من عجايب السودان: 👈 المتظاهرين والمحتجين مواعيدهم مظبوطه والرئيس مواعيده ضاربه ، لطع الناس قدام التلفزيونات قريب ساعتين . 📰 الى كتائب الظل وقوى الاسناد : 👈 حالة الطوارئ دي كيف معاكم ؟ ... . 📰 سؤال بريئ جدا: 👈 خطاب البارح دا لا فيه تهليل ولا فيه تكبير ولا فيه زول رافع اصبعه الكلام دا صاح والا عيوني كعبات ؟ . . 📰 أخبار اليوم: 👈 رئيس الجمهورية يعلن حالة الطوارئ لعام وحل الحكومة الاتحادية وحكومات الولايات . 📌 الطوارئ مابتفيدك والعملتو كان بايدك . 📰 أخبار اليوم: 👈 تكليف فضل وزيرا لرئاسة الجمهورية وممتاز للحكم الاتحادي وسعد لرئاسة مجلس الوزراء وابن عوف للدفاع والدرديري للخارجية وسالم للعدل . 📌 ماشية معاك بفكرة عميقه يا ممتاز . 📰 أخبار اليوم: 👈 مراسيم جمهورية بتكليف قيادات عسكرية وأمنية ولاة للولايات و«أخبار اليوم» تنشر الأسماء . 📌 الرئيس دا حريف عاوز الناس تركز في الهتافات على يسقط حكم العسكر بدل يسقط حكم الكوز . 📰 أخبار اليوم: 👈 الفريق أول قوش : البشير سيقود التغيير وسنتخذ إجراءات غير عادية لمكافحة الفساد والحفاظ علي العملة الوطنية . 📌 والشعب سيتظاهر وسيثور وسينتفض وسيحافظ على قوله تسقط بس .
📰 أخبار اليوم: 👈 د. فيصل: البشير سيظل رئيساً للمؤتمر الوطني ويدير الحوار مع القوى السياسية من منطلق قومي. 📌 ومن منطلق قومي الشعب يهتف تسقط بس . 📰 الوطن: 👈 اعلان الطوارئ لعام وحل حكومة الوفاق 📌 كل دا ما يمنعش انها تسقط بس . 📰 الوطن: 👈 البشير: سأقف على مسافة واحدة من جميع الأطراف 📌 شايفين وقوفك والمسافة من اطراف الوطن من الفشقه وحلايب وشيلاتين . 📰 الوطن: 👈 الرئيس: تدابير اقتصادية محكمة تنفذها حكومة كفاءات 📌 كفاءات كاروهات مشجرات كله ما يغني عن تسقط بس . 📰 الوطن: 👈 الصحة تلتزم بتنفيذ الخطط المشتركة لمنظمة الصحة 📌 مافي زول فاضي لكم هسع . 📰 الوطن: 👈 البشير يطلب تأجيل النظر في التعديلات الدستورية بالبرلمان 📌 بت الكلب يا الشعيرية . 📰 آخر لحظة: 👈 قوش: الرئيس سيتخلى عن رئاسة الوطني والطوارئ لحسم الفساد 📌 انتو قوش دا قاصد منو بالفساد دا ؟ . 📰 آخر لحظة: 👈 مدير الأمن: تشكيل حكومة محدودة من أصحاب الخبرات 📌 وفرصة لمن شفطوا (الخيرات) ليدبروا امورهم ويتخارجوا من البلد . 📰 آخر لحظة: 👈 علي الحاج: ما يجري في البلاد (انتفاضة شعبية) 📌 دي عرفتها في المانيا والا شرحها ليك الريس في العشاء الأخير . 📰 السوداني: 👈 اعلان حالة الطوارئ وإيقاف التعديلات الدستورية تكليف (6) وزراء و(18) والياً عسكرياً 📌 18 على 6 يساوي 3 (يسقط حكم العسكر) . 📰 السوداني: 👈 قوش: البشير لن يترشح مرة أخرى 📌 والله الرئيس دا ما مضمون ، واحد سأل صاحبه: الثعلب بي يلد والا بي يبيض قال له والله الثعلب دا ما مضمون ممكن الاتنين يعملهن . 📰 الصيحة: 👈 ردود فعل واسعة لخطاب الرئيس 📌 زاد النار حطب . 📰 الصيحة: 👈 قوش: الحكومة المرتقبة محدودة التشكيل وتنتهي في 2020م 📌 يا سعادتك دي انتهت قبل ما تبدأ . 📰 الإنتباهة: 👈 إعلان حالة الطوارئ 📌 واحد سأل صاحبه: حالة الطوارئ دي يعني شنو ؟ قال يعني زي لما ابوك يطلق أمك ويقعد معاكم في البيت . 📰 الإنتباهة: 👈 حل الحكومة .. ومشاورات لتكليف (حكومة مهام جديدة) 📌 الله يديكم ناس تكلفوهم ، زوجة المجضم مافي زول عاوزها . 📰 الإنتباهة: 👈 البشير: سأقف على مسافة واحدة من جميع القوى السياسية 📌 انت لو عاوز تبسطنا سيبك من المسافة وتعال اقيف في بري . 📰 المجهر: 👈 انقلاب سياسي: إعلان حالة الطوارئ بالبلاد وحل حكومة وحكومات الولايات 📌 دا موش انقلاب سياسي دا انقلاب مسوس . 📰 المجهر: 👈 الرئيس يعلن قوميته ووقوفه على مسافة واحدة من جميع الأحزاب 📌 توجد جائزة لمن يصدق . . 📌ابووضاح📌 .<
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdulhaleem Osman
فيس بوك
تويتر
انستقرام
يوتيوب
بنتيريست