|
Re: سعادة وزير الخارجية أستاذة أسماء محمد عب� (Re: othman mohmmadien)
|
تعيش يا محمد يا راجل يا ذوق ،،، انت ما شفت رئيسة القضاء يا محمد فى مدنى عملوا ليها زفة كيف؟ دا عهد النساء العالمات يا محمد ،،
الاسبوع الفات هاوسننا اشاعات ، ما عارف نسرين سوركتي بقت سفيرة ،، وطلع مافى حاجة طيب ما تبقى سفيرة مالو ؟ ماهى اعلامية وزولة كانت تكابس فى رزقا بسن طيات واضابير ومنعطفات الكيزان،، فى ناس مجبورين على رزقن بالمناسبة ،، ما كل من اشتغل في حكومة الكيزان كوزد، الكوز الصارخ دا تراهو معروف ،، لكن فى ناس قريعتى راحت واحدين يكابسوا من اجل الرزق ،،،ددد، تانى اخدنا صنة شوية جوا قالوا لينا مريم الصادق بقت معتمد العاصمة ؟ وطلع إشاعة طيب ما تبقا معتمد العاصمة ؟ هى مريم ذاتا معتمد شوية عليها نقول الحق والا نكضب عشان نحن ما انصار ولا حزب امة هسه مريم دى فى عهد الانقاذ هل حصل مسكت ليها وظيفة ؟ ما كلها معدياها معتقلات ومطاردة ليها كان مريم مسكت معتمد والا وزيرة فيها شنو يعنى ؟ دى بت اهل الدروع والخيل وهى مؤهلة لذلك ،، نعرفا عن قرب.. وزولة حبوبة وما ساهلة انتو قايلين نحن بى ننسى للناس فضلهم نحن ايامات مشاكلنا مع الحكومة مع سد مروى واعتصامنا جنب اهلا الجبلاب فى الدامر ميدان الحرية كم شهر هى الوحيدة الجات زارتنا هناك أبوها مسميها مريم المنصورة ،، مالو تستاهل الخير هسه والا فى عهد الديمقراطية الا نتخابية مفروض نحن السودانيين نحترم بعض عشان نمشى لى قدام ،،، قلتوا دايرين مدنية اهو جابوا ليكم ناس مدنيين فى مجلس الوزراء ما عارف دى مالا دى سغيرة شديد دى بى تقرا من الورقة ما عارف دى غبشا غبشي شديدي والله حيرتونا انا قايل الا يجيكم الله ذاتو حتى يريحكم،، وألا شنو ؟ كلامى دا فيهو تورية بلاغية ،، يقول علماء الحديث ( فى التعاريض مندوحة عن الكذب)
| |
|
|
|
|
|
|
Re: سعادة وزير الخارجية أستاذة أسماء محمد عب� (Re: منصوري)
|
غبشة دى ذكرتنى نحن زمان موسم الدميري والتمر مارق ام راس وام نص ومعصود ومهرود مشرق وود لقاى بس التمر فوق البحر ناكل ونعوم ، ونلعب ( كاك) ونلعب (مزيرقي) ونلعب (حدريبة ) وننط ) (قرو) ونعمل )زلقونيات) فى حجيرة البحر ، بالله مع موية الدميري العكرا ديك لما نطلع البيوت بعد المغرب يطلس ؟ بالله الواحد يطلع وشيهو ينعل قفاهو من شدة الغبشي،، دى ياها الغبشي البي يقولوا عليها غبشى جد يعنى موش تقول لى هسه دى وزيرة غبشاء وما عارف شنو ؟ اماتنا ديل زمان لا يعرفن كريم ديانا ،، والا كريم معطر ،، والا كريم واقى ،،، دهن كركار يمسحوا بيهو شعرة الوشي من قدام وخلاص طبعا نحن نقول ليهو( دهن غسيب) او ( دهن مقلوب) دهن كركار دى عرفناها بعد مشينا نقرا فى البندر ،، دهن غسيب دا تكون كراعك مشقوقة من حفر البوغة او خفج طين البناء يملوا ليك الشق الفى كراعك دا دهن غسيب ويعمطوه ليك بى جمرة من فوق ،، بس الكمدة والرمدة هسه بعد اغتربنا بقينا نفتش فى الادوية كيف وما كيف،، وبرضو ما بتعالج زى دهن أماتنا ،،،، عشان كدا الناس حقوا تكون واقعية ما تضحك على الناس ساكت بدون فهم دى غبشاء دى تقرا من الورقة خلونا فى واقعنا احسن
| |
|
|
|
|
|
|
Re: سعادة وزير الخارجية أستاذة أسماء محمد عب� (Re: Ali Abdalla Hassan)
|
قلت لى كيف يا علي. . هههه زاغت..من السودان عربي والا افريقي؟ لا مافى زوغة .. دى ما زوغة .. دى سياسة دولة ودستور وقصص كتيرة .. عايزة برلمان ومجلس شعب وقراءة اولى وقرلءة تانية تلخص الموضوع .. بل ربما انتخابات تحديد هوية .. الشعب براهو يحدد هل هو عربي . هل هو افريقي .. هل هو افروعربي دى سياسة دولة المذيعة ذاتا عايزا ليها زول يوقفا عند حدها ويدخلا فى علبا ماكل مذيع سؤالو منزل.. حقو ينتهى عهد المذيعات الصغار البي يقاطعوا العلماء والمتخصصين واهل الشان فى اللقاءات التلفزيونية ..حقو يكون فى تخصص للمذيعات ذاتو .. حتى يناقشوا الساسة والمسؤولين.. موش معناتو انتى مذيعة تقاطعينى فى ذروة تسلسل افكاري.. وتسالينى اسئلة لا تقع فى اطار عملى .. وزارة الخارجية مالا ومال السودان عربي والا افريقي.. اسع انا لو سالتنى نجوى السؤال دا .. برد عليها بقول ليها.. السودان يقع فى قارة افريقيا..كما تقع مصر والجزائر مثلا .. واهل السودان 90%يتحدثون اللغة العربية .. انتى براكى حددى حا يكون شنو ؟ حتى كان صوتنا انتخابيا الفائز راح يكون شنو ؟ ومنو فص انتهى عهد صناعة لوى عنق الحقائق.. الشى البيرضاهو غالبية الشعب.. بالديمقراطية ..
