|
|
|
 Re: صور متحركة وثابتة ربما تكون شاهدة على الا� (Re: Yasir Elsharif)
|
قصي ...
إنت مجهول الهوية ..
طيب المعروف منو ...
إنته سيد الجثة دي ...
طيب الحيين منو ...
إنت مقتول القيادة ...
طيب القاتل منو....
إنت واحد من تلاته ....
طيب الرابع منو وطيب الخامس منو وطيب الباقين منو ....
وإنته مفقود في لستنا ...
وطيب الموجود منو ....
انته جثمانك مضرج ...
بالدماء القانية حمرا ...
ونحنا نازفين من قلوبنا ...
والدماء قدامنا مجرى ...
ولسة يا صاحب الشهادة ...
الطريق مليان رصاص ...
ولسه كل الشعب واقف ....
ونحنا راجين القصاص ...
والقصاص مافيهو رجعه ...
والظلم في قلوبنا وجعه ...
لا في نوم بقفل عيونا ...
لا ضميرنا لقالو هجعة ...
والعيون مفتوحة حمرا ...
ترمي دمعه وراها دمعه ...
والدموع والدم بيقطر ...
من جراحنا ومن عيونا ..ومن قلمنا ومن حناجرنا البتصرخ في المحاكم ...
شان نرد كل المظالم ...
ياقصي ...يا ود بلدنا ...وود حشانا ...
انته يا دعوتنا وصلاتنا ويا عشانا
وانته يا المقتول عشانا ويا جنانا
وأنته يا أسد إعتصامنا ويا ترسنا ومنتدانا ...
وانته صايم ..كنته ..صاحي ولا نايم ؟؟؟لمن الرصاصة جاتك ...
وانته إتسحرته ...آخر زادك الحرية كنته ..والرصاصة ...
من بنادق الغدر من أهل الخساسة ...يا عساكر الخيبة يا ملل النجاسة ...ويا حثالة ...وعار بلدنا ...الكنتو واقفين في القيادة ...وكل عملكم كان هو غدر الشعب ...أو كان الإباده ...لا عرفتو في يوم شرف لا بتؤمنوا بالعبادة ...إنتو عار هذا الوطن ....
ياقصي ....أسمعني ياخي وانته حي ...
حسب الشهادة ...
انته حي ...
عند الله ترزق ..
وانته حي ...
وانا ياخي شايفك ...
إنته حي ...
بيناتنا تهتف في المواكب ...
إنته حي
قدامنا تقدل لابس ابيض ...
فيهو أحمر دم معطر ...
بالشهادة ...
إنته حي ...
عايش مع الثوار تنظم في صفوفنا وهي تهدر ...
إنته حي ...
صورتك معلقه في ضميرنا ...
وإنته حي ...
وريحتك تعطر في طريقنا
وإنته حي ..
وأمك تحمس في فريقنا ..
وإنته حي ...
ونارك تولع في حشانا
وإنته حي ..
يا حبيبنا ..ويا صديقنا ...ويا ولدنا ..ويا فطورنا ويا غدانا ويا عشانا ...
إنته حي ...
ويا قصي ....شوف
المحاكم يا قصي ...
نحنا ناصبين الموازين ياقصي ...
عشان نحاكم كل قاتل ياقصي
لا بنظلم لا بنداهن يا قصي ...
بكره بصدر حكم نافذ...
بكره حتشوف القصاص ..
للجبان الكان قبيل
أطلق رصاص ...
في إعتصامنا ....
بكرة بتحقق كلامنا ...
وبكرة بنجيب حقكم ...
لا بنساوم لا بنجامل ...
بكره بنجيب حقكم ...
يعدم الأطلق رصاص ...
في القيادة ...
في المكان الكنتو فيهو ...
وفي المنصة الكنتو فيها ...
والزغاريد والدموع ...
الهتافات والشموع ...
والنفق يطرق طبول ...
والمتاريس في الشوارع ..
ونرفع العلم المرفرف في القيادة ..
وفي المدارس ...
وفي المصانع ..
وفي بيوتنا ..
وفي المزارع ..
وكل ناصية ..
وكل شارع ...
وبيت شهيد ...
صرع الطغاة ...
وصورتو في كل الأماكن ...
وفي القلوب تلقاهو ساكن ...
يا قصي ...
انته ما بتموت وإنته ...
إنته حي ...وإنته حي ...إنته حي ...
| |
 
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
Yasir Elsharif
محمد بدرالدين
فيس بوك
تويتر
انستقرام
يوتيوب
بنتيريست