا تحت الناس ديل وحاسي ب ايدي دي اتقلعت عديل وراسي كابي دم ووشي فار أساسا جدعوني في البوكسي بوشي المهم بعد ما رجعو كلهم والبوكس اتحرك بقو يقعدو فينا وطبعا بالخرطوش ظط اقعد عديل وماتعاين لي ررررب قوم على حيلك في اللحظة دي الصوت دا ماغريب على والله اتشجعت ورفعت رأسي بس عيني مع عين اخوي رررب اتلاقن انا اتفاجأت طبعا وهو بقى يكورك في السواق اقيف هنا اقيف ياجن وقرب يتلب من البوكس وقفو على جنبه في الظلط وقال لى انزل هنا قلت ليهو ينزل منو اقسم بالله مانازل وعاينت للناس المعاي لقيتهم كلهم فاتحين خشومهم ومستغربين قلت ليهو محل تنزلو الناس ديل نزلوني معاهم ولا بتعرفني ولا بعرفك ياعواليق واصبر لمن ارجع البيت واكلم ليك امي وابوي اقسم بالله الا تطير يا معفن دي شغله ليك مع الرجال يازول الجماعه جاطو فيني وفي واحد داير يضربني في اللحظة ديك صدا مني الخرطوش وقال ليهو دا اخوي يازول جماعتك جت دنقروا في الواطا وقالوا لي انزل قلت ليهم مانازل واساسا انا مافيني حيل انزل قلت ليهم نزلو الناس ديل اول قالوا لي ديل متظاهرين وماعندك معاهم شغله قلت ليهم انا زاتي متظاهر يلا ارح ودونا السجن المهم اخوي ساق ليهو اتنين وحكى معاهم مسافة ورجعوا قالوا للناس المعاي انزلو اتخارجو وساقوني انا بالبوكس ودوني المستشفى اول ما وصلنا قلت لاخوي جيب تلفونك قال لي داير تضرب لمنو قلت ليهو للحاجه اطمنها انو انا في ايد امينه ماتخاف على زى الزمن دا بتكون واقفه في الباب المهم بعد اتردد مسافه اداني التلفون ضربت لاختى ممرضه قلت ليها تعاليني في المستشفى ووصفت ليها وقلت ليها ما بقدر اقيف على حيلي اديتو تلفونو وقلت ليهو اتخارج دي لو جات لقتك بخرطوشك دا بتمسح بيك الواطا انت عارفها زولى ماصدق كبرها مني طوالي جات اختي ودموعها خرايط خرايط مسكتني وبكت قدرتها اول ما الدكتور طمنها سالتني واخوك وينو؟ قلت ليها فات يشوف شغلو قالت لي كيف يعني فات خلاك في الحاله دي قلت ليها هو زاتو الوصلني للحاله دي وكانوا موديني المعتقل لو ماهو طلع شغال معاهم وكمان بضرب في الناس اتصدمت طبعا لانو زي غاشينا انو هو نازل ليهو كورس انجليزي في العربي بكت تاني قدرتها وقال لي اقسم بالله اكتلو واخش السجن بس ما اخليهو يكتل في اولاد الناس بعد ما الدكتور طمنا وانو يدي فيها شق خفيف ونجي مقابله بعد يومين وطلعنا بالركشه قشت دموعها وسالتني؟ بتكلم ليهو امي وابوي؟ عاينت ليها كدا وقلت ليها اكيد لا لانهم لو عرفوا ح يطردوهو من البيت ويتبرأو منو قالت الحمدلله طلعت عاقل وحضنتني في الركشه وبكت قدرتها وبحرقه لا يعلمها الا الله رجعنا البيت وطبعا قلت للحاجه مسكوني في الشارع مع المتظاهرين ودقوني وفكوني بس اخوي ليهو يومين ما رجع البيت وامي قالبه فينا البيت وقافل تلفونو وبتقول لابوي امش فتش ولدك دا في المعتقلات إحتمال يكون مسكوهو وضربوهو واسه مرمي ليهو في معتقل وهي المسكينة ماعارفه ولدها هو زاتو البضرب وبعتقل الناس لا وكمان اختي بتطمن فيها انو نصيح وسالت اصاحبو قالوا ليها امس لقيناهو في الخرطوم