| |
|
|
|
|
|
|
Re: سعادة وزير الخارجية أستاذة أسماء محمد عب� (Re: منصوري)
|
منصوري
سلام ، مهندس منصوري ، ياخي بعيدا عن موضوع البوست ، هل إنت نفس المهندس السوداني ، الكان يوما ما ، مسؤولا عن كل طواريء المياه ، في دائرة الماء والكهرباء ، سابقا . ابوظبي ، عاطر الاشوااااااااق ،
،،،،،
***
،،،،
عزالدين عباس الفحل ابوظبي
| |
|
|
|
|
|
|
Re: سعادة وزير الخارجية أستاذة أسماء محمد عب� (Re: منصوري)
|
الذى يشاهد لقاء السيدة الوزيرة كاملا كما قلت يعرف المقاطع التى اختصرت وبثت ،، وربما بعضها قبل البث المباشر ،، الذى يلاحظ اللقاء يرى ان السيدة الوزيرة كانت صارمة ومحددة جدا فى اللقاء ،رغم اسئلة المذيعة الشائكة ،، ولاتخلو من شىء فى نفس يعقوب،، السيدة الوزيرة أدت المذيعة 3 قرصات فى اللقاء ،، قائلة ما أنا إلا موظفة حكومة تعلن وتنشر رأى حكومتها ،،خاصة عندما طرحت المذيعة قضية اليمن والقواعد العسكرية ،، انا لو زى الوزيرة كنت اقول ليها أسألي وزير الدفاع ،، هذه الاسئلة يجب ان تقدميها لوزير الدفاع،، المذيعة لاتعرف اضابير وزارة الخارجية وماهى مهمة وزارة الخارجية وهى اخطاء من المذيعة فى اللقاء يجب ان يركز عليها الناس،، السيدة الوزيرة كانت حاسمة جدا فى اسئلة بطبيعتها فضفاضة وتمس سيادة وزارات اخرى ومحاور اخرى ،، فكانت اجابات السيدة الوزيرة محددة جدا وحاسمة جدا ،، رد معاه شوية نهره كمان للمشاهد الذكى
| |
|
|
|
|
|
|
Re: سعادة وزير الخارجية أستاذة أسماء محمد عب� (Re: منصوري)
|
منصوري
يا سلام . يا منصوري . فعلا المهندس صديق محمد الامين . كان انسان مهذب وخلوق. و كان مدير عام الطوارىء فى ابوظبي لانو مرة سافر اجازة السودان. فقام فارس ساري المزروعي . ختاني في منصبه حتي عودته . من الاجازة السنوية . رغم صغر سني آنذاك . كانت فترة شيقة وصعبة . تحياتي للمهندس صديق محمد الامين. الرجل العلامة فى الهندسة عاطر الاشواااااااق .
*** * المعذرة لقطع حبل الافكار . وااااااصل .
،،،،
Quote:
تعيش الفحل انت تقصد المهندس زميلي صديق محمد الامين ،، الرجل العلامة فى الهندسة ،،الذي كان سابقا مدير مياه مديرية الخرطوم ،، لا انا صديق منصوري اعمل كنت رئيس وردية فى محطات مياه ابوظبي كلها مريت عليها صديق محمد الامين كان مدير عام الطوارىء فى ابوظبي،، تعينا فى يوم واحد انا وصديق ،، وقبل ما يخصصوا لنا السكن سكنا سويا لمدة شهر فى استراحة هيئة كهرباء ومياه ابوظبي،، التى خصصها لنا المدير الذي يحب السودانيين فارس ساري المزروعى ،، الذي استقال من الدائرة لما حولت الى هيئة،، صديق محمد الامين يكبرنا عمرا كثيرا ،، آمل ان يكون على قيد الحياة وادعو له بطول العمر ،، هو ذهب للسودان بعد تقليص الاسطاف بعد ان حولت الى هيئة،، كنا اصدقاء ونتزاور بأسرنا ،، لم أره بعد ان غادر الى السودان،د هو رجل مهذب جدا ،،موسوعة جدا فى الهندسة ،، والدة كان عندو دكان فى سوق بحري،، وهم جعليين مع خطلة شايقية شوية ،، يسكنون رفاعة ،،ديم الشايقية ،، عندهم اراضى زراعية وجزيرة كبيرة على النيل زراعية بالقرب من حجر العسل،،جيهة شندى مثلك آمل ان اجد من يدلنى عليه،، لأنه رجل نادر فى هذا الزمان،، ،،،،، قول معاى الله يعدل طريق وزيرة خارجيتنا حتى لا نخرج عن موضوع البوست الاساسي استجبت لطلبك
منصوري ،،،،
|
عزالدين عباس الفحل ابوظبي
| |
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
|
|