المهم منتظرو يجي واختو قدام الحاج والحاجه يدوهو درس عمرو ما حينساهو
طبعا انا ما مندهش ولا اي حاجه والله ياهم الكيزان العارفهم كويس اخوانا واصحابنا الماليين بيهم ايدنا وانحنا ماعارفنهم انهم اياديهم ملطخة بدماء الشعب ياهو اخوانا واولاد حلتنا ودفعتنا في الأساس والثانوي والجامعة ياهم الناس الما بنقدر بعدين لو سقطت الحكومة ويجي وقت الحساب نشير ليهم ونقول دا صاحبي وكان مع الناس البكتلو المتظاهرين ودا اخوي كان مع الجماعة البضربو المتظاهرين نار
يا اخوانا الكيزان نتنييين اقسم بالله اي كوز اعفن من مويت الصرف الصحي الماليه شوارع البلد دي لكن مجبورين نمشي فيها ونتعايش معاهم ونشم عفتنتها ونسب ابو الحكومة الوصلتنا للوضع الزفت ونسب البلد معاهم بس ولو زول جا قال لينا بلدكم وسخانة ونتنه اكيد ح نهيج ونوريهو الطفى النور منو ونسمع ابشع الألفاظ لكن في النهاية عارفين انو بلدنا عفنه واي حاجه بس ساعة الحاره بندافع عنها وبنحميها طالما انو هي بلدنا وعايشين فيها
يعنى في النهاية حنجي نخبي اخوانا واصحابنا الكيزان وما حنقول ليهم أي ديل كانو كيزان وبقتلوا في المتظاهرين ما حنقدر نسوقهم لحبل المشنقة ونهتف في جنازتهم زي ما اسع بنهتف ما حنقدرهم نبلغ فيهم وندخلهم السجن وفي النهاية حنشيل عمود غدا ونمشي نزورهم في السجن ونضحك ونشمت فيهم
انحنا شعب عاطفي وطيب ومسامحوحنون اكتر من اللازم ودي نقطت ضعفنا وعارفنها وعارفين سلفا ما حنقدر نتخلص منها
عشان كدا ابقوا عشره على ثورتكم وماتفرطو لى كلامكم ساكت التهديد والوعيد دا ختوهو طرف وما تتطرقوا ليهو ايه انجزوا اول وبعد كدا من اراد الله له الحساب سيحاسب حتما ومن ستره الله اكيد حنضاريهو ونسترو لانو أساسا ربنا اراد ليهو السترة ونرغم انو نكون السبب الحتمي
كلنا حنجي بعدين نحميهم ساعة الحاره ونخبي عفنهم دا
الحرامي،، والقاتل،، والزاني، كلهم طالعين من داخل الشعب دا وكلهم ليهم اسر هي حتما شريفة واياديها نظيفة بس ما حصل سمعنا بأسرة فتحت بلاغ في ولدها ولا بتها عشان ارتكبو واحدة من الجرائم الشنيعة الفوق دي☝☝
عشان كدا ركزوا على المهم وبعد ما ربنا يوفقكم وتنجح الثورة دي او النظام دا ربنا بقلعة بأرادتو نحاول بقدر الإمكان نقدر نبني أرضية تربوية مثالية للأجيال القادمة أرضية ساسها الصدق والشرف والأمانة وحب الوطن ،، ،، ،، #مدنالسودانتنتفض #تسقط_بس👌
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdulhaleem Osman
فيس بوك
تويتر
انستقرام
يوتيوب
بنتيريست